Phuitong Liim

Sangmang J.H. Cope Kum Nih Zekai

2010-11-15T04:58:00.001-08:00

Hau Za Cin
Phuitong Liim

Pammaih mahmah hi. Kumnih hong zekai hi kei leh Zomi te hih sangin kum 20 in ki advance zaw ding hi.

John Herbert Cope, Sangmang Cope hiam Cope topa zong akici American Baptist Mission missionary pa pen 1908 in Tedim ah sem dinga hong kuan hi. Ahi zongin Haka hong tun ciangin Arthur E. Carson in leitung nusia in sihna tuak ahih manin kumnih Haka ah taam kik hi. Tua kumnih sungin a taamna khua te lai leh biakna limtak in puah ahih manin ama tavuan dinga a kipia Tedim ah tua kumnih sung nisim pilna leh thutheihna, biakna kibehlap ding pen Zomite in sum den a, ni 730 sung sum in, pilna leh thu theihna tampi zekai a, a pammaihna leh a manphatna sum tawh kilei zolo ding hi.

Cope pen kumnih hong zekai lo hi leh ama pilna leh makaih siamna in Tedim leh a kiim teng hong taanvaak pah dinga, nakpi tak in kikhangin, ki dok hanhan ding hi hang. Ahi zongin kumnih zekaia hong tun ciangin zong a nasep pen muh theih in khang a, ciamteh taak dingin muibun hi. A tuate hang mahmah in tua kumnih Zomite tawh hun a zat ding pen pammaih kasa semsem hi. Ahi zong in tua kumnih a zekai sungin a kithawi, a kisin, a training hi ding a, siamlo pi a mabung lo in a siamsa a Zogam hong tun tak ciang, a nasep pen banlaluang temhiam tawh at bangin pai huakhuak hi ding hi.

Pil i utna, siam i utna, theih i utna i pianpih lungsim pen Sangmang Cope in siamtakin hong zangsak a, a zangthei dingin hong pattah in, a zansiam dingin hong sinsak a, a siamneel dingin hong hahkat sak hi. Ama hong tun tuung in Zomite pen ka upmawh danin unpolish diamond dan in hong mu dingin ka um hi. A ki khaihsiang nailo suangmanpha bang hi ding hi hang. Halsiangin, sawpsiang leng a manphatna lian lua mahmah ding cih mu ahih manin tua i kisap lian mah hong hihsak in, hong pattah a, i theih lohna lungsim theihna tawh hong dimsak in, i phawkkhak loh thute hong muam in, i zak ngeiloh thu te hong zasak hi. Kham leh ngun bangin hong halsianga, zattheih leh manpha dingin hong sawpsiang hi. Tua bang i kisap ciantaka mukhol thei mipil leh mi siam, Pasian it mi hong kisawl pen Zomite adingin thupha a hi hi.

Lai hong bawlsak a, hong pattah in, hong sinsak a, laibu masa pen zong aman a bawldan hong lak in, Zolai isinna dingin zong Zomite taangin nakpi takin kumpi mai ah zong na pang hi cih i thei hi. Vantung gam thu bek hilo in leitung i nuntakna ding zong hong pattah hi bang mihoih leh migi, hong it leh hong khual mikaang tampi omlo ding hi. Aman zong Zomite hong it ngaungau man a hong kuan hi lo mai thei hi. Ahi zongin a haang khat om hi dinga, tua pen amah a piangsak pa a it luat man hi ding hi. Hong paina dingin Zomite in khitui takkhat luang in zong thungen lo dinga, zong luang lo ding hi. Kamsiam kamkhat tawh zong zawnlo ding hi. Zol lo ding hi. Ahi zongin koi lai hiam khata khukdin a thungen te, neih sunsun Pasian gama dinga a piate nasepna hangin hihte khempeuh hong piang hi ding hi.

Lamdang i ci diam? Thupha i ci diam? Pasian hong sawl i ci diam?

Ama hongpaima in midang in hong pai a sawma om hiam cih ki theilo hi. Hong pai in hong tunglo in kileh kik cih zong ki thei lo hi. Lungkia in kik kik cih zong kiza lo hi.

Sangmang Cope Topa hong tunni in nupi te in a tuibuk lim pen beek tawh ana dawn tam maw? Thaulawng ging pen lawn in i na dawn tam maw? I sialtal lian pen go in i na dawn kha hiam? Ahih kei leh uipi vaitung mah bangsak in kisuanglah takin i omsak zaw hiam? Mikhual hoih bangin i na daawn hiam? Ahih kei leh mikhual nautaang bangin i na dawn zaw hiam? A tunna te in akpi tuilai beek ana ngawh tammaw? maiteh tui awm peuh tawh ana zintun zaw hiam?

Tua te khempeuh kisam masa pen kei. Aman zong lamen ken teh. Tuate thuak ngamsa in hong pai ding hi. A kisap leh zong a lutang kham ngam in hong tung hi ding hi. I guaktang phial a i omlai hong muh ciang hong kih tam, hong hehpih tam, hong zahpih zaw tam?

Thu tampi hong ngaisun sak hi. Bangbang hileh kumnih zekai Cope pen a hun maan a hongtung missionary pawlkhat sangin nalian semzaw hi. Pasian in mi a zatnopte pen a hun in sailo hi ding hi. A hatna , a pilna in sailo hi ding hi. Bangbang ahi zongin Sangmang Cope pen Zomite adingin 'sangmang' takpi hi a, minam lakah a min khum dingin hazat huai lo hi. Amah sanga Zomi a itzaw kuamah om tuan lo ding hi. Tuamanin gamdang ah a pianga, a vun a kang hang in Zomi ahih lohna om tuan lo hi. Zomi lungsim pua a hih manin.//

Zomi ah kigawm mai diam

2010-10-08T19:10:00.001-07:00

Zomi ah kigawm pak leng a hoihpen diam. Kam phen kullo, ngeina kibang, zia leh tong kibang, tenna khanna kibang. Tua khit ciang i minam min ding, i gam min ding, i Lai Siangtho min ding, etc. etc. ah "Zomi" cih vive zangta le'ng i hek a noptuamzaw deuh tam. Am I dreaming?

Hau Za Cin
Phuitong Liim

Thu ngaihsun mahmah mi i kisam hi

2010-09-28T07:55:00.001-07:00

Tulai globalization leitung mawk pen individualism a kithupisim hun ahi hi. Privacy a kilim deih mahmah hun ahi hi. Freedom a ki deih mahmah hun hi a, good life a ki emphasize mahmah hun ahi hi. Tua ahih manin mimal khat pen bangci nuntak ding, bangci gamtat ding, bangci kikhual ding cih pen kikuppiih, kisaipih cih khawng a ki ut hinawnlo a, eima thuthu ciat in kigamtaang leh a ki ut hun 'hun thak' ahi hi. Change has come.

Tua ahih manin thu ngaihsun mahmah mi i kisam hi.

Minam sungah, pawlpi sungah, innkuan sungah, khua sungah, gam sung ah, etc. Tua bang thungaihsut mahmah hun ah khangthakte thu ngaihsun nuamlo tata hizaw lai uh hi. Nidang sangin nuntakna nopzaw ta ahih manin nu leh pa pan a deih uh ngah, a kisap uh nei ahih manin amau ngaihsut tawm taktak ding om nawnlo a, a baihsa vive hih ding hilel hi. Tua bang hun ah a tamzaw in amau nopsakna bek zonga, a kim a kiang khual nawnlo uh hi. Tua bang ahih manin ngimna nei nawnlo uh a, tupna zong nei nawnlo uh hi. Lunggulh nei napi uh mi tampi ading phatuam lunggulhna hi nawnlo hi. Amau mimal angsung deihna a huapzo ciang bek hita a, self seeking vive hita uh hi. Tua bang hun ah leitung in thu ngaihsun mahmah mi kisam deuhdeuh hi.

Generation X te hun pan kipan khangthak sungah gim pipi a sep kankan utna, haksa taleh hih teitei utna kiam in a lian a kho a kip cihte pen a gam khangtolo leh a haksa lai gamte bek in hih ngap uh hipianpian hi. Tua zawh tu hun Gen Next hun ah bel gam khempeuh phial a level hong kikim toto a, tua gamte ah nopbawlna nuntak hong uang in, gimlo a neihnopna lungsim hong lian hi. Muanhuaina tawh akingahlo van leh na khat peuhpeuh pen a manphatna neu mahmah hi cih leitung piancil a kipan a kitheisa hi. Tua manin a manphatna a theihpihlo mi a tam deuhdeuh ciangin inn sungah thuhoih sangin thusia tam tun zaw a, mite ading phatuam sangin mite ading vangik kiguanzaw hi.

China gam ah khangno a tamzaw in computer games addict uh a, Korea ah bang bel naak addict lua mahmah uh ahih manin English Premier League football sangin games club kidemna ah sum a kitah uh tamzaw hi kici hi. Mihaute in tua games kimawl siamte footballer te bang mahin lei in sum tawh cial uh a, khasum neisak in a siamna uh tawh kituak khasum pia ziahziah uh hi. Tua sanga masa zaw nidangin Aklui kitu sak cih khawng na om ngei hi. Tua banga mite in a manpha kikeuhlo ding nopbawlna, nopsakna a limzat luat uh ciang a khuak hoih mahmah uh pen leitung phattuamna dingin zanglo in games kimawlna ding khawng bek in mawkbei sak uh hi. Mi tawmcik khat hauhna ding leh mi tawmcik khat nopsakna dingin zang uh hi. Tua lungsim hoih leh hatte mihing khantohna dingin kizang leh bangzahta a manpha ding hiam kici hi. Tua bang te thu ngaihsun mite lungkham hita hi.

India gam ah politics a lunglut tawm deuhdeuh a, IT lam ah a lungsim a pia tam deuhdeuh hi. Hih bangin a pai toh zel leh a gamsung ki ukna leh democracy pen mite in phawklo deuhdeuh ding uh a, a sawtna ciang a ut khat peuh in a ut ut in hei gawpgawp thei ding hi. Tua bang mah in leitung gam tuamtuam ah technology khanna hang leh mihingte theihna khanna hangin mite awareness khang hanhan a, mite deihna zong kikheng hiaihiai hi. Mite mi adingin lunglutna sangin nate tungah lunglutna lian semsem a, van tam neih ding, materialsm khang semsem hi. Ganno leh nate tawh kilungkimsak in mihing dangte tawh kithuah ding kidam hiaihiai uh a, amau nopsakna bek a zongta uh hi. Tua manin leitung in leitung adingin a ngaihsun mi kisam deuhdeuh hi. Angsung theihna leh neih leh lam tawh kidemna a sang deuhdeuh ciangin mite in leitung na ngawn sia cip leh phamawh asa lo om hiaihiai hi. Ama nopsakna ding ahih nak leh leitung nangawn siacip henla, atom bomb nangawn kizang leh phamawh a salo khang hiaihiai hi. Tuate a hung ding, a khaam ding, a dal ding mi kisam deuhdeuh a, ahi zong a lunglut tawm deuhdeuh hi. A sawtna ciang leitung na ngawn kisehsat thei leh kilawm hi. Ka gam hi ciang, ka leitang hih ciang, ka innmun hih ciang, ka lo hih ciang, ka huan hih ciang... cih bangin eima neihsa gam ki claim dinga, ka pawlpi hih ciang, ka khua ka tuite hiciang cih bangin kituambawlna hong lian semsem ding hi. Ka thunuai ah om teng hi teng, ka nuai ah hong kun hih teng cih bangin hong kigi khun semsem ding hi.

Tua banga mite a tai ngengngang laitak in ei zong mite lak ah mi pha dinga i om leh i dianglut dinga, a ban pen tangthu hita ding hi. Kihelzau gawpgawpta ihih manin eima ut bang tek i sem dinga, eima ut lam tek nekzonna i nei dinga, eima deih zi leh pasal i nei dinga, eima utna tek biakna i zui dinga, eima hoihsakna tek ah i teng ding hi. Ka u ka nau cih kikhualna hong kiam dinga, ka mi kasa cih hong dau ding hi. Sungh leh pu cihte hong bei dinga, mo leh mak cihte hong thupi nawnlo hiaihiai ding hi. Na khempeuh neih leh lam, kei utna, kei deihna, keima lunglut cihte in hong zo zawding hi. Tua bang taktak i tunna ding pen gam khangto leh minam khangto lak ah a teeng mi khatpeuh adingin hamsalo ding hi. Ahi zongin a khangto nailo, a traditional mahmah laite adingin hun themkhat kivei lai ding hi.

Nang leh kei zong leitung mi ihih manin i khuamuhna leh i tenna gam tawh kituak in mite i phak leh phakloh ding hong kidang hiaihiai ding hi. A khangto minam lak ah mite a ten ciangin a khangto nailo mite pen hehpih ding hi napi a hehpih manlo, a hehpih utlo leh a phawk kha nawnlo zong khang hiaihiai a, a sawtna ciang khualak lamgei lasak mah bangin, "A om lai teng kuama deihloh teng," cih mah hong suak kik veve hi. Khuata ah a tengtengte, a zawng mahmahte, a hau ngeilote, a khangto zolo te pen "a hehpih huai" cih tawh a kipaisansan lel hita hi. Leitung kipawlna leh cimawh huh pawlte in a phawk khak zel uh hangin amau deihsak ciang teng cihloh midang kiang tua huhna leh panpihna te in a baanzo hi tuanlo ahih manin a phawkloh mah uh tawh akibang ahi hi.

Tua hi a, leitung a khantoh nading leh a nopzawk semsem nadingin thu ngaihsun taktak mi kisam semsem hi. Haggai Leadership Training ka kah lai un hong sinsak uh: "Makai lawhcing i cih ciangin ama zalaih ding mi tampi a sekkhia ziahziah mi hi" a cih bangin leitung khantohna ding a sem taktak hi hang, minam hi hang i cih nopleh thu ngaihsun mahmah mi tampi i sekkhiat ding ahi hi. Ei pawl in i vekpi in thu ngaihsun mahmah hi leng zong mihing million khat zong kipha nailo ding ahih cianga, i vekpi in Christian i suak ding a deih huai mah bangin thu ngaihsun mahmah mi vive i suak khit ding deih huai.

Hau Za Cin
Phuitong Liim

Mizo ah i kigawm diam

2010-09-27T07:46:00.000-07:00

Mailam ah i kigawm mai na um hiam?

The last option bel hi kei, the only option zong hi tuan kei; ahi zongin Mizo ah i kigawm ding na um hiam? Kigawm pak leng a hoihpen ahi diam. I tenna gam ciat ah midang kisuak kawikawi hita a --- Kawlgam ah tengte kawlmi suak, mikanggam ah tengte mikangmi suak, lusei gamah tengte luseimi suak, nau min zong lusei min mah phuak maita, e.g. Sangi... eimi min te zong lusei min tawh a laih kiukiu omta.... Khup pan Khum ah kilaihta, Man pan Muan ah kilaih ta... mundang ah zong English min khawng kiphuak ziauziauta... tua dan leitung ah kiteng ta...

Tua khempeuh lak pan i ngeina kibatpih leh naihpen, i zia i tong a kibang pen; tua ah i kigawm pak pen ei adingin a hoihzaw leh a baihpen ahi mai tam maw. Mailam saupi ading a hoihpen ahi mai diam... apart from our adopted country. Nopni dahni ah i kihuaidan a kibang pen zong hi mai ding hi. Mundang --- nitumna gam ah, nisuahna gam ah, leilu ah, leitaw ah i belh leh manawh gamte ah individualism hat mahmah dinga; i ngeina, i biakna, u leh nau kizop dan te leh, i duh i deih zong kibanglualo kha ding hi.

Hau Za Cin
Phuitong Liim

The Five P's in Joseph's Life

2010-09-06T17:47:00.000-07:00

Rev. Dr. J.M. Ngul Khan Pau

September 5, 2010

Zomi u leh nau

Tuzing sia Tual Mang leh a pa Dam Cin Thang amau mawtaw tawh Denver panin ko omna Colorado Springs ah hong paito vingvengin hong la uh a, amau omna Aurora veng nai khat leh minute sawm in ka tung uh hi. Zomi Community Church in Pawlpi mite buhsih leh aksa, voksa tawh hong vak phitphet uh hi. Denver Zomite inn nga khawng a phak bek hangun a kineu et tuan lo, Pasian tawh a tamzaw ka hi uh hi, cih lungsim pua uh hi. Sia Tual Mang gen dan hi leh "Ko Denver Zomite ka tawm hangun zasan a malneu (ko Pangzawl khua ah Luan Nem kawlsiing ka cih uh) a thak mahmah tawh ka kibang uh hi," ci hi. Amau cih mah bangin la siam, music siam, kikholhsiam, Pasian zahtak, leh ki-it kingai mahmah ahih lam uh ka mu uh hi.

Sia Tual Mang pen Denver post office-ah sem a, a dang papiteng bawngsa semna company ah sem uh hi. Denver papite'n a zite uh nasemsak lo innah naute kemsak amau thatang tawh a zi leh tate vak uh hi. Zite in nasem leh sum leh pai nuam tuam ahih lam i theih ciat sa uh hi. Tua ciang zite mahmah in zong nasep a neih uh ciangun "lungkimna" (fulfillment) nei kisa uh hi. Ahi zongin zite amau nasep tawh hong manlah luat ciangin innsungin thuak lawh gige hi. Nupa nangawn kiho man loin i om ciangin leitung nuntakna a hici mah ding hiam i ci thei uh hi.

Ka thugen ding John 8:1-11 sung gen dingin biakna innsungah lut in thungetna ka neih leh "Joseph" tangthu genzaw in cihna ka theih manin Joseph tangthu panin The Five P's in Joseph's Life ka gen hi.

1. Problem: Sibling rivalry: Hong khan khiatna innsungah a ute 10 in Joseph mudah mahmah uh hi. Pianna ding mun ama teel hi lo hi. Ahi zongin tua innsungah bang ci nuntakna ding cih Joseph in teel thei hi. Nang zong zong pian khiatna nang teel theih hi lo hi. Ahi zongin bang ci nungta ding cih na teel thei hi.

2. Pit: A ute in "lei-kuak, tui om nawn lohna leikhuk " sungah khia uh hi. Tua sungah a om lai in Joseph in bang a ngaihsun tam? Nang zong bang leikuak sungah na om hiam? Tua sungah na om sungin lungkia mahmah in na om kha ding hi. Ahi zongin Topa in nang adingin mailam hong bawlsakna leikuak na hi gige thei hi.

3. Potiphar: Bang hangin Potiphar innah Pasian in tun hiam? "Topa Joseph tawh om khawm" cih i Lai Siangtho sungah i mu hi. Koi mun koi laiah na om zongin Topa in hong ompih lohna mun om lo hi. Joseph in Potiphar zi khemna Pasian min tawh na do hi. Pumpi ukna panin na taikhia hi. Pasian ompihna tang i cihte Pasian zahtakte hi.

4. Prison: Thong sungah "Topa Joseph tawh om khawm" cih i mu hi. Ama ginatloh man hi loin a hoih gamtat manin thong sung tung hi. Na pha na bawl manin kamsiatna na ngah khak hun om ding hi. Midangte'n amau ut bangbang gamta uh a, siatna tuak lo tawh kibang hi. Ahi zongin Pasian in Joseph mangngilh lo hi.

5. Palace: Kumpi innah Joseph hong tut ciangin kithupisak, hopih theih loh, cih bang nei lo hi. Ama za liatna mite nuntakna dingin zang hi. Thong sung panin Kumpi inn dong tungsak Pasian ahih lam mangngilh lo hi. Tuni in Zomite zong tagah inn panin Kumpi innsung hong tun Pasian ahih lam i mangngilh loh ding thupi hi.

Denver Zomi Community Church Makaite:

Pastor: Pastor Tual Kho Mang
Chairman: Neng Muan Tuang
Vice Chairman: Mang Za Lian
Secretary: Nang Kho Vung

Pa Thawng Lam Thangte pata in amau mawtaw tawh hong kha kik uh a, Topa in hunpha hong piak leh kikhawl kik ni cih tawh ka kikhen uh hi. Denver ZCC Pawlpi in biakinn mun ding thungetna tawh zong uh hi, hong lawhcinna dingun thungetna tawh phawk ni. //

Jesu, I Lawm!

2010-08-20T20:48:00.000-07:00

Hithei mawk ding hiam aw? I Pasian pen i lawm hithei mawk ding hiam? Pasian leh mihing kilawmta cih bang hithei takpi ding maw? "I mawhna leh i dahna teng, a pua ding Jesu i lawm" (What a friend we have in Jesus) cih la phuakpa in a ngaihsun khial hi diam? Up ngam huai vetvetlo hi. Lamdang lua hi. Hithei dingin kilawmlo hi. Mihing ngaihsutna in banlo hi. Nak ngaihsut deuhdeuh leng uphuai lo deuhdeuh tawh kibang hi. Ahi zongin ngaihsut ding hilo a, 'up' ding hiziau hi. Mihing leng Pasian kilamdanna tua hi. Mihing ngaihsutzia leh Pasian ngaihsutzia kibanglo hi. Mihing leh Pasian a kilamdanna tua hi. Mihing khuak in a ngaihsut Pasian in a ngaihsutsak teng hizaw hi. Abawlpa sang a bawlpa ngaihsutna a toi zawk mah ding hi. Vantung sang leitung niamzaw pekpek hi. I tenna mahmah zong kikimlo hi.

Hih la phuakpa in, "Pasian kiangah i kisap khempeuh kithum thei, kingen thei hi," ci hi. Tua zaha ei leltak kisap hong theihpih nuam, hong bildawhsak nuam Pasian i neih pen nak hamphathuai zen si. Mihing kisap neilo omlo ding hi. Mihing khempeuh in a kisap khempeuh ngen in thum in tau tale uh Pasian in a vekpi in za in, a vekpi in thei, ciamteh, dawng, piakik, ngahsak cih peuhmah pen a lamdang, a lian, a thupi hi. Tua zaha hoih leh migi a dik Pasian nei ihih manin nak hamphathuai zen si. Leitungah i kisap bek hilo, vantung dongah i kisapte zong Pasian kiangah kingen thei hi ci zen hi. Nak lamdang ei. Mihing te zong i kisap kingen thei hi hang, ahi zong kipiak ding nei khin khollo hi hang. Pasian in bel 'nong ngetloh man uh hi, hong ngen le uh cin na ngah ding uh hi' ci miau mawk hi. Tua zaha hoih Pasian pen biaktak, belhtak hilo hiam.

A dawng 2na ah, "Ze etna, bawlsiatna na thuak zongin Topa kiangah ko lel in," ci hi. Tuate khempeuh a thei Topa hi. Mawhna bawl dingin Satan in hong khem thei hi, Topa kiangah puak lel in; khial dingin hong khem ding hi, Topa ap lel in, Ama'n hong sem ding hi. Mite bawlsiatna na thuak ding hi, Topa kiangah pulak lel in Ama'n thei lel hi. Topa theihloh a piang hih leitungah khatzong omlo hi. Na lungkhamna, na lungnatna, na thuakna, na gimnate Ama hong theihpihloh khatzong omlo hi. Amah, a bawlpha theipa tungah ap lel in, nang lungkhampih ken, nang buaipih ken, Topa'n theilua hi. Amah in lawmhoih bangin hong ompih dinga, hong nusialo in, hong taisan lo dinga, na kisap ciangin hong hu ding hi. Apa inn a buahbang ding a deihlopa, Apa inn hutna dingin a hehngampa Jesu in "Immanuel" ahi hi. Eite tawh omkhawm hi. Amah a bel mite a taisan ngeilopa hi. Lungkhamlo, lungkialo, dahlo in Ama kiangah ko in. Amah in hong ompih ding hi. Topa pen tanglai pek pan minam khempeuh kibukna hi a, mailam ah zong minam khempeuh bitna ding kulhpi ahi hi. Huihpi guahpi in hong nawk taleh Topa in hong kem peuhleh kibit ding hi. Kangmei patau om mah leh hong honkhia ding Topa hi.

Dawng 3na ah, mite simmawhna hanga zawngkhalna, gimna na thuak ciangin Topa bel in, amah in lungnopna hong pia ding hi ci hi. Topa pen mi lungkhamte kiangah a omden, a hehnempa ahi hi. Sigal ciang a hehnem ei mihing i kisak leh Topa na hizaw hi. Topa in ei hong zangin mite hehnepna hong piasak hi. A taktak in ei a vanzat hi a, a hehnem taktak Topa hizaw hi. Van i lei ciangin sum pen i vanleina vanzat hi pak lel a, a vanlei taktak ei ihi zaw hi. Simmawhna, bawlsiatna cih pen a thuakte adingin na mahmah hi, zakdah huai mahmah hi. Thuhkik ding ut huai vanvan hi. Ahi zongin Topa in 'ken thei ing' ci lel hi. Thuhkikna pen keima aa hi, ci hi. Leitung pianma pek pan a kamciampa in a kamciam peello ding hi. Gimna na bawl bangbangin Topa in nang tungah hong loh kik ding hi. Hemgen cih omlo hi, sianggen mahmah lel hi. Tua ahih manin mite na simmawh kei un, na bawlsia kei un ci hi. Vantung pan hong ensuk Pasian in mu kilkel lel hi. Thuman thudik a deihpa in thumanlo, zuau leh mi simmawhnate lungdam hetlo ding hi.

Topa in Ama angsungah hong pom dinga, na lungkhamna, na dahna, na gimna khempeuh hong lak khiatsak ding hi. He knows how you feel!

I mawhna leh I dahna teng, apua ding Zeisu I lawm

1. I mawhna leh I dahna teng, apua ding Zeisu I lawm,
Pasian kiangah I sapna teng,
Thum theih na’ng thupha aom,
Lungnopna dingpi I thuak hi,
Na khempeuhte Pasian kiangah
Thumin I kohloh hang hi.

2. Ze-et bawlsiat ahizongin,
Lungkhamna khatpeuh om maw,
Cikmahciang lungkia ngeilo-in,
Topa kiangah ko in aw,
Dahteng thuakpih nuam Zeisu bang,
Lawm maandang muzo ding maw,
Zeisu’n thei khin I sap bangbang,
Ama kiangah ko in aw.

3. Lungkhamna vangik banglel in,
Zawngkhal in na thanem maw,
Manpha Honpa I belh hi-in
Ama kiang thungen in aw,
Mi’n hong simmawh hong huat ciangin,
Zeisu kiang I pai dinghi,
A angsung hongpom hongdal in,
Lungnopna hong pia dinghi.

Lungdamna: Lamal pen Zomi Christian Fellowship, Malaysia website pan hi.

Hau Za Cin
Phuitong Liim

He Knows How You Feel
Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.

He is able to run to the cry of those who are being tempted and tested and tried.
Hebrews 2:18 (AMP)

Whatever you are facing, He knows how you feel.

A Khangtote Gamtat Dan

2010-08-19T23:10:00.001-07:00

French mipi in etiquette thupisak mahmah uh a, English te in manner thupi sim mahmah uh hi.

A theipen, a siampen, a zangpen, a ciingpen cihna hilo in mite gamtat luhek zia i muh ciang i etteh ding zong om hiveh aw i cih hun om a, tuate phawk kikkik na dingin kong zawng singmat suk gawp ding hi. Kei theihna ciangah kei khanna kim leh pam pen leitungah a khangto pente mun leh tenna hilo cih ka tel hi. Tua manin khuapizaw ka zin ciang ka kisin ding ka mu thuah zel hi. Minam dang ka tuak khak ciang ka etteh ding na omzel a, ka kisin zel hi. "Eh, tua bang hizaw maw" cih hun tam hi. Khua leh tui peel a gamvak khiat pen meetna tampi om a, eima khua ah nuamtak sa a i om hunte i phawk vangvang hun zong om hi. I khualzinna leitung kici hiven, tuakkhak thu themthem kikum leng hilo dia.

Tuipi gal kan a civilization huih dik masa, kalsang suan masa minam lakah i bual khak sunsun ciang seem... i kisin ding diil keei hi. A lamsau i theihpak loh Auto-Teller Machine cihna a hileltak ATM khawng pan sum hong pusuak deldel ciang lungsim hong tawldamsak mahmah napi i ngaihsutna zong hong vaksak gawpgawp sa mawk ing. Amau vanzat sang a nuntakzia, a gamtat zia uh hi lungsim hong sausak!

Khualam leh gamlam: Amau leh ei pen i kipatkhiatna aki batloh mah bangin i zia i tong zong kibanglo a, ei sang khangto masazaw te tawh i kigenteh nuam pak hi. Nam tampi om thei inteh.

1. Lamgei ah zun thak pen khualam ah phamawh hetlo napi gamlam ah kizang thei hetlo hi. Zang ngei ung cih zong kigen nuam phalo hi. Amau a thakna ding mun kibawl ah thak ding hi cih ngaihsun uh a, tua bang tawh na khangkhia uh ahih manin a tuabanglo pen lamdang sa uh hi. Tua pen a kilawmzaw na hi takpi hi. Utna peuh ah lamphung lam ngat pahpah pen uital zunthak lua deuh a, khua lam ah zong tua bang zang thei leng 'A Khangtote Gamtat Dan' a zui kihi dinga, ei zong a khangto hi ding hi hang. Zunbuk ah khutsilna ding tuikai om pahpah a, tua ah sillo a pusuah pen 'mawhna' ahih loh hang mawhna zaha khialhna in ngaihsun uh hi.

2. Awnghawh ciang en nidangin ciangkang kizanga, tuhun ciang tui kizangta hi. Tuipi gal gamte ah ciangkang zanglo, tui zong zanglo, laineel (tissue paper) zang uh hi. Tui zah in a siang taktak diam, themcik a banglai kha diam cih hong ngaihsun sak hi. Mikang nungak, sen nungak ngo deldal siang kilhkelh a kimu, a mai a vun khawng uh no sitset te zong laineel mah a zat uh leh, guai, themkhat a bang kha laitam cih khawng e... ha ha ha...

3. Annek ciang khualam ah bel khut mah tawh kibak ziahziah lel in, ciamnuih siamte bangin 'pianpih sikkeuka' ci ziau lel in nop mahmah lel hi, khut dim in ann bak leng gil zong dim hanhan. Ahi zongin gamlam ah mite in khut tawh ann na ne nawnlo, sikkeu, sikkeuka, temta, ciangkang cih khawng tawh na hih setset mawk uh in, ei a zat ding hong nuampha mello hi. Voksa ngial bang bel khut mah tawh deihtak hum dingin tua ciang ne leng limdiak se hi. Amau gam lamah tuate zat theihloh mawk in 'gilvah' hi pong in, 'lim mahmah' cihna ding a limna teng kikantan kha hi. Ahi zongin 'ki khua ah zin ki nek ne' cih phawkloh lah phamawh mawk hi.

4. Lengla do ciang amau gamah kitutpih, kihoho, ciamnuinui cih khawng om mello in, khua lam ah bel sun thapai zong hun kinei lel ahih cianga kigualnuam mahmah lel hi. Ei zong mi kiangah vak nuam hileng ut banga kivak theilo, mi zong ei kiangah hong vak pahpah ding uh kideih khollo, eimah beka hun zat nop hun cih khawng kithupisak ta himawk in, 'zin leh leng' pen hilhkholh, theihsak masak ahih kei leh kideih masa khollo hi. Khua lam banga annek lai tuak leh ;hong nekpih vuau; cih ding hipahpahlo ahih cianga kimawkvak mello hi. Cimvak, cimphawng cih bang kitamzat thei khollo hi. Tua bang ahih leh mi kiangah hilo in sumbuk khawng, niangtui zuakna khawng, tui bualna mun khawngah hun zat ding na hizaw mawk hi.

5. Kizep dan zong khualam ah bel a taw kiphopsa zong kizangzang lel in, a liah ding teng a kidawk kei nak leh, gam lam ah bel tua bang kizang theilo hilo napi kizang utlo himawk hi. Amau gam ah amau tua bang a zatloh uh na sawtta a, ciamnuih bawlna, leh a tuam vilvel a zat utna ahih kei leh ngeina in na zang nawn mello uh hi. Puansilh ding zong a mel kituak ding na khinkhai mahmah citciat uh a, a kituaklo silh ding ut mello uh hi. Tua pen a min phuak siamse uh a Fashion ci se uh hi. Khua lam ah bel a san i neih leh asan silh, a kang i neih leh a kang silh, a vom i neih leh a vom silh hi mai a, ol mahmah hi. Bang hang i nuntakna hamsa sak ding i hiam? A kilawm, a kituak, a siangtho, a limci ding zonna, lunggulhna, deihna leh hanciamna hang hi.

Tampi om hi. Gen khin zo pak kei ni. Tua bang hun ciang bangcih ding?

Etiquette leh Manners: Etiquette in 'bang puan silh ding' cih hong hilh a, manners in a silhlo na lawmte kiangah 'bangcih ding' cih hong hilh hi. Mopawi ah pyjamas silh in kihel lecin hong kilawm hetlo ding hi. Suit and tie hileh bel hong kilawm pah setsat hi. Kikhopna ah nasep puan tawh kuan biambuam lecin a kilawmloh mah bangin nasepna ah biakinn puan tawh kuan lecin kilawm tuanlo hi. A dan om cihna hi. A mun leh a hun om cihna hi.

Sen te zatdan ah annekkhop ciang a kham nunung penin ankuang a zuut ding ciang midang kiangah 'nang gai in' ciin pia masa ding hi kici hi. Midang pia masalo a amah bek in gaihsuak pah pen 'uisan' vai ci uh hi. Kawlte ngeina ah annek ding ciang kianga te suah masak ding pen ngeina hi. Tua zuilo a an bak pah pen 'uisan' vai hileuleu hi. America te dan ah zinpa in ann a kilui teng a gaih teitei ding hi. Ahang - ann kilui, ann kipia pen lim mahmah hi cih lahna ding hi. Tua te pen etiquette hi a, 'ngeina' ahih kei leh zuih teitei ding, zat teitei ding ahi hi. Inn lamah zong tua bang om mah veh aw, bang teng ahia? Ankuang ah upa pen in an a bak mateng kuamah in bakloh ding, ute tutphah pia ding, etc. Etiquette tampi khualam ah zong om hi.

Tua leh manner eleh?

Zuih teitei ding, ngeina, zatdan, code of conduct hilo in, ngaihsuttawm thusiamna tawh a kilawma gamtat ding ahi hi. Mikhat in na hong pia, 'lungdam' cih pen gen teitei ding cih omlo hi, ahi zongin cihloh pen thusiamloh vai, ngaihsun theihloh vai ahih manin 'manner neilo' cihna hi. Mawtaw sungah putek khat ding in nang tu kenkan cih kilawm lo a, na tutna awn lecin tua pen 'manner' hi. Thusiam taka nungta cihna hi. Nek ding hong kilui pen lim in lim kei taleh 'lim sa ing' na cih pen a luite lungdamna hi a, lim nasa kei phial zongin thusiamna hi in 'manner' ahi hi.

Etiquette leh Manner zangsiam peuh leng khualam hi hen aw, gamlam hi hen aw, koi lai koi gam ah kihtak ding, nopmawh sak ding omlo hi. I theihloh a om leh theihsawm ding, i sinloh a om leh kisin ding hibek a, i theihsa i sinsa pen zatzat ding hilel hi. Tuate in mite mai leh eima nuntakna ah lungdamna, lungnopna hong pia hi. Sin nuam, theihsawmlo a 'ko cih dan hi kei' cih lungsim a om leh bel koi mun koi gam peuh ah maizum kituak thei a, maizum i theih kei leh zong mite in hong nuihsan thei ding hi. Theihloh pen haina hipahlo a, theih theihloh, zuihtheihloh, kisinnoploh cihte pen haina namkhat hithei hi. A haite pahtawina omlo a, a pilte kipakta in ki etteh hi.

Hau Za Cin
Phuitong Liim

Khateh

2010-08-19T21:34:00.003-07:00

Kiasak kei leng omlo hi. Kiasak leng bek om hi. Annek ciang kamsung tunglo lei ah a kia teng genna hi. Omkei leh kideih a, om leh lah hoih hi. Nei kei leng ki ut a, hau leng lah kidah hi. A neite ki eng mahmah tuanlo a, a neilo te zong a neihloh uh phamawh a sakloh pawl uh ahi hi. Nu leh pa te in neihloh ding hong sinsak uh a, kihanciam tek hi. Nei eu au leng hong pakta khollo uh a, nei kei leng lah nekkham ciang hong phat tuanlo uh hi. Khateh haute pahtawina kipia cih kiza ngeilo a, a neilo te zong kipahtawi cih kiza tuanlo hi. Hau le hang annek ding tampi leilak ah a kiasak, a sum suak i hih manin i tuacih loh ding kisinsak hizaw hi. Ann zek ding, ann nem ding a kisinsak ihi hi.

Khateh hau leng nu leh pa sang tutphah nuai a ui leh zawhngeute lungdam zaw hi. Nei kei leng i nuai pan hong to etet uh a, hong kisungsiasak phial cih bangin i omnuamlo sak uh hi. Hong kisuanglahsak mahmah thei uh a, kisuanlah ding bel hi tuan peuhmah kei leh kilawm hi. Cik ciang hong kiasak tam aw, cik ciang saguh bawk leh sa them hong kia tam aw ciin na ngak teta uh a, tua lametna i mangthangsak leh hong huat bawl pah tuanlo napi hong zuallo deuh hi. Khateh neng kia om lo hileh gentehna dingin zong kizanglo kha ding hi. Ui leh zawhngeute zong a thau ding zah in thaulo ding uh a, a khan ding zah in khanglo thei ding hi.

Neihval ahih loh hangin nek leh dawn kipiakzia namkhat suak a, a kiatsuahpa adingin kiallawhna hilo a, a ngahpa adingin lah nuntak lawhna hi kik bilbel hi. Tua khateh om kei leh a nuaia pen in gil kial thuak dinga, a tunga penin theihpih khollo ding hi. A hi ding bang taka a kipiak tuah uh ciangin a hoih hi a, a kipiak tuahloh uh ciangin khat supna hi a, tua khat supna hangin a dang khat in meetpih hituanlo hi. A lamdang lemgelna hi.

Tuipi sungah whale ngapi in a kam gei ah a bang anneng te hangin ngasa neuzaw tampi nuntak lawh a, tua pen khateh ne mah hi veve hi. Bawngpi kam gei ah nahteh neng a bangte hangin bacteria tampi in nuntakpih a, tuate hangin bawngpi in a valhkhak ann tawh a gilpi sungah a annekte kigawizan in muat a, tua tawh tha ngah in nuntaklawh a, a kamgei a liakliak mah ding na hi mawk hi. Khateh nek dan tuamtuam na om hi. A guksak hilo hi. A val khong a ne zong hilo a, a kituak lianlian dinga lemgelpa lemgelna hizaw hi.

Salvation Army kici pawlte in mite khateh kaikhawm in tua te tawh midangte panpih uh a, mi tampi in nuntak lawh, hin man omsa, maizumlo in om uh hi. A nei a haute paihmang ding tampi hangin a kisam tampi in noptuampih hi. Khateh mah kici thei dinga a limcit dan kibang veve hi. India ah second hand puan kici a, gam khangtote in gam genthei leh tuahsiat tuak gamte huhna (relief materials) dinga a piak khop uh hi, kici hi. Tua te hangin mi tampi in noptuampih hi. (A taktak in a tamzaw Bangladesh gam huhna dinga kipiate a kizuaksim India hong tungto hih tuak a, i noptuampih hangin nop khollo hi. Ahi zongin foreign puan kisilh lawh a, sialo veve hi.)

Khuapi pawlkhat ah mite khateh mah ahi lamgei khawngah a ki nusia a deih peuh in a top ding ci a kikoih computers, sofa, beds, laptop, etc kitawm thei a, tampi in noptuampih hi. Lawmte khateh tua bang tuahkhak hun om thei a, i noptuam pih hi. Annek ciang tutphah nuaia uipi gilkial lungsim ding hong ngaihsunsak hi. I kisap khat en i hih pak theihloh i ngah ciang a lungdam huai dan kigen zolo hi.

En zong khateh i nei a, mi khateh zong i tawm hi. Khateh i neih ciang miten noptuampih a, mi khateh enzong i noptuampih hi. Khateh neih ding hoih a, khateh neihloh ding kisin zong kiphamawh thei hi. Nek leh dawn neih leh lam ah khateh hau mahmah in, sep ding bawl ding hun ciang khateh haulua kei leng gam leh minam khangto tuam ding hi. Nangmah mah zong khateh khateh hikha niteh.

Hau Za Cin
Phuitong Liim

Melhoih

2010-08-19T21:34:00.001-07:00

Melsia te melhoih kici theilo hi. Melhoih te zong melsia kici theilo a, melhoih bek kici thei hi. Melhoih leh melsiat ding kiteel theilo a, kibawl thei pianpian hih tuak hi. Melsia pan melhoih kibawl thei a, melhoih pan melsia zong kibawl thei hi. Melhoih leh melsia a kibatna omlo a, a kilamdanna zong tampi om hi. "Aktui sungah a vom a kang ding kitheilo" a kicih bangin a piang nailo khat a melhoih ding a melsiat ding kigenkhol theilo hi. A pian ciangin zong a khankhit ciang a melhoih ding a melsiat ding kigenkhol theilo a, a khan laitak zong a melhoih suak ding leh a melsia suak ding kigenkhol theilo hi. A hang tampi om a, a kingakna khuambul kibanglo hi. Mihing melhoih te hampha a, mihing melsia te hamsia tuanlo hi. A sep theih uh kibanga, a hih theih uh kibang hi. Mite muh dan kibanglo hi bek a, amau tungah kilamdanna omlo hi. A ente muh dan bel kibang thei vetlo hi. Tua in tampi kilamdangsak hi.

Melhoih melsia a tehna ciangkang omlo a, a gikna tawikhaina ding zong omlo hi. A sawpna ding satpiang leh a nuh ding powder a om cih zong hi tuanlo a, a ente mit ah kinga pen zaw hi. A ente in melsia i sak mahmah zong a pianna nu leh pa mit ah na melhoih mahmah thei a, mi pawlkhat in hoih a sak mahmah pawlkhat in hoih hong sakpih hetlo thei hi. A tamzaw in hoih a sak leh hoih hi inteh kici thei bek a, a hoih pen a sia pen cih kiciangtan theilo hi. Leitungbup ah nungak hoih pen cih bang om theilo a, a ente etna leh a muhzia a kibang cih om theilo hi. Tangval hoih pen cih zong om theilo a, a en nungakte mit ah kinga hizaw hi. Baby Show cih khawng zong om keei a, a hoih pen a kitel mah hiam, a bang pen kitel hiam kigencian thei tuanlo hi; a kitel pen a kitelna mun ah ahoih pen dinga a up uh a tel uh hilel a, hoih pen hi cihtheihna ding om tuanlo hi. Nupi melhoih pen cih zong om thei tuanlo a, ei zi tek mah melhoih kisa pen ding hi lel hi. Tua mah bangin papi melhoih pen cih zong om thei tuanlo a, sam kang in talkolh taleh amau pasal tek mah hoihpen sa le uh kilawm hi.

Tua man hi diam piang masate in "melhoih cih zong a ente mit hi zaw" (beauty lies in the eyes of the beholder) na ci uh hi.

Pasian in nu leh pa melhoih pen hong pia a, tu leh ta melhoih pen tawh hong phungvuh in, zi leh pasal melhoih pen tawh hong kalsuan sak hi. Tua pen leitung paidan hi a, mihing ngeina ah ei a pen a hoih pen in a kipia nuam den ahi hi. Tua bangin zong kingaihsun takpi hi. Ei a a hoihpen (ei adingin) zong na hi takpi pah a, mi hampha hi dinga tunglam pan hamphatna i ngah hi ngelngel ding hi. Ek zong ei a uih kisa lo napi midanga khat hileh ki mut susu pah hi. Nak kihum nuam pah hi. Nupi te bang amau ta hi peuhleh eksiak ding kihhuai salo a, mi nau ek hi leh siak ding cih thadah leiko nuamlai thei uh hi. Mihing ngeina hi dinga, a gei pan i muh tawm pak tawh khel pak cih hitheilo ding hi.

Lawmte khat in kuai lianga melhoih a sak a ihmut mawh liang pen midang khat adingin a ik ah zong namlo thei hi. Bawhlung siam Carlos Tavez pen nungak khat in laikhak in, "Hoih hong sa lua ing," ci hi. Tavez in, "Ka koilai hoih hong sa na hiam?" "Na ngawng tom thinthen hoih sa pen ing," ci hi. Bawhlung a suih ciang na en dih vaw - a ngawng tom thinthen manin hoih nasa hiam?

Olympics, World Cup, Conferences, Concerts, etc a om simin a tawpna ah, "Tu tung mah thupi pen hi," cih tawh thugen nunung pen in gen den hi. Sydney Olympics closing ceremony ah "tutung mah thupi pen hi," ci in gen uh hi. Tua zawh kum 4 ciang Beijing Olympics ah zong "Beijing Olympics thupi pen hi," ci in IOC President in mangpha khakna ah gen hi. 2006 FIFA WC Germany ah "Tu kum WC thupi pen hi," ciin gen a, 2010 WC tawpni in zong FIFA President mah in "South Africa WC mah thupi pen hi," ci veve hi. Tua ahih leh koi thupi pen?? Koi, koi, koi???? A nunung penpen thupi pen den hilel hi.

Nang hong kigensak hileh kua melhoih pen ciin na gen tam? Na muh nunung pen mah "melhoih pen" na ci den lecin leitung tomkal nunsung mi hampha mahmah khat na hipelmawh ding hi. Melhoih pen ka hi na, melhoih pen na hi na? The answer is simply 'YES'!

Hau Za Cin
Phuitong Liim

Ka sam met man

2010-08-19T21:33:00.003-07:00

USA ah ka sam met man ka lungsim ah bei theilo hi. Ka sam metlo hileng lah ka sam sau ding hi. Ka sam sau leh Kungfu Master te ka bang hi. Ka sam sau lai lawmte khat in, "Bruce Lee master pa na bang," hong ci a, lungdam pian veve si (Bruce Lee pu tawh kibat), nui ding maw kap ding ka khentat thei kei hi.

Sau ahih ciang ka metsak top mai hi. "Nambar bangzah deih na hiam?" hong ci a, "nambat 2" ka ci hi. A met khit ciang ka et leh sau salua lai in, lawmpa ka sam a, "nambat 1 in met sak kik in" hong ci a, nambat khat tawh ka metsak kik hi. A sum ka piak ciangin dollar 15 hi a, tips dollar 3 tawh a vekpi gawm dollar 18 ahi hi.

India ka tun kik ciang ka sam ka met sak leh Rupees 20 bek hong la a, ka ngaihsutna hong vakkhia ciaiciai hi. USA ah ka metsak lai in USD 18 ci leng, tua pen India ah kizeek leh Rs. 820 peuhmah hi dinga, kha sim in kimetsak leh zong a tawmpen kum 3 leh alang kikhom ding hi. Lah meetsak khin ka hih cianga, "Ka meet masak pen a tam man mahmah hi in, na sau pak nawn kei in, kum 3 bang na khaan in," lah kici thei samlo hi. A tammat mahmah hang a sammet hoih mahmah tuanlo a, sam tom mah hibek lel hi. Tua pen a tam man pawl hilo lai dinga, Korea nungakte meet bel hizaw bilbel hi. Bangbang ai zong a meet te in "no tu nitak bang meh ding, koi ah anne ding" hong cih bek uh zong nop tuam e.

Hi dan in ngaihsun leng leitung pen a lamdang mahmah ding khat hi. America President hi kha zen leng cih khawng ki ngaihsun dinga - nop mahmah maw, noplo mahmah maw hi ding hi. Pasian hi zen leng kici dinga, ei nopna ding bek kingaihsun kha ding hi. Dahpa Khuang nei hi zen leng kici dinga midang khualna peuhmah omlo dinga, angsung theihna lungsim bek tawh nituam hikha ding hi. Mihau pen hikha zen leng kici dinga, kiphatsakna lungsim ka kiguan den ding hi. Tua teng ka ngaihsut ciang ka mit hong keuh vat.

Hau Za Cin
Phuitong Liim

Nanga Keia

2010-08-19T21:33:00.001-07:00

Koi pan hong kipan hi ding hiam? Eden Huan pan kipan hi ding hiam? Van leh lei a bawlpa in 'amau nam ciat in bawl a, amau mun ciat ah a koih hi' cih pan hong kipan hi ding hiam? Omna, neihna, nanga keia cihna pen koi pan hong kipan hi ding hiam? Leitung pen i neihkhop ahi hiam? Hilo hi. A nei tampi om a, i neihna cia kibanglo hi. Huih e leh? A nei tuam om zel hi. Singkung leh lopa te eleh? A nei khat mah na om zel hi. Gamlak vasa, gamsa te eleh? A nei mah na om zel hi. Tua ahih leh nanga koi teng, keia koi teng? I neihkhop koi teng? I zatkhop koiteng? Omlo hi. Ngaihsun taktak lecin om vetlo hi. Nanga ahih kei leh amaa hi a, na khempeuh nanga leh keia hikhin lel uh hi. Lamdang hi.

Inn na lei a, nanga na ci hi. A taktak in na leina pa a hi a, nang a zangpak na hi hi. Nang zat khit ciang midang kiang tung dinga, kum 20, 30 na zat leh a hampha hi ding hi. Mawtaw na lei a nanga na sak leh na zatman ding a sum na piak hilel a, nanga hi lo hi. A zang thei ding nang na hi cih hi lel a, a neipa na hihna omlo hi. Puanak, pheituam i lei a eia bangin i zanga eia hihetlo hi. A neite kiang tungkik zel hi. Sum tampi na thalawh a, na thatang huai liangin na nasem a, na sum ngahte nanga nasak leh nanga na hilo a, a neite kiang tung dingin lengkhia kik zel hi. Nang a zangpak hi in, nang kiang hong lambangpak hilel a, nanga hi peuhmahlo hi. Leitungah neih khatzong i nei keia, nanga keia cih ding khatzong omlo thong hi. A zangpak, a zeekpak, a kempak kihi lela, eia hipeuhlo hi. Kiphatsakpih ding omlo tawh kibang hi. A nei ikisak leh eisang a bulzaw, a neizaw khat na om zel hi.

Pastor te in panmun neilo ciin pawlpi phuan leh a phuat mah ding hi, a mau omna ding mun kisam hiven. Upa te in panmun a neih kei a panmun a deih leh a bawl kul hi. Inn lampa in a lupna ding room a bawltawm bang hilel a, amau omna ding a bawl uh hilel hi. A bawlna dingin mipi kisam a, mipi a zui ding a om nak leh a bawl theih hilel hi. Leitungah a nei cih bang omlo a, a zeek ding a kikhek kawikawi hilel hihang. Leitung galpi nihna laiin gam pawlkhat hong kipawl uh leh a dang gam pawlkhat zong hong kipawl uh a, tuate gel sungah a lut utlo pawl Non-Align Movement ciin "pawllo pawl" kiphuan a, India bang a makai hidep hi. Kuamah tawh a kipawllo pawl, neutral ahi uh hi. Amau zong omna ding omlo cih bangin om mawk theilo uh ahih manin a omna ding uh a bawltawm uh hilel a, kipawlna a mau neihsa cih bang hituanlo hi. NATO zong a kipawl gam teng beka hituanlo a, East block zong a kipawl gamtenga hi khin tuanlo hi. Anei dang khat na om zel a, tua a neite in a nei dang khat na nei zel a, a nei dang khat in a tungah na nei sawn zel hi. Pai kawnkawna, a tawpna ah a nei peng omlo in a bei hi. A vekin a neikhawm cih zong hituanlo zel hi.

Nanga keia ci-a i khen theih ding omlo a, i neihkhop hi i cih theih zong omlohna leitungah i teeng hi. Na khempeuh illusion hilel a, ahi bangin i ngaihsut ciang ahi hibek a, ahilo bangin ngaihsun leng ahilo hilel hi. Tua ngaihsutna te zong kho tuanlo a, a ngaihsutna lo lam pan ngaihsun kik leng i ngaihsutna lam diklo zel hi. A langlam pan ngaihsun kik leng a langlam diklo kik zel a, a dik pen cih om theilo hi. Tua bang leitungah 'the oldest profession' nasemte zong a nuamsapen hituanlo ding hi. Nasep lianpen cih zong om lo a, nasep thupi pencih zong omlo hi. Zalianpen cih omlo a, za neupen cih zong om tuanlo zel hi. Thagum hatna tawh leitung a ki ukcip laiin zong nitum manlo gama kumpipa zong a sammetpa in a utna lamlam heksak lel hi. Kun a cih leh kun a, dak a cih leh dak hi. Mr. Bean ciamnuih tawh kibang kik bilbel hi. Leitung pen a tuaci hi lel a, a lamdang hilo ci leng lamdanglo a; lamdang mahsi ci leng lah lamdang takpi hi. Eima lungsim hekzia hi khin lel hi. Mihoih i cih zong a hoihna lam i muhsak hilel a, a hoihlohna lam om veve ding hi. Nungak hoih kici, niin themkhat zong a bang nuamlo a akidiik suutsuut te zong zingsang a thawh uh ciang tuibuk gei ah 'puut' mah ci daadaa ding uh hi. A ek uh khum tuan peuhmah lo ding hi. Sacia ek a khum hang pen khuaizu a nek man hilel a, a khuaizu zah in khum tuanlo hi.

Tua manin leitung pen nanga hilo a, keia zong hilo hi. I neihkhop zong hilo a, a nei om cih zong hilo hi. A langlam pan gen leng nanga lah hi, keia lah hi, i neihkhop zong lah hi. Ahi thei vive ahi hi.

Hau Za Cin
Phuitong Liim

Technology i cihcih bang hi peuhmah hiam?

2010-08-19T21:31:00.000-07:00

A tom in 'vanzat zatsiamna' cihna hi. Greek pau 'technologio' pan kila hi a, 'techne' cih ciang 'siamna', 'zatsiamna', 'vanzat siamna' cihna hi a; 'logio' cih ciang 'kisinna', 'sinna', 'siamna sinna', 'theihna sinna' cihna hi. Vanzat khat peuhpeuh zatsiamna, ahih kei leh vanzat khat peuhpeuh zangsiam dinga kisinna cih hi. Bangzah taka tulai ciang hih kammal hong kithang mahmah hiam cih leh information technology hang ahi hi. Prof. C. Thang Za Tuan in a Ph.D. Thesis ah limtak in tulai leitung IT a kizatzia leh a thupina, a kipelh theilo vanzat ahihna a gelh hi.

Singkung phuk a tumtan in, a lai vutvang, singzawl khat vawh, a tungah singmam dang khung leuleu in 'mui leng' kibawl hi. Tua muileng tungah kituangin khe tawh lampai sangin manlang zaw, tawldamzaw hi. Van puasak leng 'gim ing, tawl ing' cih genselo a, a khoh zahzah pua thei hi. Tua pen minam khangto masate in "wheels" a muhkhiat masak dan uh leh a vanzat masa uh ahi hi. 'Wheels technology' kici thei ding hi. Suangtaak nih saituah leng puak setset a, mei am leng zaizai in singkeu tawh koih khawm leng meikuang thei a, mei muhkhiatna technology khat hong suak leuleu hi. Tua banga vanzat khat peuh tawh nuntak nuamzaw ding a kibehlap toto pen technology ah khantohna i cih ahi hi. Vanzat ah khantohna, vanzat thak leh hoihzaw behlapna, vanzat khat a hoihzaw, siamzaw a zatsiamna ahi hi.

Tulai ciang IT i cihcih zong 'information technology' cihna hi lel a, thu kizaktuah mengmeng nading vanzat cihna hi. Telephone, internet, television, etc cihte pen thu kizakna hi a, laito (post office) pan lai kikhak zangin manlang zaw ta hi. Tua manin manlang taka thu kizak theih pen a meetna tampi om a, tua gah hang mah in leitung kiuli ah omte zong i kizom dimdiam thei hi. Bangzahta in manpha a, bangzahta in meet hiam?

Technology tampi om a, a tunga i gen thukizakna (Information technology) namkhat hi a, construction technology, medical technology, nuclear technology, etc om a, pawlkhat pen state of the art technology akici zong om hi.

Nidangin mawtaw lampi tupi tawh kito a, tuhun ciang mawtaw tawh kito hi. Tua pen technology thak zatna hi a, khantohna hi; ahang mihing tha hong dawn in tawldam zaw, hatzaw, manlang zaw, gim theilo zaw hi. Suk leh sum tawh buh leh vaimim sukna pan set or machine tawh kigawisak ziau a, manlang zaw, olzaw hipah a, a su a semte tha dawn bilbel hi. Puansilh ding khau khek a siamgan tawm nasep pan machine vive tawh puan ngan, puan phan cih pen meetna tampi om a, khantohna khat ahih ban ah technology thak khat ahi hi. A mun leh a gam zui in technology kikimlo ding hi. Ahizongin technology in mihing nuntakna tampi khek hi.

Nuclear technology hangin meitha tampi kingah thei a, machine zat ding tha tampi kisam pen nuclear in pia thei mawk ahih manin van bawlna phual ah van tamzaw piangsak hi. Inn ah meivak ding zong nuclear pan kingah ahih manin meet mahmah hi - khuazing sang khuavak ah om pen nuamzaw ahih manin. Zatang leh zatui ah zong nuclear kizang ahih manin damna ding nuclear technology hong suak hi. Galvan hoihzaw bawlna dingin zong kizanga, ahi zongin galvan a nuclear technology zat pen lipkhap huai lua mahmah ahih manin mihing khempeuh in 'zaknop' salo uh hi. Nuclear technology pen mihing sihna dinga zatding hilo a, nuntakna dinga zat ding hizaw hi. Tua manin peaceful means of nuclear technology pen mikim in thapiak ding, galvan a zat ding nuclear technology peuhmah nawlkhin ding ahi hi. Si khin lehang nuclear technology kua'n zang nawn ding? Iran in nuclear technolgy sangpi nei le uh Israel gam leitung pan sumai ding, kapmai, nuaimang ding uh cih khawng kiza hi. Tua hileh nuclear technology pahtak huai isa diam? A takpi maw, kilauhsakna, intimidation bek maw, politics bek hilel maw kitheihpihlo a, ahi zongin nuclear technology zangin gam khat leh mihing pen leitang pan kivaatmai thei cih bel i theilua hi. Tua manin khantohna ding ahilo suksiatna dinga technology zat pen hoihlo, deihloh ding hi.

Tonsim leh Aizawl kikal nidangin khe tawh ni 7 kipai hi ci uh hi. Tuhun ciang mawtaw tawh nai 8 sungin kitung thei hi. Machine technology khantohna hangin a piang ahi hi. Muileng, a kipei thei vanzat siamna hangin khua khat leh khua khat kinaicik suak hi. Delhi ah inn kigamla thei lua ahih manin khe tawh vak leng nitum phialphial ding pen mawtaw tawh vak leng nai 1, nai 2 sunga kitung ziauziau lel hi. Technology ki metpih peuhmah hi. Vanleng engine hangin tuipi gal khat pan tuipi galkhat tomno sungin kitung ziauziau a, khuata khat leh khuata khat kikal khe tawh paisung sangin tomzaw hi.

Awmna leh khuh natna (TB) khawng zong tuhun ciang medical technology khantohna tawh X-ray kila ziauziau in neih leh neihloh kithei pah hi. Zudawn leh dawnlo tehna dingin breath analyzer kizanga, kampan hu sang in kithei pah ziau lel hi. Nungkal deuh in Israel Institute of Technology te in Prof. Abraham Kutchen makaihna tawh hu sang a cancer neih leh neihloh theihna ding technology khat bawlkhia uh hi. Hih technology tawh tuap, nawi, cil, gilpi cancer neih leh neihloh a kam pan hu pusuak bek pan thei ding hi kici hi. Zun tha theilo te sisan khaihsiangna dingin dialysis technology kibawl hi. Lungtang hatlo te zat ding lungphu huhna technology omta hi. Tua bangin medical technology tampi kibehlap hi.

Technology laklak pan mipi khempeuh hong uapkha pen information technology ahi hi. Tua pen IT i cihcih pen hi a, a tello in nisim nuntak bukim nawnlo hi. Na khut ah na tawi handphone leh iPhone4 na cihte zong IT gah ahi hi. Olno a na ut peuh na hopih ziauziau theihna pen IT khantohna hang ahi hi. Hopih bek hilo, a mel zong mu thei, a aw zong za thei hilai hi. Nidanga laidal khat kikhak in ni tampizawh ciang tung, a sim ciang a aw zalo, a ngah leh ngahloh na theihna dinga hong thukkik hun na ngak kul, ni leh kha zong kivei thei hi. Nungak leh tangval diakdiak bang thu kizak loh kal in lungsim tampi piang man hi. Tuhun ciang thukiza lua kisa, annek laitak maw, khuasung vak laitak maw cih nangawn laikhak hilo, IT tungtawn in kithei thei hi. Technology hanga kithuzak a nop mahmah pen khantohna namkhat hi a, tu kum zalom sunga khantohna thupi pen ciin kiciamteh liang hi. Leitung kiuli a om na ut peuh tu mahmah in na kizom thei hi.

Technology thak a pan thei peuhmah hau pah, minthang pah hi. Nung deuh in India pan unau nih Japanese - English direct translation a bawlsak thei software or technology khat bawlsak (developed) uh hi. Tua zangin English siamlo Japan mite in olno in a laigelh uh English in khekziau (convert) theita uh hi. Tua in Japan pau bek a siam Japanese tampi English Journals ah laigelh theih lawh uh hi. Tu in minthang luata ahih manin Korea in zong a technology lei a, Taiwan in zong lei in midang, Hospitals, Research Centers tampi in zong leizo uh hi. Hauh lawh bek hilo in minthang lawh uh a, midang tampi in zong lei nuam lai uh hi.

Computer hong minthanna hang zong mipi nautang zat theih dinga hong bawlkhia Bill Gates hanciamna hang hi a, ama patsa Microsoft hangin leitungbup computer a kizel suak pah cih theih hi. A tunga i gen bangin inn ah a om mawkmawk khatin technology khat pankhia (developed) hileh hauhna, khantohna, minthanna ban ah mite ading nasep thupi khat aluikhia hi mawk hi. Tua lamah mi tampi tai ngeingai uh a, tua hangin vanzat ahoih nono kingah a, a luite a man kiam pah ziahziah lel hi.

"Knowledge is power" hun ah kilut takpi ta himawk hi. Technology a khantohtoh mah bangin a hitheilo zong tawm deuhdeuh hi. High School zolo William Shakespear laigelh siam minthang suak a, college zolo Bill Gates mipil mihaupen suak a, tagah mivom Barack Obama mikang gam ah kumpi suak thei ci leng leitung pen a lampi thei leng a hitheilo omlo himawk hi. Tua lampi koi ah om hiam?

Hau Za Cin
Phuitong Liim

Primitive Society

2010-08-19T21:30:00.000-07:00

'Nam niam mite' cih ziau ding tawh kibang hi. Ahi zongin a mikang kam in koih leng kitelzaw leh a theilo ki om nawnlo ahih manin mikang kamin kong koih zaw hi. A khangto nailo minamte pen 'primitive society,' ahih kei leh 'noble savage' kici a, tua pen laigelh pawlkhat zat dan himah leh Human Rights pawlkhat ahi Survival International te in tua kammal te zat nawnloh dingin hanciam uh a, a zang nawnlo zong omta hi. Namniam kicih ding pen Human Rights saite in a deihloh uh khat ahi hi. Namniam hilo in a 'khangto laitak minam' (developing society) cih zat ding a deihzaw uh hi.

Guaktanga vak laite cihna hipah lo napi nektawm ding ganhing delh a nitum den te, singteh lohing, singgah khat peuh tawh gilvak sak, ngeina kician leh nekzondan kician a nei nailo te genna ahi hi. Gamsungah sa bengin muh masak thah masak, thah masak nek masak, a bei ciang gamvak kik, sa dang man kik, ne, gai, gamvak kik; tua bang nuntakzia pen a khangto laitakte nuntakzia ahi. A minam bup ahih kei leh a tamzaw lungsim leh ngaihsutna, tatzia, sepzia ahih leh tua bang minam sungah kikoih lai hi. Gamsa mat ding a neih loh uh ciang gamsung singgah khat peuh lo, ne, gilvahsak; singgah a kicin kei leh singteh leh gua ngek cih khawng zong - a gilvahna ding khatpeuh a ne uh hita hi. Tenna, giahna mun leh inn, khua cih bang a neih uh hang a nekzon zia uh pen muh masak nek masak hi a, khol, kem cih omlo hi. Ganhing nuntak dan tawh kigamla nailo cihna hi. Hunter-gatherer kici hi. Lokho le uh zong kumsim lokhawhna mun kisuan hi, shifting cultivation. Munkip, lokip nei nailo uh hi.

Tulai khantohna mu ban nailote zong minam khangto nailo 'nam niamte' kici thei hi. Nekzonna kicing a guikhau vawh nailo, a muh tawm tawh nungta laite hi. Lokho, kumtawp ciang anla, ne, gai, a kumkik ciang lokho leuleu, cih bang zong a khangto nuntakzia hinailo hi. Technology niamlai te zong 'nam niamte' kici thei hi. Technology cih pen 'vanzat' cihna hi lel a, vanzat gina nailo cihna hi. Sazuk ki leh singzum, suangzum peuh tawh lokho, leito, inn lam cih bang ahi laite bang 'nam niamte' lak ah kihel ding hi. Tua sanga sangzaw deuh bi leh sikkang khawng tawh inn lam laite khawng zong 'nam niamte' lakah kihel phial lai dingin ka um hi. Mite in vanzat, khawl (set, machine, automatic machine) cihte a zat lai vua mihing thatang tawh kuih ngakngak, puak keikai cihte a zanglaite pen technology niamlai cihna hi a, 'nam niamte' lakah kihel thei lai kha maithei hi.

Lamka ah lawmte khat in, "Singtang mite pen (Lamka khuasungah tenglote a cihna), meihol ippi dimin Lamka ah a lu uh tawh hong pua suk un, nitak lam ciang buhtang a puakkhop uh a lu mah uhtawh pua to kik in, tua buhtang teng a gaih uh ciang tua bang mah in hong pai kik zel uh hi," ci siam se hi. Tua pen 'minam khangto laitakte' nuntakzia na hi leltak hi.

Nekzonna kip leh kho neilo cih ciang a zon tawm den uh kul cihna hi a, nisim, kha sim, kum sim zon kul cihna hi. Kumkhat kham ding khol, kum 10 nek ding khol, khangkhat nek ding khol cih omlo cihna hi. A khangto penpen minamte kua bang minamte hiam cih a kigen theihloh hang tulai leitung nuntakna ah midang tawh kizom, midang tawh kithei, midang nuntakzia thei, ngeina kiciantak nei, nekzonzia kician tak nei cihte ahi hi. Tua bang nuntakna ciangah a kilamto zo masasa minam pen minam khangto hi in, 'nam niamte' cih pan a suakta masa cihna hi.

'Nam niamte' nuntakna ah kum tampi sung kikhelna tampi omlo hi. A pu nuntakzia pen a tupa in zong zanglai cih bangin khantohna tampi omlo hi. A khangto minam lakah bel pa leh ta hun ah zong kilamdanna om hamtang hi. Nek leh dawn ah, gamtatzia ah, duh leh deih ah, nekzondan leh biakna paipih dan ah. 'Nam niamte' in zong biakna a neilo hilo hi. Nei in amau biakna pen ciik taka zuih diamdiamna hi. Minam bup in a zuih khop hi zaw diak a, mimal deihna tawh biakna pengh-khia, peengkhia cih bang omlo hi. Zuih khat pelha gamtat hi thei peuhmah lo hi. Nam khangto ah bel mimal deihtelna kizang thei a, theihsiamna leh thuakzawhna kitamneihta cihna hi. Mihing khat leh khat zong tua cih ding, tua cih ding cih kisawl ngakngak thei nawnlo, by force or aana tawh kihihsak cih bang om thei nawnlo in mimal suahtakna kizangthei hi.

Kumsim, hun sim in minam khempeuh khantohna lampi tawn in pai damdam a, a khangto masa om in, a nungzui om a, a nunung pen zong om hi. Tua lampi tawn in a pailo mihing omlo hi. Nuntakna nei khempeuh a paikhawm ihi hi. Bangciang i tungta, koi lai ah i om, kua teng i makhelh, kua teng i delh lai cih hi bek hi. I tunna ciang i theih leh hoih a, i tunna ciang i theih kei leh zong makhelh nei hang cih thei leng hoih hi. A nunung pen i hih khak ding uthuailo a, a masa pen ihih ding uthuai penpen hi. A masa penpen ihih kei leh zong amau khetul suikha ciang beek in pai leng hoih ding hi. Tua bang lampi kitawn hi cih i theih ciang a masa pen ah pai utna hong lian mahmah ding hi.

Nang koi ah na om a, na minam koi ah a om a, na minam mainawt dingin na makaih hiam, a nunung dingin na kiziakai sak kha hiam. Amakai na hia a nungkai?

Hau Za Cin
Phuitong Liim

A 5-veina Double Century Ngah

2010-08-15T06:50:00.001-07:00

Maradona - Argentina coach pan kitawpsak. Liverpool in europa league qualifying match masa pen ah gualzo. German grand prix ah Ferrari in gualzo. Pakistan vanleng kia ah mi 152 si. BP Oil makaipi kikhek. Obama real tv show ah lut vat, mipi'n lamdangsa. "Kei a nihna hi keng," Massa in ci. Mexico ah drug lord te in zong suicide bomb zangta uh. Afghan gal thu tul kua val kipholak, Obama heh. Khmer Rouge makai Tual Sleng thongcingpa kum 35 thongkia ding, Paris Hilton Malaysia mihau khat tawh kingai uh hiam...

Sachin Tendulkar, India mi leitunga Cricket kimawl siam penpen laka kigenpa in a 5-veina dingin double century ngah hi. Double century ngah lak ah a mah a 3-na hipah a, a dangte Brian Lara, 9-vei; leh Sir Donald Bradman 12-vei ahi uh hi. Amaute ngahzah a ngah ding lametna bel omlo a, ahi zongin India mi ama ngahzah a ngah om nailo hi. Amah in Test Matches ah runs 13,500 ngahta a, leitungah a tam ngah pen hilai hi. Double century a ngah tamloh hangin a runs ngahzah ah a dangte in pha lo leuleu hi.

Cricket kimawl dan pen baseball tawh kibang pian a, khat in lawn, khat in sat cih hi. Ciangkang kiphut thum te bawhlung tawh deng uh a, a denkhak leh a satpa si a, a sat khak leh a bawhlung a ciangkang omna mun hong tunkik mateng ciangphut kikal ah tai thei uh hi. Tua a tai man zahzah uh runs kici a, tua bang tam tai man ding kidem uh hi. A sat siamte in huang pua lamah a sat leh tai kullo in runs 4 hi pah a, leizul lo a huihlak ah lengin huangpua a tun leh runs 6 hi. Huangpua tunglo a runs a tai man zah uh tawh kibehlap toto a, Overs 50 sungin a tangpi runs 250 kiim ngah uh hi.

A sat siam a om mah bangin a lawnsiam zong om a, bowler kici hi. Nunga i gen Muralitharan pen a lawnsiam hi a, tuni a i gen Sachin pen a satsiam hi. Team khat ah a sat siam 6 leh a lawnsiam 5 bang om hamtang a, kihelh uh hi. A lawn masate in sat nunung uh a, a sat masate in lawn nunung uh hi. Nai tampi sung kimawl uh, a tamzaw ni khat thapai uh ahih manin mi a tamzaw in en manlo a, India in bel One Day (nikhat kimawl) bek lo Test Matches (Ni 5 sung kimawl) zong en man ciat lel uh hi! India ah hun tam kingah deuh hileh kilawm hi.

Cricket a muhnop dan a theikha photte in kimawlna dangte bei baih sa lua uh a, cimphawng sa mello dan uh hi. Theihloh zong lah hun tampi meetna hi in, sup huai lualo zel hi. Bangbang ahi zongin kimawlna leitungbup zel khat pen theih dinga kilawm cihna pong tawh a satsiampa 'little master' a kici Sachin Tendulkar lungdampihna in kong gelh ahi hi.

Congrats Sachin!

Hau Za Cin
Phuitong Liim

Torres is not to rest

2010-08-15T06:48:00.003-07:00

WC ah goal khumlo hi mahleh khawlsawm tuanlo a, a club lui Liverpool mah ah ciahkik in "You Will Never Walk Alone" lasakna mah tawh bawhlung suih kipat kik zel sawm hi. Chelsea in million 60 val piak dingin a zol hangin nungak Khaini tawh zol sangin haksa zaw a, ngahzolo uh hi. Man City in zol leuleu a Ui gilvah zol mahmah bangin a lehlam ah tai veve hi. Club hau te in zong zol zolo cilo in big four ah zong a lut pha nailo khat in zol kik a, a boss ngah ding cih a ngaihsut ciang ut dekdek a, ahi zongin 'a lianpen' hi zong a phattuamna bang om dinghiam ciin a lungsim khel kik in a tutphah lui mahah tukik dingin Slave Trade phualpi lui khat ahi Liverpool mah zuan kik hi. Hih Sila lei leh sila zuakna phualpi lui club pen EPL ah bawhlung tawh gualzawhna Trophy a ngah tam mahmah club hi bilbel a, a fans te zong hanciam, a suite zong hanciam, a khuapi bup in a pangkhwm uh hiphial hi. EPL ciangciangah bel amau fans zaha nopci omlo hi. Man Utd in naih pen a, sum hauhzawk man bek hi napi, ki mudah tinten uh a, "ui leh kel" a cihte pawl uh hi in, kiho cih thadah bawhlung suih ding ciang khut kilet ding zong a ut mello, amau club mi peuhmah a kileisak tuahlo club hi leuleu uh hi. Tuate in EPL muhnop sak a, bawhlung siam tam neih ding kidem semsem uh hi. Tuhun ciangin Man Utd in demzo pianpianta a, LFC in demlah pianpianta hi.

Tua kawmkal ah Torres in LFC nusia leh LFC adingin siatna kibehlap ding ahih manin pawi mahmah ding kimlai nusia lo a hong kilehkik ciangin LFC in Man Utd a demkik na ding ah striker hoih khat khahsuahlo uh a, lametna lian semsem hi. Captain Gerard in zong nusialo dinga, Torres in zong nusialo ding; a nusia sa Aurelio zong kilehkik a, lei kik uh a, Manager thak Roy Hodgson nuai ah sangpi tung dingin kilamen uh hi - Man Utd leh Chelsea leh Arsenal te tungah Champions ngahsawm uh hi.

A champions zo tam uh maw? En leng maw. August 14 ciang Arsenal tawh Emirates Stadium ah kinuai pah malam ding uh hi. Tua ni in 'Torres is to rest.' A khe liam a, damsiang nailo ahih manin sui thei nailo ding hi. WC bei a, EPL lah kipan nailo ahih manin cimhuai a, cimphawng kong at pak hi. Let us not rest to rest.

Hau Za Cin
Phuitong Liim

Dahpa Khuang Minute Khat Nei Hileng!

2010-08-15T06:48:00.001-07:00

Zomi khempeuh America ka tungsak ding hi! Boss lungsim, ahih kei leh dictatorial lungsim, autocracy lungsim khempeuh ka phiatmai ding a, ki itna, kilemna, pankhawmna, khat leh khat kihuhtuahnopna, unau sanggam banga nuntakkhawm diamdiamna cihte ka omsak ding hi. Biakna pawlpi khempeuh a up, a muan uh a kibat nak leh kuamah a kimudah thei omlo hi cih lungsim ka neisak ding hi. Zomi Zogam cihcih kullo dingin leitung khempeuh Zogam ka suaksak dinga Zomi lungsim hoih pupa hong nusiatte ka pholh kik dinga, Zomi khempeuh lungsim ah ka guan kik ding hi. Kim leh pam pan i tawk tawm lungsim sia leh kihazatna kihuatna angsungtheihna cihte khempeuh Pupa neihsa Zomi lungsim tawh ka kheksak dinga, Christian suahma pek pan i neih gamtatphate ka tuallengsak kik ding hi. A sia a pha theihcianna leh a dik a diklo theihtelna lungsimte ka guankik dinga, a hoih a pha a gamtatnate bek zat dingin ka tuallengsak ding hi. Satan peuhmah lungama a om nadingin a sia peuhmah leitung pan ka hawlmang dinga, vantungmi peuhmah zualtaka a gamtat nadingin leitung ka nuamsak ding hi. Environmental problems khempeuh ka beisak dinga, tuzawh kum 300 cianga leitung lumlua ding zong ka kipelhsak ding hi. USA te hauhluatna leh leitung uk den a sawmna uh ka maatsak dinga, a kikim in leitung hauhna, pilna, siamna, thuneihna, nasepna te ka uangsak semsem ding hi. A pilzaw a siamzaw omsak lo in mi khempeuh a kikim in ka omsak dinga, nasep gim kullo in Eden Huan bangin mi khempeuh in leitung hoihna leh asungah a piang tawh nuamtakin khua-ul kailo in anne ding uh hi. Vaksuk vaktohna ding vanleng mawtaw kisamlo in utna peuh tun ziauziau theihna akkha kinei dinga, tua akkha zalin kileng ziauziau ding hi. Leitung kimvial in i leng zongin kigimlo dingin ka bawl dinga, tui duh dangtak gilkial hun ciang a damna ding ngah theih ziauziauna ding ciangkang khat ciat ka tawisak ding hi. Natna gimna cih peuhmah leitung ah omlo dinga, lungkham sinkham cih peuhmah omlo ding hi. Lunglen, lungzuan, khuangaih omlo dinga, dahna kahna khitui te ka nulsak ding hi. A kingekbawllua naupang bangin leitung mi khempeuh ka bawl dinga, ahi zongin pil gamtat tek in picing gamtat tek ding uh hi. Ka ngaihsut pak khit theihloh, ka mangngilh a om khak leh ka phawk cianga ka bawlkik pak theihna dingin Dahpa Khuang minute khat dang neih theihna ka behlap zel ding hi. Ka mangngilh khak a om hia?

Hau Za Cin
Phuitong Liim

Tuiphumpa Johan guh kimu

2010-08-15T06:47:00.002-07:00

Tuiphumpa Johan guh keu pawlkhat - a ha, a kha guh, a khut guh cihte Bulgaria leitaw lam Tuipivom gei tuikulh "Sveti Ivan Island" kici mun ah kimu hi. Hih pen a manpha mahmah vanlui kimu hi ciin kigen hi. BBC News ah hih bangin kigelh hi: Bone fragments of St John the Baptist appear to have been found on Sveti Ivan Island near Bulgaria's southern Black Sea. http://www.bbc.co.uk/news/world-europe-10849211

Thu kicingzaw hong suaksak zel ding uh hi cih lamen ni.

PS: A han a kimuhna video: http://www.youtube.com/watch?v=boMX7Lcn3nU

Hau Za Cin
Phuitong Liim

Bawhlung siampen India hong zin

2010-08-15T06:47:00.001-07:00

FIFA WC 2010 laia bawhlung siampen Diego Forlan Kolkatta (a mikang min Culcutta) India ah hong zin a, Bawhlung siam zonna (talent hunt) ah kihel ding hi. Amah pen WC nihvei a champions ngei Uruguay mi hi a, tu kum WC ah goal 5 khum in Best Player pahtawina Golden Ball kipia hi. A kimawlna Athletico Madrid pan hong pai bek hilo in ama gam pan hong deihsak manin India ah hong zin vangvang ahi hi. Khangno bawhlung sui nuam, a siam, talent nei a om leh pattah dingin deih uh a, tuzawh kum bangzah hiam ciang India mi zong bawhlung sui a om ding lamen, deih uh hi. Sum, sum, sum,.... India mihing tam hiven.

Kolkatta hong tun ciangin Mother Teresa Missionary of Charity mun vehpah hi. "Tu kum ka khul hoih pen Germany tawh kisuih laia ka khum pen hi," ci hi. Ahi zongin Germany in a thumna ngah a, amau a 4-na ngah uh hi.

2008 kumin Bayern Munich te Kolkatta ah kimawl uh a, leitung club lian India leitang ah a kimawl masa pen ahi uh hi.

Tuma in bawhlung siam minthang Lothar Matthaus, Karl-Heinz Rummenigge, Diego Maradona, Branco, Romario, Oliver Kahn, Gerd Muller, Mark van Bommel leh Ze Roberto te in Kolkatta hong hawh ngei zo uh hi.

Gracias.

Hau Za Cin
Phuitong Liim

Vaak banghang vom hiam?

2010-08-15T06:45:00.002-07:00

Kisam hiven. Vom kei leh amah 'mel' (color) neilo ding hi. Tangthu ah - vaak in mi zemzem in a tawpna ah amah a kizemna ding om nawnlo in belmang kinuh, tua manin vaak tuni tan vom suak hi - kici hi. 'Tangthu' himawk ahih cianga a pian laitaka mute in a gen uh a kigen toto, a kimangsaklo thu hi dinga, tua manin zong maan lel ding hi. Maanlo hi cihna ding proof om tuanlo a, maan hi cihna ding proof zong om tuanlo hi. Mihing te Zawng pan piang hi a ci pawl om a, mihing te Pasian bawl hi cih Christian te in i um hi. Mihing pilna themcik tawh bel kisutkhia zolo hi. Up ding hilel a, theihzawh ding hilo hi. Vaak banghang vom a, vasa dangte bang hang gial uh hiam? Kisam hilel hi. A tua dinga a kibawl, piansak laia kipiangsak hilel a, ei buaipih ding omlo hi. Banghang vaphual lu guh vive tawh kidim? Kisam hilel hi. A tua banga a om ciang vaphual ahihna kilanga, mul khawng po thilthel leh vaphual ahihna om lo ding hi. Vamul khawng suak lel ding hi. Ahih kei leh min pia masa khat peuh min piak tawh kiciamteh lel ding hi.

Akpi in banghang nawi neilo hiam? Kicinglo hiven. Tangthu ah akpi in nawi hawmhawm a, a tawpna ah ama ading zong hawmkhin in kicing nawnlo a, tua manin akpi in nawi neilo hi kici hi. Tuni dong akpi nawi nei om nailo hi. Ak khawi khempeuh in thei ding hi. Akno a keuh ciang a keuh ni mah in leilak phiat in an zong pah uh a, vokno suak, bawngno suak bangin a pi nawi teplo, a pi nawi tawh kivak phot cih omlo hi. Amau nek ding a pi in zong haizan sak tuanlo a, phiatkhiat sak bek hi. A muh bangbang uh a neu a lian tu pah leihleih uh a, an kizontawm pah lel uh hi. Mu in hong vil leh bel akpi in a kha nuai ah sel in liah cip a, kimusak lo hi. Aknote in zong lauhhuai om cih thei leh (a kihilh khol mah ahi diam) a pi khanuai zuan damdam uh a, a pi khazak nuai ah kibu tek uh hi.

Thankik in no a neih ciang bang hangin kem in khoilo hiam? Kisam hiven. Akpi in nawi a neihloh hangin a note ann zonpih a, a let dong kikholhpih buang hi. Thankik leuleu in bel a tui khit ciang a tuite gul in ne maw, ahih kei leh keuh maw cih zong theilo hi. Vakmangsan lel hi. A tui lei lak ah phum in vakmang san a, a tuina mun zong phawk nawnlo. A no keuh maw keuh lo cih zong phawk nawn se lo hi. A note in a nu leh pa thei in na um hia? A DNA test le uh bel thei kha ve. Thankik te in DNA test a hih ding uh mihing ngaihsut pak in bel gamla lai leh kilawm mate? A nu leh pa a theih uh kisam khollo hi inteh. Tua ahih leh a mangthang, a vakthap a hi diam? Hi tuanlo sam. A nu, a pa khawng mah tawh tano a neih khop kik na mel uh zong i thei a hia! Sisan kinai hileh tate ginalo thei cih khawng a ngaihsun tam uh? Uphuai khol sih mate? Ka nu ka pa kua ahi tam ciin a lungngai ngei tam uh? Theih utna lungsim khawng a nei tei tam uh? Nei lo maithei, nei maithei. A neih uh hang a theihna ding uh ollo kha ding. I panpih thei diam? I panpih man diam? I panpih a phatuam diam?

Ngasa a tui ciang a tui keuh dong cingin kem in a khoi tam uh? A no keuh leh e? A no a khoi toto diam? Tuipi lianpi sungah ka no tua hi ei, ka pi tua hi ei, ka pa tua hi ei.... ka sanggamte tua teng hi ei ciin a kankan tam uh? Theihpih khol khang mate? Theihpih leng a phatuam diam? Theihpih in a note uh ciamtehsak in, a let uh ciang 'hih na pi, hih na pa, hih na na nu' ciin hilh kik leng e. Phatuam tam? Bang meetna a om tam? Theihloh pen a meetna a om diam leh? A kitheihloh uh pen a nuamzaw diam? A hoihzaw dinga a bawlpa bawl ahi tam? Ahih kei leh a thei banlo ding zaha 'hai' a kibawl ahi uh tam? Ngaihsutna neilo ding, thu ciamteh theilo dinga kibawl ahi tam? Ahi kei leh ngaihsutna nei, kithei tek uh, innkuan, beh leh phung, u leh nau mah tawh kithei a nungta mah uh ahi tam? A nuntakzia uh en theihpihlo zaw i hi tam?

Mihing ten i u i nau, sanggam u leh nau i kitheih pen a phattuamna bang ahia? A phattuamlohna a om diam? Kitheilo hizaw leng a hoihzaw tam? A kitheisa in i khankhiat sangin a kitheilo in kikhangkhia leh a nuamzaw tam? Ganhingte bangin eima nuntakna ding ciat ngaihsun in zongin sem leng a nuamzaw tam? Kipawl, kizom, kikhawl in i om pen nekzonna namkhat mah hilel hiam? Kitheih kinaih pen nuntakna neite omzia ding mah ahi tam? A tuabang tawh buai selo te nuntakna leh a tua bang tawh buaite nuntakna a kibang veve hiam? Mawtaw, vanleng, meileng, khawng i bawl pen a kisam takpi mah hi ding hiam? Machine, weapon, tools, engine, khawng a kibawl pen a kul mana kibawl hiding maw, a ommawh khat khut ommawh mana kibawl hiding maw? Guahzuk hun, nisat hun ding i theihkholh khawng a metna om takpi mah hiam? Puansilh nikten khawng i lim zat mahmah pen a tua dinga piang mah hi ding i hiam?

Vaak pen a kang hong suak khin leh vaak mah a hilai veve diam? Zawhngeu pen nidangin a gial philhphelh hi a, tu hun ciang, a vom, a kang, a san, a mel tuamtuam hong omta hi. Zawhngeu mah hiveve lai hi. Mi eitungah gilo mahmah dingin ei zong mi tungah dik tuan kei leng a kibang mah hilel lo diam. Zawhngeu a kang sitset hang zawhngeu mah hilai veve hi. Vaak a kang hang vaak mah hi lai veve a, sahang a kang hangin sahang mah hilai veve hi. Akpi nawi ngau liahluah in kai dangdang leh bel nuihsuak huai ngel ve.

Hau Za Cin
Phuitong Liim

Ka tuahkhak thu

2010-08-15T06:45:00.001-07:00

Ka zinna khat ah misi om hi. A site pen Zomi hi. A site khua pen Zomi tampi tenna khua hi. A innkim, a inn kiang, a vengsung, a khuasung buppi Zomi vive cih theih hi. Inn 500 nuai hi peuhmahlo ding hi. Mihing a omlo hi hetlo hi. Si gal ding a omlo hi hetlo dingin ka um hi. Ahi zongin kuamah in misi innkuan te tutpih lo se hi. Misi neite a mau innkuan teng na tu lingleng uh hi. Ka muh ciang ka cimul tho zangzanga, ka lungsim tawng ah nuam kasa het kei hi. Ahi zongin ka sigalte kiangah ka lungsim noploh lam ka gen kei hi. Ko khua lamah tua bang hilo a hih man hikha inteh. Lusei gam ah tua bang kiciinglo ahih man hi kha ding hi. Zomi khua ah Zomi si in Zomi a gal ding omlo, si nei te innkuan bek 'khuadakdak kawm in tu' ka muh ciang nop kasa kei hi. A khua veng min lian ka thei kei hi. Tutan in ka ngaihsut khak ciang tuate innkuan ka khawngaih mahmah hi. Amau beka a pa uh si, lupna tungah kisial, a tuteng leh a zi, leh atate bek in ompih cih pen MULKIMHUAI kasa lua hi. Amau a hehpih khatbeek omlo ahi tam. Amau hehpih ding utlo uh ahi tam? Amau sih a veng apam in theilo ahi tam? Theihloh in bel om in ka um kei hi. Ahi zongin kua mah in misi delhlo hi. Kua mah in lusun te hehnem lo uh hi. Zomi ngeina mah ahi tam? Kei theih ngeina pen midang nam dang te ngeina ahi tam? Ka luvai mahmah hi. Haksatna sihna a tuak om in, Ciimnuai ah a khuapih, Geltui ah a khuapih, China gam pan a peempih... kuamah in delhlo, tutpihlo cih pen LAMDANG kasa hi. Lamdang!

Lamdang lua aw, lamdang lua sang.... cih la sang zong lamdangzaw phial tam maw. Christian kici in kikhop khawng zong hahkat tuak uh hi. A inn gei zek vuah zong biakinn nih leh thum om kawikawi hi. Tua biakinn ah kikhawmte christian hilo ahi tam? Amau 'nungzuih' (tapeihdaw) pen Jesu hilo in a tuampi khat a hi tam! Jesu nungzui kici te gamtatzia ding kigen te bangin gamtalo uh ahih ciang ka cihna. Dahte dahpih, kapte kahpih, nuite nuihpih... ahih kei leh tuate khempeuh 'suakta zo', misiangtho hizo ahizaw tam? Ka theihloh tam tei ei... lah thei nuam si, theihna ding lah omlo lai... hai khat khawng ka dawn behlap mai diam.

Ahih kei leh tua khuate ciin dan tua bang ahi zaw tam? Tua zong a theilo hilai zen ing. Tua khua te zuih dan tua bang a hih leh zong lamdang a sa hive ve ing. Jesu thei nailo lawki hilai ahih leh zong tua bang bel Zomi te lawki hun lai in zong tua bang hilo ciin kigen veh aw... Zomi te 'bang suak' ta i hiam cih hong ngaihsunsak hi. Mopawi om leh bel kilim uap mahmah uh cih hong kigen. A nuam bek kiuap, a haksa ah kitaisan Zomi hita i hiam??????????????????? Hibang angsung theihna, dawilokna koi pan hong pai, kua hong piak, kuate hong influence hiam? I biakna Christianity hong puak ahih khak leh khel kik ngam ni. Lawki suak kik zaw ni. I pu i pa Zomi te nopni dahni ah na ki uap uh kici hi; khangthak Zomi bang suakta??????????????????? Unlimited questions...

Theihnop lah tam, seihloh lah tam, buaisaak... bang hanga tua khua ah si kigal lo uh hiam... Zomi khua hi si, tua mahmah lamdang sa pen ing... ever!

Hau Za Cin
Phuitong Liim

Ciangkang

2010-08-15T06:44:00.000-07:00

Ciangkang i cih ciangin ciangkang hipah lel hi. Ciang i cih ciangin ciang hi a, molhtum i cih ciangin molhtum, singkhuah i cih ciangin singkhuah hipah lel hi. Hong kipatna uh kibanga singkung pan hi. Singkung pen a kungpi khat po a, a hiang tuamtuam a nei hi. A hiang zau in a kung lian a, a sangna lam a khangtoto hi. A khantoh tawh kituak in a hiang pawlkhat keu in leilak ah kia a, pawlkhat a kungtungah keu in Vakhu te in bu dingin a tom hi. A keu pawlkhat leilak ah muat a leitang hoihsak in, pateh posak in, lungno khangsak a, leitang nomsak in ganhing pawlkhat annek ding a piangsak hi. Singkung pan a hiang keu lian deuhte lei ah kia pah lo in a singkung tungah muat a, a muat tungah patang, pasi, pasia po in nuntakna nei pawlkhat in tua te ann in na zang leuleu a, mawk manthan tuanlo hi. Singkung zong hei tawh phuk in ek kham leng singkhuah suak a, mei tawh kihal in thuk tungah kituah a, ann huanna leh meilum awi dingin kizang thei hi. Pelemlo a singkhuah a kizat theihna dingin gamsungah singkung tampi neih kisam a, singkung khat kiphuk leh a dang khat suan kik pah ding ahoihpen hi. Singkhuah a kikhul khit ciangin meiam suak a, meiam a mit kik ciangin meivam suaka, meivam a kipaih ciangin a tukna munmun ah lei alsak ahih manin khaici tuh leng khanghoih mahmah hi.

Ciangkang cih ciangin ciang kang hilo a, ciangkang hizaw hi. Ciangkang pen mi satna ding khawng, naupang thumanglote taw zepna ding khawng, singkhuah a kineih zawhlohna mun ah singkhul ding khawngin kipua thei a, val khong hetlo hi. Ciang cih leuleu ciangin sanginn ah sangsia te in naupang satna dinga a kep uh ciang hipah a, thumang ding kihilhna namkhat hipah hi. Galkap sungah thumanglote satna in kizanga, palik sungah mi gilote thudot kawma satna dingin kizang hi. Lai Siangtho ah tate hilhna dingin zat ding ci bilbel hi.

Ciingduai i cihciangin ciang a zat ding ciing pan kibawl ciangkang genna hi a, ciing ahih manin duai diak a, tua manin ciingduai kici hi. Ciingduai pen a zatna dang zong om a, tutphah bawlna ding, nangphan ding, sengphan ding, lawh leh ciang (van koihna lawhciang) dingin zong kizang hi. Lawhpi dingin zong kizanga, lawhpi kho thekna ding leh lawhpi gawng zialna dingin zong kizang hi.

Nahseng phan ciang a kilhna dingin ciangkang kizanga, gamsungah ek thak ciang zong ek siakna dingin kizang thei hi. Lampi ah niin om leh a phiatna dingin ciangkang mah kiman pak thei a, lamgei ah gul mu leng a satlupna dingin zong ciangkang mah kiman pak thei hi. Vakhu in bu a bawl ciang ciangkang vive zang se a, koi lai pan engineering sin uh hiam kitheilo, keibang a theilo hi ing. Noah Tembaw ah zong ciangkang leh nahteh keu hong puak masa se uh hi. Ciangkang pen gamsung vak ciang sik kha leng ging guapguap a, gamsa lauhhuai sahang, ngal, vompi cihte tawh kituah ding ciang tua gingte za le uh lau in tai uh hi. Sakhi pang leng suaklu gah ne ding sakhi hong suak ciaiciai a, na tuanna kunga singhiang keu ciangkang khat kuaitan dih... sakhi in za nuam mello hi, taw deel liangin gamsung lam ah hong taisan ding hi. Not good. Sakhi mat nop leh ciangkang tansaklo ding, kuaitan lo ding. Nuntakna nei peuhmah ciangkang lak lecin hong taisan ding hi. Hong naih utlo ding hi. Zuallo ding hi. Bawngpi lei thak inla, ciangkang tawh inn na tun ciang a taw zep gawp cih, zual baih tuam khollo ding hi. Uino lei inla, inn tun ciang ciangkang tawh a taw zep dihve, nop sa khollo ding hi ei.

Sangkah laiin sanginn sungah ka ommawh ngei kei hi. Thumang pen ka hi tawntung hi. Good boy. Ka lawmte a ommawh mahmah khat om a, sangsiapa in ciangkang tawh sat den hi. Tuni dong ciangkang mah tawh nasem hi. Lokho a, lovat in ciangkang hem in nitum hi. Khatvei a lo kuanna ah ciangkang in a mit su kha a, a mit san lela in biakinn ah hong kikhawm hi. Ciangkang palkha leng zong lei theh gawp thei a, mit sungah lei tusak in mitsip sak thei hi. Gamsungah khatvei zawngno mat sawm ka delh leh ciangkang tamlua ahih manin kipal tuk gawp in ka delhpha kei hi. Ka makaipa un, "Ciangkang in na khe khawng uh hong sun thei lai hi," ci lai hi. Singbul khawng palkha a, singzum khawng sikkha a ka tukgawp ding uh a lauh thu a genna hi kawm hi.

Forest Department kici kumpi singsuan pawl leh gamsung nosuaksak ding, singkung lopa kem ding a ci te pawl in zong ciangkang pen singno a suan uh ciang a ciamtehna dingin na zang uh hi. Singno suanna mun ah ciangkang khat phut pah lian uh a, kisik khalo pah, kipelh pah hi. Ciangkang phut lo uh hi leh kituankha, kisikkha dinga, tua singno si ding, sia ding hi. Tua manin ciangkang omlo hileh singno tampi nungtalo dinga, singkung tampi po lo ding hi. Apple kung suan ciang ciangkang tawh kilen a, ciangkang tungah khau tawh kikhih a, a tangpo nading, a soihloh nading ahi hi. Grapes a kisuan ciang zong a kung hong poto pen ciangkang tawh na dawl pah in a zamna ding lamlam ah kizawi pah a, ciangkang phut in kizawi to hi. Tua hikei leh a utna lam peuh ah puk in zam gawp a, leilak ah Lenggah (Grapes) gah pha nuam lua lo hi. Ciangkang tawh zawi in leilak pan lamto leng bel a gah limci nuam diak se hi.

Forest Department te mah in khaici a pawi uh ciang a kepna ciin Nursery phual ah ciangkang phut zeizai uh hi. Sekkhum leh Lingmaw, Taksing leh Pine seedlings, Dolsing leh Teak, etc a tuamtuam te a pona mun ciangkang tawh ciamteh zeizai uh hi. A tung pan tuipuan hiam, puan hiam, thopuan dana kiphan a vang singseng tawh hiam khuh in vasa in a nekloh nang cih bangin na dal, um uh hi. A kiu tengah ciangkang phut in a tungah puan tawh a khuh uh ciang nisa lua ding lak pan khaino dal in, keugaw saklo a, singlim, dailim, limliap ah noptak in nosuak in, hing dipdep in khangkhia uh hi. Nisa thuakzo ta ding, vasa zusa in ne zo nawnlo ding acih uh ciang kibotkhia a, amah beka a po theihna ding mun ah kisuan in tua mun ah zong lopa in a dep gawp leh zong akithei thei ding ciin ciangkang mah tawh kiciamteh hi. Gambu lopa lak ah zong ciangkang ciamtehna kimu peuh leh singkung, singno kisuan kimu thei a, a mun vatsiang in singkung kihah thei a, nek ding apple, grapes, lingmaw, suaklu, sahawk, hai, kawlkai, zokai (sorry tua bang theigah min om kei ei) kingah hi. Ciangkang tawh i ciamteh hang ui, ak, kel, vatawt, lawi, vok te in 'hih pen a kiciamteh nek theih hi' cih thei tuanlo uh a, a duh lam uh a hih leh nemawhlo, a duhlo lamuh a hih leh 'mihing suan hi' cih lungsim tawh susia tuanlo uh hi. A suan mihingte adingin bel ciamtehna bucing hi a, tua om kei leh a siasak kha ding, a kimangthangsak kha ding ahi hi.

Tua ahih manin i gensa tampi leh i gen khit zawhloh ciangkang thu tawh a manphatna a kiam nailo 'ciangkang' ahi hi. I biak Pasian nangawn in ciangkang thu na gen ahih manin ciangkang thu limtak hoihtak ciantak in theih ding akisam ahi hi. Nupi te'n sing a puak uh ciang ciangkang namkhat a hi 'singkang' pen a puakkhak uh ciang 'nu ei, vakhu khasia ngello ding maw' ciin kiciamnuih uh hi; vakhu bu pen ciangkang vive tawh kibawl ahih manin a bu bawlna ding teng sing in na puaksak ciang vakhu khasia ding hi a ci nuam uh ahi hi. Vakhu leh ciangkang, ciangkang leh vakhu, ciangkang leh singkang...

Hau Za Cin
Phuitong Liim

Puanak

2010-08-15T06:43:00.002-07:00

Silh kei leng guaktang hipah hi. 'Puan' cih ciang a 'puan' pen hi a, 'ak' cih ciang 'silh' cihna hi leh kilawmtak hi. Ahi zongin 'ak' cilo in 'silh' i ci hi. Puansilh cih ding hizaw leh kilawma, puanak i ci hi. A koizaw dikzaw cih ka thei kei a, a maanzaw cih zong om tuan in ka um kei hi. Guaktanga i om ding kiselna hilel a, a min ah buaipih ding thupi lua omlo hi. Silh loh khak ding, guaktanga om khak ding pen dahhuai a, guaktang zumhuai hi cih a kitheih pan kipan guaktanga om loh manin pupa te in zong 'lungdam' na ko tangtang uh hi. Silh khin leng lah guaktanga om ding kidah a, silh ngei kei leng zong kingeina seh mai leh kilawm hi. Naungek piang tungte kei muhna ciangah zong hunkhat laiin puansilh bek uh a, pheituam teng ngeilo uh hi. Tua pen kum 30 pha nailo hi. Tuhun ciang lah naungek piangtung nangawn pheituam sungten tengta hi. A khe in lei sik nawnlo a, a pian pan puan tawh kituam in a nel, a siangtho, a limci ahoih tawh kizem sitsetta hi. Puansilh theih hi cih a kitheih ma in kuamah in nawngkai salo lel leh kilawm hi. Tuhun TV khawng i et khak ciang gam pawlkhat ah minam pawlkhat puansilh nailo in guaktanga vak bembem lel i mu thei hi. Nupi te bang a awm uh kising liahliah lel a, nopmawh sa sese lo uh hi. Pasal te bel a kivei dangdang thei ding dalna in um lawng peuh tawh tuam in thuncip uh a, a kawng vuah gakcip uh hi. A kiselna uh sang a noplo ding dalna hizaw leh kilawm hi. Amau leh amah a om uh ciang phamawh sa sese lo uh a, 'guaktang ahih uh zong kitheilo' lel uh hi.

Puansilh kisam hi cih a mukhia masasa in puansilh thupisak a, puansilh tangtang uh hi. A silh bek hilo a nop ding, a etlawm ding, a siangtho ding, a zat tangzang ding, a kep ol ding hanciam phapha uh hi. A sangpen tungta cih om theilo a, a dang behlap zel uh hi. Fashion ci dep uh a, a mel a pong tuamtuam bawl vial uh hi. A tua bang bawlsiamte hoh sum tampipi tawh kicial in a sillh masa hiding khawng kidem uh hi. A khatna ngah cih a om loh hang numeite bang a mel thak khat mu le-uh ki-eng pah in kideihgawh pah malam uh hi. A neih loh khak ding uh dah in hanciam uh a, a neih uh ciang a thak dang mah lunggulh kik uh hi. Mihing ngeina i ci diam a lamdang veve khat bel himawk hi. Vasa te, gamsa te in silh puan nei tuanselo in a bawlpa bawl bangbangin nungta lel uh a, mihing te pen 'pilna lungtang' 'sia leh pha theihna lungtang' hong kiguan ahih man hiam a tuamtuam kibawltawmtawm den hi. Mihing khat in a neih pen a dang khat tawh kheksak, a dangkhat tawh laihsak cih pen ngeina in kinei hi.

Minam khangto masasa in puan thupi sak uh a, a silhcia uh a size kidang den hi. A lian mahmah a silh nuam om a, a neu mahmah a silh nuam om hi. Silh maw silhlo cih kitel mello a deih zong om a, ngaihsutna kibanglo tek hi. Khuk ciang a pha a deih om a, khemong ciang a pha a deih om hi. Khemong dawksaklo dingin gil leh lai teng dawk leh a ci pawl om a, gil leh lai dawklo dingin pheizum ciangciang a dawk zong phamawh salo om leuleu hi. Pawlkhat leuleu lah a sungten sang tomzaw phial hilo maw cih ding khop a siing silh nuam seisai lai uh hi. Numei diakdiak pen pasalte etnop ding hanciam peuhmah uh ahih cianga amau lunggulh bang silhpah lian uh a, a awm a niam pian, kigak pian, a pheipi bul ciang kidawk cih khawng silh le uh phamawh sa khollo uh hi. Thang Ho pi in mu leh bel 'guaktang bang uteh' ci kha ngel ve. Amau deihdan a silh thei pawl a om laitak in ama deihdan nangawn a silh theilo, a kikhamcip pawl om leuleu a, a mel cihloh a khuhcip pawl zong om kik zel hi. A mel nangawn a khuhcip omlai a, mu nuam leng nik lah hisamlo in lemlem kul ding hihtuak. Buaihuai tuak peuhmah.

Banghang mihingin hizaha puan kithupisak hiding hiam cih ka ngaihsut ciang eima lungsim puakzia tek a lakkhia hilel leng kilawm kasa hi. Pawlkhat in a kang hoihsa, pawlkhat in a vom hoihsa, pawlkhat in pak tuang hoihsa, pawlkhat in ganhing tuang hoihsa, pawlkhat in a gial bilbial, a san hilhial cih bangin a nam tuamtuam om hi. Eima lungsim phasak bang ciat kisillh hilel hi. Pawlkhat leuleu lah amau deih silh theilo hi. Nasepna te puansilh nam bek silh thei uh hi. Galkap ahih leh galkapte silh nam te bek silh uh hi. Sangnaupang ahih uh leh sangnaupang silh namte bek silh. Company nasem ahih uh leh amau company te kizepna bangin kizep kul hi. Amau deihtelna kizang theilo a, a mau deih bang tuamtat theilo uh hi.

Eden Huan ah theiteh kikhui bek puan in nei uh a, tuhun ciang savun nangawn mihing puansilh in kineita hi. Sik nangawn puansilh dingin kibawl a, buangnai nangawn tawh kizemta hi hang. Patpuan leh nai puan tawh kibawlte mah thangpen lai a, a khekzo pak ding om nai tuanlo hi. Khualum leh khuavot ah puansilh kibanglo a, khuazan leh sun hun a silh zong kibanglo hi. Inn sung leh lupna tungah puansilh zong kibang nawnlo a, vakna leh biak kikhopna phual ah puansilh zong kibang nawnlo hi. Naupang puan leh picing puan cih nangawn a tuamin om a, a pumpi golna kibang mahleh a kum ham, a kum moi a puansilh kibang nawnlo hi. Khuasung pawlsung ah ama min leh za tawh a puansilh kibanglo a, pastor leh sumbawlte puansilh kidang hi. Khua khat leh khua khat puansilh deihdan zong kibanglo a, nisim nekzong leh nisim lokho te puansilh zong kibanglo hi. Nungak hel ding ciang puansilh leh nasep ding ciang puansilh kibanglo a, lengla do ding ciang puansilh leh thacial kuan ding ciang puansilh zong kibanglo hi. Kibanglo cih ciang kidang cihna hi. Kidang cih ciang a kibang a om hang, kibangkhinlo cihna hi.

Puansilh kisam hi cih kimukhia sese kei leh sum tampi kinoptuam ding hi. Puansilh leina ding teng tawh nek leh dawn ding kilei thei dinga, Buhsih leh Aksa kilim nek zaw deuh ding hi. Buhsih leh Aksa kine mun leh protein kisam kicing zaw dinga pumpi golna kibehlap in thatang thazung lianzaw pah ding hi. Lian hehaw in puansilhlo in kivak dinga, guaktang hi hang cih kithei seselo ding ihih manin nopmawh tuanlo ding hi. Khuasunga Bawngpi leh Bawngtal kikhawlte kibang lel dinga, a nopmawhna ding om tuan peuhmah lo hi. Guaktang hi hang cih kitheih sese pen a nawngkai hizaw a, puansilhloh pen a nawngkai hivetlo hi. TV ah kilang minam khat te ihmut ciang lukham zang seselo in lukham zang dan mah in a lu uh lei pan khuttum tan khawng sangkhaito in ihmu uh a, huih lukham a zang hilel hi. A sangkhai zo zawzaw te lukham sang himai a, a sangkhai zolo te lukham niam hilel hi. Patmu leh akmul cih khawng tawh lukham bawl sese lo uh hi. Amau zat ngei na dan hilel ahih manin a ngawng uh kham tuan peuhmah lo dinga, a ngawng uh kham si in cia ci-a i ngaihsutpih pen amau zatdan leh ei zatdan a kibatloh man hilel hi.

'Naked old man of India' kici liang Mahatma Gandhi bang India suahtakna ding thugen dinga Buckingham Palace a pai laiin dialkhai bek tawh Palace sung lut theilo ding a cih uh ciang, 'ka silh ding taang teng kumpipa in silhzo in kei ading om nawnlo hi' ci ziau a, London vot mahmah napi phamawh sa vetlo in dialkhai bek tawh pai lel hi. Politics in a zat kawm nop man bel hipeuhmah incin, ahi zongin ama ngaihsutna ah bel kumpi innsungah lut ding ahi zongin ama kizepna pen zumpih huai tuanlo hi a ci nuam ahi hi. India mite hauhna teng UK kumpi in hong laksak, suhsak uh teh a cih nopna zong hi kawm inteh. Guaktang phial a kumpi inn sung a lut ding pen kumpi te in na hisak theilo uh hi. Tuhun ciang i inn sungah khe buan pi tawh mi hong lengla ding hileh 'cih cih cih...' ciin kihhuai sa in i lut phal kei mai tam ka ci hi. A khe ah bawngek vom pian deda in hong bang henla, a khut ah tangho nekna khut silloh in kheng pian henla, a ngaltak leh a khepimuk khawng gial bimbiam pian henla hileh ih US, UK, Australia inn hoih nono sungah lut dingin bel ki pakta mahmah khollo maithei mate? Ahi zongin amah pen tua bang nopmawh sa khollo, a tua bang kaan om tuanlo hi cih a ngaihsun khat hileh phamawh sa tuanlo ding hi. Ngaihsutna kikimlo cihna hi lel a, a dikzaw om tuanlo, a maanzaw om tuanlo hi. Amau ngaihsutna ah dik tuak uh a, dik a sak uh leh kibanglo cihna hi.

Innvengpa hiam innvengnu hiamg puansilh lo in inn ah hong hawh gige leh i koi teng hiam nuamlo kisa ding hi. Ahih kei leh lengla neih sial in i lupna lam ah lut in i puan suah in guaktang in lenglado leng nuam sa khin khollo ding uh hi. Sangkah naupangte sanginn pan hong ciah uh ciangin a puansilh uh hong kikhek ciat uh henla, a lawmpa puan amah in silh, ama puan a lawm dang khat silhsak cih bangin hong om zen le uh lamdang kisa ding hi. Bang hi peuhmah hiam hihte in a ngaihsut uh kici dinga, lamdang kisa ding hi. Puansilh kisam nawnlo hi ciin sanginn pan hong ciah uh ciangin guaktang tawh hong tung mawk le uh 'sanginn bang kihilh na hi vua' kici ding hi. No ut bang tek in gamta un ciin sangsiate in ciahsak leh zong lamdang kisa dinga, kithukimpih lo ding hi. Ahi zong a thukimpih pawl om dinga, tuate in lamdang na sa lo leuleu ding uh hi. Bilbah bah ding hikei cih a ngaihsun te in bil kivut pen lamdang sa kha ding uh hi. Bilbah bah leng kilawm hi a cite adingin bilvutlo pen lamdang kisa kik ding hi. Pasal bilvut a muh ciang nopmawh a sa om dinga, pasal bilvut bek hilo, bilbah bah a mu pawlkhat in phamawh salo lel ding uh hi. Numei leh numei kiteng lamdang asa om dinga, 'amau thu hilel e' a ci om dinga, pasal leh pasal kiten ngeina hi kei a ci pawl om dinga, 'amau thu hi' a ci lel pawl om kik ding hi.

Puansilh ding hi a ci pawl in a silhlo te lamdang sa ding uh a, silh kisam tuanlo hi a ci pawlte in puansilhte lamdang sa ding hi. Khaukhek pen numei khempeuh in siam kul hi a ci minam om a, tua minam te bangin numei khaukhek theilote zi ding in zong na en masa lo pah uh hi. Siamgan thei hi ding a ci pawl om a, inn nupi ding hi lel uha ci pawl om hi. Pilna siamna a neih kisam hi a ci pawl om a, sum leh pai a haumi hi ding hi a ci pawl om hi. Inn kuan silh ding puanngat, puankhui numei liangko ah kinga hi a ci pawl om dinga, pasal in zong a huh kul hi a ci pawl om ding hi. Pasal bek in thugen ding, numei in gen theilo ding a ci pawl zong om ding hi.

Puansilh minam ihih ciang a khangto veva hihang a ci pawl om ding a, a silh nailote a neumuh bang om thei ding hi. A silh hang a puan nam hoihkei (low quality) a ci om dinga, amah bel a pumpi tawh kituak lianlian bek a silh nuam hita (designer's dress only) a ci pawl om ding hi. A sum hau tata in puansilh tam man lei hi tuanlo a, a zawng te in puansilh tawm man a nei hi deksuailo hi. Lamgei lampam peuha kizuak khatpeuh a lei ziauziau a om lai in, a thak ngiat bek a lei nuam om leuleu a, mi silhsa ahih hang phamawhkei a ci pawl a om mah bangin mi silhsa peuhmah deihlo a ci pawl zong om ding hi. Puansilh nam a kikhek simin ama puansilh ding a lei den mi om dinga, puansilh nam kikhek in fashion thak om taleh alui mah a siat mateng, a kek mateng, a taw kiphop mateng a silh suaksuak zong om mawk ding hi. Kumkhat silh khin peuh leh a pai pahpah om dinga, kum 20 silh khin mah leh sia nailo ahih manin a silh silh lai om ding hi.

Na puansilh in na lungsim kilangsak a ci pawl om dinga, na ut ut puan na silh hang na lungsim kidanglo hi a ci pawl om ding hi. Na puan silh dan leh na puan deih dan in na lungsim kilangsak a ci pawl om dinga, a vom a kang, a san, a dup na deihdan panin na mihingzia kilang hi a ci pawl zong om ding hi. A gial bialbual a deih om a, a gial vetlo a mel namkhat bek a pha a silh nuam zong om ding hi. Lungsim kawi leh ngian hau tehna puan a kicih loh hang lungsim kilatna namkhat hi a ci pawl om zel mawk hi. Lei zawh bangbang silh ding a ci pawl om a, mi silh bang silh ut a ci pawl om kik a, mi silh sang hoihzaw silh ut a ci pawl zong om ding hi.

Gennop tamlai si e, guai, ka puansilh hong suah phot dih ning ei.

Nuampah ei.

Zom kik ni. Puan peuhmah a pan om a, khualum ciang silh ding om a, a sah om in khuavot cianga silh ding hiphadiak hi. Lawyer te silh a vom deda khawng pen vot taleh lum taleh silh kul himawk a, India ah lawyer hi ding, Delhi khuasung khawngah khua-ul kai neunau a lawyer puan silh a vak dangdang ding cih pen en huai mahmah keileh kilawm hi. Ahi zongin tua silh kei le uh a lawyer nasep uh sep phal hilo leu leu hi. Police te bang palik puan a silh kei uh leh mi man theilo hi mawk in, puansilh pen thupi veve mawk hi. Vantung ah zong tuuno mopawi ah kihel ding peuhmah tuuno mopuan silh ding kisam hih tuak hi. Gam khangto te ah safety dress code zui lo in nasep kipan theilo hi. Nasepna sungah zong vak phalna ngahlo hi.

Puansilh ciatciat a tungsilh om a, a sungsilh om hi. A tungsilh ahih leh a nuaia silh pen a thuapna hilel a, a zepna zong hithei a, a lumsakna zong hithei hi. Puansilh thuap thum a pha om a, thuap li thuap nga zong om hi. Thuap khat bek a silh zong om hi. Thuap thum silhte adingin a nuainung pen a sungsilh hi a, a laita pen puansilh hilel a, a tungnung pen a tungsilh hi kik hi. A nuainung silh ding pen upmawh sang silhloh tawh kibang thei mawk hi. Vang siamsuam, kek siamsuam tawh kibang thei hi. Pan lua, silh thaman om maw? cihnop huai thei hi. Ahi zong, tua sungsilh omlo in puansilh kimlo a sa om zel hi. A tunga silh zong a thupi ngaihsut om a, kisam takpi hiam a ci pawl om hi. A hun leh a mun dandan hi. Gengen leng bei thei kei kha inteh, na lungsim ah na behlap tawm mai dia?

Thuap thum na silh a, thuap nih na silh zongin puansilh na hi a, thuap khat bek na silh tawh a kibang hi. Puansilhlo hi lecin puansilh thu thupi lo ding hi. Puan na silh khit ciang suah kik pahpah ken maw... ka pi in, 'to lo hi, a nit mateng silh ding hi...' ci hi. Nang pi in bang a gen a?

Hau Za Cin
Phuitong Liim

Mutpuak

2010-08-15T06:43:00.001-07:00

Nap a gen sawm i hi kei hi. Nap zong mutpuak in a kizat hun om thei mah hi. Sawm teta man hilo in sawmloh luat manin hong puak khia puat a, puakkham vetleh navak pah heha hi. Mutpuak laklak pan neih ding a kienglo pawl hikha ding hi. Khuata leh nam niam lak ah pai leng nap mutpuak bel tam diak a, kipuah kizem a ciing, a zangsiamsa lak ah tawm deuh hi. Khai, tua lam a gensawm hi kei hang.

Mutpuak i cih ciangin balloon cihna zong hi thei a, kam tawh mut lehang a puak vokphuk, bawngphuk, ngalphuk te zong hithei hi. Mihing mahmah zong mutpuak hitheizel hi. Christmas hong naih ciangin mutpuak kilei in biakinn sung zepna dingin kikhai a, huih in mut leh kivei dada in cimphawng ki enen thei hi. Ulian hong zin ding om leh vaidawnna ah kikhai thei a, etlawmsak in thupisak tuam hi. Vaitung ding khatpeuh om leh a tungah laigelh in kipia a, a dawnpa leh a dawnte adingin nuamtuam a, kimaingalna namkhat hipah hi. Nungak tangval zawl kihel ciang cimphawng in mut khawm leng nuam a, kihona ding paulap lemtang khat suak thei hi, khantawn kizopna zong piangsak thei lai hi! Puakkham leh zong mawk paih loh theih a, cialngiat leh na henna dingin zong kizang theilai hi. Thokaplupna dingin zong kizang thei a, buangnai saili henna dingin zong kizang thei hi. Hal le hang thokang hunna dingin hoih a, khedap sia belhna dingin zong kizang thei hi. Christmas Balloon hangin metna tampi tung zel ahih manin christmas kingaklah tuam a, kisapna tampi zong hu pah hi. Tua manin mutpuak pen thuneulo a, thupi veva kei mah leh neu koih theihloh hi. Leitung a bukim sak van khat ahih manin.

Mutpuak om kei leh Hitler in a office ah cimphawng a kimawlna ding neilo dinga, leitung lim kigelhna mutpuak a neih ciangin leitung ukcip thei hileng ciin thu saupi ngaihsun in kimawlpihpih lel hi. Mit phelep pawlkhat pen a mitgui hatna dingin mutpuak deihtak kimutsak a, phatuamlo ding hileh kum tampi cidamna a sin te in hun beisak in hihsak lo ding cih uphuai hi. Israel scientist te leuleu in mihing pumpi sungah cancer om thei khempeuh theihna dingin mutpuak sungah 'hu' thunsak a, tua hu pen laboratory ah etcik kik in, sin cancer maw, liver cancer maw, breast cancer maw, brain cancer maw... cih theihna in na zang ta leuleu uh hi.

Vok gawh ciang vokphuk pen a gote tapa in tang ahih manin kinaih in, kineelneel a hong suih phal loh khak ding bang kilau hi. Suang tungah vokphuk pen leivui tawh hualhual in, dokdok in, kangkangin, a nem mahmah ciang, a pan mahmah ciang mut leh puak hanhan in, phal hileh ei bang amut nuam kihi tazen hi. Ki volunteer ngap lua. Vokphuk sungah vok zun hing heuheu khawng phamawh kisa khollo dan hihtuak. A mut hatte bang kieng in nakpi taka mut puak dan bang kilimgen nuam lai hi. Tua mutpuak zong lawm leh gual huaina hi a, met mahmah veve mawk hi. Tua vok kigo lo hileh vokphuk omlo dinga, vokphuk om kei leh naupangte kimawlna ding mutpuak omlo ding hi. Mutpuak tawh kimawl kei leh naupangte bangci bawhlung suih lunglut thei ding?? Thats the beginning. Mutpuak hangin khantohna tampi piang hi. Vokphuk sang Lawiphuk, Sialphuk, Bawngphuk te lianzaw a, a suih nuam in ging kangkang a, kisui tuah kha leng zong tam hak deuh a, tam leh zong a gin ngaih diak hi.

Vantung lam ah lentohna dingin zong mutpuak mah kizang ngei a, a kipatna hih tuak hi. Mutpuak bek hinawnlo kappuak, henpuak, thunpuak nangawn omta hi. Mihing te'n kisaploh a neilo himawk le hang kilawm, a sungah huih kithun buangnai maimai zong thuneu koih theih hetloh mawk. Puak lelah kizang thei, thep lelah kizang thei, mutpuak hangin cancer natna nangawn kithei baih, theihbaihna hangin nuntakna kihun thei, kisausak thei. Khantohna mutpuak heuh cih zawk ding hiam aw. Mawtaw Horn nangawn ah kizang thei lai ci leng - 'mutpuak saves lifes' zong cih theih phial lo hiam aw! Mutmut tek ni.

Hau Za Cin
Phuitong Liim

Mutlawng

2010-08-15T06:42:00.001-07:00

Mutpu tawh kibang dektak hi. Mutpu genna hilo a, khuak genna zong hilo hi. Mei mutna gen nuam ihi hi. Semlawng a ci zong om hi. Meimut cilo in meisem aci te in semlawng ci uh a, meimut a cite in mutlawng ci uh hi. Sem hiauhiau, mut hiauhiau, ci hiauhiau, nui hiauhiau... Mutlawng a zangte mutpu kici tuanlo a, mutlawngpu zong kici tuanlo hi. Lawmte gendan ah bel mutpu cih pen khiatna tuam nei leh kilawm; tam theihpih khol keng. Tangval khat in nungak khat kiangah, 'hong ngai lua ing' ci phei ziau, nungak in zong umlo lua, 'mutpu' ci kik ziau... amau gel bel a gennop uh kitelpah hih tuak. Mutlawng leh mutpu a kilamdanna kilang.

Nupi te zingsang thobaih in meiphual tok uh a, meiam om sunsun nilkhawm in singkang keu tuamtuam sutuah in meiam tungah sia uh a, tua khit ciang lu leh taw leh muk leh kam tawh deihtak in mei a mut uh ciang khu ngeng ngang in kuangpan hi. Muk bek tawh zingthawh tunga meimut pen ollo a, muk kham in khe kham a, luvai in meivam lutung puantung teng dim hi. Tua bang ciang mutlawng zang leng huih pen lom pai zaw a, meiam mutkha zaw in kuangbaih diaka, muk leh kam leh lu leh taw pan panpih luat kisamlo zawdeuh hi. Tua mutlawng pen Mau kitan hithei a, siklawng zong hithei hi. Kua muh khiat hi peuhmah diam, a ngaihsutna hat mahmah a, ama hun ah technology khantohna namkhat hipel mawh ding hi. Tulai bang hileh technovator award cih khat bang kipia phial dingin ka um hi. "Mutlawng Founder Award" cih zong kipia thei kha ding hi.

Maulawng hileh pen sikkha leng kitam a, nawngkai mahmah hi. Kitam kha leh kidah napi mei tawhna dingin kuang nuam mahmah ahih manin lem kik bilbel hi. Mauthel tawh meitawh leng kuang baih diak a, tha tampi hong dawn hi. Siklawng zang leng bel gik deuh cih loh sikkhak hang kitam lo a, to mahmah hi. Ahi zongin siklawng koi man mu ding? Kua in hong pia ding? Koi ah lei ding? Siklawng a neizote ki eng a, ki tunget mahmah hi. Tulai bang hi leh handphone tawi tektek iPhone nei leh samsung phone nei te bang hiphiallo dia. Siklawng hileh a hoih mahmah nakhat pen mei gei ah zawhngeu a ihmut ciang photna dingin hoih mahmah hi. Maulawng tawh sat leng kihemkhia nuam mello a, siklawng tawh themkhat khawng leng 'ngeu' ci in kihempah vilvel hi. Maulawng a hoihlohna khat pen meiam sai leng a muk kanga, vut lak ah phumkik leng vom a, a muk tawt nena thei hi. Siklawng hi leh bel vaimim emna ding meiam sa thaina dingin zang taleng kang sese lo, am sese lo, a muk sa deuh cih simloh nuam mahmah hi. A sa na lam lawngkha leng bel leilak a kiatsukna gin ngaih nuam mahmah leuleu.

Mutlawng pen nungak hel ciang zat tangzang mahmah hi. Mutlawng hanga kiteng tampi om ding hi. Mutlawng in i gen ngamloh khempeuh hong gensak thei a, mutlawng in i kihilh nop khempeuh hong hilhsak thei hi. Mi i muan kei leh laikhak pia dingin zong kizang thei a, mutlawng sungah laikhak thun leng i nungak hel penin i ciah ciang laikhak na dokkhia in lupna tungah khitui luang liangin na sim thei veve hi. Ahih hang kidop pian kul. Khatna ah, mutlawng sungah laikhak koih i hi cih theihsak kul. Bangcih ding? Mutlawng sungah laikhak i guan sim khian khit ciang a mutlawng pen sangkhaito dingin nungak nu muh theihtheih dinga mutlawng vang lak ding, a muh ciang a lu su ngeungeu ding hi. Laikhak koih khit ciang mei thaina dinga zat nawn peuhmah loh ding hi. Zangkha leng kang ding a, laigelhte kisim thei lo ding hi. Nihna ah, lengla dangte theih khak ding kidawm mahmah ding. Lengla dangte in laikhak kithun sim hi cih thei leh dokkhia in sim dinga, i 'Kel lu phum' teng kidawk ding hi. Tua ahih manin ciah ding kuan ciang bek in laikhak mutlawng sungah thun ding hi. Thumna ah, ciah khiat ding ciang nungaknu kiangah, a zak khom bek in 'mutlawng sungah laikhak' cih gen sim kiau ding hi... A dangte bel Mossad leh CIA te trick tuamtuamte sanga guktatzaw a gamtat ding hi.

Mutlawng omlo hileh leitungah meikhul haksa mahmah dinga, mei mutna in kam, huih, gilpi thatang, gawlgui te gim mahmah ding hi. Tua ahih manin mutlawng pen mawk simmawh theih hilo bilbel a, a zangkhalo te in a theihloh mah bangin a zangkhate adingin zatloh sang zat mah nuamzaw ngaungau hi. Inn sungah ak hong lut ciang i hawlhawl hang hawlkhiat pak zawhloh hun om thei hi. Tua bang hun ciang mutlawng tawh deng lehang Valah phawn mahmah bangin lengkek gawp sam uh hi. Tua pen thumang dinga kihilhna namkhat hileh kilawm phial hi. Ahi zongin akno khawng dengkha leng bel thuaklah nuampian uh hi. Mutlawng zatna dang leuleu khat pen lupna tung pan thokhia seselo a 'zan zun' nawnna dingin hoih hi (pasalte bek)! Eureka... he he...

Tuhun ciang mutlawng a zang nawnlo om dinga, a zang nailo om dinga, a zang khalo zong om ding hi. Zat theih ahi cih zong a thei nailo om thong dinga, kizang hi cih a theilo zong om ngel ding hi. Theihloh pen haina ci leng a hai honkhat zong om ding cihna hi. Pil mahmah napi a hai mahmah zong om ding cihna hi. Mutlawng tawh kivua nupa zong om kha ngel dinga, mutlawng tawh kisat innkuan zong omkha thei ding hi. Possibility khempeuh theih zong pilna khat hi a, mutlawng zatna ding theih zong a pilhuai pi khat hithei hamtang ding hi. Tuhun ciang internet pan, mobile phone pan, post office pan mutlawng nasep tang isep ziauziau hangin hihbang vanzatte a om ma in mutlawng mah manpha pen thei mawk hi. Nungak tangval lia leh taang te in mutlawng zatna ding i kan kik zong a siatna lua om lawmlawm kenteh. Zat nawnloh dan ding i theih a, a khekna ding i muhkhiat leh technology khantohna a kibehlap hizel dinga, sialo giap zel hi. Ei zong hanciam lo dia.

Mutlawng na zanga na zang kei zong mutpu hi kei phot peuhmah lecin mite hong muhna zong hong tuam kha thei ding hi. Mutlawng zangpa na hiam, mutpu na hizaw hiam?

Hau Za Cin
Phuitong Liim

Kelpi

2010-08-15T06:41:00.002-07:00

Kelnawi nekna dingin Kelpi kisam hi. Kelpi om kei leh keltal om theilo ding hi. Keltal omkei leh kelno om theilo dinga, kelno om kei leh kel om theilo ding hi. Tua manin kelpi kikoihkhong theilo hi.

Bawngnawi sanga hoihzaw kelnawi nekna dingin kelpi neih kisam hi. Ei mahmah in nei ding cihna hipahlo a, kelpi limlim neih kisam cihna hi, hih leitung vannuai ah. Innvengpa in nei thei a, innnuaipa in zong nei thei hi. Khuanawl a meigong pitek tapa in zong nei thei a, khualaizanga mihau sumbawlpa kelpi zong hithei hi. Kelnawi nekna dingin kelpi neih kisam cihna hibek hi. 'Ka khuanawl pam zang vuah kelpi nei om leh ka khuasung adingin nekpih ahi thei diai mah' cih kul tuanlo hi. Munkhat ah kelpi na om peuh leh kelnawi kizuak kawikawi thei a, koilai veng peuh pan kine thei hi. Kelpi om masa kei leh bel khualai zangah i teng zong, khuapi lianpen ah i teng zong kelnawi kine khalo song ing hi. Tua manin mihingte aw, kelnawi i duh leh kelpi khawi ni, kelpi nei ni. Thupi khol kei mate. Thupi lo lua. Thuneu lah hisam kei. Thupi lua hilo cih hibek. Vaimim leh gatam sang Kelnawi limzaw thei miau hiven, gilkial peuh leh.

Bangbang ahi zongin nang kelnawi ne ngei na hi hiam? Kelpi khawi ngei na hi hiam? Dawn ding cihna hi kei, dotna zong hipah kei, ngaihsut pak ding cihna hizaw. Kei bel kelpi khawi den ngei ka hi. Kelpi no nei delh in a no matsak, khut tawh tawi, inn ah ciahpih, tui pia, theiteh puak, khau tawh khih. Kep zong buai huai veve. Khatveivei ...bhee... bhee... ci thei mawk. A no lah khual ta buang in. A no nawi a piak ciang a mei kipei velhvelh pen muhnop khawng kisa in, kinui kawmkawm hi. A gim nam pian mah leh a ek sailungtang bang pilpel ahih cianga uihlo vanglak hi. Keugaw pian leh a phiat nuam mahmah a, kihual leihleih lel hi. A buk lah ninlo, a ek lah leihoihza dingin hoih veve, double gain. A no lian deuhdeuh, a nawi piak hun tom deuhdeuh, a taw nap sung tom deuhdeuh, i lungdam deuhdeuh.

Huan sungah phalna ngah masalo a ana lutsim ciang bel lungdam khollo hi. Huanloh in mehteh mehgah teng na sialnek a, a ham a moi cilo in na mong nektoh ciang mihingte'n nek masak ding nek nunung ding ci -a lungsim gelna i neih dimdiam teng ZERO suaksak a, 'ngaihsutna kibang kei si e maw' cih tawh kikhuisa thei hi. Kei sepsa hikei tah ci hileh kilawmtak in a utte na sikcip, a utte na tuan tan, a utte na khiaktan, 'kelpi gilkial in huandai kaanzo' cih bel dik kisa peuhmah hi. Ngaihsutna kibang khin leh lah kibatlohna omlo dinga, kikem tuam ding omlo in kimakaih ding, kithuhilh ding om lo ding hi. Pasian in kelpi leh mihing a kibang mello a hong bawl khawng lamdang tak veh aw. Mihingte a kitungnungzaw a hong bawl hilai zen a. Kelpi in mihing khoilo in mihingin kelpi khoizaw hihang. Thupha ngah mihing hi mawk hang.

Khatvei lawmte khat in huan ah kelpi lut suangtum tawh a den leh dai nawl lam ah tai cih thadah huan laizangah hong puk deda mawk... bangcih ding, 'khut sil leng hoih thei' cih phawkvat, inn sungah tai in a khut va sil... rapture ni sang lungdamzaw leh kilawm phial. Kelpi na neih ngei leh a lunglut huai dan na thei dia, kelpi nei ngeilo in na innvengten a neih ngei-a nang huan na neih ngei leh a kilem melloh dan na tel ding hi. Kelpi nei leng nuam mahmah napi innvengte'n nei leh nopmawh mahmah a, en huan nei in innvengte in kelpi gilkial mahmah nei leh nopmawhzaw pek lai hi.

Kel mahmah, tuu lah hilo.

Hau Za Cin
Phuitong Liim

Bebe

2010-08-15T06:41:00.001-07:00

A min a tom in Bebe ci ziau uh hi. Giahna ding neilopa millionaire suak mawk hi. "Cristiano Ronaldo sangin ka minthang zaw ding hi," ciin ciamnuih in na genkha ngei hi. A ciamnuih cih hitakpi a, a up mawh a gen hi peuhmahlo hi ci uh hi. Amateur footballer hi lel a, nek zonna dinga bawhlung sui hipeuhmahlo hi. Cimphawng a hun beisakna dinga sui bek hitakpi kici hi. Zawnglua ahih manin nekzonna ding zong ngaihsun ngamlo a, a cimphawng bawhlung suih pen a nekzonna ding leh nipi kal nih sunga 'rags to riches' tangthu a piangsak ding leitung thupiang ding ahih lam theilo hi. Ahi zongin piang mawk hi.

"A hun a tun ciangin" cih tawh kibang mawk hi. Hauh ding hun tung mawk a, theihkholhloh in million 7.4 tawh a bawhlung siamna kilei himawk hi. Sum pekkhat zong a thalawh ngeilopa in thakhat thu a millionaire suak cih pen 'Dahpa Khuang' nei hiziau mawk hi. Nunglam sabah hi takpi a, a piang mengmenglo tangthu ahi hi.

Bebe pen Manchester United in Cais pan million 7.4 in lei ding hita hi. Kidemna ah khatvei zong a sui ngeilo, kimawlna mawkmawk ah a sui denpa pen thakhat thu in kidemna phual ah kisuisak dinga, kum 4 sungin a tunga sumzah ngah ding hi. Mi minthang hong suak dinga, leitunga sum haupen leh club lawhcing pen Man Utd ah kihel ding hita hi. Mi tampi in a neu tung uh pan a lunggulh uh, a ut uh leh a tup uh Man Utd ah vantungmite hilhkholhna zong nei selo a a lut ziau pen bawhlung sui khempeuh in a eng uh, amau tungah tung leh cih a sunmang uh ahi hi. Tua thu lamdang Bebe tungah tung hi.

Khatvei zong competitive bawhlung a sui ngeilo khat million sagih vala lei cih pen leitunga bawhlung sia laklak pan a kizahtak mahmah tawmcik lah ah khat Sir Alex Ferguson 'hai hita hiam' kici kha ding hi, hai deksuailo hi, musuak lua mahmah ahih manin 6ft 3 inch a sang Bebe tua zah in a lei ngam hizaw hi. Monday Aug 16, 2010 ciang Man Utd ah Medical nei dinga, tua zawh ciang English Premier League ah, tua ciang.... (a ban bel i theihsa..)

Kei zong lamdang sa lua ka hih manin lawp lua liang in kong gelh kha hi. Ama tangthu honkhat omlai, mikangte hong zatsak Zolai, hun khat ciang pelmawh-a i suhsak kik ding 'English' pan simtek thei lel hang. We are the world.

Hau Za Cin
Phuitong Liim

She is a Nurse!

2010-08-02T19:22:00.000-07:00

My beautiful wife,
Mine only one.

She is cute she is smart,
She is loving, she is lovely.

She cares the sick,
Day in day out.

She laugh and smile,
Whenever she can.

She smiles and shine,
Just like the sun.

She pray and sing,
To make life strong.

She read and learn,
To know the truth.

She love and kiss,
To show she cares.

She is the best,
Ever in life.

It is because,
She is a nurse!

Wishing you a happy Nurses Day!

Hau Za Cin
Phuitong Liim

Germany Champions

2010-08-01T23:04:00.000-07:00

FIFA U-20 Women's World Cup, Germany 2010 ah zindo gam Germany in Nigeria te 2-0 a zo in August 1, 2010 niin Champions ngah uh hi. Thailand ah kum 2004 in na champion ngei uh hi. Tukum a kimawl khempeuh uh khatvei zong lello in goal 20 khum uh a, amau lamah 5-vei bek lut hi. A goal khum uh a lang pen Alexandra Popp in a khum hi.

Super Falcons kici Nigeria numeite world cup masa thumte ah quarter finals vive ah kia den uh himah leh tukum pen champion ding kilamen uh a, zong hanciam uh hi. Hangsan takin sui uh a, ahi zongin Germany te hatlua mahmah ahih manin dal zolo uh hi. Ahi zongin Africa gam pan hih ciang a tung masa pen gam ahih man un lungdam takin ciah ding uh hi.

A thumna kituhna ah South Korea numeite in Colombia te 1-0 in zo uh a, a siam pen pawl mah hito uh hi. Colombia te adingin zong hihciang a tun uh a khatveina ahih manin lungnop veve ding uh hi. Tutung numei kum 20 nuaisiah WC ah pasal WC mah bangin gam lian pipi ahi lote zong a hatpawl in hong pang toto uh hi. Leitung pen khangto mahmahta, gam neute zong siamna pilna ah neuzaw tuan nawnlo.

Siampen : Alexandra Popp
Goal tam khum pen : Alexandra Popp
Kimawl Siangtho pen : South Korea

Hau Za Cin
Phuitong Liim

Siamna Taktak Kum Nih Ngak Kul by Jose Mourinho

2010-08-01T22:50:00.000-07:00

"Ka genzelsa mah bangin a kum nihna ciangin siamna taktak kinei pan hi." Jose Mourinho, leitunga bawhlung sia siampen a kingaihsun leh tu laitak Real Madrid siapa in a genna ah Club khat peuhpeuh a hilh ciangin siam taktak nadingin a tawmpen kum 2 kisam hi ci hi. Real Madrid zong 2012 ciangin a siamna taktak uh hong kilang pan ding hi ci hi. Jose in bel Chelsea, Inter a hilh masak kum in zong gualzawhna pawlkhat lapah hi. Ahi zongin gualzawhna thupi taktak pen a kum 2-na ciang ngahpan hi.

"Mihing in siamna taktak leh lungsim ngaihsutzia kikhekna taktak neihna dingin kum 2 kisam hi," ci hi. "A kumkhatna ah gualzawhna neih pen hithei mah a, tu kum zong ahih ding ka lamen veve hi," ci hi. Real Madrid te tu laitak in Los Angeles ah zin uh a, mun tuamtuam ah kidem kawikawi uh hi. "Pawlkhat pen ka upmawh sang na siamzaw in, pawlkhat lah ka upmawh zah na hi kei," ciin gen hi. Mipi gen a banlo ama naupangte om ciin a gennopna hi.

Bawhlung hi in, thu dang khat peuh ah hita leh mite upmawh ciang tunna dingin deihtaka kisin phot, hun tampi piak kul hi cih hong ngaihsun sak hi. Real Madrid pen leitungah bawhlung siam penpen teng kituahkhopna hi a, ahi zongin gualzo den lo uh hi. Amau lungsim ngaihsutzia leh a siamna uh kituaklo cihna hi. Tua bangte akituaksak dingin kum 2 bang leptuahtuah kisam hihtuak hi. Mihing lungsim thakhat thu in kikheklo a, mihing pumpi zong thakhat thu in kikheklo cihna hi. Kisinsin, kihilhhilh, kipattahtah mah a kisam cihna hi.

Hau Za Cin
Phuitong Liim

Frankfurt Ah Nai Nih Sung

2010-07-28T00:27:00.000-07:00

Lufthansa vanleng tawh New York khuapi Kennedy International Airport pan nai 9 leh minit 20 ka len khit uh ciang Germany khuapi lian khat Frankfurt vanlengtual ka tu deda uh hi. Tua lai ah nai nih sung taam in, tua pan India khuapi New Delhi ka zuan kik uh hi. Ka tuanna ding uh vanleng omna lam ka zuat lai tak in vanlengtual sung kikawi pai kawikawi a, kahlei tai ah tuang, kahlei ah tokah, tuaksuk, kikhaitohna lift te ah tuang cih bangin kikhek pheiphei a, India lam zin dingte ngakna mun ka tung ngawngaw hi. German te in Indian te hong gamla ngaksak deuh hiam ka ci phial a, ahang in midangte ngakna mun pen naicik, saupi khe tawh pai kullo, kahleitai ah tuan kullo cih bangin vanleng masa pan kumkhiat ciang a pam deuh, a gei, cih bangin na om ziauziau hi. Ahi zongin ko hong tuacih cihna ding ka theihpak tuanloh manin hong koihna mun mah uh ka zuatmai kul hi. The world seems unfair at times, you know!

India lam zuana zin ding khempeuh ka kingakkhopna mun vuah nungak tangval, nupi papi, pitek putek ban ah mingo, mivom, mikang, misan cih bangin vun mel a tuamtuam ka om ngeingai uh a, tua lak ah sari silh vai nupi leh numei tam pen uh hi. Ka upmawh mawkmawk ah Germany ah a tanau meltheihte uh nasem a om veh a zin te a ciah ding hi in ka um pen mawk hi. Ka thei tuan sam kei hi. Van lianpipi sawn uh a, puan hoih mahmah silh tam hetlo uh hi. India te pen puanak leh pheituam cih khawng a hoih mahmah a deih masate hi khollo uh a, sum gum leh van-gil khawng a deih cinten te hizaw uh hi. Tua ahih manin a zawng thilthial a bat uh hang a taktak in sum leh sumgum, van-gil pen upmawh zah val na nei nuam khin khian gige nuam uh hi. A kizep dan lel tak uh tawh upmawh khialh theih, a zawng sak theih, 'ba i them' cih theih mawkmawk hi. Gandhian philosophy, 'simple living, high thinking' hi nuam diak uh hi.

Vanlengtual sung pan khuadak leng vanlengtual ah a lengkhia dinga vanleng kileh dudu cih khawng muh ding om a, hong tu cil a khawlna ding lam zuana kikhin litlit cih khawng leh a lengkhia dinga a lenkhiatna mun ngaka kiguala ding phei temtam khawng muh ding tam hi. Vasa leh pengpelep leng cih khawng kimu khollo a, khuaivah leh khuaipi leng zong kimu lo hi. Vanleng khuai vaitung banga kileh ziahziah lak ah khuailal banga ging hehu kitamzak pen a, nek leh dawn zuakna mun pan aksa kan gim leh coffee kaang (burnt) gim nam kitam zak leuleu hi. Lawmngai kikawi leh kitawp ngakngak nau ann kimuam bang phial a kimuktuah muh ding tam a, a vom a kang cih omlo kigual phei mai uh hi. India mite zong 'inn tun ma' ciin am uh hingel lel lo dia, inn tung leh kimuh ding bek zong ollo ding hiven. Leitung pen ahih ding bang tak in hi hi kici nuam phial hi. Eima deihtelna leh eima suahtakna ciat tawh kiom hi mai a, freedom a kizang ciat cihna hi. Anne pawl, niangtui dawn pawl, vanleng en pawl, mi dang en a dak ngawkngawk pawl cih bangin vanlengtual sungah bel nasep dang om khollo ahih ciang kimanlah tek veve hi. Vanzuakna khat ah ka lut leh souvenir ka zuak uh ci a, ka et suksuk leh World Cup 2006 laia Germany Key Chain leh pen, puansilh leh flags cihte na kizuak a, kei zong key chain ka lei pah hi. Ka US dollar kizang thei a, ka Indian rupees kizang theilo bilbel hi - is it fair?

Ka khuadak phei leh a galkhat ah post office hileh kilawm tak khat om a, tua sungah nasem honkhat om tawh kibang hi. Tua inn pen a kilam saan hiam, a kipuahpha laitak hiam, a kiphel laitak hizaw hiam khat hi ngel ding hi. Vak phei a va et ka ut phial a, ahi zongin kongkhak kihong napi vakkhiat ding kikham bikbek hi. Muhnop tuamtuam kigal et kawikawi lel a, a khuasung a kimu thei na tantan ki en a, inn sang khollo leh lian pipi bek kimu in, inn bawlna kahlei sang crane leh iron bar tampi kigalmuh pen hi. Development nasep tampi kisem hiding cih hong phawksak hi. Ka pai kik ciang na thupi ngel ve!

Ka vanleng uh hong kidawh phei ta a, ka lenkik ding uh hun hong cingta hi. A lut masa ding ka kigual demdam uh a, vai pitek leh naupang puanggial silhte ama pek pan na dingkhol uh ahih manin a nunung lam ah ka ding hi. Ka maia paite in kinawh deuh leh ka khe kham phadawm ding hi a, ka cih kawmkawm in ka hun hong tung sam a, ka lut phei leh vai gim - dal, dalda, pyas, masala, etc cihte na nam vengvung mai hi. India ciah ding vanleng mah hi cih kitel pah hi. Ka tutna ding ka zuatphei leh ka tutna ding ah van lianpi khat a tungah talo na kikoih a, a neipa in a koihna ding zongin na khuadakdak hi. A taktak in van lianlua pen vanlengsung kilutpihlo a, a van bawm ah kipuasak hizaw hi. Kala te lak ah bel ahi theilo omlo a, ahi thei zong om lua khollo hi. Na kizop siam dan, na kiho siam dandan hizaw - hi thei, hilo thei. A tawpna ciang ka tutna ding hong awng thei a, amah zong lungdamtak in tuta hi, a van pen vanleng nungakte in a pamlam ah koihsak uh ahih manin.

Vanleng hong ginga, ka lengkhiatna ding mun lam uh zuanin ka tai phei uh a, ka tun uh ciang a leng masa dingte na kigual ta a, ko zong ka ngak uh hi. Khuadak kawikawi in Frankfurt vanlengtual hoihna tuamtuam ka mit dim tawh en ding ciin ka am mahmah a, ka mit hak lela in ka en kawikawi hi. Vanleng a tam dan, mi khualzin tam hi kei leh hizah vanleng omlo ding ahih dan, Germany gam ah mite khualzin nuam mahmah hi ding cih khawng ka ngaihsun kawmkawm hi. Hun khat laia gam lipkhaphuai, a kimulkim mahmah gam pen tuni ciangin science leh technology lamah a mainawt leh madawk gam hita in, amau pau mahmah zong a kizel kawikawi ahihna ka ngaihsut ciang mite pilna leh hanciamna, nasep kuhkalna te kineu ngaihsutsak theilo cih ka mu hi. Hun khat laiain gilo taleh pil in siam in hau peuhleh mite in a gam uh munuam in zuan uh a, khantohna ding zongin amau kiang pan pilna tampi sin uh hi. German mite a lian gemgam minam ahih mah bangin a thukhualna lam vuah a lungsim uh zong lian mahmah zel hi dingin ka um hi. Tua bang khawng ngaihsun kawmkawm in ka vanleng uh hong kihei dada in, a taina ding lampi maingat in hong ding a, thakhat thu in sik gin veuveu in hong ham ceca a, zinling banga kising liahliah kawmin hong tai a, hat deuhdeuh, hat deuhdeuh in a muk kilamto in a mei in zuito a, vantung ah kilamto in a lengkhia ka hilel tak uh hi.

Germany khuapi lian Frankfurt a nusia ding ka hitakpi ta uh a, khuapi tung ah leng kawikawi mah leh inn leh kongzing teng, mual neu cikcik hing dipdep te, luineu leh guazu ding meikai te cih loh mihing leh mawtaw cihte kitam muh theilo a, vanleng sang len to deuhdeuh in meipi sungah ka lutto uh a, nuailam bangmah kimu thei nawnlo in meipi bek in hong liahta hi. Kekkia te khenlam, guahzu meikai in a bop phak loh vantung leh gimna tawlna namkim omna leitung kikal ah nuamtak in ka leng diaidiai uh a, ka tutna gei a puanza lum silh in, ka tunga meivak sumit in, ka mit si in ka ihmu hiaihiai hi. Ka khanlawh ciang vanleng nungakte in nek ding dawn ding hong tawi uh a, tuate ne kawmkawm in ka masuan New Delhi leh innkuanpih it leh ngaih u leh naute kiang lam ka zuan diaidiai uh hi. Cidam in Delhi vanlengtual ah hong dawn uh a, lungdam maitai khut kilen in inn ka zuan uh hi.

Hau Za Cin
Phuitong Liim

Florida Phawkna

2010-07-27T23:39:00.000-07:00

Nai 21 sung vanleng nungakte kepkep, zuunzuun khit ciang USA kitu demdam sap hi. Vanleng nungakte zong mi mawkmawk hilo a mikang Zokam in cileng ‘mangkang’ icih diakte ahi uh hi. A khe suan uh manlang, a kal uh lah sau, a khutvik uh zong khauh ahih manin vanleng sungah nek ding dawn ding hong hawm uh ciang pai vutvut uh a, galkap khuanciah mahmah bang vatvat uh hi. Hong vik kha le uh kithallot mai leeng kilawm hi. A aw uh nem kik bilbel a, kamsiam bel nei khollo uh hi. Deih, deihlo, deih, deihlo hi ziauziau lel hi. ‘Deih pian mah veng aw’ cih nimnem, cih khilkhial te pawl kizang theilo vanglak hi. Ann hawm uh, la, ne. Niangtui hawm uh la, dawn. Theitui hawm uh la, dawn. A kuang leh bunghawm, hai guak te kipia kik a, amau zong nuihmai man nawn sese khollo in hong la kik lel uh hi. I duh lai, I deih lai leh nget kik theih a, lungdam takin hong pia kik bilbel uh hi. ‘Ei piak bang peuh na duh leh lungdam e’ bel ci duamduam tuan sese lo uh hi.

USA tung cih buang leitunga Beach minthang penpen khat a kigen Miami Beach muh loh ding ki utsamlo ahih manin kipai nuam sam hi. Beach ah pai ding cih pen nungak guaktang phialphial a tui bual TV khawngah I muhte a taktak a va mu ding cih ahih manin pasal hihna tawh kilawp mawhlo hi. Tuipi gei I pai ciang I nipisang naupangte in hong mu kei leh cih khat I lungsim in ki ut mawk hi! Paitheih, paimawh, ei zong by feih tawh kiphugawp a Florida kitungsuk sam hi. Ahi zongin Florida khempeuh Miami Beach na hilo ahih manin gam lapi mah beach etna dingin pai kul a, … tua lam den lam ciang a lem leh zomkik zaw ni.

Florida pen USA gamke khat hi a, Sunshine State na ci uh hi. Nitaang Gam cih a ngahna hang pen a gamke dangte tawh tehin Nisa tam kingah a, equator tawh zong kinai ahih manin khua lum in, khuahun tuamtuam nisa, guahzu leh meikaite in zong in na bawm deuh hi. A gam leilu lam tawh teh in hih leitaw lam gam pen simgam zaw a, buh zong piangzaw in, lo khawhna dingin zong hoihzaw a, Redneck zong na tamzaw pah hi. Tua hang mah in Abraham Lincoln te pawl in lokho pawl te tawh kikhen ding na hisak theilo uh hi. Tuate history tuampi hi. Sunshine State ahih manin gam lum zaw a, pitek putek adingin khuavot sangin a thuak nuamzaw ahih manin phalbi tawh aki kelki Florida pen teek kepna gam na suak phial hi. Mi a pensen zawh uh ciang Florida ah peem in, a sih dong uh tua ah teng uh a, vuk kia leh phalbi a khauhluatna Chicago lam sang mite in nuamsa zaw uh hi. Tua manin ‘giant nursing home’ tawh kibang ciin ciamnuih gensiamte in na gen uh hi.

Miami International Airport ah zan nai 1 in ka tuk suk deda leh khuapi sung pen mei na taang zihziah a, tuipi gei khempeuh lah kidawk ziziai ahih manin ka geia tu Spanish nungak thau lihliah zong ka en man nawn kei hi. A phei lian si, a awm lian si, a ban lian si – a lawt hi mai in ka thei hi. Vanleng sungah nek ding sawksawk zawlai. ‘Asengtaw lim ti, min o’ a cih bang un ‘Spanish te hoih ci lawt gawp uh’ kici phial hi. A hoih tuak kha lo hilel zaw ning e! Meitang lah etlawm, tuipi gei lah nopci. Inn lah sang thei tuak.

Ka tun zawh a sawtlo in Florida thu hong gengen uh a, a omsa Zomi pawlkhat tawh kimu in vamim sa peuh em in ka ne kawmkawm uh hi. Phuitong gah peuh muam in ka ne khawm uh a, a vot leh a ii, a phan leh a khumlo, a pawng leh a allo cih bang khawng nek ding kicing mahmah hi. Voksa aksa bawngsa kelsa… duhduh gen leng a kileithei hilel a, nek leh dawn ciangciang USA na patau deksuai lo mawk uh hi. Anne a hongsam tawh, niangdawna hong vakpih tawh, sumbuk leh khuasung hong vakpih tawh, milian milal bang keek in ki om a, mite hong itna leh deihsakna pen a lamdang genzawhloh zah dongin lian hi.

Hong gengen uh ciang Florida State pen na maimai lo hi. Miami pen leitung melhoih sanga tennis sat siam a minthang zaw Williams sisters te omna khua na hi a. A kimawl ding a kiphallopa pan leitungah a siampen Golf sat Tiger Woods leh a ekbuk khat bang gold tawh a kibawl a kici Miss World neipa Donald Trump te laitual lenna hi a. Let Gets Loud cih lasa siam Jennifer Lopez te, tennis star Maria Sharapavo te, actor John Travolta te, American Football siam minthang Tim Tebow te tenna gam na hi hi. Tua bek hilo Disney World, Water World, Hollywood Universal Studio, khapi tung kahna mun Kennedy Space Center, the Village, etc te omna gam zong ahi hi.

Zomi honpi khat leh midang zong a tenna mun leh gam zong hi ci kik ni.

Florida Zomi Innkuan (FZI) in thusiam takin ka tun zawh sawtlo in “Nitak Annkuang” (Dinner) hong umpih uh a, FZI kipatcil lai leh, a kipat dan, a makaite leh a nasepte uh hoihtak in hong gen in holim kawm, anne kawm, hun nuamtak nitak khat zankim dong dektak kizanga manpha kasa hi. Amau nuntakna ding bek hilo gam leh minam ading ban ah amau sung nopni dahni a kiphawk a kihuai a kihuh tuah diamdiam a a omna te uh mit mahmah tawh ka va mu a, thupi kasa a, nopci ka sa hi. Veng kigamla pipi himah leh vengsung makai leh thusa kiseh in nasep ding a om ciang in semkhawm uh a, kihuh a kul ciang sap kullo in kidelh uh hi. Zogam nuntakzia leh Zomi lungsim pai nailo uh a, itna leh kikhualna lian mahmah ahih manin mi nuamsa penpente ahi uh hi. Biakna tuamtuam a om uh hangin kikhopna hun kituaklo ahih manin ki uap liailiai uh a, camping leh crusade, seminar hunte ah kinusia lo in kisim tuah ciat uh hi. Nasepna ding kisam omleh kizonpih uh a, a cina khat om leh kikhoi uh hi. Christian innkuan nuntak dan ding ahi hi.

Zomi Community Church te in thugenna hun hong pia uh a, mi 40 val bang kikhawm uh hi. Khatvei mah a a tungpan Zomi hizah a om man pen a lamdang mahmah khat hi a, mailam ah kibehlap lai dingin ka um hi. Kikhopna a tamzaw ah kikhop tawp ciang a nek ding dawn ding innpua ah kikoih a, nasepna mun pan zong biakinn kidelh leh gilkial in kiomlo ding cihna hi. ZCC kikhopna ah makaite in thupulakna limci tak hong nei in kei leltak bang hong phat siam uh a, Zomi khat hihna tawh hong pahtawi siam uh ahih manin tua laia makai Pa Ai Mung te, Tg. Bass Thangpi te pen mi tei mahmah leh lumuhzi (kikholhkhawmna, social) a siam mahmahte hi uh cih kimu thei hi. Tua manin mi huai uh a, kikhop, kikholh zong nuam hi.

Burmese Christian Church ah Zomi World Cup 2008 makai Pa En Lian Pau in hong kikhoppih a, tua ah zong Zomi honkhat na kikhawm uh a, thugenna leh thupulakna khawng pau dang a kizat hang thungetna leh tetci panna khawng Zokam in a kizang thei lua na hi hi. Laiatpa in hong dingsak in hong muak uh a, hampha ka kisa hi. Nisuahna lam pan kipua pau ka theihlohte kizang ahih manin tua ni thugen bel a vekpi in ka thei khol kei hi. Zokam tawh bata piah lah om samlo ahih cianga.

Ka taam sungteng nitak ciang Tennis ka sat zel uh a. Shillong ah sangkahpih Tg. Lianpu zong na om a, a guitar tumna khut te tennis satna dingin zong na khauh mahmah mawk hi. Sia Mang leh sia Mang dang khat tawh, khuapih lawm leh gual khenkhat tawh zong kithuahna hi bilbel ahih manin Tennis sat pen nuam mawk hi. A gim huai dan bel gen vet kei ni in, a gei a nungakno phei ngo kikkek kisin ciauciaute en kawmkawm leng tawldam toto lel hi. Nikhat Tuipi gei ka vak uh a, guaktang a nisa ah kipho, nilum awi pawl zong na om kiukiu thong ahih manin khamtunga letli vak gimlua te ihmut ma-a Zo-aktui a dawn thute khong uh hong phawksak liang thong hi. ‘Heih, tua lam tawnzaw maw’ ci kawmkawm in ko zong Miami tuipi za pi ah ka kidiah suk uh hi. Luigal ah Europe leh Africa om a, kigalmuh banlo hi.

Lawm Thangpi (Bass Thangpi ci a kitheizaw) in “ann hong nekpih nuam ing ei” ciin hong phone tautau a, gamla tuak mahmah kasa hi. Ka ngakngak leh sawtlo cikin hong tungphei a, Tiger Woods te pawl gimnam kiza phial ding mun ah Mang-ann hong nekpih a, ngalpi a mat ni zingsang annek khit ciang, “ka lo zuak ing ei,” a ci pa bang hong phawksak hi. A inn lutna ding kelkong a tun ciang amah leh amah hong kihong kiaukiau a, a inntual ah a mawtaw hong khawlsak in, a innsungah ngalkhat banga a tang lupna room khawng hong lak kawikawi a, ‘nang bek tenna dingin pammaih si’ kici dekphial hi. Zolia kua peuhmah in a hamphat lawh tam maw! He he… Pa Thang family ten ann hong nekpih ciang a inn uh Five Star Hotel tawh kibang kasa a, meh tam si, khamvalte India lamah kipua thei leh ka utphial hi. ZCC makaipi Pa Ai Mung, USA ah Zomi te Sushi hual a pattahpa leh minam akhual mahmah in deihsakna annkuang hong umpih ciangin Zomeh leh Mikangmeh ka duh zawkzawk ka suak ziauziau uh hi. Founder hih ding a ut phadiak Zomi te sungah ‘kei Sushi founder hi’ng’ cih lungsim a nei tuanse lo, a kiniam khiat hih bang Zomi makai Florida ah a om pen hua lai zin kha Zomi peuhmah hamphatna ding hi. “Na laigelh I sim ciang Phuitong Liim ciden na hih ciang Phuitong phawkna in Phuitonggah ne ni,” ciin ann kham ciang inntek Pa Paupek in Phuitonggah kuang dim mahmah hong lui khia ziaizuai a, a dup deuhdeuh ka ten masa ciat uh hi.

Zomi World Cup USA 2008 hun sungin bawhlung sui kawm in ka pai leuleu uh a, tua ciang bel Washington DC Zovontawi te tawh ka hi uh hi. Ka team manager uh Pi Lun, Zotaang Home hi a, ama makaihna nuai ah quarter final na tung uh hi. Voksa, niangtui, moh, theitui, a kisam khempeuh amau hong vaihawm sak ban ah ka zinpi uh Pa Ai Mung te in lupna hong awn zawmah uh hi. Ann lah hong vak, a kisam khempeuh Zongeina diktak in mi 24 khawng hong vak zihziah uh hi. USA cih hang tuazah zindo ding pen ollo veve ding hi. Pa Lam Khup te tawh hong zindo nate khempeuh uh Zomi hih a nopna hi ciin ka ciamteh den lai hi. Tua bang mah in innkuan dangte in zong Zomi bawhlung siamte na zindo tek uh a, FZI te thupina kilang kasa semsem hi. Khatvei bek hilo a, kumsim ahih manin FZI te mi mawkmawk hilo uh hi cih ka phawk den hi. Bawhlung kisui, kigualnuam, kikhawlkhawm, etc. Zomi hih a nop mahmah hun ahi hi. Tua bang hun ah Florida ah om kha ka hih manin hampha ka kisa hi.

Florida ka phawkna khempeuh gen khin zolo ding ka hih manin a tom in gen zalzal ding ci leng: Pa En Lian Pau inn ah vamim sa ka em uh; Pa Khaipi in bawhlung sui Zovontawi teng ama mawtaw tawh hong puak ngiat a ann hong vak tawh; Phuitonggah limci tak ka nekna uh Pa Paupek inn; Zomi Christian Church ah thugenna hun hong kipiak leh hong kipahtawi; Miami beach ah khedap mangsak lianga ka vakgawp ni uh; mikang nungakte gei court ah Tennis ka sat nitak uh; FZI in nitak annkuang hong umpih uh; Jenifer Lopez inn gei lamah nitak tuipigeia lasa ka ngaih nitak uh; Hooters te gamtatna mun pawlkhat ka etna mun uh; Sia Dopi tawh ngasa ka siah vua ngakawi tawh ngasa anglang khat ka mat ni; etc… A dang tampi gen khit zawh pak ding ahilo pawl zong omlai.

FZI in hih banga laigelhna ding hunpha nong ngahsak uh ka lungdam. Mailam zong Topa’n minam leh gama ding sepna khempeuh hong gualzawhpih zel hen. //

Hau Za Cin
Phuitong Liim

Rags to Richess (Zawnna pan Hauhna ah)

2010-07-26T20:49:00.001-07:00

Zawnna pan Hauhna thu pen mi khempeuh lunglut lam hi bilbel hi. A zawngte lah lawp, a haute lah lunglut sem! Tu lai leitung sumbawlna a niam duaiduai laitak semsem in mite in zawnna pan hauhna tangthu thei nuam uh hi. A diak in thakhat thu a hau vat cihte tangthu.

Singapore ah Christine a kici Philipino numei khat kum 20 sung innteng a sep khit ciangin a innteng sepna nu in sihsan a, a nusiat sum million 6 (Singapore sum) leh innpi khat khuapi laizangah ah pia hi (luxury apartment at Orchard Road shopping area)! 'Dahpa Khuang' tum mah bang pah zuai cihna hi. Bawhlung siam Cristiano Ronaldo tapa' nu zong kha 9 sungin millionaire suak ziau hi. Tapa a neihsak manin Ronaldo in a min a kigen nailo numei a zattawm pak dingin USD million 15 pia hi. Amah bang English siam mello hih tuak laia, Los Angels a zinpakna ah ansai ah nasem numei khat kiangah, “you, me, f*ck, f*ck,” a cih ciang tua nu in bang acihnopna hiam cih theipak lo a, a theihsiam ciang, na theihsa... zankhat giak khawm.. June 17, 2010 niin tapa nei uh hi. Nopsi, hauhna lah hisi... he he...Tua banga thakhat thu a hau vat, 'Dahpa Khuang' tum a bang khinlo, zawnna pan hauhna a ngah mi 10 tangthu i gen nuam hi.

Zawnna pan Hauhna tangthu ah 'Dahpa Khuang' a kizat theih hangin tua Khuang a neilo mite zong a tup tinten man uh, a kimuan ngam man uh, leh a thuakzawh man un na tung veve uh hi. Pawlkhat sut suk leng:

1. John Davison Rockfeller (July 8, 1839 – May 23, 1937) : Unau 6 lak pan a 2-na hi in, a pa letli sem hi. A nu dik mahmah napi apa pen van zuakna ah citaklo in mi khem ding leh zuaugen ding bek tawh summuh sawm hi. Hamsapi in sangkah in a zawh ciang nasep ngah a, kha 3 ciangin USD 50 bek sang hi. Ahi zongin a khasum muh masak pan sawm-ah-khat pia pah hi. A tom in gen leng, van nen alu, muamkhum, aksa cihte lei in a meet mu in zuak kik zel a, a sawtna ciang a lawmpa Clark tawh sumbawl hong kipan uh a, meitui khaihsiangna Oil Refinery hong bawl in, tua pan oil company hong behlap to uh a, a lawmpa share teng zong a leisak khit ciang a nasepna ding gam lianpi khat New York khua ah hong lei uh hi. Tua ah Standard Oil company hong pan uh a, a upmawh hetloh uh oil reserve lianpi a nei hong suak hi. Leitunga 'billionaire' masa pen hong suak hi. Tu hun tan in ama hauhna leh sum lei sum khek a kituat ciang, amah sanga hauzaw leitungah om nailo bangin kituat hi.

Amah pen 'a piakhia pa' zong kici hi. Midang a khual leh panpihna limlim a ciil vetlo, mite huh leh panpih ding a hanciam penpen leh tulaia Philantrophy i cih thukkik lamenlo a nasepna pen ama picinsak hi a kici liang hi. A tate khangah UNO hong om ciangin tuni a UNO office zong amau innkuan in a USD million 8.5 tawh a leisak uh hi (a tapa in). Tua bek hilo, cidamna ding a khualna leh a hanciampihna hang tawh (sum tha tawh huh) hookworm leh yellow fever kici te zong a kibeisak zo hi kici hi. A sih dongin zu nelo, za teplo a kidek suakpa hi. [US gam huazah a hau leh nopsa ah tuate ut banga kizang thei hinapi a kidekzo cih pen a lamdang kasa hi]. University of Chicago leh Rockefeller University te zong ama phuat hi a, i telsiam dingin founder ahi hi! Christian biakna ciik tak zuipa hi a, Northern Baptist mi ahi hi. A sih dongin Christian biakna adingin a sep, a bawl theih khempeuh ah huh in sem in hanciampih pa ahi hi.

2. Ozzy Osbourne (3 December 1948 - ): 'Black Sabbath' ah lasa siam minthangpa hi a, a nu leh pa factory ah nasema sum thalawh tawm ahi uh hi. Amah zong kum 15 a phak ciang sangkah tawp in construction site ah labor nasem a, 'tong kuppih theihloh siksem' tawh bangtan hiam hun a zat khitteh puan gu ahih manin kimanin thongah ni 42 kikoih a, tua pan hong pusuah ciang lasak hong kipan in Heavy Metal phuankhia leh minthangsak pawl ah hong pangto suak hi. A pianna UK gama khua lianpen Birmingham leh a nasepna LA, USA kawm tuahtuah lai hi. A zi, i theihsa American Idol ah host a sem Sharon pen hi a, a zi masa Thelma Riley bel UK ah sangsia sem suak hi. Christian hi in, Church of England ah member hi a, concert a neih ding simin stage a tunma in Pasian kiangah thungen den hi kici hi. 'Tong kuppih theihloh siksem' tawi lak pan leitung dong a zelsuak lasa siam leh mihau ahi hi.

3. J.K. Rowling (31 July 1965 -): "Harry Potter" tangthu gelhnu England gama Yate khua ah piangin, BA a zawh ciangin 1990 kumin Portugal gam ah English lai hilh dingin pai hi. Kum 3 zawh ciang ciahkik a, a sanggamnu te khua Edingburg, Scotland ah tengin kumpi huhna sum 'welfare sum' tawh nungta hi (US te 'food stamp' a cihte). Zawnglua, kumpi vaksa a a om sungin a neu tung pan a lunglut tangthu gelh a, kum 5 sungin leitunga mihau 50 kitelna ah kihel ban a, a hauhna USD 1.1 billion hi kici hi. England gamah numei mihau 12-na in kituat a, a hauhna sum ban ah a laibu Harry Potter pen bu million 400 kikhawng mawk hi. A hauhna mawk ipcip lo in panpih ngaite panpih a, philantropist, Comic Relief, One Parent Families, Multiple Sclerosis of Great Britain leh Children's High Level Group cihte nasepna huh hi. Manchester pan London a zin ding ni, 1990 kumin Harry Potter tangthu ding a lungsim ah hong kilanga, tua te Niangtuisai (Cafe) tuamtuam ah a pasal tawh a kikhen ma a neih a tanu ihmut kal in gelh samsam zel hi. Tua a gelh khit a kipan a ban khempeuh mikim theih hita hi.

4. Jim Carrey (January 17, 1962 - ): "The Mask" leh "Ace Ventura" ah ciamnuih bawlpa pen Ontario, Canada ah piang hi a, a nu leh pa factory ah nasem mah hi in, amah zong a sangkahna ding sum thalawh tawm in factory ah a sem ahi hi. Ciamnuih a lunglut luat manin a sangkah hoihtak zong zom theilo in, nasep tawh thuah kawm ahih manin a tawpna ciang a ciamnuih bawl theihna ding lawm zong a, a muh ciangin tuni a etnop i sak mahmah ciamnuih bawlpa hong suak in, leitungah ciamnuih bawl man a kipia tam pen pawl hong suakzo hi.

5. Oprah Winfrey (January 29, 1954 - ): America ah Teenage Pregnancy cih kithang mahmah a, Oprah zong 'unwed teenage parents' kici kal pan Mississipi ah piang ahi hi. A pian ciang a nu leh pa kiteng tuanlo in 'kikhen' uh a, a pi in kem hi. Kum 3 a phak ma in laisim dan siamsak man a, laipil ahih manin kipakta mahmah hi. Kum 6 a phak ciangin Milwaukee ah anu tawh om dingin pai a, nek tawm ding zong tawm mah in nungta uh hi. Oprah pen gilo in inn pan taimang a (tanu taimang) a nu in Tennessee ah a pa kiangah sawl hi. Laisiam lua mahmah ahih manin a thei khempeuh in pakta in Radio host semsak uh a, tua pan news gen, tua pan TV host, khangtoto hi. Tuni in Oprah in ama show "The Oprah Winfrey Show" nei a, TV Channel zong nei in Magazine zong a nei hi. Leitunga numei mi lungsim zo pen in kiciamteh hi. [America ah thukante in a kankhiat zawhloh pen Oprah in olno in kankhia ziau hi kici hi, kizahtak mahmah hi.] Kum 9 a phak in kibuan (rape) a, kum 14 a phak in tapa nei hi (a tapa naungek in si). Kum zalom 20 sunga African American mihau penpen in kiciamteh a, America tangthu ah mivom midang panpih thanuam penpen (greatest philantropist) hi in, hun khat lai amah bek leitungbup mivom lakah 'billionaire' ci-a kiciamteh ahi hi (the only black billionaire) .

6. D. Ambani (28 December 1932 - July 6, 2002): India gama Reliance Business Corporation neipa pen a neu laiin lam gei ah van zuak a a summuhte a nu a pia ngei khat hi a, sum a zon theih ciangin Arab sumbawlte nuai ah sem in sum zon a kipan ahi hi. Tuni in leitunga innkuan mihau lak ah a 2-na, Walton family te zom ahi uh hi. A hauhna uh USD 60 billion in kiciamteh hi. Telecom, Refinery, Insurance leh a dang tampi sumbawlna nei uh hi. Amah a sih ciang tu'n a tapa te gel in apa sumbawlna zomto suak uh hi.

7. Jackie Chan (April 7, 1954 - ): Pemta hi uh a, China pan Hong Kong ah China Civil War sungin a galtai refugee ahi uh hi. Hong Kong ah piangin a neu tung panin ommawh lua ahih manin 'paopao' ciin sam liang uh hi, sailungtang cihnopna hi, kikhuk den, kihual den, ommawh lua cihna hi. Sangkahsak uh a, lai kia pah ahih manin tawpsak kik pah uh hi. A nu leh pa Australia ah annhuan dingin a pai uh ciang amah pen China Drama Academy ah lutsak uh a, martial arts leh acrobatics siam tuam diak ahih manin sanginn mina kalsuanna peuhah madawk tangpah hi. A kahpih Sammo Hung leh Yuen Biao te tawh lawmta suak uh a, The Three Dragons kici uh hi.

Kum 8 a phak ciangin "Little Fortunes" ah panga, kum 17 a phak ciangin Bruce Lee film "Fist of Fury" leh "Enter The Dragon" te ah stuntman in pang a, tua laiah ama min Chan Yuen Lung hi.

8. Michael Jackson (August 29, 1958 – June 25, 2009): A nu leh a pa pemta mah ahih man un factory ah nasem uh a, a pa in R&B te tawh music tum khawmzel hi. Unau 10 lakah a 8-na hi a, "King of Pop" cih min kipia liangin, leitung ah pop culture a minthangsak leh entertainer, artist leh midang panpih thanuam (philantropist) khat ahi hi. Guiness World Record in a ciamtehna ah leitungah "most successful entertainer of all time" ci uh hi. A music, a lam dan, a kizep dan, leh ama mimal nuntak zia khempeuh in tulaia popular culture kici pen a kipsak ahi hi. 1960 to pawl in 'The Jackson 5' cih mintawh lasak kipan uh a, a sih tan in kideih lo cih om ngei nailo hi. Mi lamdang ahi hi. Factory nasem leltak pan leitungah hizaha minthang thei a hong om ban ah hip hop culture, contemporary R&B leh rock cihte zong lawhzo mawk hi. Lamdan 'robot' leh 'moonwalk' kici te ama patkhiat ahi hi.

9. Manny Pacquiao (December 17, 1978 - ): Kum 2007 kumin High School zo pan a, kum 2009 kum in Doctorate kipia hi! Hih Philipines pan boxer pa pen leitung ah zawhna sagih, gihna sagih pan a lapa hi. Gihna nam li ah lineal championship a lapa hi a, tu laitak "No.1 boxer pound-for-pound" a hi hi. Ama tup khempeuh a gikna kibang peuh leh a zo denpa cihnopna hi. Hizaha kitup siam pen a lamdang a kisa pian hi. Amah RC biakna kiptak a zuipa hi a, biakna a thupi sim mahmah pa ahi hi. Kum 6 a phak in a nu leh pa kikhen a, kum 14 a phakin a nu bek in nekzong zolo ahih manin nasem in kuankhi a, a sanggam 4 te vak hi. Tua manin sangkah theilo a, kum 2007 ciangin exam kik thei pan hi. Boxing a lunglut ahih manin tua lam ah paizaw zong cih theih hi. Kumkhat a summuh USD 40 millions pha a, athletes thaman sangpen ngahpa kici hi. May 10, 2010 niin Member of Parliament dingin kitel a, professional boxer lak pan MP a sem masa pen hi.

10. A 10-na pen kua hi ding hiam? Zomi te a hi diam?

A sawmna ah Zomi ahilo, ahi hizaw hiale... lasiam Dolly Parton ka koih hi. A zawnna uh "Coat of Many Colors" cih la a phuahnu hi a, "I will always love you," "Love is like butterfly," "Jolene," "Where Have All The Flowers Gone?" "Islands in the stream," etc. cihte a sa nu hi. Country Music powerhouse Tennessee ah January 19, 1946 in pianga a, 'a pianpih' a kici phial country la sak siam ban ah laphuah, acting, leh midang panpih (philantropist) semnu ahi hi. Kum 45 sung la a sakna ah 25-vei top single hipha a, 'The Queen of Country Music' kici liang hi. Unau 12 lak pan a 4-na hi a, a neulai a zawnzia uh a gen ciang amah leh amah, "dirt poor," kici hi. Christian hi in, Dollywood Foundation pan a, a neu tung pan music hangin biakinn naih den nu hi.

COAT OF MANY COLORS by Dolly Parton
Youtube: http://www.youtube.com/watch?v=Wv4NBF8nQvs

Back through the years
I go wonderin' once again
Back to the seasons of my youth
I recall a box of rags that someone gave us
And how my momma put the rags to use
There were rags of many colors
Every piece was small
And I didn't have a coat
And it was way down in the fall
Momma sewed the rags together
Sewin' every piece with love
She made my coat of many colors
That I was so proud of
As she sewed, she told a story
From the bible, she had read
About a coat of many colors
Joseph wore and then she said
Perhaps this coat will bring you
Good luck and happiness
And I just couldn't wait to wear it
And momma blessed it with a kiss

Chorus:

My coat of many colors
That my momma made for me
Made only from rags
But I wore it so proudly
Although we had no money
I was rich as I could be
In my coat of many colors
My momma made for me

So with patches on my britches
Holes in both my shoes
In my coat of many colors
I hurried off to school
Just to find the others laughing
And making fun of me
In my coat of many colors
My momma made for me

And oh I couldn't understand it
For I felt I was rich
And I told them of the love
My momma sewed in every stitch
And I told 'em all the story
Momma told me while she sewed
And how my coat of many colors
Was worth more than all their clothes

But they didn't understand it
And I tried to make them see
That one is only poor
Only if they choose to be
Now I know we had no money
But I was rich as I could be
In my coat of many colors
My momma made for me
Made just for me

... Zokam in a deihte in ei ading ciat aw...

Hau Za Cin
Phuitong Liim

Nurse

2010-07-26T04:30:00.000-07:00

'Nurse' i cih pen cidamna dinga nasem pawl lak ah a kep, a khoi lamsang a sem deuh leh a kisapna mun ah zatui sun, zatang pia, natna pan kidalna ding mite hilh, kikep dan ding lamlak, innsung, khuasung, leh tualsung ah cidamna a om den theihna ding makaih leh tangko na asemte ahi uh hi. Theihkholhloh natna hong tung vat lak pan kikep zia dingte leh tuahsia (accident) vat om leh a kem a domte ahi uh hi. Zatui hoih leh cidamna hoihzaw a kisapzia a kan pawl leh tua dinga nasem pawl zong ahi khawm uh hi.

Florence Nightingale hanciamna tawh nurse nasep leh a sinna sanginn hoih a kisapzia hong khangto a, tua ma peuhmah in nurse pen nasep ngeina khat mawkmawk leh a kigelhsa laibu zui a nasepna khat hilel hi. Crimen War sunga Florence Nightingale nasepna hangin nurse nasep pen mawkmawklo hi cih leitungin hong mukhia a, ama hanciamna hangin galsunga galkap liam tampi a si ding nuntakna kihonkhia hi. Tua hangin amah pen "Meivak A Tawi Numei" ("The Lady with the Lamp") kici liang hi. Zan ciang meivak tawiin cina te veh, kem, khoi kawikawi ahih man hi. Tua ma in zan cianga cina veh kizang nailo a, ama hun pan a hun maan zuia zan, sun cih omlo a cina kep ciangin nuntakna tampi kihonkhia hi cih a kimukhia hi. Tua manin tuni tanin Nurses Day zong Nightingale suahni May 12 in kizang ahi hi (b. May 12, 1820). Hih Italy gam Florence khua ah pianga a pianna khua mintap a zangpah Florence Nightingale in, "Topa'n hong hopih a, Ama nasem dingin hong seh hi," ci hi. A khantawn pasal neilo in Nurse nasep bek ah a hun khempeuh zangkhin a, kum 90 pha in 13 August 1910 zan a tenna inn 10 South Street, Park Lane, London pan a ihmu suak in si hi. Amah zong nung deuha i Zomi sungpan master degree lukhunelkai khu Pa Dong Mang sanginn King's College London nuai ah a om St. Thomas Hospital pan nursing a sin ahi hi.

Crimean War i cih pen October 1853 – February 1856 sung Russian Empire leh a langkhat ah Bristish Empire, France Empire, Ottoman Empire, leh Kingdom of Sardina cihte pangkhawm a Crimean Peninsula zul tenga kidona hi a. Britain ah Russian War kici a, Russia lamah Eastern War ciin ciamteh uh hi. Kidona min zong a tuam tek!

Tua Crimean War sungin Florence Nightingale leh a lawmte mi 38 galdo British galkap liamte kem dingin 21 October 1854 niin kipiakhia uh a (volunteer), a liamte hoihtak kikemlo, zatui zaha kicinglo, cidamna ding kithupi ngaihsutlo, nek leh dawn siangtholo, natna kilawh tawm hangin tampi cina kibehlap cih a mit mahmah tawh a muh ciang nakpi in hanciam nopna hong nei a, hong hanciam saan in, nasem a, leitungah a mang ngei nawnlo ding nasep hoih minphatna hong ngah hi. Kum khat zong a om ma in mihing tulli val si man a, zato siangtholo, huihsiang lutna ding kibawllo, galkap liamte kikoihkhawm lua, tui niin paihna kician omlo cih bang ahih hang hi cih mukhia hi. Ama omzawh kha 6 sungin galkap liam sihna 42% pan 2% ah kiasuk hi kici liang hi. Ama nasepna hang leh siangthona leh annek siangtho ding a uanggen leh malakna hangin galkap tampi nuntak lawh ban ah British kumpi in tua hun pan kipan siangthona leh nek leh dawn siangtho piak ding cih galkapte adingin hihsak hi kici hi.

Meivak tawia cina a kep bek a nasep na hilo mawk hi.

The Times thukizakna in, "Meivak A Tawi Numei" thu hih bangin na ciamteh uh hi. "Amah pen uanggen hetlo in 'nasem vantungmi' hi mai a, amah meivak tawikawma bikhalap zul ah a pai a kimuh peuhmah leh natna hanga lupna tung ngak peuhmah lungdamna tawh na kidim den uh hi. Siavuan te a ihmut khit, zan khuamial leh gamdai ah a khut a meivak tawi kawmin amah bek in vak khiankhian in cina te a kem hi."

English laphuak siam minthang H.W.Longfellow in 1857 kumin hih bangin la na phuah hi:

"En un, hua inn gamdai tak sungah,
Meivak A Tawi Numei khat ka mu hi
Mite lungzinna a tangsak dingin
Dei khat pan dei khat ah a pai kawikawi hi."

Hih Nightingale nasepna hangin tuni dongin Nurse nasep pen a ki pakta mahmah nasep hi tawntung hi. Lasinna sang hunkhop khat a ngahte bek kisinsak ta a, sem thei ding cih a kimuangte bek in semsakta uh hi. Amau siamna tawh kituak in galkap bangin a sep theih ciang uh kiciantan a, mi a kem thei ciang, cina a khoi thei ciang, zatui zaha a pia thei ciang, cidamna lam tawh kisai a makaih thei ciang cih bangin na khentoto ta hi. Pilna sinna sang college leh university tan ah zong nurse sinna na omsak ta uh a, diploma bek hi nawnlo degree zong kipia ta hi.

Leitungbup ah a tamzaw numei hi a, ahi zongin Africa gam pawlkhat Ivory Coast, Cameroon, Burkino Faso, Chad, etc ah numei sangin pasal nurse tamzaw hi. Europe sungah zong Spain, Portugal, Italy, etc cihte ah za ah sawmnih (20%) pen pasal na hi uh hi. UK, USA, Canada cihte ah nurse kicinglo den a, gamdang pan mite pai ziahziah uh hi. India gam Kerela bang "Bang piang hiam?" kici leh "Nurse piang hi" a kici liang hi kici hi. Gamdang bek hilo India sungah zong Kerela te nurse sem tampen hi kici hi. [Amau state pen India ah laisiam tamna pen state ahi hi.]

USA leh Canada gam bangin "national speciallity certifications" cih khat na panta uh a, tua deihna in nurse khat pen ama siamna tuam neih a siamsem dinga sinsakna cihna hi. Medical doctor te banga specialist suaksak ding cihna hi. Tua pen gam khangto te ah kizang mahmahta hihtuak hi. Sin lam siamte sin lam bek siamsem dingin sinsak, Kal lam siamte kallam bek siamsem dingin sinsak, gilpi lam siamte gilpi lam bek siamsem dingin sinsak cih bangin. International Council of Nurses te in 'nurse nasep pen nisim kisin behlapna tawh kipelh theilo nasep hi' ci hi (nursing education should always include continuing education activities). Thuthak, kikepdan thak, zatui thak, cidamna ding nasepzia thak, natna pan kikep dan ding thak cih bang a om simin tawlngalo a sintoh zel ding cihna hi. Tua bang hanciamna a picingsak ciat dingin International Council of Nurses in gam khempeuh ah Nursing Council khempeuh hanthawn in ahih takpi ding uh zong deihin lamen hi.

PS: Zomi te nurse sem bangzah om a, bang hun pan nurse sem om a, kua masa pen a, kua in zom a, kua in bangci in nurse sep ding kihanthawn, kipattah cihte ka thei tuan kei hi. Hih tawh kisai a theite in hong behlap (ahih kei leh a thu kicingin hong at) leh Zomi te adingin thu theihhuai, theih dinga zong kilawm leh a keptak tangthu khat hi dingin ka um hi. Tulai leitung khantohna ah Zomi te kalsuanna khat ahih manin mailam ah a semto zel dingte leh a sem laitak khempeuh adingin tangthu gina khat ahih ban ah, tha hong pia, hong lunglutsak, hong hansuah den khat ahih ding ka lamen hi.

Kei theih bel tamlo a, nurse te a khut uh neel mahmah ci (ka lawmte'n, sangkah lai)... ha ha ha...

Hau Za Cin
Phuitong Liim

India Laptop 35 Dollar bek man ding:

2010-07-24T01:20:00.001-07:00

Apple te iPad zawh ciang India zong van man tawm bawlkhiat hong hahkat vial ta hi. Nano car lah dollar 2500 khawng bek man dinga kibawl hi a, tun touch screen laptop computer pen dollar 35 bek man ding hita hi. Tu ciangciang ah China van man tawm kici a, India in a dem nuam hikha ding hi. Laptop 35 USD man a bawl uh bel India gamsung sanginn ah zat ding a kibawl ci phot uh hi. IIT leh IISc te bawl hi a, gambup hanciamna tawh a kibawl hi. India sumin Rs. 1500 man dinga, sangnaupang adingin 50% discount tawh 750 INR tawh kingah thei ding hih tuak hi. Na deih hia? Kong khak dia?

Pawlkhat in van man tam kidem uh a, pawlkhat in van man tawm kidem uh hi. A hoihzaw ding ngaihsutna vive hi inteh maw? Car millions tampi man om a, tawmcik man zong om, a tunga tuangte lah mihing tuaktuak hilel. Leitung luah dingte lah hituan lo.

WC laia bawhlung siam bawhlung sui nuamlo te FFF team te tawmkhat sung a sui theilo dingin khawlsak phot uh a, kua tengin sui kik thei ding cih kikum lai ding uh hi. Piantit cih pan France ci a Zokam thak i laih toh laitak a hih bang buaina tawh bawhlung siam tampi a siapa tung vuah a lungkimloh mawk uh pen bawhlung lunglut mipite hamsia phial mawk hi. Euro 2012 qualifier ah WC team a kihel lo teng in sui phot ding uh hi, a vai uh a siang mateng. Maradona bel Argentina in sia semsuak leh deih a, amah bel nungak melhoih kigente mah bangin "OK" ding maw "OK lo ding" a ngaihsut laitak hi. German gama WC Octopus Paul pen Spain sumbawl khat in (summetbawl cih ding hizaw) USD 66,000 tawh lei ding in kun a, ngah nailo hih tuak hi.

Facebook ka kisin zawh kal khat pha pan napi leitungah a zang mihing million 500 om ta ci tazen uh hi. Leitung mihing 14 lak pan 1 ta in facebook a zang suakta ci. Nang a koi lamah na om a - 1 lam ah maw, 14 lam ah? Leitung pen manlang takin a kikhek ziahziah hi mai ei. Zomi te kikhek zong manlang e, tuzawh kum 100 ciang Zomi Zogam a paal zihziah keileh Zomi cih peuhmah kiza lo deuhdeuh ding hi, tua zah a manlang ding ahi.

Korea lam zong na kido dekdek uh e. A kul leh Nuclear zong ka zatmai uh kul ding hi, cita. US leh S Korea in galsinna a neih ding uh N Korea in mitsip sa pian hihtuak. Nuclear kido a cih uh hong om leh mu nuam mah hange na ci phial na? Japan gal lai a pen kimu manlo a, ei hong su kha kei peuh leh cih nop huai phial. Ahih hang i leitung zan cip dinga, leitungbup a hi kei zong a khakna ciangciang zancip dinga, vut leh vai suak ding hi. A zo cih om theilo ding kici a, a lel cih omtheilo ding kici hi. Tua bang galvan zat ding pen mi khempeuh in a mulkim uh hinapi US, UK, Russia, China, France, Israel zong ahi tam maw in nei zihziah uh himawk hi. Zatloh dinga kibawl lah hi kei ven cin, a kizat ciang i muh man leh muhnop ngel ve; a mumanlo in i pan leh lah vut leh vai kisuak manlang ve... Nuclear galvan a lauhuai dan uanggen huailo napi theih dinga hoih mawhlo khat hi.

HIV/AIDS khoppi Vienna ah thu kigen leh HIV/AIDS dona ah a kizang zatui, gel, zatang, etc. te thu i theihteksa hi. A gen ding nopmawhpian hikei leh Zolai tawh gelh in kikoih leh sia khollo ding hiven. I gelh sawm ciang i ci zia daldal e, mate.

Hau Za Cin
Phuitong Liim

Pasian Thugen Siam Kasak

2010-07-23T23:22:00.000-07:00

Pasian thugen siam kasak te pen kei mawhna a gen kha lo, midangte mawhna leh midangte kibawlphat kulna teng a genkha den, kei hoihlohna leh kipuahna ding, kibawlphatna ding lam peuhmah a genkha vetlo hi masa hamtang hi. Mite acici dan khatin gensiam leh kei pen muk tuk liang, kam ka hehaw dektak liangin a ngai pah pawl ka hi hi. Kei hong cihna kiau khat a om leh lah ka tumna ding, ka kiselna ding ka bukna ding azong pah, tua lam gen nawn kei leh hoihding hi a, a ci nuam pawl ka hi hi.

Mawhna leh khelhna khawng tam gen lo dingin ki it ding, kingaih ding khawng uang gen khollo dingin sep ding bawl ding leh piakkhiatna khawng awlgen zaw ding. Kha Siangtho ngahzia leh limna, lawpna lam khawng zong tam gen lo mai ding. Kei hih theih lam ahi, mite khual ding, hanciam ding, mite huh theihzaha huh ding, thatang tawh sep a kul leh sem ding cih khawng limgen zaw ding. Piakkhiat a hat hetlo pa kiangah piak khiat ding bekbek hong genpih ciang ka piakloh luat lam kitel ka hih cianga ka maizum in, 'ki uiveih phawk' a cih bang vua, 'kau nei kisungsia' cih banga kei kuama theihloh a na kisungsia in, nop het-het-lo.

Ka lawmpa pen zu dawndawn mi ahi cih ka theih leh thugenpa in zu dawn a hoihlohna lim gen mahmah leh ka ut lamtak hi. Nak genlua cih omsak kei leh ka ut mai hi. Ka lawmpa in nuamsa kei henla, hong kikhel leh cih ka deihsak man khat ahih hang, kei leh kei gualzo kisak man, kiphatsak man zong hikawm veve hi. Kei peng in amah penglo ahih cianga. Kei hoihlohna kipulak kha lo, amah gialpi den banga guahpi huihpi thuak-a thuak hi. Tua pen angsung theitaka ka nopsak giugiau ahi hi. Hakkol na pua khawm un, van gik na kidawn un cih te peuhmah ka phawk nawn kei hi. A huhlo kei pen a khial veve ka hih lam ka mihing hihna in hong mangngilhsak hi. Ka lawmpa zu dawn luat pen ka mawhsak kawm in a kikhel ding ka deihsak hi. Ahi zongin ama adingin zu dawn pen bangzah a nuam a, bangzah a kikhel ding hamsa hiam cih ka theihpih kei hi. Kei kikhel ding ka theihte zong ama abangin ollo kasak hiveve ding hi. Ahi zongin a kawk kei hilo in pulpit tung pan thugenpa ahih manin tha ka ngah mahmah hi.

Ka kibawlphat ding, ka hoihlohna hong genkha den pulpit thugenpa pen ka ngai ngaungau kei a, tha ka ngah lua kei hi. Kei hong maizumsak tawh kibanga, kei hong selpho tawh kibang hi. Ka kibawlphat ding hong deih hi cih lamsang sangin kei hong khelbawl hi, kei hong simmawh hi ka ci nuam phial hi. Kikhel hileng a meet ngah ding amah hilo in kei ka hi zaw gige hi. Ahi zongin banghangin tua bang thugen ngai nuamlo ka hiam? Kei hong kici lo dingin midang kici leh ka utluat man ahi hi. Angsung thei, selfish ka hi hi. Star fish zong hizolo in, selfish ka hi. Ka hoihlohna kipuah in a hoih in gamta leng kei a hampha bek hilo ka kim ka kianga te a hampha hi dinga, vekpi a hamphatna hi ding hi. Tua ding ngaihsun lo in siapa in kei hong ci deuh cih bang lungsim ka pua thei hi. Ka picin lohna hong kilangsak hi.

Zindo a siam hetlo pa pen zindo siam bangin hong kigen leh ka nuam mahmah hi. Ka siamzah ka hanciam pen a hong kipaktat ciangin nuam kasa a, hi kakisa a, thupi ka kisa hi. A taktak in cileng a phattak nai hetlopa ka hi hi. A cihtak a sem nailo pahtawina a ngahpa ka hi a, a kilawmlo pahtawina a ngahpa ka hi hi. Mipi mai bang hi peuhmah leh ka lawp semsem ding hi. Ka naupang lungsim hi cih kidawk hi. A picing ding ka kisin kisamlai cihna hi.

Zi te aw na pasalte uh zahtak un, a thu uh mang un cih pen zak nuam kasa mahmah a, pasalte aw na zi te uh it in bel kitambaih bangin kem un, a cih ciang bel ka kizakmawh bawlta hi. Tate aw na nu leh pa thumang un cih ciangin haksa ka sa a, nu leh pate aw tate pen Topa hong piak hi a cih ciang un nuam kasa hi. Ka nu leh pa thuman den ding leh it den ding pen haksa kasa a, khat veivei kei thu a gamtat ut hun ka nei hi. Tua ciang sermon pen ka za nuam kholkei hi. Ahi zongin kei hong kingekbawlna ding lamsang ahih leh bel ka bil vang keklian in ka ngai dedaw hi.

A taktak in mihing hong bawlpha pen i hoihlohna leh i kisapna mun hong kihilhna pan kipuah phatna ahi hi. Haksa mah leh nuam kei mah leh, zumhuai mah leh ut kei mah leng... tua bek in mihing mi picingzaw in hong seek ahi hi. A kilanglo ki itna sangin a kipulak kithuhilhna in itna maan hizaw hi. Kei hoih ding hong deihsak taktak te in bel ka hoihlohna zong hong puah nuam ding ahi hi. Ka hoihna teng bek hong pakta a, ka hoihlohna hong puahsak sawmlo in itna kicing hong neilo cihna hi. Ka hoihna ka hoihlohna hong pulak ngampa in hong it, hong deihsak taktak cihna hi a, tua bang thugen mi ka paktat pen ding te na hizaw hi. A nuam bek in mihing picingsak lo a, tui hual om kei leh tembaw hawlte siamna kilanglo a, kihal kikkik kei leh sik nangawn khauh zolo hi. Tua manin mihing zong a picin semsem dingin sik bangin akihal, a kikhaihsiang den kisam hi. Tua mihing picing ding ka ut leh kei zong ka nitna khempeuh ka khaihsiang den kisam cihna hi. //

Hau Za Cin
Phuitong Liim

OM Laibu zuakna MV DOULOS Tembawpi

2010-07-23T23:18:00.001-07:00

Taiwan ka om sunga ka hawh khakloh tuni tana ka kisik khat pen OM Laibu zuakna MV Doulos Tembawpi sunga laibu zuakna ah ka veh khak loh hi. Hih tembawpi in March 10, 2007 in Taiwan hong tunga, khuapi pan nai 1 val bek paia va hawh theih, laibu va lei theih hi. Kum 93 a upa hih MV Doulos in laibu volume 500,000 pua a, nasem volunteer 320 gam 54 pan hong paikhawmte in sem in, kum 2010 ciang kikhawlsak ta ding hi. Hih lai gelh ciang kikhawlsak ta hi.

Hih tembawpi pen Titanic siat zawh kum nih 1914 kuma kibawl hi a, vanpuakna dinga SS Medina, USA te bawl ahi hi. A laibu puak tamzaw pen English tawh kigelh hi a, laibu lei dinga pai pawlkhat pen a tembaw mu nuam ngiat a pai pawl zong om hi. Hih mihing leh van puakna tembawpi in Gospel laibu pua hi cih a kigen hangin Christian hilo te zong lawpsak veve a, laibu en tampi Christian hi tuanlo uh hi. Lawmte khat va pai a, hong tun ciang a gen bel, "mi tam lua" cih hi. Nikhat in mi 10,000 (tulsawm) bangin veh uh hi.

1977 kumin German gam a Good Books for All (GBA) te in lei in amin thak MV Doulos tawh khek uh hi. Greek pau 'Doulos' a khiatna in 'nasem, sawltak' cihna hi (servant). Tua hun pan kipan GBA nuai ah nasem OM (Operation Mobilization) te in leitung gam 104 ah lungdamna thu tangko kawm dingin sawl kawikawi uh a, 'pilna, lametna leh huhna' puak kawikawi uh hi. OM te in gam tuamtuam ah amau office pan hih Doulos ah nasem ding mi kumnih sung sem dingin a utte pantah uh hi. Zomi a sem a om ngei hiam ka thei kei hi. [OM limlim ah sem ngei bel om inteh, Sianu Nuam Lam Cing, tu laitak a CBA zum ah numei lai at nu, Dr. Neng Ngaih Lian naunu zong India ah sem ngei hi, bang lian sem cih bel tel keng].

Hih sungah sem dingin Christian kum 18 tunglam hih kul a, volunteer hi ding hi. Volunteer sep kawm in hih Doulos ah donation piak kul a, Taiwan pan volunteer nuamte adingin tua laiin 20,000 NTD (600 USD) khawng piak den kul hi. Doulos nasep theihna dinga sum 1/3 pen laibu zuakna pan kipia a, a dang 1/3 pen donation pan, a dang 1/3 leuleu pen mipi donation pan hi ciin tembaw makaipa in gen hi.

1977 pan tuani dongin gam 104 ah zinta a, mipi million 20 val in vehzo in, gam pawlkhat ah tamveipi zin kikkik ngeita hi. Taiwan ah hong zin a thumveina ahi hi. Taiwan leh Japan ah a veh tampen hi ciin ciamteh uh a, laibu kikhawng tampen zong Lai Siangtho hi ci uh hi. Gam tuamtuam ah mite laibu deih kibanglo hi ci uh hi. Saudi Arabia bangah Nek leh Dawn tawh kisai laibu kikhawng tampen hi ci (Nutrition books).

Annek lim mahmah a, mi tuamtuam paikhawm ahih manun kisin ding tam mahmah in kicim man ngeilo hi ci uh hi. Holim, kikhawl, thu kikum cih bang in hun zang uh a, kimawlhun leh khuasung vak khiat hun zong om zel hih tuak hi. Tua ahih manin pilna kibehlap in khuahek zai sak a, khantohna namkhat hi gige hi. Nikhat in nai 8 sung sem uh a, tua zawh ciang amau lunglut peuh hih thei uh hi. Taiwan hong 3-vei zinna leh a tawpna hita a, hong kipatna Phillipines hi in, a zinkikna ding Japan, South Korea leh Hong Kong ahi hi. Tua pan Asia nusia ta dinga, 2010 kuma a tawlngak ma Asia hong zin nunungpen hita hi.

Doulos a sia hi nailo in, a kum upa luata ahih manin khawlsak phot ding a sawm uh hizaw a, amah a laih ding Logos II hi in tua in Latin America gam teng lim veh diak ding hi. Logos II zong kikhawlsak pah dinga, tua laihna ding pen Logos Hope ahi hi. Denmark gam khuapi Copenhagen ah kibawl Logos Hope pen Doulos sangin a zahnih in lianzaw ding hi.

PS: March 18, 2010 niin Doulos pen a leipa Singapore mi Mr. Eric Shaw, Director and Chief Executive of BizNaz Resources International Pte. Ltd. in a kep ding koih a, a min khek in Doulos Phos (Nasem Meivak, Servant Light) ci hi.

Hau Za Cin
Phuitong Liim

Lamto kah gimhuai

2010-07-23T22:23:00.000-07:00

"Paisuk tai thum, paitoh tai guk," hong ci bilbel hi. Pyidawtha te, ka zinpa uh Kawl leh Tedim kigamlatna ka dot ciang tua tawh hong dawng hi. A ciamnui kawm bel hisam.

Lamto kah pen gimhuai hi. Lamsuk pai leng kitungbaih zaw hi. Suk puak leng phadawm a, to puak leh i kawng kham hi. To tai leng i kampau banglo a, suk tai leng kamdimdima pau mah tawh kibangzaw deuh hi. A nuam khatzong om tuan kei. A phei a pai zong baih tuanlo hi. Zomi ten bel lamsuk leh lamto kitam zuihzaw ahih manin lamphei na ngillah tek uh a, "lamphei tawn nuamlo omlo" na ci liang uh hi. Upa te in kum tampi a etcik zawh uh ciang amau tuah thu pan a pulak khiat uh kammal ahi hi. Own experience a cihte uh hi. I pianna bulpi kithei nawnlo a, upmawh thu vive tawh ki awng ngeingai tek hi. I mit keuhna mun bel kithei lai a, i khuamuh cilna mun bel zangsung sang khamlak hizaw ahih manin mawtaw hawlna akilim zat mahmah kulna mun hi.

Ka nu tawh lo ah Za lo, bawm dima pua, aman zong seng dim a pua, ciah. Lo pen nai mahmah hi. Lo pan inn pen kisuk pai pian hi. Paipai, inn tung dek ciang Hanmual na om hi. Hanmual taw pan inn dong lamto vive hi. Lo pan ka van a gik khollo pen khawtaw pan gik mahmah ta hi. Kito kahpihzo nawnlo hi. Letli pua bel kihi samlo hi. Za pen teep ding, buk za ding, zuak ding cih bang hi. Zomi te leh za pen kikhen theilo hi. Lokuan le uh zatep uh a, lo ah thosi thovai te in petlo pah hi. Gamsa Sahang leh Ngia te in naih nuamlo hi. Tua manin za pen Zomi te survival na dingin a kisam khat ahi hi. Khuataw pan ka van puak pen to kahpih dingin hong gik mahmah ta hi. Lu siip in, khe kikhai zo nawnlo hi. Lamsak phung tung kingaito in ka din khawl leh ka nu in ka van hong letsak a, "Giklua maw?" hong cih khit ciangin, dawnna ngahlo ahih ciangin theisiam hiding hiven a lang taang ding suahkhia in inn pan ka la kik uh hi. Lo pan bel phamawhlo hi. Lamto pan bel 'senpi' vetlo thong!

Nungak hel zong tua mah bang pian hi. I nungak hel pen in hong hisak thei pianleh a nu leh pa in hong phal kei zong hong lemlem lel hi. Ei tawh kiho ding a khamphial uh zong a tanu un ei tawh kiho theihna ding paulap pen mulah vetlo hi. Kimuh theihna ding zong ngian tam theilua lel hi. Nuvaw, nuvaw... kicici lel hi. Ahi zongin lamto kah bang sak in hong ngaihbawl kei mawk leh kihona ding lem i bawlbawl hang zong za thei vetlo uh hi. Nungak hel pen lamto kah tawh a kibatna om kasa pian hi.

Khualzin ciang zin zon zong lamto kah tawh kibat hun om hi. Hong kitungsak nuam kei leh 'zin nei khin ve ung aw' ci pong un neilo ding cih i theih pipi zong 'nei' cita phot uh ahih cianga suppreme court thukhen zum banga 'nei kei nuteh' ci a va tangnial theih hilo in, 'aw, hong hisak zolo uh ahi ve maw' cih tawh kipusuak kik hi. Hong it bawl in hong tungsak pah le uh maipuang tui awm i meh a, sianmawng tui bek i hawpkhawm zong lim kisa ngaungau a, luipi tung ding mualdung pan tuaksuk tawh kibang hi. I tha kizan in, i sa malh hanhan a, i tawldam in, i bil vang hanhan hi. Aksa meh in bawngsa meh taleng a sa i suah khak ding hong kikihta pian leh lim lua khollo a, Aizawl khuasung steps tokah mah bang pah hi.

Lamto kah tektek ah zong mawtaw tungah tuang leng phadawm. Mihing khe Sen gam pek pan i zat suksuk pen tawh to kah thong bel olhiau lo. Mawtaw vanleng sakol tung tuang hipeuh leng a dan khat omzaw deuh. Ut leh Aizawl khua to lut aw, a ut leh Tonsim khua to lut aw, a ut leh Singngat khua to lut aw, a ut leh Tedim to lut aw (ci ding hileng Tedim pen a kito lut maw, a ki suk lut theilo, sorry)... phamawh kei, khe tawh suk lut sang zong nuamzaw pekpek hi ei. Ciau lui geia Lih Bual (Lih Lake) en dingte a khua ah to kah teitei kul hi. Khe tawh hileh khuk kidomdom dinga, mawtaw tawh hileh kinui to veuveu lel hi. Lih Bual gei ah 'tuisik mantam' om hih tuak a, ciah lam ciang Mizogam pan paite bang nui sa mahin ciahkik uh hih tuak.

Khatveivei i nuntakna zong lamto kah mah tawh kibang aive (ci ding hi leng...gospel lam ah lut zel veh hong kici kha ding aih ciang)... tua lam bel gen kei ni.

Khual kizin tek a, khe tawh a zin pawl om a, khe tawh a zin ngei vetlo zong om ding hi. Khe tawh a zin ngeite in lamto kah haksatzia tel dinga, a tualo te in tel khollo ding hi. Lamphei tawn leng khuasung vak bangin kihei dada theih deuh a, nawh pai kei leng lah kiziakai hi. To pai leng khenuai kham a, suk pai leng khuk zek hi. A tawldam penpen bel, "pai suksuk, pai suksuk inla, hunta vak na cih ciang kawi lian lecin, tua mah tawldam pen ding hi."

Hau Za Cin
Phuitong Liim

Sangsia ginalo

2010-07-23T22:22:00.000-07:00

Zolai at a kisin tung ei khangthak pawl lai gelh theihna ding hunpha i ngah leh 'tagah nawimu' a gen bangun am mahmah mai ni maw.

Zolai gelh masa i mi masa Siate Rev. ST Hau Go, Rev. Khup Za Go, Rev. Zam Khaw Thang, Col. H. Kam Pum, etc leh midang tampi nungah tu laitaka nupi papi ahi honkhat om a, tua zawh ciang ei khangthakte i hi a, ei zom ah khangsawn momno honpi khat mah om ding cih Zomi Siamsin Magazine 2009 na sim leh na mu thei ding hi. Tu laitak hong dampih lai sungpan "Ka sih ciang lai kuang tawh hong vui un," ci a genkhia ngiat, lai a it luat man leh lai a thupisim lua, 'a pen' ci leng zong khial lua lawmlawm kei ni Sia Rev. Job Thawngno ahi hi. Minam leh lai a kemcing nuam Prof. Dr. C. Thang Za Tuan leh midang tampi om, genkhin zo kei ni.

Amau thu a gen nuam i hi kei a, amau zom ah ei tuni a laigelh kisin lengleng pawl cihnopna hizaw. I gennop pen bel sangsia ginalo ahi hi. Zolai tawh utut kigelh thei, Zolai zangin zong utut kigen thei cih lahnopna bek hi. Cimphawng a cih pawl uh hizaw. Laigelh kisinna zong hipah.

Khatvei Zolai sia khat in, A=Ak khuangta, thawh hunta cih pen inn lai in pia a, a khiatna nong kan ding uh ci hi. Naupang zong ciah in, a nu leh pa kiang dong pah lo a innsunga kisuang a et leh A=Abraham, ta pia ngam cih na hi hi. A zingciang sanginn a tun ciang a siapa in na dong lian a, 'A=Abraham, ak khuan ciang tho in, a tapa pia hi' ci hi; siapa zong a ihmut suak pian ahih manin Abraham zingsang thobaih in a tapa Isaac tonpih a, Horeb mual tung ah biakna pia dingin a paipih hi cih phawk ziziai ahih manin,"maan hi, tu o," ci a, full mark a ngahsak hi. Sangsia ginalo.

Khatvei leuleu Zolai sangsia khat in, "Hihpa lai at 'Pankhawm Hatna Hi' cih pen inn lam ah hong sim unla, zingciang kikum ding (group discussion) nei ding ci. Amau zong ciah, inn a tun ciang a nu leh pa kitawng in, "I tapa thumanglo pen nanghang hi," ci a na kingawh uh. A nu in, "Nang pasal hive cin, na hilh kei ding maw," ci. A pa zong ut deklo, "Nang a nu hive cin, na nawipiak kawmin thuman ding na hilhpah kei ding maw," ci. A mawhpua ding kuamah utlo. Na ta hiven a ci leh nang kep nang khoi hiven a ci tawh, kithutuak theilo ahih ciangvua, a ta zong sanginn a tun kik ciang kikupkhawmna ah: "Siapa aw, pankhawm pen ahi thei vetlo hi," a cihnopna in, "pankhawm hamsa hi," ci hi. Banghang? "Ka nu leh ka pa zong pangkhawm theilo hi, ahi zongin a ki it a kiteng mah uh hi," ci hi. Siapa zong sau ngaihsut khollo ahih cianga, numei pasal zong ngaihsutna a kibanglo thei himah e ci kawmkawm in, "Maan hi, tu o," ci a, full mark a pia leuleu hi. Sangsia ginalo.

Zolai sin ziahziah, A=Ak khuangta, thawh hunta, B=Bi leh lo gamlak po, .... ci toto, Z=Zomi te hanlungciam khangto diam, diamdiamdiam? a cih ziahziah khit uh ciang khat khat a gensak. Tua laitak naupang khat in a khut hong lamto in, "Sia aw, Z=Zomi te hanlungciam, kikhentoto diam" a cih leh a siapa in zong ngaihsun ngeungau in, hisa lua, dik salua, ahi zonga hi cipah ngamlo, zuau lah gen utlo, 'thudik gen ding, thuman gum ding, zuau genlo ding' ci a sangnaupangte ahilh den, apattah denpa leh amaute model hisi ahih cianga, a tawpna ciang hamsa sapipi in, "Zong hi peuhmah veh aw mate," ciin, "Maan ei, tu o," ciin, full credit mah pia leuleu hihtuak hi.

Zuau genlo sia i ci diam, sia ginalo ici zaw diam?

Zolai lunglut huai peuhmah hi ei mate.

Hau Za Cin
Phuitong Liim

Hanciam i cih den a meetna om hiam?

2010-07-23T22:21:00.002-07:00

What is the use of trying? Hanciam i cih den a meetna om hiam? Hanciam, hanciam, hanciam hi den mawk hi. Zomi hita maw? Hanciam laitak. Zomi khangto ta maw? Hanciam laitak. Zogam hong paalta maw? Hanciam laitak. Zineita maw? Hanciam laitak. Pasal neita maw? Hanciam laitak. Gam ading nasem ta maw? Hanciam laitak. Hanciam, hanciam, hanciam... bang phatuam?

Minam thupi hi hang ci, minam hihna mite muhding lahkhiat ding lah omlo. Kampau bek minam kilahna hi khinlopi; a kampau mahmah zong mi-a tawh kibang toto ta, Zomi te kampau tuam pen kizanglo deuhdeuhta, ei lah ki Zomi sak panpan. Chin ci a hong kithei minam sung pan lusei pau 'enga' zangte a vekpi un 'enga' zangkhawm diamdiam ahih manun minam tuam Mizo in hong dingkhia uh a, tuhun ciang pawlkhat bangin Chin tawh level bangin koih phial ta uh hi (Chin sang upa zaw a koih nuam pawl bang om phial lai). 'Bange' ci pawl Zomi ciin kipan leuleu Chin tawl level in i kilamsang zo ta hiam, a tung deuh ah Mizo bangin i kikoihzo ta hiam, i vek in 'bange' i ci ta hiam; tua ahih kei leh i hanciam kisam lai vak...

'Bange' cih bangci ding? Hanciam lai ding. Hanciam bek tawh pha ding maw? Minam ciamtehna Vaphual mahmah zong kibanglo pi e. Pawlkhat Phualpi lim gelh, pawlkhat in Vahai lim gelh, pawlkhat in Phualleng lim gelh, pawlkhat in Phualleingak lim gelh, bangcih ding? I vaphual mahmah zong kibang phot leh e... hanciam laitak. Minam puanlap (flag) zong kibang maw? Pawlkhat in Vaphual tuangsak, pawlkhat in tuangsaklo. Pawlkhat in a kikalh in bawl, pawlkhat in a kizul in bawl... A mel leh puam (design) mahmah zong kibanglopi. Tua zat ding, tua zatloh ding cih bang om theilo hiam? A hipen zat ding cih i minam sungah kihilhna omlo hiam. Ahi pen ding omlo hizaw hiam. Ei ut tek hih ziazua pen ahi pen hizaw hiam.

Zomi kici teng i kipatna bulpi i gen ciang akibang hiam? Zomi pianna sangnaupang te sinsak ding hileng bang sinsak ding. Inntungpa leh innuaipa theihna kibang kei leh e, bangcih ding? A kibang ding hanciam ding. Khat in Khul ah piang ci dingin khat in Sinlung a piang ci ding. Khat in Sen gam pan piang ci dingin khat in Cimnuai a piang ci leh e? A kibang ding hanciam ding. What is the use of trying? Hanciam a meetna om hiam?

Khat in Zomi minam puan a silh ciang mel tuam ding. A dang khat i Zomi minam puan a silh ciang a mel tuam ding. Inn sakpa Zomi lam theih pen inn khangpa Zomi lam theih tawh kibanglo ding. Tua leh bangci minam khat hi thei ding? Minam tuam mah hipah lo ding maw? Minam khat a gawm sawm ding. Minam khat suah ding hanciam ding? Hanciam a metna om maw? What is the use of trying? Ei hoihsak ciat zui dingin tua a kibanglo teng helkhawm dingin tua tawh Zomi bawl ding. A kibanglo gawm khawm pen hoih peuhmah in cin, Sakhituihup (rainbow) bang ding hi. Etlawm peuhmah ding hi. Zomi pen a etlawm mahmah kisam hiam? Sik pen kigawm tamlo a khauh mahmah hi. Diamond pen a kihel tamlo a, manpha mahmah hi. Sakhituihup pen etlawm mahmah napi huih nung leh bei a, guahzu in Nizung om kei leh piang theilo hi. Zomi zong haksatna, kipawl khop teitei a kulna om kei leh pianglo zel ding maw. Sepkhop loh theihloh ahih ciang bekin Zomi hong piang zel ding maw?

Hanciam a meetna om takpi hiam? What is the use of trying?

Kisin leng hizaw lo ding maw. Min khat Zomi cih bek mah zatkhop ding kisin leng e. Zomi banga kalsuan khop kisin leng hizaw lo ding maw. Minam puan khat zat kisin leng hilo ding maw. Minam ciamtehna lim khat bek zat kisin leng e. Minam puanlap (national flag) khat bek zat kisin leng e. Minam lai 'hih hi' cih khat neih kisin leng e. 'Pot luck' Zomi sang khat bek a hi giugeu Zomi a hoihzaw diam? Zomi sungah tribe tuamtuam om cih sang Zomi pen tribe khat hi ci zawleng e? Nam neu tuamtuam lungsim pua in nam lian i bawl sawm leh ahi thei takpi ding hiam? Nam neu lungsim tawh i nitum kha kei tam maw.

Hanciam den lai ding maw? Ahih kei leh kisin ta ding? What is the use of trying?

Hau Za Cin
Phuitong Liim

Kawlpau ah Zopau tampi kihel

2010-07-23T22:21:00.001-07:00

Zokam icih ngakngak pen pau leh ham lam siamte in (linguist) a bulpi Tibeto-Burman hi na ci uh hi. Bang acihna uh hiam? Tua nihte pau pan hong ka khia hi cihnopna ahi tam maw. Tua pau nih bulphuh in a mengkhia pau hi a cihnopna uh ahi tam. Tua ahih leh tua lam mite ihi uh cihna hia? Sen gam Tibet gamke pan pai khia, Kawlgam nawksuk, mualtung kahto, tuipi gal kana Sial ek denkek banga kithehthang laitak Zomi te ihi kha kei tam. A theician om tuan samlo. Upmawh a gen ngam teng a hampha hiphot. A kicianzaw a a kikan ciat mateng.

Tua hileh i pau e le? Kawlpau ah Zopau tampi kihel hi. Ahih kei leh Kawlte in Zopau tampi hong kepsak uh hi. K = Kawl leh Zo, u leh nau ci napi; T=Tedim pau, eima pau ci kik; Z=Zomi te Tedim mi, kici lo leuleu si. Bangcih ding? Tua lam a theite adingin koih ni. Ei lunglut lamah lutkik leng.

Kawlte in Zopau, ut leh Zokam i cih tampi hong kepsak uh hi. Mikangte in zong tampi hong kepsak uh a, Kala leh Meitei te in zong tua mah bang hi. I khualzinna a gamlat semsem leh Zopau hong kepsak ding mi kitam muh semsem ding hi. Asenpi mahmah cih ding hi.

A gamla tung deuh Zomi te zat dingin 'awle' cih tangin mikangte in 'OK' cih na kepsak uh a, 'hei' cih tang in 'hello' cih na kepsak uh hi. Kawlte hong kepsak 'nainganzi' cih taang in 'politics' cih na kepsak ta uh a, 'piahtana' cih tang in 'problem', 'kahbia' cih tangin 'mixed' cih bang in. Nisuahna pan Nitumna ciang a pem khin Zomi te hi a, pemta Zomi sung pan a gamla tung pen te hita uh hi. "Lungtup gam tung," i ci theita diam bel thei khang in, tuate tunna lam bel a ki mitsuan tek zawdeuh tawh kibang hihang. A dang tampi omlai inteh.

Hahkat taka Zokam hong kepsak, Zopau hong puahsak hih i leitung sanggam mikang leh kawlte, nam dang te i kikholhpiha, i lawmbawla, i midang bawl hetloh ding ahi hi. Amau hong kepsak kei leh en koi ah i Zopau, i Zolai kemzo leltak ding. I zat khit masaksak 'one time use' dan a a nusia pahpah, a pai pahpahte hive hang. Zokam a pa in zang, a ta in zang nawnlo. Zolai a pa in simthei, a taten sim thei nawnlo. Zomi khangthu a pa in lunglut mahmah, a ta in khangthu leh ngeina leh minam thu peuhmah kin nawn vetlo; PS3 leh iPod, iPhone, iPad te kinzaw ta. Break dance leh club party khawng nuamsa zaw. Tuktu kulkul peuhmah za kha nawnlo.

Mexico te leuleu in, Spanish pau zangte ci zaw ni in, 'Hei' i cih pen a lehlama hong laksak uh in, 'Hola' hong cih sak leltak uh. Sen te leuleu in lah, "Na dam hiam?" cihnopna in Ni mah thupisak uh hivem, "Ni hau ma?" ci bilbel uh hi (Ni na hau na? a ci nuam ahi tam maw, Ni hau te mi hampha, mi nuamsa, mi en huai, mi cidam a ci nuam uh ahi tam, theisam khang). Sen gam pan Shi Fu cih i nusiat khit ciang (cikik zel ni, i kipatna bul hiven) i pupa in Nu, Pa, Pi, Pu, etc cihte tawh hong pantah a, themkhat i mitvak deuh ciang mite hong kepsak Zokam ahi Sia, Siamah, Oja, boss, sir, etc cihte i zangto theita a, a dang tampi hong kepsakte uh zong a zangto thei zel dingin i khangto hi. Kiallap dinga Christian Missionary J.H. Cope te pawl hong bawlsak pen mite hong kepsak Zokam i zat theih ciangin ki nusia dinga, 'Ka pa Kaw-te hi, Ka nu Zaw-te hi, kei pen Zaw-mi hing" cih pan, "I am an American, my father an immigrant, my grandfather I don't know him," cih tan kitungto ding hi. Khapi tung kah khit ciang kahna ding Aksi tampi a omlai bangin kiallap a i zatpak Zokam panin mite hong kepsak Zokam te zatding tampi omlai hi.

Zomi te i mailam limci mahmah hi. Kampau bek hilo, Ngeina, Lai, Biakna cihte zong mite hong kepsak i zat nailoh tampi i manawh ding omlai hi. Mothak bangin i nunglam sang i mailam sauzaw lai hi. Tua mun i tun ciang "Sumkuang Tuili Khiat Bangin" kuamah phawklo in ei zong tuipi lianpi sungah nuamsa leitung dang leh minam dang englo, phawklo in i zap diaidiai ta ding hi.

Na ngaklah hia?

Hau Za Cin
Phuitong Liim

Bang teng in Zomi hong hisak peuhmah ahia le?

2010-07-23T03:53:00.001-07:00

Zomi a it ding bang kituh phialphial ve hangin guai, Zomi i cih bang hi a, kua hi a, bangte Zomi hi a, kuate Zomi kici a, bangin Zomi hong hisak peuhmah ahia le?

I kamsiam in Zomi hong hisak hiam? I zindo siam in Zomi hong hisak hiam? Christian ngeina i kipletna in Zomi hong hisak hiam? Bawm leh Seng i puakte in Zomi hong hisak hiam? Lokho in Tu leh Hei, Tem leh Tei, Suk leh Sum, Lawhpi leh Lawhciang i zat te in Zomi hong hisak hiam? Puandum leh Puanlaisan i silh te in Zomi hong hisak hiam? Nopni dahni i kiuap, ikikhoite in Zomi hong hisak hiam? Hua lai mualtung gamah i teen ngei manin Zomi ihizaw hiam? Zangsungah tenglo a Khamtungah i ten manin Zomi ihi hiam? Beh leh phung u leh nau naihuai deuh teng tawh khua khat ah i ten tek manin Zomi ihi hiam? Dotna tampi om dingin ka um hi.

Bang in Zomi hong hisak peuhmah hiam? Na ngaihsun ngei hia?

Biakna zuih kibang ci leng kibang takpi hiam? Pupa hun in dawi bia i cih leh a dawi biak uh kibang hiam? A kibat leh bangteng hi peuhmah hiam? Kithoihna kibang i cih leh bangteng hi a, bangci kithoih hiam? I theilai hiam? I theih a phamawh hiam? I theih ciang Zomi hihna ahi diam? Theihloh Zomi hihna ahizaw diam? Tuhun ciang biakna kibang lai hiam? Kibang kei leh Zomi a kikhen khen cihna ahi diam? Biakna kibang kei leh minam khat in din ding haksatna a om diam? Biakna kibang i zuih pen minam damna ding a hi kha veve diam? Zomi i cihte biakna vai theih zong minam bitna ding ahi diam, theih kulse lo, ciamteh kulse lo, phawk kulse lo i ci suk mai diam? Kithoihna ah a kisam kammalte a kibang hiam?

Ngeina kibang ahih manin Zomi hi hang i ci diam? I ngeina a kibang takpi hiam? Zi neih dan a kibang hiam? Zi pui dan akibang hiam? Moken leh Moman a kibang tek hiam? A kibang diak pawlkhat a om kha hia? A kizul i cih pen a kibang tawh kilamdanna, kibatlohna a nei hiam? Pasal neih dan a kibang hiam? Sih ciang kivui dan akibang hiam? Kawsah hanken - kensak dan a kibang hiam? Inn luahza kipiak dan a kibang hiam? Uzaw, nauzaw cih a kilamdang hiam? Free choice ahi hiam, ahih kei leh nu leh pa deihna bang hizaw maw, ahih kei leh beh sung vaihawmna hizaw maw, ahih kei leh innkuan thusa/tanupi te vaihawmna hizaw maw, tua bang vaihawmna, deihna a kibang takpi hiam?

Kampau kithei teng ci ding hileng i pau kammal a kibang takpi hiam? A kibang dingin i kigawm nuam takpi hiam? A kibang teng i zangkhawm hiam, ko a hi ciin i kituhzaw hiam? Pau khat zanglo pen minam khat a hi thei takpi diam? Zat deuh khat a om a kisam diam? Kihohon napi pau kithei tuah kei leh minam khat hih utna a khangsem takpi diam? A kiamzaw diam? Pau khat zanglo minam khat midangte in a zahtak takpi diam? Lai neilo khat minam a kici thei diam? Zolai i cih pen koi pen tak hiam? Koi pen Zolai ciin i ciamteh dinga le? Zolai i cih pen Zomi a kici teng in i pom thei hiam? Zolai cih minvawh i nei thei hiam? A kisam hiam? A kul hiam? A kul kholkei zaw hiam? Ut tek in pheng ommang lel leng Zomi hihna ahi zaw hiam? Ut tek lai zang lel leng Zolai akici zaw diam?

Zomi i kicih leh Zolai i neih a kisam dia? Zongeina i neih a kisam dia? A mi mahmah Zomi a kici a om a kul dia?

Ei kuate i hia le? Who are we?

Zomi i cih kua?
Zolai i cih koi?
Zongeina i cih bang?

So, tell me, what makes a Zomi a Zomi?

Hau Za Cin
Phuitong Liim

Bang gelh ding?

2010-07-23T03:52:00.001-07:00

Florida Zomi Innkuan (FZI) te in tu kum 2010, kum ?? a cinna uh pawi bawlding, tua tawh kiton in magazine/souvenir bawl ding... thului gelh nuamte in gelh a khak theih.... bang gelh ding? Zomi Siamsin Magazine Nov 2010 ading thului gelha khak theih... bang gelh ding? Mizogam ah Zomi Baptist Churches Champhai khuate in kum 25 cinna souvenir laibu bawl sawm, thului gelh a khak theih... bang gelh ding? Shillong ah Zomi omte kikhopna Zomi Baptist Churches kum 10 cinna Souvenir kibawlsawm, article gelh a khak theih .... bang gelh ding? Adang tampi omlai..... Malaysia Zomi te thukizakna ZAM THUPUAK ah thului gelha puak theih.

Tua ahih leh... bang gelh ding, bang gelh ding, bang at ding?

I gelhgelhsa teng mah a bul zem ding, a lai puah ding, a dawn zep ding. Tua hi leh i laigelhte a hoihlo omlo a, a sia omlo hi. I deihna teng bek i at kiau ciang, i deihna teng bek gual nih gual thum tawh i nusiat ziau ciang a deihna kitel napi Magazine, Souvenir te ah suah dingin laimai dimlo lua thei hi. Laigelh cih zong nungak mah banga zepzep a kul hi a, naungek banga puahpuah a kul hi. Pulpit tung pan thungen khat pen tomsak mahmah ci. "Na piangthak un" ciin kumsuk ziau. A tawp uh cianga mipite in, "Na thugen tom si e," a cih leh, "Ka deihna teng tua hiven," ci ziau hihtuak. Murlen ah Pasian thu hong gen masa Pu Evan. Son Lang bang zong, "Nang Pasian thu um dingin hoihve teh aw," ci kawikawi bek hih tuak hi. Tua thu mah sermon in gensak leng naikhat in a zolo om lai ding hi hang. Kei zong thugen ka kipat vanglak leh nai 1 leh alang (90 mins) bang a hawmthawh phial ka hita hi. Ve khanglang.

Sumpi ap pawlkhat in nailang dekdek hun zang thei uh hi. Pawlkhat leuleu in lah gual khat a zo suak pah. Kibang hetlo hi. Apna hun sausak nuam lua kisa Eden Huan pan panin Calvary tungto sak in, Zomi te Christian suahna ah lutsuk kik in a kikhawm teng pi leh pu te hun pan hong mualsuak phei in, a kitawikhawm sumpi te tungah lungdam ko kik zawzen in tua ciang a piate piakna pa tungah ap pan... (pawlkhat bangin ap mangngilh in ngetbeh zawsawp).

Kalsim a suak thukizakna om, nisim a kihawm zong om, kha khat khatvei kihawm om, kumkhat khatvei kihawm om, a hun zui a kihawm zong om. Tua te ah bang gelh ding? Bang thu at ding? Zolai in at ding maw, mikang lai zang ding maw, Sen lai zang ding?

Na ngaihsun ngei hiam?

Hau Za Cin
Phuitong Liim

800 wickets!

2010-07-23T03:50:00.000-07:00

Ama khang bek hilo ama pianma a kimawlte in zong a ngah zawhloh uh '800 wickets in Test Matches' a ngah hizen hi. Leitung pianzawh cricket kimawlna khempeuh ah amah zaha wicket ngah thei om nailo a, ama milestone a kheng cih thadah a tung omnailo hi. Tua manin thupi a, leitung kimawlna ah a hampha, a thupi, a minnei khat hong suak hi.

FIFA te numei bawhlung U-20 World Cup Germany ah kimawl laitak in a pasalte uh a ciahpah uh hang a numeite uh Champion zong a hithei lai North Korea te thupi mawhlo a, tuma in zong na champion ngei uh hi. A pasalte uh sang siamzaw cih hilo in a kisuihpih uh numeite sang siamzaw cihna hizaw hi. Amau Octopus genkholhna buaipih lo uh a, WC om hi cih zong a theilo bawhlung uk zong omkha thei tak hi. Super Eagles te numei pawl pen Super Falcons kici a, USA tawh kinuai ding uh hi. A zawh uh leh semi final, a zawh kik uh leh final, a zawh kik uh leh bang....? I theihsa - Hip hip hurray!

Amah kum 38 phata a, hih Test Matches khit ciangin Test Matches kimawl nawnlo ding cih a genkhol hi. 800 wickets a ngahna dingin wicket 8 a lak kul a, 792 wickets neisa in hih kimawlna Gale ah hong pai ahi hi. India tawh Test Matches kimawl ding hi a, cricket leltak ah bel India pen World Rank 1 khawng hi gemgam sam hi. A khepimuk uh sau a, dindel thei uh i cihsa, mate... tua mana India tawh Test Matches kimawl ding 8 wickets lak ding cih pen bawhlung suihna bang hileh Brazil tawh Zomi Innkuan Aizawl te kidem dingin goal 4-0 a zo ding cih tawh kibang pian hi. Tuazahpi bel hi sam kei in Brazil leh South Africa kidem dingin SA 4-0 Brazil in zo ding cih dan twh kiteh thei ding hi. Tua hi a, 800 wickets ngahna ding pen lametna LIANPI neih kul hiphot mai hi.

A kimawl uh leh a ni khat ni, ni nih ni, ni thum ni, ni li ni cianga ah 797 phata. A tawpna ni nga ni in wicket 3 a lak kul hitazen a, a tawpna, a lot tawpna ah tua wicket 3-na ngah takpi hi. A masa lamah a lot tampi in a satpa khe kha taleh endikpa (umpire) in "na khe kha" cihsak nuamlo ahih manin 800 wicket milestone pen Zusa/Bilpi leh Sumkuang tai kidem hong bang dekdek a, tun zawh ding kingaphuailo tawh kibang hi. Ahi zongin a 'hun lapin' a ngah geigei hi. Indian movie mah bang himai hi, a last minit ah ngah ciaiciai...

A pian cil pan a khut guh kitanglo, kawi ahih manin a lot dan tamveipi ICC leh a diak in Australia te in kamtam thei zel uh a, ahi zongin physicians te leh cricket expert te in a etcian uh ciang amah a lawn hilo in a veisuak mah hi na hiveve hi. Tua ahih manin a ma cricket bawhlung vikdan, veidan, lot dan pen midanga tawh kibang vetlo hi. Etcil in nuihza a, lamdang kisa ciat hi, kei zong ka tam theih loh hang ka nuihza mawk hi. I theih ciang ama pianpih na hi zaw a, mit-kaai pian nungak heel tawh kibang hi. Ei ana kipiapia e... hmmm..

Tu in Gale khuapi pen ama adingin a khantawn a mangngilh ngei nawnloh ding khuapi hong suak a, tua Test Matches pen a mangngilh ngei nawnloh ding kidemna hong suak hi. Aman bel, "800 wickets sangin Sri Lanka te ka gualzawh ding uh a thupi himasa zaw," ci bilbel hi. Zomi te bangin thukhual liamliam sam. Seeng Q! (Japan pau, Japan te mangpau pau leh amau pau suaksak uh hi ei: "Thank You" cih pen "seeng Q" "seeng khiu" ci vetse uh, ariato.)

A mel a hoih mahmah khol kei zong cricket kimawlna ah bel amah sanga test matches ni 5 kidemna ah wicket la theizaw omlo phot ahih cianga a hampha pen suak hiphot hi. A mukmul leh a kha mul, a sam kiil thilthel leh a puandup vom... not so attractive, but you can't write him off. He is a star. A hero. A king. A champion. A record holder.... and so on...

Oh, sorry amin gen mangngilh dek. Congrats Mr. Muttiah Muralitharan.

Hau Za Cin
Phuitong Liim

Singapore 2010 Youth Olympic Games - 1

2010-07-23T03:49:00.001-07:00

August 14-26, 2010 sung Singapore in "Singapore 2010 Youth Olympic Games" zindo ding hi. Leitungbup gam 205 te National Olympic Committees taangmi in kidemmi (athletes) leh sia (officials) 5,000 val deuh kihel dinga, media taangmi 1,200 val leh a kisapna mun peuh ah a huh ding volunteer 20,000 ban ah Youth Olympic Games a en limlim dinga hong pai mi 320,000 te kituahkhawm ding hi. Khangno kum 14 pan 18 kikal tengin kidemna nam 26 tawh kitaiteh ding uh a, Ngeina lahna leh Pilna Siamna sinkhopna hun te zong zangkhawm ding uh hi (Culture and Education Program).

Singapore 2010 Youth Olympic Games in leitungbup khangno te kiangah Olympic thu luanpih ahi siamna kicing, kilawmtatna, leh khat leh khat kizahtakna cihte sin a, kem a, zang den dingin hansuah nuam hi (to inspire the world youth with excellence, friendship, and respect). A kihel khempeuh adingin a khantawna manpha leh a mangngilh ngei nawnloh ding uh thumuhna hi pelmawh ding hi.

Zomi tawh 'pok-huan/ciimsat' nawn dah mai ni, WC thu hinawnlo ahih manin. Enjoy!

A thulu ding uh "Blazing the Trail" cih hi a, Zokam in koih ding hileng bang icih tam aw: "Na lampi totsa taangden hen" cih bangin koih leng bang aci tam maw. Hong huh dih vo. Na totsa lampi pen midangte tot theih dingin khuavak bangin taangden hen a cihnopna hi. Na paina sa lampi pen midangte in zong hong tot taak dingin limpha, ettehpha suaksak in. Na khekhap pen zuihtak hi hen. Na hih, na sep, na bawl khatpeuh mite etteh taak dingin hih in; tua banga hoih nusiat in a cihnopna hi. A hoih a pha a gamta ding, a etteh taak khangno hi ding cihnopna hi. LS tawh zong a kituakna mun om leh kilawm. Mite adingin limpha suak in, limpha na hi in...

Sakol 38 hong tungzo a, Australia pan hih YOG sunga zat ding ngiat a a lei uh, a sinsa uh hong puak ngiat uh hi. Kidem ding peuhmah in amau sakol puak kullo in YOG saite in siksak cihna hi. A zatkhit uh ciang Thuammual lam khawng ah a khahzau tam uh maw, Sen te annek pawi ah pai ciang "khamval luak theih" cih bang hi leh bel a zatkhit uh ciang khatta kiciahpih leh Tonsim lam zinpih dingin... :)

Olympic mei halna (olympic torches) nam 16, kum 1938 - 2008 kikal a kizangte zong hong tungta a, mipi ettheih dingin Aug 15-25 sung Blazing the Trail Exhition at ICC Level 3 ah kikoih ding hi. Etman omlo hi, free admission.

YOG phawk tawntungna dingin sumtang zong kibawl a (coins), mipi ettheih dingin zong (June 29-July 18, 2010 kikal bek) Olympic Superstore, Orchard Road ah kikoih hi. A lei nuamte adingin gold S$10, Silver S$5, Copper-Nickel S$2 hi.

YOG ambassador dingin Usain Bolt, Michael Phelps, Yelena... amau kuate cih na theihsa hi.

YOG ah kihel kidemmi te in tualsung nasep (community work) ah kihel thei ding uh a, a ut te in inn za nuh, huan kho siang, miphalote tawh kikhawl, lai tep, singsui, etc cih bangin a hun uh zang thei ding uh hi. Tua banga midang te adinga kizat, hun piak pen mihing nuntak a etlawmsak leh nuntak a manphasak gamtat hi ciin Singapore kumpi in ciamteh hi. Tua banga a kisamte huh pen Education and Culture Program in a ngimna khat hi ci uh hi.
Ei zong ci kha dek dek hang ei...sorry.

Lawm Suan (Pa Vungh Suan Mang) in a genna ah Olympic kidemna mun a hunlapa mite a tun theihna dingin kumpite in mawtaw lampi zong zingkhat (a laizang) hawisak (give way olympic) hi ci hi. Tua pen olympic hun sung khempeuh kizang ding hih tuak hi. Opening ceremony lutna ding, closing ceremony lutna ding ticket kizuak ta hih tuak hi. A lunglutte in ngaihsut huai. Bawhlung suihna ding Jalan Besar Stadium bek kizang ding a, et man pek 5 (pre), 7.50 (qr final), leh 15 (final) Singapura sum hih tuak hi.

Battery kizang ding "Energizer" hi ei. Suncreen zong amau pia ding hih tuak. Theme song ding in: "Everyone" cih hi.

A thubulphuh thum: siamna kicing, kilawmtatna leh khat leh khat kizahtakna cihte a deihna uh hih bang hi. Siamna kicing (excellence) cih ciangin sports ah kidemna, kitaitehna bek hilo in mihing nuntakna leh khantohna ah zong siamna kicing neih ding a thupizia a gennopna uh ahi hi. Mihing khat pen ama lunglut lam ah siamna kicing nei in hattak in mai anawt ding ahi cihnopna hi. Kilawmtatna (friendship) cih ciangin kidemna, kimawlna tungtawna kimeltheihna leh ikibatlohna, i kilamdanna te zong theisiam a, kitheihsiampih ciat ding cih deihna hi. Khat leh khat kizahtakna (respect) cih ciangin siangtho taka kidemna, siangtho taka kimawlna, lungsim siangtho pua kawma hanciam ding, eima hihzawh ciang leh hihzawhloh ciang thei ding, i cidamna zahtak ding, i kiim i kianga omte zahtak ding, i tenna leitung mahmah zong zahtakbawla itna tawh kem siangtho ding cih deihna hi.

Hih pen YOG a khatveina hi (1st Youth Olympic Games comes to Singapore kici hi).

(zop lai ding)

Hau Za Cin
Phuitong Liim

Singapore 2010 Youth Olympic Games - 2

2010-07-23T03:46:00.000-07:00

Singapore pen neucik hi a, khepek lianpi nei leng miksi banga sikcip suk ziau ding hi. Ahi zongin a gam neu banglo in a lungsim uh lian a, 1st YOG a zatna ding vuah a lapi uh zong "Everyone" cih hita zen hi. Mi khempeuh huam hi, (ei zong ci kha dekdek zel hang e, sorry). Everyone a cih vial uh bang hi peuhmah hiam; en dih ni.

E v e r y o n e

Singapore 2010 Youth Olympic Games Theme Song

Tabitha
Walls are down
Hopes arise
Rings of the world unite

Steve
Every child
Has a wish
To glow like the stars above

Jessica ~ Bridge 1
Lift our voices as victories blaze
This is the day to win with grace

Chorus
Raise your hand for our generation
Fly the flags of every nation
Reaching out for that moment in our lives
Raise your hand for our generation
Living out your aspiration
Time to fly way beyond the skies
A world that shines for everyone

Jody
Be the best
Go all the way
Friends beyond the race

Sean
Cheer the joy
Share the tears
The journey remains our pride

Bridge 2 *
Lift our voices as victories blaze
This is the day the world will shine on for everyone

A Zokam in ci kik bualbual leng (free translation):

"MI KHEMPEUH"
Singapore 2010 Youth Olympic Games Theme Song

Tabitha
Baang kicim
Nithak suak
Leitung bup kilemta

Steve
Mi kim in
Lunggulh nei
Van aksi bang taang ding

Jessica ~ Bridge 1
Gualzawhna tawh kiko khia un
Lungnuam taka gualzawh ni hi

ChorusMi khempeuh ading khutte lamto in
Mi namkim puanlap khai ni
Tua bang ni hong tung ding i ut pen hi
Mi khempeuh ading khutte lamto in
Na lunggulh banga nungta in
Van meipi khengin I leng dinga
Mi khempeuh I taanvak ding hi.

Jody
A siam pen
Hi tawntung in
Mi namkimte lawm

SeanLungdampih
Zong kahpih
I tonkhawm diamdiam ding hi

Bridge 2 *Gualzawhna tawh kiko khia un
Tuni pan kipan mi khempeuh lungdamta ding hi

Hih lasa lasiam te hampha uh hi, leitungbup in Aug 14, 2010 ciang TV pan na en ding uh ahih manin.

Hau Za Cin
Phuitong Liim

AIDS vaccine kingah dekta

2010-07-23T03:45:00.002-07:00

US gambup natna kilawh thei kan pawl National Institute of Infectious Diseases (NIAID) ah a lian pen Mr. Anthony Fauci in, "Kum tampi aki hanciam zawh ciangin AIDS vaccine tuni in a kizo ding hita a, kingah dekta ding hi," ciin gen hi. "Kum tampi sung, tu ma deuh tanin zong bangciang kitungta hiam cih kigen theilo a, kingah thei ding maw kingah theilo ding cih zong kithei vetlo hi. Ahi zongin tuma kum bangzah hiam sungin upmawh sangin kimainawt kik vat a, kingah thei ding dinmun kitungto hi. Tua banga kingah theihna ding a kilametna pen Thailand ah mi tul sawmleh guk (16,000) tungah tua HIV/AIDS vaccine kisin a, noptuampih uh ahih man hi. Tua a kisinna ah lametna kimu in, mipi lakah hawm khiat ding zaha lawhcing ahih nailoh hangin lametna lianpi hong neisak hi. Tua manin a lawhcin ding kilamen hi. Tuama peuhmah vaccine ding cih lunggulhna leh deihna a om hangin a piang thei takpi ding thu ahih leh hihloh kicianlo hi," ci hi.

Nung kal sungin NIAID scientist te in a lai hawmna vuah antibodies nam nih thu gelh uh a, tua antibodies te in HIV nei leh neilo khentel thei hi ciin pulak uh hi. Tua antibodies nam nihte gawmkhawm lehang HIV lungno za ah sawmkua (90%) khakcip thei hi ci uh hi. Khangsak theilo, pungsak theilo. Hih antibody khat zawzaw tengkhia dingin tua pen i thahlup nop virus tungah belhsak dingin tua pen vaccine a zang ding; ahang pen antibody te virus lungno tungah belh leh tua virus pen thazawmsak in khangsak theilo, sisak hi.

Ahih sawm dan uh pen antibody te virus tungah belhsak dingin tua ciang tua virus pen mihing pumpi sungah thun ding in tua virus in HIV ngah theihna lakpan dal ding hi. Hih pen Austria gam Vienna khuapi ah International AIDS Conference 18-veina July 18-23, 2010 a neih ma ni vua a gen ahi hi. "Thailand gama ka sinna uh pan ni khat teitei HIV/AIDS vaccine kinei ding hi cih kicianta a, a ni a kha bek kicianlo hi."

AIDS vaccine pen a kingah ding ni leh kha kitel nailo ahih manin kum tampi kivei theilai a, tua sungin i hih ngeisa 'kikep ding' mah a thupi pen ahi hi. Tua kikepna ding van tuamtuam condom zat pan kikapna phim siangtho zat cihte zong i zoptoh zel lai ding hi. Tua vanzatte a kisam mite kiang a tun theihna ding i nasep lianpen hiphot a, gam khangto laitak gam ah a kisam lak pan za ah sawmnih (20%) bek in tua a kisapte uh ngah uh hi. Tuate kiang i puak zawhna ding hanciam ni. AIDS dalna ding nasemte leh kumpi thu neite in a tam theithei in a kisam mite kiangah hih nasep i hanciam semsem ban ah a tam theipen midang lawh lo dingin i khaktan ding ahi hi. AIDS neisa te in midang a lawhlohna dingin sem leng AIDS neisa i damsak kik mah tawh kibang hi. A taktak in cileng manphazaw thamtham hi.

Vaccine i ngah mateng kidalna leh kikepna mah uangbawl in hanciam lai ni," ci hi.

Fauci pen NIAID ah Head hi a, leitungbup AIDS vaccine zonna lamah makaipi khat ahi hi.

Hau Za Cin
Phuitong Liim

Kangmei patau huihpi guahsia

2010-07-23T03:45:00.001-07:00

Taiwan ah guahpi zu in tui hong khanga guam leh mual te kicim in mi tampi in a inn leh lo uh taan in a gam uh kieukhia a, supna tampi a thuak ban vuah amau nuntakna mahmah sihna tuak ahih manin ka lungsim ah ka pi in a gen theih zel, thu a nget cianga, ....Topa aw, kangmei patau huihpi guahsia lak pan hong kem in.... a cih zelte ka phawk velval hi. Ama khangah kialpi nihvei na tuak a, gamlak singgah leh singteh tawh a kivak hun uh om hih tuak hi. Lo pan piang buh leh bal, vaimim leh be te kicinglo a, singgah theipuam a zon tawm uh tawh zong a kicinloh hun om hih tuak hi. Tua banga kialpi a tuak uh ciang nektawm zongin buai den uh ahih manin a innsia, a losia uh puah manlo in huihpi guahsia thuak in omzel uh hi. Tua banga nektawm zonga gim leh tawla a om laitak un huihpi guahsia in behlap leh gim kibehlap suak ahih manin hamsa semsem a, tua bang haksatna tawh kipelh pen Pasian thupha hi ciin ngaihsun uh hi. [Pasian, tuni a i biak pen ahi diam i thei kei a, ahi zongin 'van leh lei a bawlpa' kiangah thupha na ngen uh hi.]

Tuhun ciangin inn leh lo zong hoihzaw ta, khantohna tawh kituak in vanzat zong hoihzaw, tozaw, kipzaw ahih manin huihpi nung ding kikihta lua nawnlo a, guahpi zu ding kikihta lua nawnlo tawh kibang hi. Inn lah bitta, guahzu maimai in letzo nawn samlo a, a tam a tawm zongin guah lak pan bit lel hi. Ka pite khangah bi inn leh khampheng buk khawng hilel ding ahih manin guahpi zu leh bitlo, gial kia leh dawllo, keh, vang, kawt hi ding hi. Tua manin tulai i lungkham tawh amau huna lungkham uh kibanglo cih ding hi. Ahi zongin tuabang haksatna pan a kem thei khat om a, tua pen Pasian hi cih na thei uh hi. Huipi nung leh zong a inn te uh leemkhia in, a umna teng lengkhia thei a, nei leh lam zong mut mang thei hi. Tulai ciang tua bang lianga patauh huailo in kikhangto ta a, ahi zongin za ah za a kibit hi tuanlo hi. Nidang sang pen kilungmuangzaw a, tuate ciangciang ah thunget kisam i sa nawnkei hi.

"Tua bek hilo, nisim nek tawm hong pia in" cih zong i lungsim tawng tawh i thungetna hinawn mello tawh kibanga, nek ding ciangciang a ki patau nawnlo tawh kibang hi. A val, a dimlet, a behlapna cihte ki uang ngetzaw ta a, hauh ding, avala neih ding kilimngetzaw ta tawh kibang hi.

Ka pi in a lungkham mahmah pen kangmei, patau, huihpi, guahsia te na hi hi. Kangmei cih ciang amau hun lai in inn pen bi tawh kilam a, buhpawl tawh zong kilam a, tuum teh leh singteh khawng tawh kilam hi. A umna zong mau dap phan khawng hi lel a, a sual lah gua dap hikik lel hi. A khuam lah sing hilel ahih manin meikang kha leh a vekpi in a kangtum baih mahmah ding ahi hi. Tua manin nidangin inn kang leh kiphelh manlo a neih leh lam teng a bei hiziauziau hi. Kum tampi a kepkep a khoikhoi uh minit 20 sung khawnga kangtum khin cihna hi. Tua bang tuak khak ding pen kamsiatna lianpi hi in a kihtak uh ahi hi. Tulai ciang tua hun zah in meikang kipataulo dingin ka um hi. Vanzatte hoihzaw ta, mei kang kha leh zong paisuak lo in kiphelh man dingin vanzat leh gelna kicing omta hi.

Patau a cih ciangin gal leh sa piang kha ding cihna hi. Gal hong laang kha leh numei naupang tualsung pan taikhia in gamsung gamnuai ah kibuk kul dinga, numei naupang patau in akpi mu in a neksawm bangin kawkak ding uh hi. Tua bang tuah khak ding pen khangluite in a lauh mahmah khat uh hi a, khua mipite a bit ding, khua mipite a galmuang ding cih pen hausa leh upate vaihawm leh deih, a hanciam uh ahi hi. Tua bang hun pen tu in nung ngaihsut leng "Hai lai" hun himawk hi. Ahi zongin tua hun laiin lamdanglo hi. Tuipi gal tunma in i kiko giapgiapte khawng tuipi gal tunzawh ciang a hai huai mahmah bang na hilel hi.

Kumsim August kha hong de peuh leh Florida State te in Sunshine a muh loh khak ding uh lau uh hi. Huihpi pingpei hong kilat khak ding lau uh a, Tornado, Hurricane a tuamtuam hong tun khak ding lau uh hi. Thungetna ah hong phawk un a cih uh ciang zong tuate tawh kipelhna ding pen item khat hi thei hi. Japan gam ah zinling pen a ngeina bang in a ngaihsut phial uh hangin a hat mahmah a liin khak ding amau zong dipkua veve hi. Indonesia ah meikang hangin gam lianpipi kangtum a, vanleng lenna ding nangawn nawngkaisak in meikhu kizel hi. South Africa ah WC a om laitak in Brazil ah tui khangin mi 100 val tuiin tai manga, si uh hi. Zinling hangin Haiti ah mi tampi si uh a, inn leh lo tampi kisia hi.

Hih bang leitung ngeina tawh a kizom, natural disaster a kici pen mihing in a kipelh nuam ciat hi a, kuamah a tuak nuam, a thei nuam om masa lo hi. Tua bang tawh kipelh theihna ding lampi a thei omtuanlo a, Himalaya mual mong saklam mualdawna teng pitek khat in bel "Topa" na ko hi. Tua "Topa" pen hihte khempeuh a bawlpa, a kempa, a piangsakpa hi dingin um hi ding hi. Ama ngaihsut tawm ahi tam, ahih kei leh Zomi ngeina ah tua bang ngaihsutna na om khin ahi tam?

Hau Za Cin
Phuitong Liim

Akpi meibawi

2010-07-23T03:44:00.001-07:00

Akpi in no a keuh ciang a mei kibawhsak a, a mei tawng hi. A mei a khan kik ciangin a note lianta a, a tui kik hunpah hi. Tua bangin akpi khangah no keuh, no kai, mei bawi, tui kik cih bangin life cylce a nei hi, mikangpau a kawm ngaingai hi hang ei, life cycle. A meibawi hun pen a nungak kik laitak, a nopsak laitak, mawhpuak a neihloh laitak ahi hi. Guah hong zu in kuamah a khual ding omlo, a huai ding omlo ahih manin amah bek tai liatliat lel hi.

Ka guah aw zu sengseng
Ka kel aw tai diamdiam
Neihtong te kongmai nuai a,
Akpi meibawi tai ta liatliat

ciin la kisa hi. Tua la pen kohsak dan hi a, ka neulai in ka pi tawh guah a zuk ciang innka tau ah ding kawm in inn kong a ak tai diamdiam, kel tai diamdiamte ka muh uh ciang naukepna bangin ka sa zel uh hi. Hih la phuak kua hi diam, bang hun a kiphuak hi diam cih pen kithei nawnlo a, Zomi te Nau Awih La namkhat ahi hi. Doh Reh Meh a kibulh lo Zomi la neih masak pawl hi in ka um hi.

Tu hun ciangin i nu leh pate in nau awih la hong phuak ding hileh bang aphuak tam uh maw? Akpi a mu nawnlo, kel tal a mu nawnlo te in a la phuah ding hileng bang i phuaktam maw. A sa i nek zah in a tak i mu nawnkei a, KFC khawngah aksa a si kai neunau khawngin i petsuk guapguap a, kam gei teng san khin phial mahleh nopmawh isa kei ta hi. Nau Awih La tawh awi ding hi leng bang ciin i phuak tam maw? Naukepna te lah Computer khawng, TV khawng, CD player leh Cassette Player khawng hita a...

Electric aw mit lo aw,
Ka nau TV ensak aw,
Ka nau CD ensak aw,
Ka nau VDO games siamsak aw,
Ka nau iphone ngai sak aw,
Ka nau phone ah pausak aw.

cih bangin i phuakta mai diam? Ahih kei leh,

Bawi aw hong khang mengmeng aw,
Pam a computer siamsak aw,
Gamdang tuipi gal tungsak inla,
Mi nam suak mi ngeina zui sak inla,
Tun leh zua u leh nau ngilhsak in,
Hauhna namkim pilna namkim na guan in.

i ci zaw diam?

Akpi meibawi pen ama nuntakna ah a khangno hun tawh kibang ding hi. A kep a huai ding a omloh laitak hi. A nopsak laitak hi. A tung a nuai a don ding a kisap loh laitak hi. Guahzu leh amah bek bikhaliim lam zuanin tai a, inn nuai niliap ah kibu dingin tai liatliat lel hi. A nung a ma khual kullo a, ama bitna ding bek a sep phamawh lo hi.

Akpi Meibawi la a phuah Zomi te in amah banga i suahtak laitak amah bangin ei bek i ki khual kha hiam? Akpi bangin ei bek lu taakna ding zongin i tai kha hiam? Akpi tawh i kibang thei hiam? Akpi in bel amah bek kikhual lel hi, Zomi te tua bang ihi thei ding hiam? A meibawi masasa i kitaisan zelzul diam?

Hau Za Cin
Phuitong Liim

Bang lian pen?

2010-07-23T03:43:00.000-07:00

Mihing nuntakna ah bang lianpen hiam cih na ngaihsun ngei hiam? Na pian pan na sih tan in bang lianpen hi in na thei a? Nek ding maw, silh ding maw, giahna ding inn maw, innkuan maw, nu leh pa maw, lawm leh gual maw, sum leh pai maw, cidamna maw, zat zawhloh ding sum maw, etc... Pasian thu um, Lai Siangtho thuzui, upna leh biakna a nungta Pasian tungah kinga te adingin bel i LS in hong ITNA lianpen hi.

Tu laitakin a omlai thu thumte pen upna, lametna, leh itna hi a, tua thumte sung panin itna mah a thu lianpen ahi hi. (1 Korinth 13 : 13)

Nungak tangval kingaihna ah itna mah lianpen a (a tuabang lo a om leh thu tuam), zi leh pasal hi khinte kikal ah zong itna mah lianpen a, lawm leh gual kikholhna ah zong itna mah lianpen in, Pasian nasem a kalsuanna ah zong itna mah lianpen hi. Mihing khat nuntak sung tawntung in itna mah lianpen hi kici thei ding hi. Gal kidodo te in zong itna mah na zong veve uh a, a kitawngtawng i cihte in zong itna mah na lunggulh veve uh hi. Kuamah tawh a kikhawl theilo amau beka thu tangpek te in zong itna mah na lunggulh uh a, itna neia it taka nasemte in zong amau tungah itna kilak ding na lunggulh veve uh hi. A piak zah mah uh amau zong lamen uh hi. Mihing tung pan a ngah kei uh leh van leh lei a bawlpa kiangpan na ngen uh a, Amah in bel ciil hetlo, zeek hetlo in itna na pia ziahziah hi.

Nungak leh tangval a ki it ciangin a akbawm sia nangawn mu leh nuamtuam a, ama min kigenkha bek leh zong kekkia bangin kiguihsak hi. Vokpi in a note it lua ahih manin sawlpang khuhcip ta leh a nuai pan zongkhia veve a, zawhngeu in a note a it luat manin a koihna mite in a theih ciangin mundangah tuah kawikawi, sel kawikawi hi. Ngasa namkhat in a note it lua ahih manin ngasa dangin a nek ding ciangin a kamsungah muam in a ne thei ngasa a paikhiat khit ciangin siakhia kik a, humbit hi. Vaphual in a no keuh mateng a pi a bu sungah buan tawh zuutnelh in khumcip a, a tate a leng theih ciangin khahkhia hi.

Kolkatta khuapi lam gei a niin paihna bawm sungah a kipai naungek leh phakte a sih ma un la khia a puan tawh tuam in silsiang in, sathau namtui tawh zut a, a muk ah tawp in, a khut ah tawi a, Pasian kiangah lungdam a ko thei Mother Teressa nasep zawhna zong itna hang mah ahi hi. A gam mite a it mana Mikang kumpi in Ci peuhmah India mi in bawl theilo ding ciin a khaktan sawm hang hilo ding ci a vuak leh sat thuak a thongsung na ngawn a tung ngampa Mahatma Gandhi pen India mipi leh India gam a it man ahi hi. Mikang kumpi in leitungbup ah gam a kek zawhna hang zong a mite in agam uh a itman uh hi a, a galkapte in a gam ading a thuak ngam man uh ahi hi. US galkap Iraq ah galdo dingin a kuan masa ding akituh ziahziah na hang uh pen US gam a it man uh hi a, cimawh huhna sum a piak khiat ziahziah uh zong mihing nuntakna a it man uh ahi hi (humanitarian aid).

Vantung tokhom na ngawn nusia a leitung mimawhte gum dinga hong kumsuk a, a pilna siamna khempeuh ban ah a hun khempeuh mawhnei mite adinga hong zanga, a tawpna ah ama sisan tawh hong tatkhiatna zong hong itna hang ahi hi. Itna simloh kuamah lei na kiba kei un ciin hong nusiat a, itna tawh khat leh khat na kikhawl un ci hi. Tua itna tawh tomcik leitung om sung nuamsa dingin hong deih hi. Huaihamna, itsikna, hazatna, duhgawhna, etc te tawh kipelh a kiniamkhiatna tawh itna laka nasem dingin hong deih hi. Tua zahta a hong deihsak midang hilo a, i Pasian ahi hi. Mihing bangin hong piang a, Pasian bangin hong it hi. Angsung theihna gitlohna cihte tawh kipelh a itna tawh a kalsuan hi dingin hong deih ahi hi.

Tuipi sagih kantan in mualtung gam keu vot leh thosi thovai tamna hong zongkhia a mihing ngeina nuntak theihna dinga hong pattah a, hong zongkhia missionary te nasep khempeuh itna hang bek hi a, eite hong itna hang hi masalo in van leh lei a bawlpa a itna hang uh ahi hi. Adoniram Judson, Hudson Taylor, William Carey, etc te nasep khempeuh mihing it man hi masalo in Pasian itna pan hong luangkhia mihing tungah a kizeel hizaw a, tua itna a ngahkha, a tangkha te a hampha ahi hi. William Carey nasepna gam Bengal minam te tuni tanin India gamah laisiam minam, kumpi u lian sem minam hi toto uh a, science pilna leh thu theihna lamah a madawk hi den uh hi. Calvary mualtunga itna sisan luang kizom suak in India gam khuapi lak pan a kihhuai pen Kolkatta nangawn sawpsiang in a mite lungsim ah pilna, ciimna leh thutheihna guan a, van leh lei bawlpa a phawk loh uh hangin Ama nasempa hoihtak in nasemsak uh ahih manin tuni tana Botonical Garden, Zoological Garden, University leh College te a gah a lawh uh a khum mahmah te ahi hi. Tua itna pen tuni dongin kizuun zuun laia, kikepcingsak in mite in zahtak, kemnuam uh hi.

Huatna tawh nasepna Japan te galkap tampi a sihna phual Imphal ngei ah WW II phawkna mun pen paan kaiin, gambu a, a kiim a kiang buah thilthel hi. A kipuah zel teei hangin mite in pakta lua khollo a, thupi simlo in enzuul lel uh hi.

Guaktang phial a omlai eite hong pattah dinga khuaizu leh nawitui tawh a nuamsa sa USA pek pen missionary Cope Topa te hong pai vingveng hangin tuni in hih ZONET tungtawn in Zolai tawh i kiho thei a, thu i kikum thei hi. [A hun tamzaw ah kikumlo in i ki tawng, i kinial, tungnung i kituh guapguap lai kha phial zongin]. Tua itna hangin a nuntakna nangawn bei lawh liangin eite kiangah hong nusiat a, tua itna hangin eite tuni in tuipi gal kaan ding i kidem phial maita hi. Lai atpa khat in 'Pasian thupha' cih i lim zat luat manin ei hong huhte nangawn i mangngilh liang hi... a cih dinmun i tungto liang hi. Itna nasep khempeuh itna tawh kithuk kik tuanlo a, a phawk kha om dinga, a phawk kha nawnlo om ding hi. Ahi zongin a gah kibanglo kha ding hi. Mi 10 damsak hilo ka hiam, 9 te koi ah om hiam? 9 te thupha leh adang khat i thupha ngah kibanglo hi, kikimlo hi. Mihing tung pan lamet pen lungkiat huai a, Pasian tung pan lamen leng lungnuam hi. Itna khempeuh zong Aman hong thuhsak dinga, huatna, bawlsiatna khempeuh phuba zong Aman hong laksak ding hi. Na khempeuh a bawlpa theihloh in a piang khatbeek omlo a, Ama muhloh khatbeek omlo hi. Thudik thuman a thukhenpa hi a, a dik a maan in a sem ding Pa hi.

Itna hangin Shillong Khasi nupi te in ann a huan ding uh ciang buhtang khut dim khat pham in a khol uh, a nek ngaih uh ciang KHUTPHAM nasepna hong kipan a, numei sep theih Pasian na cih sungah a thupi mahmah itna tawh gam kekna nasep hong suak hi. Tuni tanin tua bang nasep kizom to a, buh tang a phamlo te in zong Pasian ading khenkhia in a piakhia uh hi. Tua itna lah kipat, Khasi gama ITNA GOSPEL a tun pen kum 150 val pan ding hi. Ahi zongin leitung kizel a, itna nasep thupi in kingaihsun hi. Sangkah naupangte in a sangkhak ding uh ciang a silh puan lui teng uh khawm in a kisamzaw diakte kiangah hawmkhia uh a, tua tawh Pasian itna lak uh hi. Tua zong damdam in kizel a, itna nasep thupi khat ahi hi. Anngawl a nektaang piak khiatna zong itna lahna hi a, a zang tampi om hi. Pasian neihsa sawm-ah-khat ban ah a val in a pia om a, itna hang hi in, na lianpi sem sak hi. Bill Gates in India gam ah HIV/AIDS dona dingin sum tampi pia khia a, mi tampi in nuntak lawh in mi tampi in nek muh lawh hi. Itna nasep ahi hi. India mihau Steel Industry neipa in bel, "ka hauh mahmah khit ciang mite ading pia khia pan ning" ci hi. Leitungah steel industry nei a hau pen thum lak ah kihel napi pia khia nai tuanlo hi. Cik ciang a pia tam?

Hauh cianga piak ding maw, neih ciang a piak ding maw?

Ka hauh ciang pia ning ci in, hau ngei kei leng. Ka neih ciang pia ning ciin nei ngei kei leng. Ka pil ciang sem ning ciin pil ngei kei leng... Topa a lungkim tam? Zawnglua pia zo keng, it zo keng ci in hau ngei tuan kei leng. Topa'n a tawm a tam cilo hi. Na neih zah pia in ci lel hi. Na neih val hanciam in cilo a, na neihsa sung pan pia in cilel hi. Leiba in zong ci tuanlo hi. Sum puk in zong cilo hi. Na neihsa sung pan pia in ci hi. Itna na neihsa a om hiam? Tua te na zang thei hi. Itna na kholsa om hiam, tua zang phot in. A kiam leh hong dimkik ding hi. Ciktui bang ahih leh a kisuakkhia zahzah hong phul kik dinga, hong dimkik lel ding hi. Tunglam pan kamciam khat om a, a piate in tam ngahkik dinga, a pialo te khangtuanlo ding, kiam semsem ding ci hi. Kamciam a peel ngeilopa kamciam hi bilbel hi. Leitung bei dong note tawh kong om khawm ding acipa kamciam ahi hi. Tuni in pia khia in. Itna lak in. It zawhloh a om leh it thei dingin kisin in. Nang hong bawlsia te thungetsak in. Nang hong langpangte adingin thungen in. Nang hong simmawhte itna lak in. Nang hong thusimlote itna lak in. Nang hong hazate adingin thungetsak in. A za dingpa ITNA PASIAN ahi hi.

Mihing ngaihsut tawm a hi hetlo van leh lei a piangsaka, a sunga om khempeuh nuntakna a bawlpa hong hilh a lian penpen, a thupipenpen in ITNA ahi hi (1 Korinth 13 : 13). Tua itna a zang thei dinga teel tuam i hih khak pen mi hampha ihi hi. Van leh lei bawlpa nasem i suah theih bek zong a hamphat huai hi khin hi. Tuni in Amah teekteek in a gen lak pan a lianpen ITNA a zang thei dingte ihih manin nak hamphat lua hi hang. Ciil hetlo in i zat ding, zeek hetlo in i zat ding hi. A bei theilo pen ciil huai khollo hi. Hong kipia kikkik ding ahih manin.

Hau Za Cin
Phuitong Liim

Zeisu maw A' thupha?

2010-07-23T03:42:00.000-07:00

Hiangmun khua khoppi ah hih la ka sak zuaizuai tak uh ciangin ngaihsutna saupi hong neisak hi. A phuak, a gelh, a awbulh kua hiam cih ka theihloh hangin Pasian hopihna Kha Siangtho ompihna tawh a phuah hi pelmawh dingin ka um hi. Zomi te labu bawl ciang a phuak, a gelh, awbulh cihte kikin khollo ahih manin ni khat ni ciang i kituh dinga, kei phuah hi ikicih giapgiap mateng a phuak taktak kithei nailo ding hi cih pen ka lungngai kawm hi. Bangbang hileh a phuakpa muhna pen ciim kasa mahmah hi. Zeisu maw A'thupha?

Laphuakpa in bel "Nang kong telzaw hi Topa aw, Nong piak thupha sangin" ciin thukhup hi. Tua ci ciat thei leng i nisim nuntakna hong nuamtuam dingin ka um hi. Ahang pen mite kituahlohna i bulsui ciangin Zeisu hang hilo in A'thupha hang hizaw a, kuamah Zeisu kituha kisia omlo hi. A thupha - - sum, van, za (rank), etc cih bang hangin kinialna piangzaw hi. Upa a ngah nawn keileh a kikhawm nuan nawnlo pa pen Zeisu teello pa hi. Pasian nasep kawma A'thupha bek mite tungpan a lamen kawikawipa zong Zeisu teello pa hi. Zeisu tawh A'thupha mite kiangah a 'barter' kawikawipa pen Zeisu tello pa hi. [Barter system = van neih kikhek tuah, ken khat pia aman khat hong pia kik]. Cope topa pen Zeisu a telpa hi. Zogam pan bangmah lehpuak lo in ama hong puak Zeisu bek hong nusiat zaw hi.

Tulai ciang gamdang pan Taihinn khawng, Motor car khawng, etc i puak luatluat leh mite'n "Zeisu maw A' thupha? Koizaw tel ding na hiam?" ciin hong dong vat leh bangci'n i dawng tam? I vaitun ciang pawlpi mite in tua la vaidawnna ah hong sakpih leh koi lam i hek tam? A piapa paulapa a piakding bek i lamet leh Zeisu a zuakpa tawh i lamdanna a om diam?

Hih la phuakpa in a mot phuak hilo peuhmah dinghi. Muhna, theihna, theihsakna, ompihna nei hikha ding hi. Tua pen ama ngaihsut tawm zong hilo in 'kisam' ahih manin Kha Siangtho nasep zong hi thei hi. A phuakpa phuakna hang theihpih khang, ahi zongin a manpha mahmah leh eite lam maan hong tawnsak ding la, kamhilhna, hopihna, theihsakna la hi ding cih ka um hi.

A thulu bekbek zong ngaih khin hi: Zeisu maw A' thupha?

Hau Za Cin
Phuitong Liim

Minam khat neih ding a hoih

2010-07-23T03:40:00.000-07:00

Hau Za Cin

Minam cih ciang pianna gui kibang, ngeina kibang, zat leh zuih kibang, biakna upna thupi sakte kibang cih bangin a paipi khat kibang hamtang hi. Korea te ngo mahmah tase le uh vompi suan hi cih khat i za ngei hi. Zomi kici te ngo mahmah khol takei leng Nisa in a kap ngei vetloh suanghawm, kua hawm "Khul" pan piang kici leuleu hi.

Tua pan piang khempeuh tuni in 'laigui zom' i ci a, minam khat ihi hi. I kibatna om hi peuhmah a, tua kibatna omte i khahsuahloh ding thupi mahmah ding hi. Minam ciamtehna khat, minam puan khat, minam dial khat, minam pau khat, minam ngeina biakpiakzia khat, minam ngeina kitenzia khat, minam ngeina kivui dan khat, minam ngeina kipahtawidan khat, minam sung mimal khempeuh thupisak (value system) a kibang khat, etc. cihbangin i neih kisam ding hi. Tua bang anei ngeisa ihih ding uphuai hi. Tua neih ngeisa pen kepbit zong kul ding hi. Kepbit a hih kei leh a thak piang dinga, minam thak piang ding cihna hipah hi.

Minam khat hite in minam puan a silh uh ciang kibang hi. Minam Lam a lah uh ciangin kibang hi. Minam pau a gen uh ciangin kibang hi. Minam nopni dahni zat dan a gen uh ciang kibang hi (Customary Law kibang). Ei zong a kibang nei thei leng, zang thei leng hoih ding hi a.

Minam khat sungah innkuan bangin genteh pak leng, nu ding kisam a, pa ding kisam hi. Nasem ding khangno kisam a, minam mel kilahna ding nungak melhoih kisam hi. Lametna hong neisak ding naupangno kisam a, thudot kamdot ding pitek putek kisam hi. WC bawhlung mah bangin i khialh khak leh a dik a maan a kipankiksak ding referee i kisam hi. Minam sung bitna dingin galveng kisam a, midang tawh kilawmtatna a bawl ding gamkek diplomats kisam hi. Sia in pha ta leh a puah a huai dingin minam Nu kisam a, genhak in hilh hak tase leh a kem a khoi ding Pa kisam hi. A hoihlohna khat om leh a kiphawksak ding 'phun hat' pawlkhat kisam a; phun hat te a nial ding 'phun hat zawsem' pawlkhat zong kisam hi. Sia leh pha leh a phat nuam veve angsungthei honkhat kisam a, hoih in khangto ta leh a hoihsem a khangtosem nuam a huaiham honkhat zong kisam hi. Phunlo paulo a a sem ngiatngiat a kisap mah bangin sem in sem takei leh kampi bek tawh a awngawng, ama sepsa bang keek a a gen thei honkhat zong kisam zel hi. Ama sepsa nangawn ah pahtawina a lamen lo a kisap mah bangin, mite sepsa khempeuh ah a minpha a ngah nuam honkhat zong kisam hi. Pahtawina kipia kei leh a thadual pah mi a kisap mah bangin pahtawi takei leng a khawl tuanlo maban a zom den mi zong kisam hi. Mi khut ah gul man nuam hon khat a kisap mah bangin ama sepsa na ngawn ah 'ka sepsa hi' a ci nuamlo zong honkhat kisam hi. Kipawl in semkhawm siam a kisap mah bangin mite tawh a kipawl thei vetlo zong hon khat kisam hi. Thu ngaihsun siam a kisap mah bangin a ngaihsut masaksak a awtpihpih pawl zong kisam veve hi. A pil a kisap mah bangin a kipilsak zong honkhat kisam a; a hau a kisap mah bangin a kihausak zong kisam zel hi. A zuau ngeilo hon khat a kisap mah bangin a mutmut thei pawlkhat zong kisam a; a khem ngeilo mi a kisap mah bangin mikhem tawh nekzong thei honkhat zong kisam veve thong hi. Phat kei leng a khasia pah pawl a kisap mah bangin phatphat taleng 'phat tak hi keng' a ci pawl zong kisam zel. Heh leh a hehna cillum tawh a valh pawl a kisap mah bangin heh leh vompi halungvei bang pawl zong kisam zel. Mite in pil teh cita leh amah leh amah pil a kisa nailo honkhat kisam a, mite in hai teh cita leh pil ing a ci nuam mi zong honkhat kisam hi. Pil mahmah taleh a pilna a kizang theilo mi kisam a, hai mahmah taleh a haina minam bukimsakna ding kisam om hi. Hau mahmah minam a khual vetlo kisam a, zawng mahmah taleh minam ading a piakhia den zo mi zong kisam hi. Minam minam cihcih kul kei a ci pawl zong kisam a, minam it ding minam kep ding cih a gengen pawl zong kisam hi... and so on...

Guai, minam khat i cih pen a bukim na ding a baih hetlo hithong. Zomi te'n hih teng khempeuh leh i gen khak loh teng zong i nei hiam? Minam lian khat i hih leh bel neih dinga kilawm, minam lian a kicite in a neihte uh ahi hi. Gen khit zawh pak ding hilo lai.//

Kua upa zaw - Akpi maw Aktui?

2010-07-23T03:38:00.000-07:00

Hau Za Cin
Phuitong Liim

Piancil Lai Siangtho sung a simte adingin a dawnna olno hi.

Leitung piansak pan tuni donga a piangsakpa piansak mihingte in a piangsakpa piansakzia phawklo a amau pianpih leh kisintawm pilna leh siamna tawh a nung kan kik uh ciang Akpi leh Aktui pen kua upa zaw hiam cih theilo in 'nang zi leh kei zi kua hoihzaw' cih dotna bangin a dawnna ding zongzong lai, a dawnna uh kibang ngeilo hi.

Tunai in Unversity of Sheffield ah researcher Dr. Colin Freeman,"Aktui sang Akpi piang masazaw hi cih ka gumzaw hi," ci hi. Akpi sungah protein namkhat ovocledidin-17 kici om a, tua in aktui a kibawl ciang a tuamna 'aktui hawng' ding a khauh piangsak hi. Tua pan in nuntakna nei akpi sung panin suangtang banga khauh suang namkhat aktui hawng hong pianga tua a pianna pen 'biomineralization' kici a 'mineral piansakna' ahih kei leh 'nuntakna nei ganhing sunga suangtang banga khauh omsakna' kici hi (the production of minerals or solid materials inside organisms).

Tua ovacledidin-17 in akpi sungah nai 24 sungin aktui leh aktui tuamna hawng khauh calcite piangsak hi. Tua ahih manin akpi sungah kibawltawm aktui pen a pianna akpi sangin upa zaw hi kici theilo ding hi. Hilo hia?

Colin Freeman leh a pawlte in aktui leh akpi vai a kan nuam himasalo in aktui tuamna hawng 'shell' pen bangci hong piang, bangci kibawl hiam cih a thei nuam uh hizaw hi. Amau tuipi geia 'tuamna hawng' (shell) nei ganhingte enen uh a, "a hawng bangci hong kibawl hi peuhmah ding hiam?" cih theinuam uh hitazen hi. A lawmpa John Harding in, "Algae te sangin mihing i pilzaw kei mawk ding hi" ci hi. Algae te in amau leh amau khualum khuavot, tuisia tuinin lak pan kidalna dingin 'tuamna' (shell) na bawltawm thei uh hi. Mihing in tua banga hong tuam ding 'shell' i bawltawm thei nai kei hi. I bawl theih sunsun zong tua nuntakna nei ganhing khempeuh lak pan a niam penpen algae te neih sangin hoihlo zaw lai hi, ci hi.

Nikhat ni ciang mihing te zong khuahun kikhek tuamtuam lak pan kidalna dingin kituamna hawng kibawl thei dinga, mi khat aircon khat pua kawma vak kawikawi hipah lel ding hi. Na ngaklah hia? //

How big is your world?

2010-07-20T07:14:00.001-07:00

Hau Za Cin
Phuitong Liim

Nisim in laboratory ah nasem in ka om ciangin ka kiim ah hong umcip pen baang hi mawk hi. Ka ciah ciangin ka room ah ka om a baang li mah in hong umcih hi. Nikhat a hun a tamzaw hih baang li umcih in kizang ahih manin leitung khuadakna pen TV, internet, newspaper khawng bek hi den mawk hi. Tua te in bang gen pen hiam i cih leh mite in bang hih uh hiam cih hi a, a tamzaw te nasep pen baangli sunga kikhumlo, inn pua a baang omlohna tuallak a gamta te nasep tampi hi. Sydney Olympic a tamzaw inn pua hi a, politics hi leh inn pua thu hi a, kimawlna cileng a pualam thu hizel hi. Innsung sangin innpua zai zaw a, taanzau zaw in lian huam zaw hi. Tua in hong ngaihsutsak khat om a, 'innsung bek a kikhum sangin innpua ah dakkhia leng taangzai zaw hamtang' cih hi.

Nang e le?

Na lungsim innsungah kikhum bangin neucik, toicik ahi kha hiam? Baang li in a umcih tawh a kibang kekna ding a om nawnlo lungsim ahi kha hiam? Ahih kei leh innpua ah om bangin lianpi taanzau tak, a kihong lungsim ahi zaw hiam? Innkuan sung, khuasung, beh leh phung ciang khawng bek a huam lungsim toi na nei kha hiam? Na khua na tui kantan in minam leh gam leh leitung mihing te ciang a khual lungsim tanzau ahi zaw hiam? Limtak ngaihsun kik mah dih; na lungsim in koiciang huam takpi hiam. Na huamna ciang nang na tel pen ding hi.

"Ni nungzui" ciang khawng leltak a ngaihsun i pupa te lungsim tuhun leitungah kimang thei nawnlo hi. Khuata khat bek kikhual huna lungsimte tu hun ciang kizang thei nawnlo hi. A taktakin ci leng "ni nungzui" i pupate in a deihna uh pen a neih a lam uh, a lim a al a nek ding uh, a nuam a nuamlo a thuak ding khempeuh uh meltheih sung bek ah kizeek henla, meltheih u leh nau kheng kei leh cih a deihna uh hilel hi. A lim i nek leh i u i nau tawh ne leng; mi ta mi tu tawh i gualnop sangin ei ta ei tu tawh gualnuam leng cih a deihna uh hileltak hi. Angsung thei lungsim hi. Huaiham lungsim hi a, a huam zau hetlo lungsim toi ahi hi. A taktak in ci leng 'ni nungzui' cih pen mikangte kisapna bangah cousin hi lai mawk ahih manin sanggam, unau hi lai hi, tua bang kiteen pen incest hiphial mawk hi. Innkuan khat kiteeng himawk hi. India gam ah Kala/Vai te in amau khuapih te tawh kiten pen 'unau kiteng' (incest) hi ci uh a, khua khat kitengsaklo uh hi. A zi ding, a pasal ding uh pen khuadang pan pui teekteek uh hi. Zomi te in khua khat genloh sisan kinai ciikteek kilasak mawk hihang. I lungsim toi, i angsung theih, i ngaihsutna toi lai hun thu hi.

Hih banga kitheisa, kinaisa sungh leh pu in i kizon kik zel ciangin i kinaihna, i ki meltheihna kikhan theilo a, singtung kah bang hilel hi. Kahto in kumsuk kik; kahto kik zel tawh kibang hi. Singbul kimvial a taitai tawh zong kibang hi. A ngeina teng mah tawh kithei den, kikhawl den, kinai den cihna hi. Tua in i lungsim toisak a, tua in i leitung muhzia liansak khollo hi. A kingaia kiteng te phamawh kei, ahi zongin hunlui hun ah bel kingai ta kei leh kipuisak hi mawk hi. Midang ngaih neizaw phial leh zong 'na pute tanu' kici se hi. A ni a nopni, a dahni in a hehnem ding, a panpih ding, a khoi ding, a khual ding cih deihna hi kha ding hi. Sisan kinai leh ki itna, kikhualna bel lianzaw thei mah hi. A kul leh zong kihilh ngam, kitai ngam hipah hi. Midang khat hi leh hilh ngamlo tai ngamlo dinga, kitotna, kisiatna piangin innkuan nuamlo suak ding hi. Ni nungzui hi phot phot leh bel thukim takei leh 'thuak keikai' ding hilel a, kilemna omzaw hiding hi.

Midang apantah ngamlo, midang tawh kizopna a bawl mengmeng utlo minam ihihna kilang hi. A haksa a phu nuamlo, a olno bek tawh a kimang thei ding a ngaihsun Zomi nam kihileltak mawk hi.

Tu hun ciang leitung huih nungin hong nawk kha ta a, Zomi bek hilo India kala mivom te nangawn gamdang a tun uh ciang nungak leh tangval khut kilen in khualai khawngah hong vak luanluanta uh hi. Khut kilen bek hilo in mikang dan zangin hong kinam tuttut lei peuh uh a, tukhawm leh kikawi ngamta uh hi. Tua bang peuhmah India omlai hi leh hih ding cih thadah ngaihsun ngamlo ding uh hi. Mihing suahtakna gam ah a tun uh ciang amau zong 'vasa khahsuah' a gen mah uh bang sam hi. Zomi zong tua bang mah. Lawm kingaite khut kilen ziauziau, tukhawm ziauziau ta lel hi hang. We have come a long way. Nu leh pa, pi leh pu te in bel hong awi hetlo kha inteh; zong tuabang dingin hong ngaihsun lo ding uh hi, amau ngaihsutna pen 'hua hunlai' pek a hilai ahih cianga.

Hibanga leitung huih nungin hong nawk khakna mun ah ei zong i lungsim i liatsak ding hilo hiam, ka ci hi. Lungsim liansak ding cih ciang i beh i phung ciang bek, i u i nau ciang bek huam ngaihsutna te paikhiain minam leh gam ading ngaihsut huai hilo hiam ka ci nuam hi. Ko khua ah tua pau kizang cihcih hun nawnlo a, ko tua kuam, tua beh, tua pawlpi cihcih hun nawnlo hi. I vekpi a khantohna ding vai kikup hun hi a, i vekpi a khantoh ding ngaihsut hun hi. Minam khantohna dingin mimal khantoh kisam a, mimal khantoh kei leh minam khangto theilo hi. Mimal khantohna i neih ciangin a meet ne ding minam hi hen la, beh leh phung leh khua leh tui bek hi kei leh hoih ka sa hi. Mimal khangto khat a om ciang "ko a pa hi" "ko khua pa hi" cih i gen tam luat ciang a huam lianzaw minam in suplawh hi. I lawhcinna, i khantohna in minam ban hen la, u leh nau sung pen gen kullo a hisa hi. Tua bang kalsuan dan i minam sungah i hanciam kik ding kisam mahmah hi.

Na lawhcin ciang, na khantoh ciang nang leh na tanau ciang bek ah tawp kei leh minam in meetpih ding hi. Nang leh na innkuan pih teng bek in na khantohna na gaih kiuhkeuh uh ciang minam sum hi. Na khateh minam in a top theih ding kisam hi. Lawhcing ta ing, nuamsa ta ing cih ciang minam leh gam na khual nawn kei a, nang bek nopsakna na zon leh na minam sum dinga, na vaang a bei ciang nang zong na sum dinga, na keu ding hi. Tua hun ciang kuamah in nang hong don nawnlo dinga, minam kidon kei leng minam kisum ding hi. Tua manin na nopsak hun ciang zong minam leh gam ading na khualna a bei ding hoih tuanlo hi. Nang zong na minam pelh in leitungah na khuasuak tuan kei ding hi. Hauhna kip denlo a, liatna zong kho tuanlo hi. Zawng den ding cih om tuanlo a, hai i sak mahmah khat zong ulian suak mawh lo hi. Tua manin hi kisa lua in minam leh gam na kin bawl kei leh tua minam leh gam in zong nang hong kinbawl kei leh sawt na nopsa tuan kei ding hi. Minam leh gam nasep pen i hih theih bang tek a sep ding ahi hi. Kidang koih theih cih bang omlo hi. Lungsim liatsak kul hi.

Nopna dahna a om ciang minam khat pen kikhual kul hi. Kihuai kul hi. Ki it diamdiam ding kisam hi. Daipam lama mizawng khat i phawk sinsenna pen i thupi na hi a, minam i itna hi in; tua te mangngilh a khuapi laizanga u lian khat bek i pi bawl keeina pen minam thupina hi masa lo hi. A huai kul khat huaina, a kep kul khat kepna, a dah a kap khat khualna pen thupina hi a; a nuam a thupi bek delh ngengngangna pen picinna hi khin khollo hi. Germany ah Zomi khat luang pham loh a om den cih pen ngaihsun taktak leng Zomi te aw, minam thupi ihihna hi masa khollo dingin ka um hi. Malaysia ah, Delhi ah, Singapore ah, Korea ah, Japan ah, USA ah -- Zomi te in tua bang haksatna tuak, tua bang dahna tuak, tua bang huai kisam om cih i zak ciang i sep kei leh -- Thupha Ngah Minam kici aw, A Khangto Minam kici aw, Topa Pasian in a nei Minam kici aw.... na zuaupi hi, umveih. Zomi kipawlna, Zomi ka it ciin kam dimdim in i pau hang i mi i sate khuallo, donlo in om leng bang hiam a phattuamna, bang hiam a metna, i thupina om khollo hi. Mipi kikhop cianga amai gual a tutna sangah nektie awka tut liatluat pong ciang khawng bek thupina hi khollo hi. Makaipa, siapa ci a mite hong theih, hong nohset ciang khawng bek thupi khollo hi. Minam makai, gam makai cia mi deidan nei a nasepna zong minam itna hi lo a politics hizaw hi.

Tua ahih manin Zomi te in lungsim lian i neih ding kisam pha mahmah hi. Hih sanga khantoh zawk i sawm a, hih sanga sangzaw i phak nop leh kisin taak mahmah ding hi. Minam banga mite in hong theih ding i deih leh i kisin ding tampi omlai hi. Tua kisin ding tampi lakah ei unau sung, ei beh sung, ei khua sung, ei kual sung cih bang ciangciang bek huam lungsimte i kek a, i liatsak a, lungsim tangzai leh Zomi bek mah cih lungsim i neih kisam hi. Tua hilo a, ko tua pau zangte hi ung; ko tua beh te hi ung; ko tua khua kiim teng hi ung; ko tua pawlpi te hi ung... cih bang lungsim i neih kiukiau den leh minam 'ZOMI' bangin khangkhia khol kei ni. Minam dang lak ah thelthang in mangthang lel ni. Zomi cih leitungah minam bangin hong kiciamteh khol kenteh. Mite minam i suahna mun ah a Zomi teng mah kimu khawm luailuai ding hi hang.

Minam khat a hong bawlpa in minam khat a i din ding hong deih in ka um hi. Tua bang ahihna dinga ze-etna te zong thuakzo ding leh palsatzo dingin hong ompih ding cih ka um hi. Minam thupi hihna dinga hong dalte enlo in minam thupi Zomi i galmuhsa lui gala pen bek mitsuan kawm in luineute kantan pheiphei ni. //

Minam Picing I Suahna Dingin

2010-07-11T21:06:00.000-07:00

Hau Za Cin
Phuitong Liim

Minam picing i suahna dingin minam picing lungsim i neih kul hi. Mihing tulza tampi tawh a kibanga i ngaihsut theih kisam hi. A kibang cih ciang ngeina, kampau, biakna cihte kibang khin ding cihna hipah samlo in; sisan khat pua, sul khat kual, tuun sung khat piang hi hang i kicih theih kul ka cihnopna hi. Innkuan khat leh nih, khua khat leh nih leh beh leh phung sung ciangciang khawng bek huap ngaihsutna i neihte i paihmanga, i beisak kul hi. A hun leh a mun zui a ngaihsutna picing i neih theih zong picing gamtatzia hi a, tua bang gamtat kilawm a kisam minam i hita hi. I minam milip hong kibehlap in, i nekzonna, i zinsuk zintohna hong kidanga, i biakna zuih ut, i mimal lunglut hong kidangin, i politics muhdan zong hong kibang nawnlo a, i duh i deih hong kibang khin thei nawnlo in, innkuan khat zong i lunglut leh i hoihsak hong kidangta hi. Tua manin 'picing lungsim' i puak theih ding hong kisam pha diak hi.

Thuakzawhna (tolerance), ahih kei leh theihsiamna (understanding) , ahih kei leh midang ngaihsutzia theihsiampihna cihte minam picing te neih sitset khantohna nuntakzia ahi hi.

Tua bang a nei theilo minam pen a picing nailo, a niam mahmah, a khangto nailo leh a mitkeuh nailo minam ahi hi. Ei cih sangin Kei cih thupisak zawkna, ngaihsun khawmni cih sangin Kei ngaihsutna cih nopna, semkhawm ni cih sangin ka gen teng sem un cih lungsim te nam niam leh khangto nailote neih leh gamtatzia ahi hi. Democracy hilo Autocracy zang guapguap lai cihna hi.

Minam picing lungsim i cih ciangin bang hi mawk ding hiam? Haksatna, lungdamna, gelkholhna i cihte a picing, a hoih a zangsiamte. Na khat peuhpeuh ahihna bang lian in a mu theite cihna hi. Ahihna bang lian in mu thei cih ciangin a hoih leh ahoih in mu ding, a siat leh a sia in mu ding cihna hi. A hoih hi napi a hoihlo a mu hilo in; a hoihlo zong a hoih a mu hilo in. Liangko kikim ding deih, To leh Sal om ding deihlo cihna hi. Tua bang ahih kei leh To sem leng nuam dinga, sal suak leng nuamlo ding hi.

Mi picing i cihte in naupang lungsim paaita hi. Naupang ngaihsutna ah ama pa pen a hatpen hi tawntunga, picing ngaihsutna ah a pa pen a hatpen hi tuanlo hi. A sia apha khensiam in a hoih zui in, a sia puah a, a kilawm in gamta hi. Naupang in a sia a pha khentheilo in a kem ding kisam a, a pattah ding mi kisam hi. Picing in biakna pawlpi khat ah ngaihsutna tuamtuam om hi cih thei a, tua ngaihsutna tuamtuam te pomsiam hi. Thu kikup ciang ama ngaihsutzia tawh a kibanglo om ding cih tel a, ama ngaihsutna sangin a hoihzaw a ngaihsun om dinga, ama ngaihsutna ciang a ngaihsun banlo zong om ding cih muthei hi. Ngaihsutna hoih pen zong zahtak in, a niam pen zong zahtakbawl siam hi.

Zomi zong minam picing i suahna dingin minam sungah ngaihsutna a tuamtuam om ding cih i theihsa ahih manin tuate i pomsiam ding, thupi i sak om dinga, thupi i sak kholloh pawl zong om ding hi. Biakna zuihzia ah zong ngaihsutna hong kibang khinlo thei ahih manin a tuam deuh, a veikeh deuh i sak cih bang om tek ding hi. A tam man in maan khin lo thei a, a tawm manin khial khinlo thei hi. Tua bangte mimal suahtakna hi ciin i pomsiam ciang Zomi sung nuam ding hi. Politics ah zong tuamah bangin pawlkhat in Zomi Party thupi sim dinga, pawlkhat in party dang thupi sim kha ding hi, ahi zongin i bulpi Zomi ihihna kikhel tuanlo a, deih leh zuihnop kibanglo hilel hi. Crusade leh Cialpi a thupi sim mahmah sia pawlkhat om dinga, Lai Siangtho sangkah leh Pasian thu sinna a thupi sim pawl om ding hi. Kha Siangtho deihna bangin pai ding cih a thupisak pawl om dinga, Kha Thu limlim a zadah hilo napi a thupi simlo zong om veve ding hi. Tua te khempeuh biakna hi a, kitheihsiamsak ding picing gamtat ahi hi.

Khantohna leitung ah a hoihzaw, a siamzaw, a pilvai zaw cih bang om tawntung a, kisin den ding, kisin tohtoh ding a thupi mahmah ahi hi. Tua bang kisinna ding in kisin dinga kisam i sakte a pulak thei, a pholak thei, a lakkhia thei mi kisam hi. A hoihna bekbek a genthei mi kisam a, a hoihlohna bekbek a gen thei mi zong kisam veve hi. Vallua ta ei, ciin a khaamna (break) tuan thei ding zong kisam kik zel hi. A tawmlua lah hoihlo, a vallua lah hoihlo, a hoihbek in a zeek thei ding moderator zong kisam hi. Moderator sem dingin kum upa cih manin ngaihsutna upa khin tuanlo thei a, kum naupang cih manin ngaihsutna naupang cih zong hikhin tuanlo hi. Minam hi in, mimal hi in, pawlpi hi in, kipawlna hi in, innkuan khuasung, vengsung hi ta leh "hici zaw deuh leh" cih a genkhia ngam, a pulak ngam a om kei leh tua society pen khangto lo dinga, kiam lam manawh kha ding hi. A hoih zaw ding akipulak naak leh "himah ei" ciin a saangsiam paha, a kisin pah, a hanciam pahte khangto a; "kei nong tua cih se" ci a kikhasia sak ahih leh a khangto lo ding ahi hi. Minam picing suahna dingin i khialhna i hoihlohna hong kipulak leh i saan siam ding, ka kipuah kul hiveh e, i cih theih ding a kisam ahi hi.

India gam ah Lusei te a khan mahmah na khat uh pen amau ahoihzaw ding thu khat thei le uh numei pasal cilo in kihilh pah ziahziah uh, kigenpah, maitang ah zong kipattah pah uh hi. Khatveivei zakdah huai phial hi. Ahi zongin "an open rebuke is better than secret love" cih pen mucian lua uh ahih manin hizah in khantohpih uh hizen hi. Zomi te pen kihilh ngamlo, kihilh leng zong -- nang hilh ding ciangciang hisam keng e -- kici pian thong in, kihehnuam phial thei hi. English, Briton te ka cihna, bang kekkek, ka tuahkhak khat lawmpa pen ka kimuh masak uh pan ka kimuhkik uh ciang, "hih teng na kisin in" ci hileh kilawm tak in, a kilawm ding a cih teng hong gen giapgiap mawk hi. I ngaih khikhe hang nopmawh kisa veve hi. Ahi zongin hong itna, hong deihsakna pen kimangngilh thei lo hi.

Minam picing i suahna dingin, i minam kalsuan zia ah, i minam ngaihsut zia ah, i minam gamtatzia ah a hoihlo i sakte pulak in, kibawlphat sawm in; a kizui nailo, i theih nailohte kisin in hong hilh hong tai a om leh zong saangsiam, pomsiam in, kipuah leng i kilaamtoto ding hi. Lai Siangtho sungah Paunak laigelhpa in, "tate picing ding na deih leh ciangduai tawh sat ding phamawh sa kei in" ci hi. Minam zong ciangduai tawh sat a kul hun om ding hi.

***

La hoih kasak khat:

2010-05-29T23:20:00.000-07:00

HONG LEN GIGE’N

Dr. Hau Za Cin, Taipei

Hih lasa Lia Chingmuankim Shoute…Lia! Taktak hia? Shillong ah bel hoihsak simsimte thu themkhat a kizak nak leh "taktak hia?" ciin naak manlo, fast forward or a manlang thei bang pen in kidong kik pen a ngeina hi; a lamdang hilo hi.....ha ha.. that’s for fun.
Pu V. Paukhansiam la mah hoih ngaungau zel sam hi. I leitung nuntakna bek hilo i Christian nuntakna ah zong i bah hun tamin Topa hong let leh hong khutkaih mah kisam den hi hang cih hong phawk sak a, Amah lo in leitung kipal zolo, lui bang hileh kikan zolo cihna hi. A thukhupna pen hoih kasa mahmah a, a tang tawpna ah en leeng:

Aw kei hong gum Topa, Aw hong nusia lo aw,
Simlei mialna nuai ah tummang kha ning,
Aw na itna khut in kei hong len gige in la,
Damsung buaina ciaugal hong kaipih in,

Na vak ah mialna om ngeilo,
Na siangah muanna kim hi
Nang ah muanna nga ing,
Hong len gige'in

Sun Ni tum muihkhua zing, zankhua hong mial ciangin,
Mialna mitte hong vak, ka kha kem in,
Zing Nino hong suak a, Simlei pallunte lang,
Simlei pakte lo dingin, Aw! hong phal ken

Topa nang lo belh ding ken simlei ah nei keing,
Kha mit thuksem mu dingin hong vak sak in,
Aw na itna hoihna, hehpihna a thuk dan,
Nang naih sem a mu din, hong vaksak in.

Ka thumna ngaikhia in, Nang ngai a dangtak hi'ing
Khemna huihpi lakah ka kha a vai,
Hih hang kong sap ciangin, Nang kei ah na om a
Kahna mittui luang tawh phatna la ka sa.

Topa a mu ciante’in bel khitui luangin Topa a phat uh hi mawk mah hi. Hih la ka zak ciang Zomi ka hih nuam sa semsem ing. Lasa siamnu, nungak melhoih zitzet in ama hoihna khempeuh kilawmtaka Topa phatna dinga a zat mawk pen thupi kasa hi. Zolia te mahmah pahtak huai uh, i nam tawisang uh, i nam zuun uh hi. Zomi i hih nuamsak vanvan uh hi. Topa muhna ah zong kilawm dinga, talent a piak Amah phatna dinga a zatna ah Topa lungdam in thupha zong pia dingin ka lamen hi. Mizogam ah a kithupi sim mahmah khat pen lasa siam nungak leh tangvalte in Topa phatna la simloh leitung la -love songs leh la gina lote sakna dingin a aw uh zanglo uh hi. Mel lah hoih, la lah siam, a hoihna khempeuh Topa adingin zang, kipia, ki-ap cih pen a kithupi sim, a kizahtak, a kipiibawl mahmah khat hi. Tua bang lasa siam in hih la hoih a sak pen kilawm kik semsem hi.
Aw! vanglai hun kaihsau theih hi leh ka dam sungteng vanglai in zang khin nuam ing. Ahi zongin make up thuah giat leh hair dye tamveipi in zong vanglaini kho theilo ahihna i zak ciangin i hun hoih pen beibei hi cih hong phawksak, remind tak pi hi. Ut in ut kei leng, ciangkhut leh mitbulh tawh kipelh theihloh hun hong tung ding a, zan ihmu loin zun leh ek i nawn hun in hong kheng lo ding hi.
Khamuanpa Topa, i bukna hi tawntung takpi hen. //

Zono khat lasakna

2010-04-15T22:53:00.000-07:00

Lian Suan Khai lasakna: http://www.youtube.com/watch?v=iHHoM13ip_Y

Do na lingling, Do na lingling,

Gual in kumkhua do na lingling...

SILVER JUBILEE PROGRAMME

2010-04-14T01:03:00.001-07:00

ZOMI BAPTIST CHURCHES, MIZORAM
SILVER JUBILEE PROGRAMME

“Live for Christ”

A mun : Zomi Baptist Church Biakinn, Champhai, Mizoram, India
A hun : December 7 – 9, 2007
Speaker : Rev. Dr. J.M. Ngul Khan Pau, D. Miss. (USA)
General Secretary,
Council of Baptist Churches in North-East India (CBCNEI),
Guwahati, Assam, India.
Thulu : Picinna (Efesa 4:14-15).

“Tua hun ciangin thu upna lamah naupang i hi nawn kei ding a, mite khemin a khialsak theite’ mutna hangin i suk hoi i to hoi nawn kei ding a, itna lungsim tawh thutak genin, lutang ahi Khrih tawh i kibat dongin i khangto ding hi.” Efesa 4:14-15.

DECEMBER 7, 2007 (LAITHAI NI)
Pawi Tunkim Ni

BIAK KIKHOP (5:00 – 8:00 P.M.)

1. Phatna leh Biakna : La makaite
2. Jubilee Prog. Honna : Revd. G. K. Nang, Shillong
3. Khuaimei detna : Zomi Baptist Youth Fellowship (ZBYF), Mizoram
4. Hun uk : Upa Nang Khan Dal, EC member
5. Phatna la : Dawn un Jesuh min vanglian.. No. 24 (Tedim Labu, 149)
6. Hun pan : Nu Cing Ngaih Ning
7. Vaidawn thugen : Upa J.K. Thang, President, Zomi Baptist Churches (ZBC)
8. La pawl : (1). Champhai BYF, (2). ZBYF Central Choir,
(3). Leisenzo BYF, (4). Vaikhawtlang BYF.
9. Souvenir honna : Rev. Suan Khan Thang, Aizawl
10. Thupulakna, Mai lahna leh Pahtawina: Executive Secretary, ZBC
11. Thutom genna : Upa Cinh Za Khup, ZBC Founding member
12. Thuhilh : Dr. Rev. Enn Za Sian, ES, Chin Baptist Association
13. Phatna la : Pasian hong... No. 26 (Tedim Labu No. 185)
14. Thupha piakna : Rev. Dai Do Thang, Hnahlan Area Pastor

DECEMBER 8, 2007 (NINO NI)
Pawi Nikhat Ni

ZING THUNGETNA : (6:00 – 7:00 A.M.)
Ki -apna makai : Evan. Thang Lian Go, Vaikhawtlang

ZOMI BAPTIST HOUSE HONNA (9: 30 A.M. – 2:00 P.M)

1. Announcer : Women Secretary, ZBC
2. Kidawnga sim : Tedim Labu No. 31
3. Phatna la : 1). Tanga tuana hong huh (No. 8)
2). Gualzawhna mualsuang (No. 14)
4. House Honna : Rev. Dr. J.M. Ngul Khan Pau
5. Tray Girl : Lia Lian Do Kim, Champhai
6. Building Report : Upa Suan Khan Cin,
Vice Chairman, Jubilee Building Committee.
Zomi Baptist House hon khit ciangin mipi khempeuh in Biakinn lam zuan in paisuk dinga, Khua Pawlpi Upate in flag (laan) tawi in makai ding hi. Flag tawi dingte leh kigualh dan dingte:

1. Hiangmun
2. Ngur
3. Vapar
4. Murlen
5. Champhai
6. Sesih
7. Vaikhawtlang
8. Leisenzo
9. Hnahlan
10. Ngaizawl
11. Zokhawthar
12. Aizawl
13. Mimbung
14. Shillong
15. New Champhai
16. Vengthar, Champhai

Biakinn tualah Jubilee Dak sat dingte:

1. Upa Cin Za Khup, Founder – 3 vei
2. Upa Ngul Cin – 3 vei
3. Upa Suang Khan Do – 3 vei
4. Upa J. Thawmte – 3 vei
5. Upa J. K. Thang – 3 vei
6. Upa Z. K. Thang – 3 vei
7. Upa Gin Khan Do – 3 vei
8. Upa Thawng Pau – 3 vei
9. Upa Gin Za Go – 1 vei

7. Thau lotna : Thau nei khem peuhin lawn ding
8. Haleluijah Lapi : Khua khempeuh BYF
9. Hon Thungetna : Lungdam kohna
10. Hun uk : Upa Z K Thang, Secy. Senior, ZBC
11. Phatna la : Pasian A’ minthang.. No. 29
12. Hun pan : Upa T. Thang, EC Member
13. Thu pulakna & Phawkna : Executive Secretary, ZBC
14. Lapawl : ZBYF Choir, Shillong BYF, Aizawl BYF
15. Sumpi : Itna sisan luangin No.17 (Pawi huhna)
16. Sumpi ap : Upa Cin Khen Khup, Hiangmun
17. Thutom genna : Jubilee late (10 minutes ciat)
18. Mihon lasakna : Topa sung nuam.. No. 31
19. Thupha piakna : Pastor Lian Do Khup, Shillong
20. Ankuang thungetna : Siapi J.M. Suan Do Chin, Vanzau

PAWI ANNEKNA (2:00 – 3:00 P.M.): Pawi sim khempeuh in ankuang umna

ZOLA SAKNA (3:00 - 4:00 P.M.)

1. Zola sakna : Pawi ann nek khit ciang
2. Makai : Upa Thawng Pau leh Upa Cin Khan Kam
3. Hanla sa ding : Upa Kam Ngaih Thang, New Hiangmun

NITAK BIAK KIKHOP (5:00 - 8:00 P.M.)

1. Phatna leh Biakna : La makaite
2. Hun uk : Upa Cin Ngaih Lian, EC member
3. Phatna la : Ka lungdam..No.30
4. Hun pan : Upa Huat Khan Lian, Chairman, Mission Board
5. La pawl : (1). ZBYF, (2). Shillong BYF,
(3). Hnahlan BYF, (4). CBYF
6. Thu pulakna : Executive Secretary, ZBC
7. Deihsak thugenna : (1). Rev. Cin Kam (5 mins)
(2). Pa Thawng Do Thang (5 mins)
(3). BCM palai (5 mins)
8. Phatna la : Tho un...No.32
9. Thuhilh : Rev. Dr JM Ngul Khan Pau
10. Thupha piakna : Revd. Lian Khaw Siam, Teikhang Area Pastor

DECEMBER 9, 2007 (NIPI NI)
Pawi Ninih Ni

ZING THUNGETNA : (6:00 – 7:00 A.M.)
Ki -apna makai : Evan. Thang Khan Khual, Vengthar

ZING KIKHOP (9:30 A.M – 12:00 Noon)

1. Phatna leh Biakna : La makaite
2. Hun uk : Upa Gin Za Go, EC member
3. Phatna la : Topa Pasian…. No.27 (Tedim Labu No. 41)
4. Hun pan : Evan. Cin Ngaih Thang, Leisenzo
5. La pawl : (1). ZBYF Central Choir, (2). CBYF Choir,
(3). Sesih BYF, (4). New Hiangmun
6. Thu pulakna : Executive Secretary, ZBC
7. Ordination : Rev. Suan Khan Thang, Aizawl Area Pastor
8. Resolution simna : Recording Secretary, ZBC
9. Letsong Piakna : President ZBC (Ordained Elders)
10. Sumpi : Si a khutguak No. 37 (Pawi huhna)
11. Sumpi-ap : Upa Z. K. Dong, EC Member
12. Phatna la : Leivui Panin Hong Lamto
13. Thuhilh : Rev. Dr. J.M. Ngul Khan Pau
14. Thupha piak : Pro Pastor Cin Khan Tuang, N. Hiangmun

SUN KHANGNO HUN (1:00 – 3:00 P.M)

1. Phatna leh Biakna : La makaite
2. Hun uk : Upa Lang Kap, President, ZBYF
3. Phatna la : Hong phat ung.. No.33 TD.269)
4. Hun pan : Pa Thang Lian Mung, Asst. Rec. Secy.
5. Thu pulakna : Executive Secretary, ZBC
6. Skit ZBYF : ‘ZBC Tuma leh ZBC Tuhun’
7. La pawl : (1). ZBYF Central, (2). Vaikhawtlang BYF,
(3). CBYF Choir
8. Kidemna : La pawl
9. Quiz Master : Tg. Sawm Thang Suante
10. Hansuahna tom : (1). Dr. Neng Ngaih Lian, Guwahati,
(2). Dr. Hau Za Cin, Taiwan
11. Hun khakna : C.E. Thupha

NITAK KIKHOP (5:00 – 8:00 P.M.)

12. Phatna leh Biakna : La makaite
13. Hun uk : Upa Gin Khan Do, ECmember
14. Phatna la : Jesu Kumpi.. No.34
15. Hun pan : Upa J. Thawmte, Chairman, Music Board
16. Thu pulakna : Executive Secretary, ZBC
17. Lapawl : (1). ZBYF, (2). Shillong,
(3). Leisenzo, (4). CBYF Choir
18. Thuhilh : Rev. Dr. J.M. Ngul Khan Pau
19. Lapawl : Jubilee Lapawl sakkhopna
20. Letsong hawmna : ES, leh ZBC President
21. Lungdam kohna : Rev. Gin Lam Thang, Executive Secretary, ZBC.
22. Phatna la : Nangmah tawh Pasian Omkhawm Ta hen… No.35
23. Thupha piakna : Speaker

Ciamteh dingte:

1. Usher ding Champhai BYF & Aizawl BYF te tavuan hi.
2. Banner bawl dingin Aizawl BYF tavuan ki-ap hi.
3. Physical arrangement khempeuh Champhai LCC tavuan ki-ap hi.
4. Zin hawm khempeuh Champhai local committee tavuan hi ding hi.
5. Programme lawhcinna dingin thungen tek ni.
6. A kisam bangin programme kilaih thei ding hi.

Programme Making Committee
Zomi Baptist Churches Silver Jubilee 2007

Executive Secretary: Rev. Gin Lam Thang, MA, BD

ZOMI

2010-04-14T00:49:00.000-07:00

(ORIGIN, CULTURE, RELIGION, EDUCATION)

Dr. Hau Za Cin, Taipei

Thupatna:

Zomi, Pasian in minam khat dinga a tuamkhenna Sengam pan tuni ciang ah kum tulthum pha ta hi (1027BC – 2006AD). Sengam pan Kabaw zanggam ah kikhinsuk in kum zagiat val teeng uh a. Tua pan mualtung khua Khampat ah kum zanga val tengin Mawngpi suan uh a, Cimnuai ah kum sawmnga, Geeltui ah kum za, tua pan Tedim sat in, Kam Hau ukpi sep laitakin mikangte Zogam hong tung, hong sim uh hi. Laipian Pau Cin Hau in maangmu in Zomite lai neih masakna pen hi a, Biakna thak neihna, Lai sim kipatna ahih laitak in Christian missionary masa pen Rev. Arthur E. Carson te nupa Zogam hong tunga, tua ni-a kipan Zomite leitung hong kilamdang in Zomi thak hong pianga Zomite mit hong keuh hi. Nuntakna thak neiin, ngaihsutna thak tawh leitung tuancil dingin kalsuan kipan hi.

I. ZOMI PIANNA (ZOMI CREATION)

1.1. Zomi pianna thu: A kipat cilin Pasian in vantung leh leitung a piangsak hi (Piancilna 1:1). Ni, Kha, Aksi, Tuipi, Ganhing, Lopa, Huih, adang na khempeuh a bawl khit ciangin a uk, kem a khoi dingin Amah lim leh meel sun in mihing bawl a, tua ah Zomite kipatna pianna thu ahi hi. Pasian in, “Eima lim, eimah hong sunin mihing bawl ni. Tuipi ngasate tung, huihlak vasate tung, ganhingte tung, leh leitunga a bokvakte khempeuh tungah ukna neisak ni,” a ci hi. Amah in mihing piangsak a, pasal leh numei a piangsak hi. Pasian in amaute thupha pia a, amaute tungah, “Ci pha-in tampi pha un la, leitung dimin zo un. Tuipi ngasate tung, leitungah a gamtang, a nungtate khempeuh tungah ukna nei ta un,” a ci hi. Pasian in, “En un, leitung maitang khempeuhah a om, tang a piangsak kungnote khempeuh leh a gah sungah tang a om singkung khempeuh note tungah kong pia khinta hi. Tuate an-in na nei ding uh hi,” a ci hi. Tua mah bangin a piang pah hi. Pasian in a bawlsate khempeuh en a, hoih sa mahmah hi (Piancilna 1:1 - 31). Mi masa pen Adam pen Zomite pa hi a, a zi Evi pen Zomite nu hi.

Khang tampi hong pai zawh ciangin Adam leh Evi suan pan tuni a Zomi pen hong ka khia a, a sanggam dangte mah bangin Zomi in zong ngeina leh biakna nei in, inkuan khat, minam khat a hihna kilahna dingin ngeina kician khat nei hi. Tua pen Adam suan leitung mi khempeuh neih a hi hi. Pawlkhat in Zomi cih pen mualtungmi cihna hi ci uh a, ahi zongin Zomite bek mualtung ah teeng hi lo hi. Tua manin Zomi cih pen mualtungmi cihna hilo a, Zhou ukpipa suante ihih mana Zomi ihi zaw hi.

a). “Ei teng khawlkhawm, a tuam omlo, vannuai ci peuh
Khul a piang, laigui kizomte hi ngeingei hang e”
b). “Laigui kizomte hi ngei ngei a, tunsung khat pan
Piang hi ngeingei, piang hi ngeingei e”

Zogam zaina (Zogam : Zogam pen sim leh mal teha a dung lam pen Equator mal lamah latitude 21.56 degree leh 24.30 degree kikala om hi a, tai (mile) 250 khawnga sau-in kituat hi. Sak leh khang a vai pen longitude 92.16 degree leh 94.20 degree kikal hi-in, tai (mile) 220 khawnga zai-in kituat hi.

Zogam sing leh sa (Zogam flora and fauna): Zogam khua hun pen hoih mahmah ahih manin singkung lopa leh nuntaakna a nei ganhing nam tuamtuam tawh kidim hi. Zogam ah taaksing, ngeisok kung leh gua tuamtuam tam mahmah hi. Tua lo Dol, Hiang, Tei, Mawng, Vau leh Vong singkungte zong pha mahmah hi. Paak nam tuamtuam - Ngeisok, Palpi, Heisa, Zozam, Tumtai, Phuitong, Lingpaak tuamtuamte a hunhunin paakin Zogam etlawmsak mahmah hi. Sahang tuamtuam, Vom, Gamsial, Ngal, Sazuk leh Zawng nam tuamtuamte teenna gam hi a, vasa nam tuamtuam - Vaphual, Tawlawk, Mu, Gamak, Vagik, Va-ak, Vaki, Simbu, Baibek, Pengpelepte tam mahmahna ahi hi.

Hih bangin Pasian in Zogamah Zomite nuntaak nadinga kisap teng a kicingin koih ahih manin Zo minamte pen minam hampha mahmah ahi hi. Tua ahih manin hih gam pen itna leh zahtaakna tawh a kep ding Zo minamte mawhpuakna ahi hi.

II. ZOMI KIPATNA LEH HUNLUI (ZOMI ORIGIN AND HISTORY)

2.1. Zomi kipat khiatna: Adam pan khang tampi a phak zawhciangin Sengam ah Zomi ukpi Ji Fa, "Zhou Wu Wang" (Zomite Ukpipa Wu a cihna, Wang = Ukpipa, Kumpi, King cihna hi) in vaihawm hi. Zhou inkuan ukpi sepsung (Zhou Dynasty) kum zagiat a hi hi (1027 – 221BC). Hih inkuan pan Zomi a piang hi. “Zomi na hih uh leh ‘Zhou suan’ na hi ding uh hi. ‘Zhou Ming’ (Chinese) cih ciangin ‘Zhou mite’ cihna hi (ming = mi)” ciin Dr. Tommy Tsai Po-Yu, National Taiwan University, Taipei in hong hilh hi. Zhou Ming cih pen lai ineih ciangin Zomi ciin ki at ziau hi ding hi.

2.2. Sen gam om lai thu: BC 1757 pawl in Xia ukpipa in mipite itna leh hehpihna tawh uk lo in, gitloh na leh ki phatsak natawh uk a hih manin Shang Dynasty uk na hongpiang hi. "Shang" ukpipa in khuakim ah hausa upa koih lo ahih manin, Zomite in ol takin a ukna BC 1027 in sutkhia hi. BC 1046 -1043 hun tak ciangin Zomi ukpipa Ji Fa in a uk ciangin khuakim ah hausa upa koihkim a hih manin kuamah in ukpi zaa sutzo pak lo hi. Zomite uksung in khangto mahmah uh a, ki-ukzia zum nasepzia, khat leh khat kizahtakzia, lo khoh singpuak na leh sumbawl paiibawlnate ah khangto mahmah uh hi. Hih hun pen Sengam khantoh mahmah hun hi. Sente miciim Con Fu Cius in siangthona, huahna, dikna leh pilna, khat leh khat kithupi simna, nupa ki kal, lawm leh gual kikal, ulian uneu kikal ah kizahtakzia, inkuansung ki zahtakzia, inkuansung nuntakzia, beh leh phung kiit zia dingte, kimakaihna, innluahna, sahawmziate kician takin hilh hi. Tua a hilhziate Zomite in ‘i ngeina’ (Zomi culture or tradition) i cihcihte ahi hi. "Zhou Wu Wang" hong khanga kipan in kipum khatna hong khanga a mah pen VANTUNG TAPA (Son of Heaven) kici liang hi. Vantung pan hong kumsuk kumpipa hi dingin ummawh uh hi. Hun hong paito zel in Ji Fa inkuan sungah vaihawm ding khang kisam a, Ping Wang ukpipa (BC 770 – 720) hun panin Zomi vaihawmna pen a minbek hita a, Ji Fa inkuan zahtakna omnawnlo in, vaihawm upate in kumpi bangin vaihawmgawp uh ahih manin BC 221 ciangin Hui Wang khut panin Qin Shi Huang in Zomi vaihawmna suhsak hi.

2.3. Sen gam pan Chindwin luidung ah: Tuabanga Zomite ukpi sepna a kisuhsak ciangin ukpi thakte in ‘Great Wall’ lam ding hong kipan a, mihing nasem dingin zang uh hi. Hih nasep gimhuai leh ukpi hihna a khahsuah uh nuamsa loin Sengam nusia in leitaw lam zuan in suahtakna dingin na paikhia uh hi. BC 4 hun ciangin Szechwan kim ah tengin Pagyi khua sat uh a, AD 6 ciangin Chindwin luidung ah tengin Dahpa leh Penglamte hunlai AD 108 kiimin Pugam leh Pupa khua na sat uh hi. AD 600 ciangin Ji Fa suan sungpan Thet mite Zomi suak hi.

2.4. Chindwin pan tuni ciang: AD 800 hun in Khampat khua satin hun sawtpi teeng uh hi. Khampat khua pen zang leh kham kipehna, kham kipatna ahih manin ‘Khampat’ a kici hi. Mualtunggam genna 'Kham' cih kammal pen Zomite bekin nei hi. AD 1300 in Ciimnuai satto in, 1350 ciangin Zomi nungak melhoih Leng Tong Hoih pen Ava mangpi zi in na om hi. 1450 AD in Thang Ho, Lian Do, Galngam, Hangsai, Cing Khup, Ngam Bawmte Ciimnuai leh Geeltui ah teeng uh hi (Ciimnuai a sa kibak Geeltui ah kithuk ciin upate in kammal na nei uh hi). Kabaw luidung pan kham kahtoh, Khampat, Cimnuai leh Geeltui hun pan Tedim khuasat (1570), Kam Hau hong khan’ (1840), mikangte hong pai (1886), Pasian thu hong tun (1899), lai ineih (1900) tan zong eimau beh hausa, khuasat leh ukpite makai-in kizangin ki-uk ciat a, Zomi Nam Ni (February 20, 1948) ciangin tua ki-ukna bei in Zomite a suakta minam ihi ta hi. Kabaw Valley pan a paitoh na vuah Tuingou leh Thangmualte kantan to in Ciimnuai ah khul a tuak uh hi. Tua lai pan suakta taktak kisakna neita uh ahih manin amau leh amau ukpi ding kisehtawm in ‘khul a piang’ na kici uh hi.

2.5. Nam tuamtuam tawh ten khawmna: Ciimnuai pen Phaileng leh Saizang kikal Tedim pan taisawm a gamla ah om hi. Tua laiah Zomi nam tuamtuam na tengkhawm uh a, mihing hong tam ciangin Sengam pan a hihngei uh loneihna zong hong hamsa ahih manin amautenna mun leh gam ciat ah ki-ukna tuam neihin, a bawngbawng in hong kikhen uh hi. Tuate tuni a - sihzang, galte, gangte, paite, simte, thadou, vaiphei, zoute, lusei, khelma, baite, rangkhols, langrong, aimual, anal, chiru, lamkang, kolken, kom, chote, hmar, tedim, sailo, ngawn minamte ahi hi.

2.6. Zomi kumpi in ciamteh: Zomi lak pan laipil masa, Mandalay University, Burma ah Lecturer a sem ngei, Rev. S.T. Hau Go in ‘Zopi (highland) ah i teen manin Zomi a kici hilo in, i pianna pi leh pute Zo ahih manin amau min kepna in Zomi aki ci ihi hi. Zopi sung I tenma, luipi dung zangsungah I tenlaiin zong Zomi ikici zo hi’ ciin na ciamteh hi. Pu Thawng Khaw Hau ‘Zo Khang Simna Laibu’ leh Captain K. A. Khup Za Thang ‘Zo Suan Khang Simna Laibu (Genealogy of the Zo Race of Burma)’ laibu sungah Zomite kipatna pen Zo hi ciin kiciamteh a; Dr. Vum Kho Hau ‘A Profile of Burma Frontier Man’ laibu leh Dr. Vum Son ‘Zo History’ in zong Zomite kipatna Zo hi ciin na ciamteh uh hi.

Rev. Sowards, Secretary, American Baptist Missionary Society in 1953 kum in Zomi Baptist Convention na patpih a, 1953 in Zomi Theological College na phuan hi. 1988 ciangin Burma kumpi in Zomi ciin hong ciamteh a, Zomi National Congress zong pawlpi min khat in sang hi.

2.7. Leitung civilization in hong pha: Zomiten tanglaiin lai kinei a, savun tunga kigelh ahih manin Savun Lai, Tualsuak Lai kici hi (AD 1400). Zosuante lakah Zomi bekin ‘Lai’ cih kammal kinei hi. Tua ahih manin Zomite in tanglaiin lai nei ngei takpi i hihna leh Savun lai pen Zomite aa ngiat a hihna kilang hi. Tua savun lai pen ui in tuah mang ahih manin lai kinei nawnlo hi. Lai neilo theilo uh ahih manin thu pen lungsim leh la tawh na ciamteh uh hi. A gal mat sa mat zah uh singkhuam pang liamin ahi zongin, singkhuam dawnah sa lu gal lu suangin khau khihbawkin ahi zongin na ciamteh uh hi. Sing hiam suang hiam suiin a sa mat a gal mat uh lim bawlin zong khawmualah na phut uh hi. Pau Cin Hau lai leh Mangtual lai i neih zawh panin a lim bek hi nawn loin a thu (laimal) tawh kihelkhawm to hi.

Zomite in lai i theih cil pen Kawllai hi ding a, Zomite leh British galkapte kidona ah Mang Pum (Khuasak) kimanin Yangon thongah 1894 pan kum li a kiat sungin Mang Pum in Kawllai siam man a, Zomi sung pan lai thei masapen hi dingin kituat hi. Tua ma-in Khuasak khua mah Hang Kip in zong Kawllai siam zo a ci zong om hi. Mang Pum in 1898 kumin Khuasak khuaah Kawllai sinna sang hong hi. ABM ten Kawlzang pan hong tonpih Karen mite zangin 1902 kumin Tedimah, 1904 kumin Khuasakah, 1905 kumin Tonzangah sang (mission school) hongin Kawllai hong sinsak uh hi.

1900 kum in Pau Cin Hau Lai kici Lailui khua, Pau Cin Hau (1859-1948) in mang a muhna pan 1896-1898 kum sungin kammal khat teh laimal khat ta ahi laimal 1050 bawlkhia a, laibu-in bu guk suah hi. Laipian Lai, Zotual Lai zong kici hi. 1901 kumin khaw 13 pan mi 51 sinin siam uh a, tuate’n amau khua ciatah midang hilhsawn uh hi. Galpi Khatna sunga France pai Zomite leh innlamten lai kikhakna in a zat theih sun uh hi a, tua in Zomite lakah Zotual Lai kizeel mahmah ta hi. Tua ahih manin ABM missionary Rev. J.H. Cope in zong 1931 kumin Mualtung Thuhilhna bu bawlna-in Zotual Laiin a zang hi. Chin Hills Deputy Commissioner Lt. Col. Burne leh Rev. J.H. Cope’ malakpihna tawh 1936 kumin Thang Cin Kham, Pau Za Dong, Cin Khaw Gin leh Sian Khaw Cin ten puahpha uh a, consonant 21, vowel 16, tonal sign 20 suahin a vekin laimal 57 phasak uh hi. Tu dong Laipian Pawlpi sungah kizang lai hi.

Tulai taka i zat leh i zat suak ding zong hih tuak Mangtual Lai (or Zolai or Ni Sagih Lai) i cih pen 1908 kuma Rev. J.H. Cope (1882-1938) hong tun phetin Zomi Khristian suak masa pen Khawsak khua-a Pau Suan leh Thuam Hang te nih Hakha-ah samin Zopau kihilhsak a, tua pan Mikang laimal (Romanised script) tawh laimal hong bawlsak kipan pah ahi hi. 1919 kumin Tedim uk sunga hausa lian teng samkhawmin bang kam tawh laihilh ding cih genna pan Kam Hau kam (Tedim pau) zat dingin thukimna bawl uh hi. Rev. Cope in Zomite adingin Tedim pau leh Roman script tawh bawl laimal mah hoih pen ding hi a cih teitei ciangin Deputy Commissioner Mr. Burne tawh kimukhial dekdek heel uh hi. Zomite laimal ding Roman script tawh bawl pen Royal Asiatic Society in zong 1912 kumin hoih a sak pen thu na pulak zo hi. 1925 kum pan Zogama primary school tengah kawllai kiphiatin Tedim pau, Hakha, Falam leh Chinbok tawh laihilh hong kipan to hi. Hih bang teng hang tawh Rev. Cope pen Zomite in Sangmangpa kici a, Cope topa cih tawh min nih kitangsak hi.

2.8. Tuma kum zakhat sung a tom in: Kum 1904 Zomite palik tum cilna hi a Zomi palik kiphuan in, sila kiphiat hi. 1914 Tedimah Zolai tawh Thukizakna kihawm pan hi. Muizawl khua, Pau Khen in siah a piaknop loh manin Falam gamah lal dingin kisawl. 1915 Zokam tawh Lungdamna Matthai bu kikhen. 1917 Piantit (France) gam pai ding mi 1000 Tedim pan ding khia. London hawh. 1921 Chin Hills Census, Tedim uk (Tonzang tawh) sungah inn 5045 leh Mihing 36,048 om. Zogamah ann hoih lo ahih manin, Lusei gamah mi tampi tak peem, sang khempeuh ah Zolai hilh ding thukim. 1923 Zomi 300,000 sung panin 2,351 in lai sim thei. 1925 Zolai sin kipan in kawllai kiphiat. 1931 Pa Pau Cin Hau lai tawh Mualtung thuhilhna kikhen. Hau Za Cin Pau in Matric zo, a zo masa pen. 1932 Zokam Thuciam Thak kikhen. Mikang a do Zomi makai Pu Suang Khaw Kam, Magwe khuapi-ah si. 1946 S.T. Hau Go in M.A (Madras) zo; Chin Hills pan a masa pen. 1947 Tedimah High School kiphuan. THUKITUAHNA cih thukizakna kipan. Zo Education Board kiphuan. Tedim ah Lai Siangtho Sang kiphuan. Siamsinpawlpi (SSPP) January 13 niin Suangpi khua-ah kiphut. 1948 ZBC sungah TBA, FBA, HBA kiphuan. Zo zum Rangoon-ah kiphuan. Hill Chin Students' Union Rangoonah kiphuan. Zogam ukpiten mipi deihna zuiin ukpi za nusia, Zomi Nam Ni hong piang. 1950 Sia S.T. Hau Go in MRE, Colgate Rochester Theological College, USA pan zo. 1952 ZBC (Zomi Baptist Convention) kiphuan. LUNGVAKNA cih thukizakna kiphuan. Dr.Vum Khaw Hau in Ph.D. ngah. Chin State-ah biakna lam khanlawhna tung. 1977 Tedim Lai Siangtho kizo.

Piancit paina thu: Leitung galpi khatna kici Germany leh England (France leh USA in England panpih hi) kidona ah Zomite zong England galkapte panpih dingin May 25, 1917 ni-in Piantit (France) gam pai ding mi 1000 Tedim pan ding khia a, Ocober kha in tung in, tuipi tungah a si 21 te France gamah kiphum hi. France pan London zong hawh in, kumpi inn zong en uh hi. France-ah Ukpiapa Hau Cin Khup in mi tampi paisak zo ahih manin kumpinu in minphatna KSM pia hi. France gam zinte hong ciah uh ciangin sum tampi hong pua uh ahih manin zi a deihdeih uh tel uh hi kici hi.

Panglong Agreement I cihcih pen: February 12, 1947 ni-a kawlgam ah omdinga Zomi Hausa leh a Upate in suai a kaihna uh pen Panglong Agreement kici hi. Mipi vaihawmna zui dingin, kumpi in Hausa leh upate vaihawmna pan a khawlman uh sum pia ding cih thukimna hi. Hih kikhopna ah Hausa leh upa mi 5000 val kihelin, thukim na suaikai uh hi.

Zomi Nam Ni: Pu Thawng Za Khup in February 20, 1948 niin Zomite Hausa leh upate khutsung pan suahtakna dingin thusung a, mi 5000 in deihin, mi 17 in deih lo hi. A tamzaw thukimna bangin tuani panin Hausa leh Upa khutsung pan Zomite suakta a, amau leh amau vaihawm ding telin, democratic form of governance zang uh hi. Tua ni pen Zomite suahtakna ni, Zomi Nam Ni (Zomi National Day) ciin kiciamteh hi. October 9, 1950 niin Kawlgam kumpi in National Holiday in hong ciamteh sak hi.

III. ZOMI NGEINA (ZOMI CULTURE)

Sangmang J. H Cope in a genna ah Zomite nuntakna pen mikangte hong tunma pek in zong zahtak huai mahmahta hi ci hi. Ahi zongin mualtunga teng Zomite ngeina pen namdang hong lutte in dausak a, siasak hi ciin a laibu ‘Awakening of the Northern Chins’ ah at hi. There are evidences that these people once had a higher civilization. This is seen from the fact that they are completely clothed and do not appear ever to have been headhunters or cannibals. There is even a tradition of a written language. They differ from many Hill tribes in that violent crime is rare polygamy not very common, women more respected, and warfare carried on less brutally than in many Hill districts.... After reaching the Hills they quickly spread out in little villages in the narrow valley and many dialects soon developed.

3.1. Nik leh puan silhna thu: Zomite pen khi ok, kawnggak gak, tukbel tep ihi hi. 1904 kum in Zomite khitang Wate khuapi gei ah kito khia hi. Hih in Zomite leh kawlte hun khat laiin kiteengkhawm hi cih hong lak hi. 1971 kumin S. B. Kham Tin Zam Vungh in Sabani khua, Sagaing Division ah Zomite khitang leh tukbel tampi tokhia hi.
Zomite van neih lak ah khuang, zam, dak, pengkul, gosem, phit, sialki, hihte pawihun lehgualnopna, dah hun ciang zong a kizang ahi hi. Zomite ngeina a kilawm mahmah pen ‘kilawm’ hi. Nasep ciang kilawm, kiseppih, ni khat a khat lo ah kuanin, a zingciang a khatzaw lo ah sem kik. Tua pen nungak leh tangval kingaite bangin nuam a sak mahmah uh hi. Sunkhua a nasem khawm cih pen maw. Sawn - kelsawn, akgiasawn, vaphual sawn, kibah hi. Nik leh puan kitenma in mawngkhak numei in teng uh hi. Gal leh sa tawh kidelh tawntung ahih man un thaulawng thupi mahmah hi. Thauvui kohna dingni sialki kizang a, a kuahna thungip dingin vompi kawngvun kizang hi. Thangsiah kilim zat a, tumkhau leh khaugui, tangval khau tawh kisiah hi. Sakhi, ngal, sazuk, sahang cih bang awk zel hi. Sakuh leh saneu dangte matna ding pena neu deuh kisiah hi. Ngasa matna dingin ngawi kidawh a, gu kideng hi. Salian mante in haipi tawi thei a, mipi maiah kipahtawi hi.

Numeite in a sam uh phek in, phek thum phasak uh a, a liangko nih tuakah kaisak uh hi. Bilvut in bilbah bah uh hi. Khi ok in, nik kawg ah gak uh hi. Christian suak khit ciangin Nipini a silh ding leh nasepna a silh ding puan nei tuam uh hi. Numei khempeuh in siamgan, khauphan thei in, pasal khempeuh in thau kap thei uh hi. Pasalte in nangphan in, bawmphan uh a, ciang leh lawhte phan uh hi. Siksek khempeuh pasal nasep hi a, tem, hei, tu, tei khempeuh a tavuan hi. Inlam leh gawlbawl khempeuh pasal in sem hi. Zomite in ansuk khekna dingin Tui-annsu bawlkhia uh hi. Ni leh kha leh aksite na en in a tangthu na theihsawm uh a, aksi tai leh aksi kiate zong na ciamteh uh hi. Aksi kihei dan, khabei, khalik, khadete in hun na ciamteh uh a, phalbi leh khawkhal zong nisuak dan in na ciamteh uh hi. Khuapang a san leh khua pha ding ciin na genkhol thei uh hi.

3.2. Inkuan: Kitenna pen a ki thupi ngaihsut hi a, a hoih pen mah kizong ciat hi. A melhoih, a migi, a siam, a pil, a tei mah mo dingin nute in na deih uh a, a hangsan, a thahat, a kivate mah nute in makpa dingin na deih uh hi. Numei man pen a kitengding inkuan nihte thukimna bang hi a, a kitendan leh a kitenhun khempeuh amau khut ah om hi. Tagah leh meigong a om leh Zomite in limtak in na khoi in na keem uh hi. Angkawmna leh khialhna a om leh hausa leh up ate in thukhen uh a, ki thahna pen kigawtna in kizang ngei lo hi (capital punishment was never in practice).

3.3. Nupa suah dan: Kitenna pen a ki thupi ngaihsut hi a, a hoih pen mah kizong ciat hi. A melhoih, a migi, a siam, a pil, a tei mah mo dingin nute in na deih uh a, a hangsan, a thahat, a kivate mah nute in makpa dingin na deih uh hi. Numei man pen a kitengding inkuan nihte thukimna bang hi a, a kitendan leh a kitenhun khempeuh amau khut ah om hi. Tagah leh meigong a om leh Zomite in limtak in na khoi in na keem uh hi. Angkawmna leh khialhna a om leh hausa leh up ate in thukhen uh a, ki thahna pen kigawtna in kizang ngei lo hi (capital punishment was never in practice).

3.4. Sivuina: Mi a sih ciangin vui pah lo in siluang nithum bang kikoih hi. Siampi in phuisam in, zu mop a, kawsah sa go in, a si pen thupi takin a kha khia uh hi. Gal ai sa ai ahih leh a luang kizawng in dai ah kisia a, a sa a muat khit, a tolh khit ciangin a guhkeu la in han ah a phum uh hi. Dai ah a ki koih sungteng a nuai ah meipi kikhul a, a sithu a luan kang baihna ding cihna hi. Tua veh dingin nupite daihawh in, tua siluang kiangah va kap thei zel uh hi.

3.5. Mithupite: Mi minthang tampi lak pan Galngam leh Hangsai, Leng Tong Hoih, Khup Cing leh Ngam Bawm, Lian Do leh Thang Ho, Mauzuang te unau,
Tangthu minthang lak ah Dahpa, Sangak leh akpi, Aksinelkai, vanleng nungak,

3.6. Lo neihna: Buh leh taang pen anntak kici a, vaimim, bal, kawlkai leh be pen kial ann kici se hi. Gankhawi lak pan Sial thupi pen a, kel leh ui leh akte pen nektawm dingin kizang hi. Bawng pen a nawi nekdingin kikhawi a, Sial pen moman dingin kipia thei hi.

Zomite ukpi sep hun sung in lo neihna pen limtakin kibawl a, kumpi in zong hansuah hi. Gam pen kumpi gam hi a, mipite in loneihna ding a gam a zat ciangin sehkua suah sehkhat pen ukpipa kiangah sung uh hi. Tua pan in ukpipa in kial hun leh haksat hunin mipite panpih kik hi. Nasepna ding in suankang sik na zang uh a, galdona ding leh tu leh hei bawlna in zong na zang uh hi.

3.7. Khuasung ki ukna: Khuasung vaihawmna leh kiukna pen hausa leh a upate in sem a, thukhenna zong amau khut ah om hi. Hausa pen inkuan in kiluah toto a, a pa laih thei ding a om kei leh a tanaute khat in Hausa semtosuak hi. Upa pen Hausapa in amuan deuhdeuh a tel, a seh hi. Gam leh lei pen Hausapa khut ah om a, Zogam sunga Hausa khempeuh a thuneihna uh kikim khin hi. Hausa in vaihawm ahih manin nasem lo a, khuamite in siah sung uh hi. Hausapa vaihawmpih dingin upa, siampi, tangau, siksek,

3.8. Sawm: Tangvalte giah khawmna dingin Sawm kinei a, Sawm upa in khangnote pattah in thuhilhna nei zel hi. Tua lai ah kidemna tuamtuam kanteh, leilamkan, tai kidem, suangpum lot, kibuan, tei khawh, kisukheek,

3.9. Pawi tuamtuam: Pawi tuamtuam Sialsawm pawi, Khuado Pawi, Ton, Gal ai, Sa ai. Zangta lam, lamngui, dak lam, phit lam cih bangin kinei hi.

Zomi numei te khutsiam a pianga ahi uh a, khaukhek, khauphan leh siamgan a siam ahi uh hi. A kizepna neihtung uh mawngkhak hi a, khauhual numeite in a kawng vuah khai in a tut uh ciang a sel uh liah hi bek hi. Tua pan pat kikhek in puan kibawl hi. Puanbu, tual puan, nikphei, puandum, puanlaisan kizang hi.

3.10. Kitaitehnate: Gal ai, sa ai hih ding, mim za taangza kho hih ding kidem uh a, kumsim buh leh vaimim, bal, kawlkai leh mehteh mehgah kumkhat kham ding neih ding hanciam uh hi. A hatna teng khempeuh uh tawh tua sem in a hun tamzaw uh nasepna in na zang uh hi. Pilna sin leh kidemnate pen nasep loh sung hun awng ah hih bek uh hi.

IV. ZOMI BIAKNA (ZOMI RELIGION)

Zomite in ‘theih loh pasian’ na bia uh a, dawi na ‘thoih’ uh hi. ‘Dawi bia’ hilo in ‘dawi thoih’ minam ahi uh hi. ‘Bia’ cih ciang ‘thupha zong, zahtakna pia, amai ah, a thuneihna ah ki ap’ hi a, ‘thoih’ cih ciang ‘a lungkimna dinga khembawl, lungkimsak, mai et, lungsim leh pumpi ki ap lo’ hi. A lungsim vuah a lian penpen ‘dawi’ hilo in ‘theih loh pasian’ hi masa a, tua pen ‘theih Pasian’ ahih dongin kibia a, kingeina seh hi. Ahang pen natna a ngah uh ciangin ‘dawite hong bawl hi’ ci uh a, tuahphatna a ngah uh ciangin ‘dawite hong piak hi’ ci lo uh hi, ‘hong siam khat om hi’ ci uh a, tua pen ‘lungzai’ zong kici hi. Sih zawh ciang ‘gun gal’ kah ding uh a, tua ah a paisa it leh ngaihteng kim ding hi, gi bang kikhen om nawnlo in lei a thupina leh pahtawina a ngah khempeuh tawh tua mun ah nuamsa ding uh hi cih um uh hi. Tua man in ‘gun gal khuamun nuam’ ah nuamsa-a a nuntak theihna ding in leitung a nuntak sungin mi tungnung hih sawm in, ton leh ai sa in hanciam uh hi. Tua ‘gun’ pen Tuikangpi hi a ci pawl om a, Rih hi a ci pawl om hi. Lui khat ah a leitung nuntakna silsiangin ‘gun gal khua’ ah mithak in lut hi cih um uh hi. Muh bat loh ah munthak, khuathak khat om a tua ah a paisate kituah khawm kik ding cih lametna na nei uh hi.

American Baptist Missionaryte in Zomite lam tampi ah hong pattah uh a, tua manin Zomite in mangkangte na ci liang uh hi. Ki thupi sim mahmah a, a lampai dan, a kizep dan, a tutdan, a pau dan, a om dan peuhmah thupi kisa in zong limtak in kiciing pah hi. A mau hun sungin a mang khempeuh lah Zomi hetlo mikangte vive hi takpi ahih manin ‘mangkangte’ a ki cih pen a kithupi simna hi a, tuni tan in bei tuan lo hi. Sangin phuan in pilna hong sinsak uh a, cidamna hong sem in, lokhawh dan leh kizep dan hong sinsak uh hi.

Christian suahna hangin ngeina pawi peuhmah biakna pawi in khek a, dawi thoihna taute Pasian biakna tau suak sak in, dawi thoihna ding khempeuh Topa phatna leh biakna in kizang ta hi. Zu nun Khuadote Zeisu sih leh pian Lungdambawl Pawi hun in khek ta a, sia leh pha theihna hong khang in, hanla, gal la, sa aih la khempeuh Pasian biakna la suakzo hi. Ngeina la leh ngeina laamte haivai in ki ngaihsun a, dawithoih hanga a kitang khempeuh kisiangsak in khanglui biakna ciin ki nusia hiai hiai hi. (Kuppihna: Ngeina, Pawi, Lam, La, leh a dangdangte hong mangngilh sak uh, hong zuunsak loh uh pen Zomite ngeina leh pawite a deihloh man uh, a huat man uh hilo in Christian i suah ding a deihluat na uh hi zaw ding a, hong siatsak nop man uh hi lo dingin ka um hi).

Kitenna mo vanken leh mo man tamluate zong hong zuun pih kei vua, a siangtho kitenna ahih ding, ki it tak a nungta ding cihte hong zatpih zaw uh hi. Nupa ki khenna limlim deih lo in, siangtho kitenna lo zong khalna na kipia hi. Tua banga pattahna tawh Zomite a mit uh hong keuh in leitung khuavak ciantak a mu in tuni in mailam tangtak a delh in ama insung, khuasung, gamsung leh leitung bup ah Zeisu tangthu a tangko kote hita hi.

Christian suak zawh ciangin cidamna leh siangthona lim ngaihsut in, khawlni peuhpeuh in biakin ah kikhawm in puan hoih penpen silh uh a, siangtho na pen Pasian dan hi cih tel pah uh hi. Tua manin cidamna leh siangthona nakpi in khang hi. Zeisu pan a hong pai maisak na in ‘phu kilakna’ beisak a, zu dawn kikham in niangtui leh niangphan ki limdawn a, ngeina hoihte biakna sungah damdam in ki seng hi. Christian suahna in dawi leh kau lauhna pan in Zomite suakta sakta a, kithoihna sa leh sum leh pai tampipi beite om nawnlo hi.

4.1. Khanglui biakna: Sengam pan a paikhiat un bang biakna zui hiam cih kithei lo hi. Ahi zongin biak khat nei uh a, ‘theih loh pasian’ na ci uh hi. Dawi bia lo uh a, singbul uangtum bialo uh hi. Ni leh kha zong bia lo uh hi. Dawi leh kaute in cina sak hi dingin um uh ahih manin lungkimsakna dingin na thoih uh hi. Thoih cih ciangin anpia, antah, gilvah sak, lungkimsak cihna hi. Thupha a deih manin bia lo uh hi. Thupha ngahna dingin ‘theih loh pasian’ kiangah kithoih uh hi. Sengam pan a zatsa uh hi ding hi. Chindwin luidung, Khampat, Ciimnuai, Geeltui, Tedim a tun tan un zong biaknaten a zang lailai uh hi.

4.2. Pau Cin Hau biakna: 1900 kumin Biakna thak piang hi. Pau Cin Hau in Maang mu in, Pasian in a muhsak bangin biakna phuan a, lai tawh pia pah ahih manin Laipianpa kici in, Laipian Pawlpi zong kici hi. Tuni in hih biakna a zui omlai hi.

4.3. Christian suahna: Laipian Pawlpi a pianzawh tawh kiton phial in Zomite kiangah Christian biakna zong hong tung a, a sawt lo in lai tawh hong kithuah pah hi. Carson in kum nga a sepzawh, kum 1904 ni in Christian suak masa Thuam Hang leh Pau Suan hi.

4.4. Zogam missionary te: USA pan Zogam ading misionary masa pen Arthur E. Carson March 15, 1899 niin Zogam a zi Laura L. Hardin tawh hong tungin, April 1908 niin si a, Dr. East in vui hi. Dr. E. H. East pen March 21, 1902 in hong tunga, October 3, 1910 in ciah kik hi. John Herbert Cope December 21, 1908 niin Haka hong tunga, September 29, 1910 in Tedim hong tung hi. Biakin masa pen February 17, 1906 niin Khuasak ah hong a, Topa ankuang masa pen tua lai ah kilui hi. Thuciam Thak bu 1936 in kikhen a, June 11, 1938 niin leitung nusia hi. Carson tawh hankhuk kizom in Haka ah kiphum hi.

Franklin O. Nelson pen December 2, 1939 ni in Tedim hong tung a, Tedim ah Lai Siangtho sang 1947 kum in phuan hi. Gamsung buaina hangin February 23, 1951 niin ciah a, hong pai kikna ding phalna ngah nawn lo hi. Robert Johnson leh a zi Elizabeth Johnson April 21, 1941 niin hong tung a, 1966 kum in ciah a, hong paikik ding uh kumpi phallo uh hi. Tua zawh ciangin Zogam a Christian biakna pen Zomite makaihna khut ah kiap a, tuni dongin kizang suak hi. 1921 kum in sia masa pen Sia Vial Nang ki kipsak hi.

V. ZOMI LAISIMNA (ZOMI EDUCATION)

5.1. Lai neihna: Savun lai i neih pen uipi gilkial in hong neksak ahih manin sawtpi zawh kum 1899 ciangin Pau Cin Hau lai kinei kik pan hi. Tua pen Zotuallai kici in kum 1922 ciangin Roman lai tawh Cope Topa in hong laihsak a ‘Zolai’ kici in, kum 1932 ciangin Zolai tawh Thuciam Thak masa pen kikhen hi. 1970 Paite pau tawh Laisiangthou buppi kizo. 1977 Tedim Lai Siangtho kizo.

5.2. Tualsuak Lai Hun (AD 1400 malam): Zomiten tanglaiin lai kinei a, savun tunga kigelh ahih manin Savun Lai (or Tualsuak Lai) kici hi. A hun pen a tangthu pan Zomite Kawlgam pan Khamtung i peem cil lai ahih manin AD 1400 malam hi ding hi. Zosuante lakah Zomi bekin ‘Lai’ cih kammal kinei a, Pawiten Kawlpau kawmin Sa ci uh a, Luseiten vaipau kawmin Lehkha ci uh hi. Tua ahih manin Zomite in tanglaiin lai nei ngei takpi i hihna leh Savun lai pen Zomite a ahihna kilang hi. Tua savun lai pen ui in tuah mang ahih manin lai kinei nawnlo hi, kici hi.

5.3. Tuallim Lai Hun (AD 1900 malam): Khanglui huna i pu i pate in lai neilo theilo uh ahih manin thu pen lungsim leh la tawh na ciamteh uh hi. A gal mat sa mat zah uh singkhuam dawnah sa lu gal lu suangin khau khihbawkin ahi zah na ciamteh uh hi. Suang hiam suiin a sa mat a gal mat uh lim bawlin zong khawmualah na phut uh hi. Pau Cin Hau lai i neih zawh panin a lim bek hi nawn loin a thu tawh kihelkhawm to hi. Tu dongin kimu thei omlai hi.

5.4. Zotual Lai Hun (AD 1900-1930): 1900 kum pawlin Pau Cin Hau Lai or Laipian Lai or Zotual Lai kici Lailui khua, Pau Cin Hau (1859-1948) in mang a muhna pan 1896-1898 kum sungin kammal khatteh laimal khat ta ahi laimal 1050 bawlkhia a, laibu-in bu guk suah hi. 1901 kumin khaw 13 pan mi 51 sinin siam uh a, tuaten amau khua ciatah midang hilhsawn uh hi. Galpi Khatna sunga France pai Zomite leh innlam ten lai kikhakna in a zat theih sun uh hi a, tua in Zomite lakah Zotual lai kizeel mahmah ta hi. Tua ahih manin ABM missionary Rev. J. H. Cope in zong 1931 kumin Mualtung Thuhilhna bu bawlna-in Zotual lai na zang hi. Chin Hills Deputy Commissioner Lt. Col. Burne leh Rev. J.H. Cope’ malakpihna tawh 1936 kumin Thang Cin Kham, Pau Za Dong, Cin Khaw Gin leh Sian Khaw Cin ten puahpha uh a, consonant 21, vowel 16, tonal sign 20 suahin a vekin laimal 57 phasak uh hi. Tudong Laipian Pawlpi sungah kizang lai hi. 1981-1997 sungin Kawlzangah Zotual lai sinna 30 vei kibawl a, tua-ah sia 38 in hilhin mi 1833 in siamna certificate ngah uh hi. Zotual lai pen 1900-1930 kikal sungin lim kizat bel a, tu dong Laipian pawlpi sungah kizang suak hi.

5.5. Mangtual Lai Hun (AD 1908 pan): Tulai taka i zat leh i zat suak ding zong hih tuak Mangtual Lai (or Zolai or Ni Sagih Lai) i cih pen 1908 kuma Rev. J.H. Cope (1882-1938) hong tun phetin Zomi Christian suak masa pen Khawsak khua-a Pau Suan leh Thuam Hangte nih Hakha-ah samin Zopau kihilhsak a, tua pan Mikang laimal (Romannised script) tawh laimal hong bawlsak kipan pah hi. Pau Suante hilh Zopau pen Sihzang kam hi a, tua tawh 1908-1910 sungin laimai 40 a pha laisimbu bawlin, Tedimah 1911 kum pan nitaak sangah sinsak hi. Ahi zongin Rev. Cope in mikim in Sihzang kam tel khinlo cih nung muh nunawh a, tua sawng teng pau leh lai vaiah a vanglak mahmah hun ahi hi. Sangah Kawllai a kihilh zawh a kum sawma sim pha khin ta si, Pau Cin Hau Lai lah kilim zat mahmah khin ta si, tuapi maha Roman script tawh laimal hong bawlsak Rev. Cope pen bang pau tawh laihilh suak a, bang laimal zang suak ding cihah na lungbuai mahmah hi.

Tua ahih manin 1919 kumin Tedim uk sunga hausa lian teng samkhawmin bang kam tawh laihilh ding cih genpih a, Sihzang kam mah tah veve hi. Tuimui hausapa Guite Mang Za Thang in, “Ko Sihzang kam tel khinlo ung a; ko kam lah midangten tel khin tuanlo ding na hih manun Kam Hau kam (Tedim pau) hi leh kitel kim pen ding hi,” a cih leh hausa dangten bangmah genlo uh ahih manin Tedim pau zat dingin thukimna bawl uh hi. Tua zawh a sawt lo, 1922 kumin kumpite in Falam khua pen Chin Hills phualpi ahih ciang taangkam pianna dingin Chin Hills bupah Laizo (Falam) pau tawh laihilh ding cih thupiak bawl hi. Rev. Cope in Zomite adingin Tedim pau leh Roman script tawh bawl laimal mah hoih pen ding hi, ciin pan khawh a, tua hangin Chin Hills Deputy Commissioner, Mr. Burne tawh kimukhial dekdek heel uh hi. Zomite laimal ding Roman script tawh bawl pen Royal Asiatic Society in zong 1912 kumin hoih a sak pen thu na pulak zo hi. Hih tawh kisai 1920-21 sungin Falamah leh 1923, October 23 niin Maymyo Chin Education Rev. Cope pen Chin Hills-ah lai lama naseem pen hi si ahih manin a tawp a tawpah Chin Hills bup sang vai thuneihnateng (Honorary Inspector of Schools) Rev. Cope tungah ap in, a deih bangin 1925 kum pan Zogama primary school tengah Kawllai kiphiatin Tedim pau, Hakha pau, Falam pau leh Chinbok pau teng tawh laihilh hong kipan to hi. Hih bang teng hang tawh Rev. Cope pen Zomite in Sangmangpa kici a, Cope topa cih tawh min nih kitangsak hi.

VI. ZOMI MAILAM (THE ZOMI ROAD AHEAD)

6.1. Tu laitak Zomite: Tu laitak in Zomite pen leitung hun tawh kizui in gamdang ah zong zinkhia ta in, Piantit pai zawh I gamlek lai tak hi ding hi.

6.2. Mailam Zomite: Mailam Zomite pen leitung khantohna tawh kituakta ding a, pil nuntak khinta ding uh hi. Nek ding ankham ciat ding uh a,

THUKHUPNA:

Kum tulthum sung Zomite khangthu ah kum tulnih leh zanga sung ukpite ukna nuai ah nungta in kum sawmnga sung i suakta pan hi. Singbul suangbul bia nawnlo in a nungta Pasian bia in nuntakna ann Lai Siangtho sim in i laamlaam ta hi. Kam tawh tangthu kihilh sawn hi nawnlo in laitawh at in laibu in i keemcing a, gal leh sa tawh kidelh nawn lo in pilna siamna i delhzaw ta hi. Dawi leh kaute kihta nawnlo in nit ding, siangtho loh ding i lauzaw ta a, lungdam huai hi.

(This article is meant for the “Zomi Baptist Churches Silver Jubilee Souvenir, 2007” by HZC, Taipei, Taiwan, July 25, 2006)

Laibu ette

1. J. Thang Lian Pau (editor), Zolawkta, Aizawl, www.zolawkta.com

2. Cin Do Kham, Journal of Asian Missions, 1999, pp. 205-222.

3. Zolus, Yangon

4. Khup Za Go, Zo Aw Thukizakna, 1986, Guwahati.

5. Khup Za Go, Leivui Panin, 2004, CLC, Guwahati

6. Chin Baptist Association Silver Jubilee (1961-1986) Souvenir, Lamka

7. B. Lalthangliana, Mizo Chanchin, 2001, Aizawl

8. Siamsinpawl Annual Magazine, Golden Jubilee Special Issue, 1996, Lamka.

9. Zolawkta Thukizakna Kum Thum Cinna (1994-1997), Aizawl.

10. Zomi Inkuan Laibu, 1972, Tedim

11. Vaphual Magazine, 2004, Delhi

12. Robert G Johnson, History of the American Chin Mission, 1988, vol. I, Valley Forge, USA

13. E.H.East, Burma Manuscript. Edited by C. Thang Za Tuan, Yangon, Myanmar:
Christian Literature Center, 1996.

14. The Zomis are not headhunters as some people said, R. G. Johnson reported that “The Zomi were not cannibals nor headhunters like their cousins the Nagas to the north, nor were they savage.” (“The Church in the Chin Hills”, in Burma Baptist Chronicle Edited by Maung Shwe Wa, Rangoon: Burma Baptist Convention, 1963, pp.384).

15. The names of the first converts in Chin Hills were Pau Suan, a chief, age 27, and his wife Kham Ciang; Thuam Hang, also a chief, age 36 and his wife, age 30. These couples were baptized by E. H. East at a small stream called “Pok Loy River” at Khuasak, Northern Chin Hills on May 11, 1905.
***************

He Knows How You Feel

2009-05-15T20:41:00.000-07:00

He is ableto run to the cry of those who are being tempted and tested and tried.
Hebrews 2:18 (AMP)

Jesus was angry enough to purge the temple, hungry enough to eat raw grain, distraught enough to weep in public, fun loving enough to be called a drunkard, winsome enough to attract kids, weary enough to sleep in a storm-bounced boat, poor enough to sleep on dirt and borrow a coin for a sermon illustration, radical enough to get kicked out of town, responsible enough to care for his mother, tempted enough to know the smell of Satan, and fearful enough to sweat blood.

But why? Why would heavens finest Son endure earths toughest pain? So you would know that he is ableto run to the cry ofthose who are being tempted and tested and tried.

Whatever you are facing, he knows how you feel.

Mother's Love

2009-05-12T18:02:00.001-07:00

Hau Za Cin
Phuitong Liim

On Mothers Day 2009

She washed all the dirty clothes in the family. She mopped the floors after sweeping every nook and corner of the house. She then fetched water and watered the flowers in the garden and in flower pots. By the time she could barely finished the household chores, it was already evening. She had to go to pick up her children from school. The kids complained of hunger and thirst. She had to feed them again.

It was already dusk and she had to prepare for dinner. Just then, her husband arrived from office tired and demanded some nursing. She bathed the kids, helped them revised their lesson. She arranged dinner and did the dishes as done in the brunch. By the time the domestic chores of the day were partially over, it was already time for bed.

Lausanne Congress Working Committee on Diaspora in Manila

2009-05-05T20:24:00.000-07:00

Rev. Dr. J.M.Ngul Khan Pau
Manila (Nipi Kal Khat sung)
Date: Monday, 4 May, 2009, 7:35 PM

Lausanne Congress Working Committee on Diaspora consultation Manila-ah ka kihel thei a, tu Saturday in bei ding hi. Tuzing U Ginneithang phone tawh ka hopih a, dam uh hi. Friday ni-in kimuh sawm ni, ka ci uh hi.

Civil Service result i et ciangin Pasian mai (seeking God's face or favor) or Pasian lungsim i natsakna om lai hi dingin ka ngaihsun hi. Mite' sep bangin i sem uh a, gah khia lo hi. Bang hang hiam cih leh "sansakna pen nitumna, nisuahna pan hong pai hi loin Topa Pasian khut pan" ahi hi.

I minam in Pasian maiah kisikna; Ama maipha ngah nadingin i sep ding om dingin ka um hi. Nasep mu lo bel i hi kei hi. Ahi zongin a lu (head) ding ki-om lo hi. Lohcinna i neih loh ciangin i minam leh i gam dam lo cihna hi. Gam dam lohna Lai Siangtho gen danin:

(i) Milim biakna (idol): Bang milim i bia uh a tuni. Midangte sangin thupi kisa baih luate hi lo i hi uh hi.

(ii) Immoral life: (Gen kul loin Lamka sungah numei kizuakte leh a leite), India khuapi dangah numei pasal kikal phatmawhsak om loin gamtatna.

(iii) Mawhnei lo sisan suahna: (Mawhnei lo sisan bang zah i luangsak uh a, amau sisanin a bawlpa Pasian tungah i mawhna pulak hi).

(iv) Midangte sim mawhna: Lamka sungah Zo suanhte tengkhawm ki-it lo, Zomi ci-in Political vaiah kigawm thei sam, ahih hangin Pawlpi (Church) ah kigawm lo, Khristian lim (mark) om het loin i nungta uh hi. Bang ciangin i gamah Pasian gam (Kingdom of God) hong tung ding hiam?

Topa maiah kiniamsak in Ama mai zong ni.

Video: Taiwan Paina

2009-04-01T19:26:00.000-07:00

Personal video bek hi.

1. Taiwan paina: http://www.youtube.com/watch?v=EWH_nihHVWg&feature=channel

2. Taiwan omlai: http://www.youtube.com/watch?v=nO39xvJ8m14&feature=channel_page

Video: Zonet Writer of the Year 2008 Award Lungdam Kohna

2009-03-30T20:58:00.000-07:00

Video Link: http://www.youtube.com/watch?v=ElDyhbdNwtc&feature=channel_page
Personal video bek hi!
Nong etsak lungdam.

Hau Za Cin
Phuitong Liim

Video: Kennedy Space Center Hawhna

2009-03-29T16:50:00.000-07:00

The video link: http://www.youtube.com/watch?v=Ws4EVg1urB4

Khapi tung kahna Kennedy Space Center (KSC) hawh ni in Space Shuttle DISCOVERY STS-119 vandawn-ah kilawnto ding cih ka zak uh ciang et teitei dingin ka khentat uh hi. Nitum khit lian, nitak nai 7:43 in ka etna uh 3 miles khawng pan a taw ah mei hong kuang zaih in thakhat thu in vantung lamah hong kilawnto zeza hi. A sawtlo in vandawn ah meipi sungah hong lensan hi. A ging ngaih mahmah leh a en mipite lungdam kikona aw bekbek bil dimin kiza a, a meitaang nuai-ah a giahna uh pan a ging lau-a hong lengkhia vasa leng zuaizuaite bek kimu hi. A meitui bawm nih a kiat khit ciangin mi 7 te tuanna Shuttle bek vanlam ah lengto suak hi. Ko zong ka kiang vua nungaknote tawh maan kizaih in, see you again HERE...!! ka kicih khit uh ciang' Kennedy Space Center Bus tawh inn lam ka zuan ta uh hi....

Hih lai ka at laitak hong ciahkik a, March 28, 2009 nitak nai 2:00 in KSC ah tu kikta hi. Ni 13 sung International Space Station (ISS) ah Solar Panel bulh in nasem uh hi. Tua Solar Panel te in ISS ah nasemte meitha (electricity) pia ding hi. Hih ISS pen lei pan 350 Km a gamla huihlak ah om hi.

May 12, 2009 ciang Atlantis Space Shuttle vantung ah kilawnkhia kik dinga, ISS mun ah nasem zom kik ding uh hi.

Hun na neih leh May 12, 2009 ciang KSC hawh in Atlantis kilawnkhia va en ve...

Assam sangnaupang te leh NASA astronaut kiho

2009-03-01T07:50:00.000-08:00

The Shillong Times (January 7, 2009)

GUWAHATI, ASSAM, INDIA: Van leh Lei kikal ah mipilten leitung thu, vantung aksite thu a sinna ding uh khawlmun, ahih kei leh ‘bu’ bawl uh a, tua pen International Space Station (ISS) ci uh hi. Lei pan 350 Km a sang huihlak ah om a, bawmpi bangin a sung hawm in, bukno khat bangin a sungah giah theih hi. Leilak pan ‘Rocket’ ci-a i cih ziau, tu hun ciang spacecraft a cih uh ‘huihlak a khualzinna’ tawh lengto-in ISS ah leitung vantung aksite thu sinin ni tampipi tam uh hi. Tua banga a sem, a tam laitak NASA, USA vangtungkahmi (astronaut) Edward Michael (Mike) Finke leh India, Guwahati khuapi a Asom Jatiya Vidyalaya high school sangnaupangte melmuhloh tongsan (telephone) tawh January 7, 2009 niin kiho kha phophot uh hi.

Vangtungkahmi (astronaut) Edward Michael (Mike) Finke pen US Air Force ah colonel hi a, ama makaihna tawh Vaikuan 18na (Expedition 18) a kuan, ISS ah a tam laitak uh hi. ISS pen gam 16 kipawl in sum US dollar billion 100 bei-a a bawl uh, kum 1998 pan kipan tuni dong a hoihzaw dinga a behlaplap laitak uh hi. California leilu lama NASA phualpi vaisaina tawh sangnaupang 14 (n 7, p 7) in dotna 14 dong uh a, minit 10 sungin Mike in a ‘bu’ sungpan telephone tawh dawng hi. A thu dotte uh pilvai mahmah hi. Tua holimna pen sangnaupang tul khat val leh a nu leh pate un a zak theihna dingin 'Friends of Assam and Seven Sisters' (FASS) te in paungaihna thuahsak uh hi.

India nitak nai 1:30 a kipan a, tomno sungin beipah hi. Naupangte dotna a dawnna ah - a ‘bu’ sungah a nasep dan (research work) leh a gamtat luhek dan (life style), leihupna omlo a kilaam/kikhai mun ah (zero gravity) bangci nuntak, gamtang hiam cihte naupang tel theih dingin limtak in dawng hi.

A kihona uh a za mite a thalawpsak mahmah khat pen Mike in a tawpna ah, "Moi alap alap Asomiya Kobo paro ( Assam pau tawm pauthei ing)" a cih pen hi, kici hi. Mike zi Assam nungak Renita Saikia hi a; a ‘bu’ sungah a tawlngak kawmin a sung’te pau sin zel hih tuak hi. Azi in NASA munpi Houston , Texas , USA ah nasem hi.

A kihona uh tomlak hih bang hi:

Q 1. Mridusmita: Na ‘bu’ sung leh a pua a kilamdanna bang hiam?
Mike: A pua lam pen huih omlo, a hawmpi (vacuum) hi a, vot mahmah, khuamialcip hi. ISS sung bel innsung bang hi a, lum in nuam mahmah hi. Temperature 24 degree Celsius in kikoih hi.

Q 2. Sweta: Spaceship sungah tui bangci kikem hiam?
Mike: Limtak in kem ung. Huih lutlo dingin sincip ung. Oxygen kibawltawm a, carbon dioxide khaihsiang zel ung (re-cyle CO2).

Q3. Priyanka: Bang an ne? Ann kihuan thei hiam? Ann kilumsak thei hiam?
Mike: Ann ngeina moh, sa kan, singgah, etc. mah ne ung. Ann kihuan theilo ahih manin a kitunsa vive lei pan kipua hi.

Q 4. Prajna: A ki ihmu thei hiam? Bang hun a lum, bang hun a tho? Bang nai zang na hi uh hiam?
Mike: Nuam tak, ihmut ngeina bangin ki ihmu thei hi. Greenwich Mean Time (GMT) nai mah zuiin, nai 24 sungin nitak nai 10 in lum, zingsang nai 6 in tho ung.

Q 5. Mahendra: Tui nek ding koi pan ngah?
Mike: Leilak mah bangin tui kizang hi. Khatveivei ka bawltawm uh a, khat veivei ka khaihsiang uh hi. Zun pan zong tui dawn ding kikhaihsiang hi.

Q6. Abhrakash: Na kisil thei uh hiam? Tui kai mah kizang hiam?
Mike: Tui haksa ahih manin tui kai lo a, puankawt tawh kinul siang ung.

Q7. Anamita: Ni suahna ni tumna na tel khialh hun uh a om hiam? Bangci thei kik?
Mike: Leihupna omlohna (zero gravity) ah kimangngilh kha zel mah hi. Ahi zongin ka tuanna uh ISS space station pen ni suah, ni tum nalam tawh kizawi dingin amah leh amah kihei tawmtawm hi.

Q 8. Nirvan: Leilaka khuahun kikhek – tuk, phalbi, khuakhal cihte na thei thei uh hiam? Leilak a omte muh theih na nei uh hiam?
Mike: Khuahun kikhek kimu thei hi. Leilu ah phalbi hun leh leitaw ah khuakhal hunte kimu thei hi. Great Wall of China leh a dang leilak a om a gol pipite kimu thei hi.

Q 9. Tridip: Tu laitak ISS ah bang pilna lam sin na hi uh hiam?
Mike: Nasep 120 – 130 khawng zota ung. Tua lak ah ‘tui luanzia’ (fluid physics) leh leihupna mihing pumpi in a kisapna thute kihel hi (effect of gravity on human body).

Q 10. Vaishali: Na nasep uh bang phattuamna om ding hiam?
Mike: Hih ISS sungah mi guk a om theihna dinga a kek, a golsak a hanciam hi ung; tu laitak mi thum bek ki-om thei hi.

Q 11. Chiranjib: Na tawldam kawm un bang hih? TV na en thei uh hiam? Radio na ngai thei uh hiam?
Mike: Tawldam kisam pha peuhmah hi. TV khawng, movie khawng ki en thei a, laibu (electronic book) khawng ka sim uh hi.

Q 12. Gitartha: Ni khat in ni suak, ni tum bangzah kimu hiam?
Mike: Ni khat in ni suak 16vei, ni tum 16vei kimu hi. Ko pen nai khat a 26,000 Km tungman dinga leng ka hih man un minit 90 sungin leitung khatvei ki kimvial den hi.

Q. 13: Adnan: Na cidamna uh bangci kep? Tha lakna cih khawng a om hiam?
Mike: Ni khat in nai nih sungta thalakna kinei a, siksakol tuan khawng kilim zat pen (cycling). Doctor pen ka kisap uh leh leilak a omte telephone tawh ka hopih ziau uh hi.

Q 14. Dhrubajyoti: Na ‘bu’ sungah Assam pau sin cih ka za vua, 'Apuni Asomiya kobo pareneki (Assam pau na pau siam hiam?)’
Mike: Nui bua bua kawm in, ‘ka dawn nop pen hi ei!’, ci. "Moi Alap Alap Asomiya kobo paro (He, Assam pau tawm pau thei)."

ISS website: http://www.nasa.gov/mission_ pages/station/ main/index. html

“ZoNet Writer of The Year 2008”

2009-03-01T07:40:00.000-08:00

Dear Zonet Member Khempeuh,

Zomi International Network (ZoNet) in a beisa kum 2006 pan in ZoNet sungah Zomite hoih zawkna ding lai gelh siamte sung pan mi khat kitel khia a, “The Writer of The Year” cih min pahtawina kipia hi. ZoNet a semte buaina tuamtuam hangin, “The Writer of The Year, 2008” pen 2008 kum sungin hong kibawl zawh loh hangin, January 11, 2009 ni a kipan ZoNet member khempeuh teel theih dingin poll kibawl a, nipi kaal ni sung kihong hi.Tua poll kibawl in tuni (January 24, 2009) a kipan kikhak ta hi.

ZoNet member te in Zomite hoih zawkna ding lai gelhsiam mite sung panin, "The Writer of The Year, 2008” dingin Dr. Hau Za Cin kiteel hi, cih ZoNet in kong pulak uh hi.

Dr. Hau Za Cin aw, hong lungdam pih ung. Zomite hoih zawkna ding lai tampi hong gelh zel ta in!

Tual Khan Suan (Suanpi)
Vice-President and Moderator
Zomi International Networkhttp://zomi.org

Sunday, January 25, 2009 9:44 PM

Barack Obama kua hiam?

2009-03-01T07:38:00.000-08:00

Hih lai ka gelh pan nai 12 a cin lian, January 20, 2009 12:00 AM (ET) ciangin US President 44na dingin kiciamna nei ding hi.

Zomi Paunak ah, "Tagah khuasuak kuamah in dem zolo" kici hi. Lai Siangtho ah Pasian in ...meigong tagahte PA ka hi... ci hi. Romans 8:31 ah, Pasian ei lamah hong pang peuh leh kuamah in hong zolo ding hi ci hi.

Barack Obama pen, "Change, Change, Change" ci a kiko a US President a ngah ziau hi mawk lo hi. "Hun thak ah i lut kul hi" cih bek tawh kiko a President a ngah hi zenzen lo a, "Change you can believe in" (Hun thak ah om na hi cih kimuang ngam in) cih bek tawh zong mipi lungsim a zo hilo hi. Mivom te khempeuh in a deih man a kitel cing zong hilo a, mikang mivom misan mi eng a vekpi a kigawm a kitel cing ahi hi.

Hun Thak a cih bang hi hiam?

Mr. Barack Obama in "Change" a cih "Hun Thak" pen mi khempeuh suakta ta hi cih a tangko nuam ahi hi. Tuma kum 150 phial pai khin hun ah President Abraham Lincoln in Sila khempeuh Suahtakna na pia a (abolition of slavery), tua suahtakna a piak manin ama nuntakna kilaksak hi. Ama sihna pen MARTYR hi kici a, America gam bitna dinga a nuntakna piapa ciin kiciamteh hi. Topa Zeisu in leitung mi khempeuh ading a nuntakna a piak bangin USA a om theihna dingin Lincoln in a nuntakna pia hi cihzah in thupibawl uh hi. Tuni ciang dong President 43 a om khit hang US President khempeuh lakah amah kizahtak pen a, thupi kisa pen hi. Amah mikang hi. Amah hangin US gam kitam kham ding kimlai kigawm kik in tuni tan a UNITED STATES ahih theihna "gam kilomkhawm" ahih theihna uh President Lincoln hang ahi hi. A nasep thupi lua mahmah ahih manin amah phawk tawntungna dingin LINCOLN MEMORIAL HALL ciin US Kumpi vaihawmna leh National Mall tawh kitang, kizomto diudeu in inn lianpi bawlsak uh hi.

Tua pen Barack Obama in President dinga telcing ahih nitak November 4, 2008 a a thugenna ah "America pen UNITED STATES OF AMERICA hi tawntung ding hi" ciin gen hi. Ki khenkham ngeilo ding cih a deihna hi. Ahang pen American Civil War (1861–1865) hun lai in Sal Khawi nuam leitaw lam gamte leh Sal Khawi deihlo leilu lam gamte kido in, America tum nih, North leh South kisuah man dektak hi. [America gam khangthu a kan peuhmah in i theihsa hi dingin um ing, sau gen dah ni].

Tua banga President 16na (March 4, 1861 – April 15, 1865) Abraham Lincoln in Sal Suahna (Abolition of Slavery, The Emancipation Proclamation, September 22, 1862) dinga a min a gelh khit tak ciangin sal khawi nuam laite heh mahmah uh a, thangpai gawp uh hi. Sila pawlkhat zong Sila hih ngeinaseh lua uh ahih manin suahtak ding utlo in a pute uh nasem in om teitei uh hi. Makai Moses in Israel mite Pharoah khut sung pan a pai khiat pih in mihonte in haksatna a thuak uh ciang phun in, 'hih bang hamsatna ka thuak uh sang Pharoah khutnuai ah ka thuak uh nuamzaw hi ngel ven maw..' ci kha liang uh hi. Zomi te ele?

Sal pan suakta hi bek a, mivom leh mikang kideidanna bei tuanlo hi. Bus sungah tuang leh mikang ding a mivom tutphah tunga tu cih bang hitheilo hi; mivom in mikang tutphah a ot kul hi. Tenna khua khat ah zong mikang omna leh mivom omna a mun a mual kideidan in tengkhawm lo uh hi. [Tuni tanin zong mikang tenna khua leh mivom tenna khua kideidan pianpian lai hi]. Mihing ciatciat kuamah TO leh SAL om thei nawnlo ding cih kumpi thukhun hi a, ahi zongin KIDEIDANNA (Discrimination) omlai veve hi.

Tua ahih manin American Civil Rights Movement ciin America mi khempeuh kideidanna omlo a liangko kikim ding cih hanciam in Martin Luther King Jr. in kum tampi na sem hi. Tua ahih manin amah pen tu hun ciangin "human rights icon" ciin min kipia liang hi. Liangko kikim dinga a nasep lianpipi lak pan Aug 28, 1963 a Lincoln Memorial Hall pan a thugen, I HAVE A DREAM (http://www.youtube. com/watch? v=PbUtL_0vAJk), a Zolai in MU ZIZIAI ING ci mai ni, pen in mipi lungsim zocip a, leitung kiuli dongin kithawn hi.

Tua Mu Ziziai Ing cih a thugenna ah, "Ni khat ni ciang mivom leh mikang kideidanna om nawnlo in ankuang khat umkhawm in vaihawmna khat ah tukhawm in vaihawm ding uh a, vaksuk vaktohna, tenna giahna phualte ah zong kideidanna bei ding hi. Ni khat ni ciang mi khempeuh in American Dream a neih uh tangtungsak ding uh hi...." cih bangin gen khol hi. (American Dream: America ah na ut peuhpeuh hih thei, nang hanciam zah in tangtung ding cihna hi, tua bang suahtakna gamdangah omlo a cinuam uh hi. Tu ni in zong tua American Dream om a, Barack Obama adingin ama American Dream a tangtung hi kici hi).

Hih a thugen zawh kum 5 ciang April 4, 1968 niin, Kum 39 bek pha pan in ki kaplum a, Medical Doctor te in a khuak pen kum 68 a pha mihing khat khuak zah in hoih, pil hi ci uh hi.

Martin Luther King Jr nasepna hangin kitelna, kumpi nasepna, sangkahna, moto tuanna leh tenna mun leh mualte ah kideidanna hong bei hiaihiai a, a sawtlo in mi khempeuh in President tel theihna (voting rights) zong hong ngah uh hi. Tua banga hun hong kihei toto ah tuni in Barack Obama, mivom khat in US President sem dingin kitelcing hi a, Martin Luther Sunmang, ahih kei leh Mangmuhna a tangtung hi kici nuam hi. Martin Luther King Jr a kikaplup laitak a kiangah dingkhawm Jesse Jackson zong tuni in damlai a, Obama tel cing ahih nitak in a biang langnih a khitui luang TV News Channel te in lak khia ziahziah uh hi.

Hih ciang a tun theihna dinga lampi a sial, lam hong leh hun thak nihvei thumvei bang a piangsak suksuk President Abraham Lincoln, Rev. Dr. Martin Luther King Jr. te hih leitung kumpi vaihawmna lian pen a kingaihsun White House sungah a lut ding ni in Barack Obama in a thupi bawl ding mah ahi hi. Amau lampi ziiksa ah pai in, amaute hanciamna tawh hih ciang tung thei a, amaute nuntakna nangawn uh a piak man un Sal leh Sila sisan tawh a khangkhia khat a lianpen suak ding hita hi.

Tua man in Obama in tel cing ahih nitak in, "Change has come to America" (Hun thak sungah America kilutta hi) ciin mipi maiah awsang tak tawh na tangko zo hi. Sila pan suahtakna hun thak beizo a, kideidanna om nawnlo dinga liangko kikim ding hun thak zong kipelta hi. A vom, a kang, a san cih omlo a mi khempeuh in a hanciam zawh nak leh ama lungtup, a lian penpen US President nangawn kingah thei hi cih zing ciangin Barack Obama in lak ding ahih manin January 20, 2009 pen America gam adingin NI THUPI mahmah khat hi takpi hi.

Sun nai 12 a sat ciangin Barack Obama in President Lincoln kamciamna Lai Siangtho tung mah ah khut nga a kumpi dinga kiciamna a neih tak ciang America gam thu ah a mang ngei nawnlo ding thu khat a piang (historical event) hi ding hi.

Tua manin Barack Obama special mahmah a, mivom mikang thalawp mahmah hi. Sum tampi, USD 170 millions bei in hih kumpi suahna (Obama Inauguration) kibawl hita zen hi. America khangthu ah a tambei pen hilai hi.

Thukhupna:

Mipil gam ah HUN THAK sungah a kilut ciangin a hoih lam, a khangto lam hi a, mun dangah a sia lam, a kiamsuk lam khawng hinuam se hi.

Zomi zong HUN THAK ah i lut simin a hoih lam hileh cih i deih leh Pa Pasian kiangah i thungetna hi den leh cih ka deih mahmah hi.

Hau Za Cin
Phuitong Liim

Cope leh Zo Ngeina

2009-03-01T07:21:00.000-08:00

Rev. Dr. Thuam Khan Thang
Cope 98 Celebration, Tedim (November 2, 2008 nitak)

Outline
Zomite' Dinmun

1. Pasian omhi cih um, Khuavaak (Pasian), khuazing (Dawi) upna nei (Sing Khaw Khai, p.87-88)
2. Kha omhi cih um, Vantung, Leitung, Leinuai (Dr.Ngul Khan Pau, p.53 )
3. Dawibia, Sihkhit kha a ding kikhual uh:

-Zomite ngeina in Pasian upna leh khathu upna te pan kipan,

4. Tapidaw upna hong lut nangin Pasian in geel khol.

-Sangmangte tunma-in Karen sangsiate in Pasian thu hong hilh khin,
-Pau Cin Hau in dawibiakna bulpiteng longkhia khin,
-Sangmangte hong tunteh, Pasian thu sanhak kisa lo,
-Dawibiakna vangik ahihna kitel, kinusia nuam,

C. Cope leh Zo Ngeina Kikheelte:

-Zo ngeinate- upna pan piang,
-Tapidaw suahteh Tapidaw masate Dawibiakna huangsung pan Ngeina lui tawh Pasian bia uh,
Topa hai leh Dawi gilote hai, Topa Sabuai leh Dawi gilote sabuai ah tukhawm loding (1Kor.10:21),
Amasa pen huangkhenna, zuihding thu kibawl, July 23,1926 ni in Thuklai khua-ah kibawl (Kip Thian Pau, p.54-55);

1. Zu ne loding,
2. Lawki pawi-ah kihel loding,
3. Hanken-Kawsah/lamtaak sa go loding,
4. Aisan, Khut lamen loding
5. Tanu man ne loding,
6. Nipi ni Pasian biading, Na sem loding, Pasian bek biakding hi.

1. Zu Ne loding:
-Zuneek pen Zo mite ngeina bulpi, nuntakpih,
-Zu kiphih, phui kisam, Zu lotawh kisem lo,
-Missionary dang pawlkhat in zu nesak,
-Tapidaw te in dawi vanzat Zu ne loding,

Kha Siangtho tawh kidim un.

2. Lawki pawi, laamnate ah kihel loding:
-Khanglui ngeina laamna, galaih, sa-aih, ton, khuado,tualthoih, cihte dawi biakna tawh kizom,
-Dawi biakna tawh kizom peuhmah kihel lo ding,

3. Hanken,kuasah/ laamtaksa go lo ding:
-Misi neih cianga sagawhna, Dawi biakna tawh kizom,
-Misite kha ading ngaihsutna,
-Sasin tawisak- Sah nupi piakding, Sakol- atuannang, Sial, bawng, leinuai a khawiding,
-Satan kibawl, samal kizeek, Milim biakna sa ne loding (Sawl.15:28)

4. Aisan, Khut lamen loding:
- Aisanna, khut lametnate dawi biakna tawh kizom,
- Thungen ding, Topa deihna zong ding ( )

5. Tanu man ne loding:
-Pu le pa te'n Moman thupi sak,
-Numeite neubawlna, Tanute zuakna,
-Tapidaw te'n zangh loding

6. Nipi Ni Pasian Biading, Na sem loding:
- To neita ahih manin, Lawki tetawh kilamdang ding,
- Nipi ni na sem lo-in Pasian biading

Thukhupna:

-Sangmangte in Upna bek hongpuak hi lo, ngeina hoihloteng hong laihsak, nuntakzia hoihlote hong laihsak,
-Hakha Sangmang inn Zakang zuut, Hakha lam te in zuipah,
-Tedim Sangmang inn, Zinanchi zut, inn khempeuh kizuut pah.

References:
The Theological Concept of ZO In Chin Tradition and Culture; Sing Khaw Khai; 1984
When The World of ZOMI Changed: J.M; Ngul Khan Pau; 1995
Trails and Triumphs of The Chin Pioneers: Kip Thian Pau;

**********

Cope topa leh Biakna

2009-03-01T07:15:00.000-08:00

Rev. Go Lian Thang
Cope 98 Celebration, October-November, 2008, Tedim

Khamtung gam, Tedim gam a sangmang masapen Joseph Herber Cope pen November 21, 1882 ni-in Pennsylvania (PA) State, Philadelphia khua ah suak hi. A pa pen Joseph Cope hi a, a nu Elizabeth Danforth Cope ahi hi. Unau 5 sung panin a lina ahi hi. Innkuan cithei sung panin a hong khangkhia ahi hi. A pu (a nu ii pa) Rev. Appleton Howe Danforth pen India Assam gam a sangmang khat hi.

1904 kumin University of Pennsylvania, Philadelphia khua panin Bachelor of Science (B.Sc.) degree ngah hi. Kum khat sung Utah State (gamke) E- Colorado, W-Nevada, S- Arizona) state in umcih hi. a om Mormon mite kiangah Pasian thuhilh na sem hi. Tua khitteh Noew York a om Tuiphum Lai Siangtho sang khat a hi Rochester Theological Seminary ah kah aa, 1908 kumin Bachelor of Divinity (B.D) degree ngah hi. 1934 kum America a om sungin Zogam a a nasepna hangin Colgate University in Doctor of Divinity (DD) pia uh hi.

Kum 17 a phak ciangin kikhel in Pasian um a 1899 kum in Philadelphia kua a om Second Baptist Church of German Town pawli ah tui kiphum hi. Tua pawli ah a zi tawh a khantawn in pawli mi in om uhhi. amau phawkna ciaptehna zong tua pawli ah tuni dongin om hi. February 17, 1908 ni in American Baptist Missionary Union in Zogam a sangmang dingin seh uhhi. Jul 7, 1908 ni-in Tuiphum sia (ordination) ngah hi. A zi Elizabeth Caldwell Simith tawh September 3, 1908 ni-in siangtho kitenna nei uhhi.

Sangmangpa Cope zi pen July 31, 1882 in Philaelphia khua mah ah suak hi. A pasal sangin khali dekstak upa zaw hi. Philadelphia khua a omsang sia sinna sangah kah a, 1904 kukmin zo hi. Tua khua a om Mt. Airy Baptist Church ah 1906 kum in tui kiphum hi.

Cope in B.D a ngah kum 1908 kum in Northern Baptist Khawmpi pen Oklahoma khua ah va siim hi. Gamdng mission sepna a president a sem Dr. Haggard in "Kawlgam, khamtung, Chin Hills a kici munah na pai ding hi." ci-n gen hi. Cope in zong "Chin Hill" cih koi lai munah ompeuh mah hiding a hia" ci-in theizo peumah lo hi. Pasian in eite pianma pek in ong itna, ih muh theihna dingin i omna Chin Hills theilo khat na teel hi. Lamdang lua Pasian hong itna hangin Pasian min i phat masa hi.

Tua ciangin a lawmnu Miss Elizabeth C. Smith sikkhau sat in "Chin Hills koi mn ah om hiam? Gam thu bu sung an koi zon dih in ci in sawl hi. Sang a gamthu a sinpihpih a kithuah pih a lawmnu in zong , "Ka punote khat in Gazetteer khat nei in tuan sung hongen ningin tua khit ciangin sikkhau kong sat dinghi ci hi. tua laibu a et caingin "Kawlgam nitumna lam, gammong khat kuama uk nailoh na gam (unadministered area)khat hi, ci in a zing ciangin sikkhau thukkik hi.

Cope topa pen a neutung pan in sunday School hoihtak a kah khat, khangno C E sungte ah a kihel mahmah khat ahi hi. Kimawl zong a siam khat ahih hi.

Amau nupa pen Tedim gamah Pasian nasem dingin America Tuiphum pawlpi in a seh mahbangin New York khua panin September 30, 1908 ni in hong dingkhai uhhi. November 16, 1908 ni in Yangon hong tung uhhi. Amau tun hun leh Dr. East amau innkuan vai in Yangon ah a om hun tawh kituak a Dr. East in ama omna Hakha khua dongah Cope topte nupa tonpih in December 21, 1908 ni in Hakha hong tung uhhi.

Sangmang Cope-te nupa in tapa thum nei uh aa, Joseph Howard pen January 1, 1910 ni in Hakha khua ah suak hi. A nihna Harry November 26, 1911 ni in Hakha ah suak a, October 22, 1915 ni in Hakha mahah si hi. a tatumpen Appleton Danforth January 30, 1917 ni in America ah suak hi. Sangmangpa Cope June 11, 1938 zingsang nai 5:00 hun in Hakha ah si hi. a zi pen December 10, 1968 ni-in Philadelphia ah si hi.

1. Tedim a nasem ding kim lai Hakha hong tunna thu:

A thu in Tedim ah phualthak sat ding vaihawmna a omtei hangin Tedim ah bangmah om nailo ahihn manin Hakha khua phuali in a neih masak loh uhn a phamawh ahi hi. Tedim ah inn lam nading sum a kicin lohna hang leh Tedimah phual i mun siauhna pen kipia pak thei lo ahih manin Tedim ah a kipanpah theilo ahi hi. July 1910 cianginTedim innlam nading Rs2500 kipia aa October 1, 1909 ni in Khamtung gam nasepna pen khanglam leh saklam ci inkhennih kisuah aa khanglam ah Hakha khua hualpi in nei in Dr.East in tavuan la ding a saklam ah Tedimphuali in ne in Cope topa in tavuan lading hi ci in khentatna nei uhhi.

Hakha khua atun uh ciangin ama sa pen in Hakha pau sin pah uh aa kum khat khit teh a kilawm zah pauthei ta uhhi. Khakha a om sungun Mrs.Laura Carson zi sangha uh uhhi. 1909 kum April kha in Zogam Tuiphum Pawlpi khawmpi a thum veina Hakha ah tung a Cope topa a kikhel masakna ahi hi.

Zogam khennih a khenkhit uh teh Rev. Cope pen Octber 1909 kum sungin Tedim paipah a Dr. East tawh Tedim ah kituah kik in sangmang huang mun ding seh uhhi. Mayh 1910 pawl in a inn leh anbuk ding a kizawh tei hangin Tedim ah kikhin pahtheilo uhhi. A tapa upapen January 1, 1910 ni in suak ahih manin naungek lai tawh tuuk hun sungin kkhual gamla tua taan zing ding thubaih lo khat ahi hi. Tua ahih manin guahtui kan khit November 1, 1910 ni in sangmang Cope tenupa nasep kipan taktak dingin Hakha khua panin Tedim hong tung uhhi.

Amau hong tuna hangin Tedim gam a Khristiante nuam mahmah uhhi. Tedim pau hong sinpah uh aa Tedim mite a gualhuai leh thuthak zong a thei nuam mawh khollo dingin hong mu uhhi. Zu pen nakzatlua hongs a uh aa, Khrisian suah nading a khaktan lianpen khat in mu uhhi.

Cope topa pen Sunday School panna khangkhai ahih mahbangin 1911 kum in Tedim ah Nipi sang (Sunday School) khat hong pankhia hi. Kumpi sang a sangnaupangte hong kah khak leh a cihna hi in a hi zongin amau upmawh zah in lawhcinglo hi. May kha in nipi thum sung Pasian thu genin zin kawikawi hi. October kha in Henzada ah Kawlgam a nasem sangmang teng kikhopna ah va kihel hi. Sangmang 65 kah hi.Kawl gambup tuiphum khawmpi zong kfinei suak pah aa, mi 1400 bang pha hi. 1912 kum in zong Pasian thugen in sihzang kual leh Sukte kual ah zin leuleu hi. Kumlang a cinma in khua 75 pha hi. Ahi zongin ama lamet zah inTapidaw hong suah cihbang om phalo hi. Hih kum mahin Tedim agam khua neu khat ah khanlawhna om in mitampi in Pasian thu um hi. August kha in Cope in mi 32 tuiphum hi. 1913 kum in Tedim gam ah mi 96 kituiphum hi. Sangmang Cope lungkim mahmah hi. Alangkhat ah Khristian a suaksa mi tampi zong nungtolh mawk hi. Pawl khat te bang Tapidaw a suah zaw kum sawm nai bang hikhin hi. Sunglam ze-et bawlsiatna hang ahi hi.

1914 kum in Cope in Tedim gam a om khua 133 sung panin khua 124 te ah zinin Pasian thu tangkona nei hi. April kha in Khuasak ah Zogam Tuiphum Kahawmpi a giat veina kikhioppi om hi. Mi 18 kituiphum in mi 200 in neekkhawm ne uhhi. Hih kikhopna ah Britist (Mikang) galkap ulian Col. Burne zong kihel thei hi. Col. Burne leh Cope topa kikhawl thei mahmah uh aa khkual zong zinkhawm zel uhhi. 1914 kum in Cope in sihzang kual leh Tdim gamteng pha kawikawi hi. 1915 kum Zogam Tuiphum Khampi pen Tdim ah January 29 -31 sungin kibawl hi. Misawm tui kiphum uh aa, akikhawm vekpi numei naupang tawh sim in 250 tang pha hi. 1915 kumin zong Cope topa in Tedim gam leh Falam gam sung ten gtuancil ngiingei hi.

Gamdang panin biakna na sem in a hongpaite in mabanpi khat ciat nei dingin a hong ai uhahih hi. Thu hilh nasep, pilna lamsang, leitung nuntakna khantohna ding lamsang cih bangin tavuan khatciat a neih tei uh hangin amau nasepna mun tawh kizui in a hithei bangin a vekpi in a thuahciat loh uh phamawh hi.

Sangmang pa Cope pen mipil mithumu mahmah leh mi thanuam khat hih manin zinkhia kawikawi a Pasian thu lam a genbek tawh Tapidaw upna kizel zo taktak lo ding zong kip zo taktak lo ding cih thei hi. Tua ahih manin a khual zin kawmkawm mahin Lai Siangtho na teitei hi. A tuntan na ah hun awng a ngah nak leh lainasep na sem pah lian hi. Amah tawh a kithuah Kayin mi Sia Shwe Zan leh Sia Po Ku-te in eipau tawmtawm thei khin uh ahih manin nakpi in na huh thei uhhi. Hih Siate gel ih phawkt tawntung ding a thupi khat ahi hi.

Cope pen nasep kizenna lamah kuamah phak ding hilo hi. Na naksep lua ahih manin a pumpi thuak zolo in a khantom hiding hi kici phial hi. Aman kalkal a Lai Siangtho a teipen 1914 kum bul lamin ei Tedim pau tawh Matthew bu hong zo hi. Kikhen thei pahlo ahih manin 1915 kum the kikhe zo pan a eipau a lai kikhen masapen ci-in kiciamteh hi.

2. Lai Siangtho Tawh Kisai Laite:

Matthew – Tedim pau in 1915 kumin kibawl hi.

Mualtung thuhilhna – Pau Cin Hau lai tawh 1931 kumin kibawl hi.

Thuciam thak – Tedim pau in 1932 kumin zo hi. Hih pen 1983 ciang dong kizangh hi.

Piancil leh Paikhiatna - Thu ciamlui sung panin hihte gel zong Tedim pau in teikhin a, a laidal bek (Manuscript) in om pan hi. Hih pen Rev. Kam Khaw Thang in “Keima mit mahmah tawh ka muh hi aa, 1952 kum in Insein ah Lai Siangtho sangkah dingin ka paikhit ciangin kua khut sungah tung hiam cih ka thei kei hi” ci hi.

Thuciam thak zong Falam pau in a sih madeuh in sem hi. cih zong kigelh ahihmanin 1960 hun malai in a kizangh khin sinna a kitei (tentative Translation) a kici pen hikha dingin ka um hi. ci in Sia Thangin na gelh hi.

3. Laibu lamsang Tawh a Kisaite

Tedim pau in 1914 kum in laimai 29 a pha khat bawl hi kici ahihmanin dawng 20 val bang a pha labu hiding hi.

Tedim pau in 1923 kum in laa dawng 283 a pha laimai 293 a pha bawl hi ci in kigelh hi. Hih pen leitung galpi 2 na ven dong a kizangh ahi hi. Leitung galpi 2na venma sungteng Tedim, Falam, Hakha pau in ih laibu neih a kibang linlian ahih manin Tedim pau bek hilo in Falam leh Hakha pau tawh zong sangmang dangte tawh a semkhawm uh hiding hi. Leitung gali 2na hun cianginSangmang khempeuh galtai in a om uh hi aa, galven ciangin Laibu tawh kisai in Tedim Falam leh Hakha in amau san ciat ah sem in lanambat paizia kibang nawnlo ahih manin 1974 kum ciangin Zomi Baptist Convention in vaihawmna twh a kibangin neih kik ding a kipan kik ahi hi. Tua labu ah dawng 469 a pha hi a, tuhun dong mah a kizangh lai ahi hi.

Sangmangpa in Pasian thu bek hilo in leitung thu mahmah ah zong Zomite khantohna ding na tampi hong sepsak hi.Zomi bup I laiding hongphuat sak in laisin bute hong bawlsak hi. Pilna lamtawh kisai nasepna dingin Mikang kumpite in 1925 kum inZogam Sangmangpa Honorary Inspector of Schools) dingin koih hi. I Tedim kamin Pasian nasem gammial phulte sangmang I cihna pen Cope topa in sangmang nasep a sepna hang ahi hi. Cope Topa in hong phuatsak Roman alphabets tawh kigelhna 1919 kumin kikipsak hi.

Kumpi in a khualzinna dingin a piak sum sung panin Tedim pau leh Falam pau in Thu kizakna lai bawl in hawmkhia hi.

1932 kumin Cope topa in Tedim kam tawh Lai Siangtho thak hong zo aa, March kha in kikhen hi. Zo gamah a om masa pen Thu ciam thak (NT) ahi hi. Hih Lai Siangtho teina ah eimi leh Kayin siate pawlkhat in huh uhhi. June 10, 1935 ni-in Zogam a nasepna tungtawn in Rev. Cop pen Tuiphum sang khat ahi Colgate University in Doctor of Divinity (D.D.) pia uhhi.

Zogam Tuiphum khawmpi Sangmang pa Cope kihel tawpna pen March 18 -20, 1938 sung a Tonzang a kibawl Khawmpi ahi hi. Mi 900 bang kikhawm hi. 1938 kum in Zogam ah Tuiphumsa mi 650 pha a, pawlpi mibup 4600 bang pha hi ci-in kizasak hi.

Ton zang khawmpi khit ciangin Cope leh Dr. Strait Kawlgam leh India gam Pasian nasepna gamgi bawl ding in India lam pan a ong pai Rev. Lorrain tawh Zogam khang lam India gamgi khuaneu khat ah May 24, 1938 ni-in thukimna khat bawl uhhi. Hih mun panin Hakha hong ciahtoh uh ciangin Cope gilsan natna tawh a ci hong naknat mahmah a May 31 ni-in Hakha hong tun the zawam mahmah ta hi. Siavuan siam om sunsun tawh kibawl napi damtuan lo hi. Falam Siavuanpi pa kisam a aman’ zong ahih theih tawpin bawl napi, June 11, 1938 5:00A.M in Hakha khua ah kivui a, Dr. Strait in kikhopna makaih hi. Tuani in kumpite in dahna lahna in a laan khuamkim ciang khaisuk hi. Cope pen sangmang A. Carson han kiangah kivui hi. A sih in kum 55 leh kha 6 pha pan hi. Kum 30 sung Zogam ah Pasian’na sem hi.

Cope a sih laitak in a zi Bess pen a kiangah omlo hi. Gim mahmah cih thu a zak ciangin Tedim panin hong delhpah keei sam hina pi, lamkal panin a pasal si zo cih thu a zaktak the aman zong ka pasal luang beek va mudih ning ee, a luang ka lap kei leh zong a han beek ah va kap dih ning w, cituan sam lo in Falam panin Tedim ah kileh kik pah ving veng hi. Tedim ah zong sauvei taamlo in a gam uh America ah ciah pah ving veng hi. A pasal sih na tungtang a Sangmangnu tatzia pen ei Zo lungsim tawh kibang phalo hi. Kileh bulh lian hi.

Sangmangpa Cope phawkna in 1960 kum in Golden Jubilee kibawl a, Cope Jubilee Church kici hi. Diamond Jubilee zong kibawl khin a tu-in Cope Memorial Baptiast Church kici hi. TBA a kinei laikhetna zong Cope Memorial Press ci-in Cope min mah kitap sak hi.

A tomin tuazah hisak phot ni. Topa’n thupha hong pia tahen! Amen.

4. Etkak laibute:
- Johnson, Robert G. History of American Baptist Chin Missions. Vol.1.
-Rev. Kam Khaw Thang, a 51 veina TBA Kikhopna leh Cope Diamond Jubilee, March 17-21. CMBC, Tedim
- Rev.Dr. Do Suan Mung, Tapidaw Pawlpi leh Upna Tangthu, 2005.
- Rev. Thang Khawm Pau, Ngilhmawh Sangmangte & E.B.C, March 31, 2008.

******

J. H. Cope leh Zolai

2009-03-01T07:03:00.000-08:00

Sia Gin Sian Pau
Cope 98 Celebration, October - November, 2008, Tedim

1. Zomite' Lai Neih Masakna: Khangluite in "Zomite in nidang hun sawtpi lai pekin lai kinei ngei khin hi" ci-in gen uhhi. Tua lai pen savun tungah a kigelh hi a, Go Cin in tua savunlai nisa ah a pho leh ui-in na neksak hi. Tua a kipan Zomite in lai a kinei nawnlo hi ci-in gen uhhi.

2. Lim Kisuai Lai Zatna: Zomite' savunlai ui-in a neksak khit a kipan 1900 ciangdong Zomite lai neilo in na om uhhi. Suangpeek tung peuh leh singpeek tung peuhah lim suai-in, tua pen lai in na zangh uhhi. Mualsuang gelhna in na zangh phadeuh uhhi. Lai a kikhak uh ciangun suangbek tung, singbek tungah limsuai in tua tawh na kithuza uhhi.

3. Pau Cin Hau' Lai Zatna: Pu Pau Cin Hau in 1888-1902 sungteng pumpi damlo in a om sungin mangmu a, tua a mangmuhna sungah Pasian in laimal (1050) lak hi. Tua panin "Pau Cin Hau' lai" cih hong piangkhia hi. Laithak mukhia ahih manin ama' min "Laipianpa" na ci uhhi. Tua laimalte laidal tung leh suangpeek tungah gelhin, midangte hilhsawn ahih manin mitampi in na thei uh a, tawlkhat sung ding na kizangh hi. Sen laitawh kibangin a awsuah zui in laimal om hi a, mal 1050 pha-in, a bu in bu (6) na pha hi. Nidangin tua lai bek na kizangh a, Piantit pai hun lai bangin lai a kikhak uh teh Pau Cin Hau' lai tawh na kikhak uhhi. J.H. Cope mahmah in zong 1930 kum in Matthew Lai Siangtho sung a mualtung thuhilhna teng Pau Cin Hau' lai in na khen khia hi. Hih Pau Cin Hau' lai zong a manthan loh nadingin kep huai mahmah hi.

4. Kawllai Zatna: Sangmang A.E. Carson in Zogam ah na hong sep ciangin lai lo tawh maa kitelh zolo ding cih mukhol a hih manin Kawllai hilh dingin Karen Siate pawlkhat hong tonpih hi. Sia San Win in 1900 kumin Hakha khua ah Kawllai sang khat na hong hi. Sia Po Ku in 1902 kum in Tedim ah Kawllai sang khat mah na hong a, sangnaupang ding mi a kingah zawhloh teh 1904 kum in khawl kik hi. Sia Shwe Zan in zong 1904 kum in Khuasak khua ah Kawllai sang khat mah na hong hi. Kum khat a cin ciangin Sihzangte in zumlai en theita uh, cih thu ukpipa Pu Hau Cin Khup in a zak ciangin ama' khua Tonzang ah zong Kawllai sang hon ding hong vaihawm a, Ukpipa Pu Hau Cin Khup' sapna tawh Sia Po Ku in 1905 kumin Tonzang ah Kawllai sang khat na hong leuleu hi. A kipat tungin sangnaupang 40 pha a, kum bei kuan ciangin 70 bang na phato hi. Kawllai a hilh kawmin Pasian' thu tawh zong na pantah kawm hi. Tua hang mahin tua hun lai-in Zomite sungah Kawllai thei tampi leh Khristian pawlkhat na om a, tua hun lai–a kigelh mualsuangte bang Kawllai vive tawh na kigelh ahihna tuni dongin kimu thei lai hi.

5. Zolai Neihna: 1910 kumin J.H. Cope Tedim hong tung a, hong tun khit a sawt lo-in Roman Alphabet ABC panin Zolai hong bawlsak hi. J.H. Cope hong tun ciangin Zolai a kinei pan ahi hi. 1913 kumin"Tual Laisintawmna bu" cih laibu khat hong bawlsak a, tua pen Zolai a kigelhcilna na hipah hi. 1914 kum in "Tedim Labu" a masapen hng bawlsak a, ama' sih 1938 kum dong 3 vei na bawl man hi. 1919 October kha in Zolai tawh laihawm masapen "Tedim Thukizakna Lai" hong hawmkhia a, J.H. Cope in editor sem hi. Tua laihawm sungah "Tedim mite laisim thei tampen ahih manin Tedim pau in kibawl hi", ci in na gelh hi. Tua bangin biakna sungah Lia Siangtho leh labute simtheih nadingin ABC laimalte zanghin hong hilh ciangin theihnop kisa mahmah aa mite lawp thei mahmah uhhi. Tua lai-in "Zolai" kici nailo-in "Mang Tuallai" kici phot hi. Manglaimal pen i Tuallai hong suak a cihnopna ahi hi.

J. H. Cope in Yangon zumpi ah Zogam sunga sangte ah Zolai sintheih nading phalna a nget leh na ngah takpi hi. 1924 kum ciangin Tanbul (Primary) sang khempeuh ah Zolai tawh sin sak ding kithukim hi. 1925 kum panin Zolai sang (Vernacular School) kihong a, tan khat pan tanli dong kisin hi. 1919 kumin Laisimbu khatna kikhen a, 1920 kum teh bu nihna, leh 1928 kum ciangin bu thumna leh bu lina cih bangin kikhen toto hi. 1926 kum in sangte ah sin dingin Zolai tawh leitung thu leh Gamthu (Geography) hong bawlsak a, 1927 kum leh 1931 kum teh tua laibute mah hong puahphat sak kik hi.

Biakna sunga zat dingin biakna laibu, Lai Siangtho bu, Labu cihte hong bawlsak banah sangah sin dingin Gamthu bu (Geography), Nate' thubu (Science) leh Ganan (Arithmetic) leh Laisimbu tuamtuamte zong hong bawlsak lai hi. J.H. Cope in kumpi' sawlna tawh Tedim, Falam, Hakha pau tawh a bawl laisimbu (35) pha , kumpi in zong "Kaisar I Hind" cih pahtawina pia hi. Zogam khanglam Mindat, Kanpetlet lamte' ading a bawlsan laitak in hong sihsan hi.

Zanggam a teeng i Zomipih Asho Zomite in J.H. Cope in Zolai hong bawlsakna thu a zak uh ciangin Magwe Menzipa kiangah "Ko zong Roman alphabet ABC laimal mah ka zattheih nadingun hong vaihawm sak in," ci in na ngen uhhi. tua ciangin Magwe Menzipa in, "Hih na sanggamte uh pen India leh Kawlgam kikal ah amau teng a lomteen uh ahih manin ahi ding mah hi. Ahi zongin no pen Zogam a teeng na u na naute uh tawh na kikawm nading uh haksa a, Kawlte' lakah a teeng nahih manun Kawllai mah zangh zaw le uh cin hoih zaw ding hi," ci-in na dawng kik ahih manin a lungkimlohna uh 1927 'Myammar Thaman' sungah hong suak ngei hi.

6. J.H. Cope in A Laigelhna ah Tedim Pau A Zatsena Thu: J.H.Cope Zogam hong tun ciangin Pu Pau Suan leh Pu Thuam Hang-te Khristian masa nahi uh ahih manin amau tawh na kithuah khawm pah a, Sihzang pau na sin pahin, a sawt lo-in na siampah hi. Zolai a gelh masakte zong Sihzang pau in na gelh hi. Laibu hong bawl taktak ding ciangin Tedim gam sunga pau nam tampi a omte sung pan bang pau zangh leng tangzai pen ding cihna lungngai kha hi. Tua ahih manin 1919 kum in"siahkaai hausa teng kaikhawm in Tedim khua paangpi nuai ah thu kikupna khat na bawl hi. Tua thu kikupna ah J.H. Cope in Hat Lian Bu (Jack The Giant Killer) kici Sihzang pau tawh a kigelh, laigelhloh dal 20 bang a pha ding laikhetna tawh a kikhen tangthu khat hong simkhia hi. Tua pen kuamah in tello ahih manin "Tua ahih leh bang pau –a bawl ding ihi hiam?' ci-in a dot ciangin a kihel hausate khempeuh in "Tedim pau mahin kibawl leh kitheikim pen ding hi" ci-in thukimna hong nei uhhi.

Tua hun a kipan Cope topa in Tedim kampau tawh thukizakna hong suakkhia sak a, biakna laite leh laisimbu a bawl khempeuh zong Tedim kampau vive tawh hong bawl ahi hi.

7. Zolai Neih Manin Hamphatnate: Zolai i neih manin hamphat ziate lungngai pha kik le'ng a masa penin sangmangpa J.H. Cope in Mikangte zat Roman Alphabet ABC panin Zolai hong bawlsak khak laizang pen ei nget leh ei kut zong hipeuhmah lo , mailam hun suapi a mukhol leh a geel khol Pasian mahmah in ei Zomite hong angvan ngiatna leh ei adingin a hoih penpen mah hong geelsak ahihna kimu thei hi. ABC laimalte i zat khak manin ei adingin laikhetna a tuam bawlkul nawn seselo hi. Mikangte ading a kibawl siktawlai, lainetna (Press) leh Computer cihte tawh Zolai deih bangin i khen ziahziah thei hi. Zolai zangh in e-mail tawh leimong dongah hun tomno sungin thu i kiza ziauziau thei lel hi. Zolai tawh zonet panin a kitawng nangwn ki-om ta hi. I Zolai pen leitung bup dongah kizangh thei hi. Tua ahih manin i Zolai neumuh kha peuhmah kei ni. Kawllai tawh hihte kizangh theilo ahih manin Kawlte bangin hong eng thei mahmah uhhi. Hih pen J.H Cope hangin i ngah hamphatna lianpi khat ahi hi. Sangmangpa J.H. Cope in tawm vei sung Pu Pau Cin Hau' lai na zangh man a, a zenzen in na zanghsuak bang hileh ei adingin siktawlai, lainetna, computer, leh e-mail cihte a kimanna omlo ding a, kizangh theilo ding hi.

A thu nihna ah ABC laimal i zatkhak manin Mikang lai leh Mikangpau tawh i kinai tuama, i maingap tuam pah hi. Mi namdangte sangin Mikang lai i kiva zaw deuhpah a, mikangpau zong siambaih zaw pahin mikang laa khawng zong saknuam i sa zawdeuh pah hi. Hun khat lai bangin Zomite Mikanglai siam ci-in hong kiciamteh ngei hi.

A thu thumna ah Pasian in Zolai thupha hong piakzia zong a lamdangpi khat mah ahi hi. Tuhun ciangin Topa' thupha tawh Zomi sungah laisiam tampi mah ki-omta aa, amaute in leitung bup a laibu hoih minthang tampite ei lai in hong letkhia uh ahih manin Mikanglai leh Kawllai a siam lo, Zolai bek a thei tampite in kiphattuam pih mahmah hi. Tua tham lo-in tuhun ciangin Zolai tawh a kisin Lai Siangtho sang khawng zong hong omta aa, hih zong Pasian' thupha taktak ahi hi. Bang hang hiam cih leh Lai Siangtho sang a kah Zomi tampite in a thu kibuaipih lo in a Mikanglai vive kibuipih za hi. Pawlkhat bangin pum lotngah pong lel uh a, ahi zongin a thu tel khollo lel uhhi. Tu in Zolai tawh kisin ta ahih manin a thu lah tel in, zong kizangh thei pah lai hi. Hih zong J.H. Cope hangin i ngah hamphatna lianpi khat mah ahi hi.

A thu lina ah Pasian' nasepna ah lai lo tawh maa kitelh theilo a zong gahsuah zo taktak lo hi. Zolai i neih khak manin Zogam sungah Khristian khang tuam a, pawlpi zong thahat tuam hi. Zolai in i khamit hong honsak, hong pilsak, i khuamuhna hong tangzaisak, i upna hong khosak hi.

8. I Zolai Kepsiam Ni: Topa Pasian in J.H Cope tungtawn in hong piak i Zolai i kepsiam mahmah ding kisam hi. Kepsiam ding i cih ciangin koihcing ding cihna hilo a, a manthanloh nadingin zanghzangh ding cihna ahi hi. Kum 2000 pawl a kipanin kumpi in Zogam sung sangte ah Zolai hong sinsak nawnlo mah ahih manin khangthakte in Zolai kithei nawnlo tamawk a, dahhuai mahmah hi. Zomi hi napi Zolai theilo cihbang pianglo hi. Zomi ihih nak leh Zolai i theihkul hi. I Theih nadingin i sin kul hi. Sangte ah lah kisin nawnlo tamawk ahih manin biakna lampan hanciamin Zolai sinna neihzelzel ding kisam theikha ding hi.
(Cope 98 Celebration, Nov.1, 2008 ni-in Nitak kikkhopna sungah GSPau in a simkhiat laipi ahi hi.)

COPE TOPA HONG PAI A PHATTUAMNATE

2009-03-01T06:55:00.000-08:00

By Rev. Thang Go Khup
Cope 98 Celebration, October-November 2008, Tedim

Thupatna

Cope topa tangthu i et ciangin a hongtun leh a sih kikal nasep lianpi namthum hong sem hi. Tuate-in Zolai hong bawlsak, Pasian thu hong hilh, leh sang-uk (sangmang) ahi hi.

Hibangin nasep namthum a sep manin Hakha ah "Cope si hi" cih a zi E. Cope in a zak ciangin "a gimthei lo tawh a kibang mihing thum nasep a sempa' nuntakna beita" na ci hi. Hibang a mihing thum nasep a sempa' maban tungtawnin tulaitak Zomite omzia i en ding hi.

1. Cope topa hang a lai lam khantoh zia: Lai i neih lohna thu-in anasep tampi nawngkai sak ding cih thei ahih manin Pasian thu a gen kawm in i lai ding hong bawlsak hi. Hih Zolai a hong bawlsak manin i phattuamna tampi omhi. Leitung aa mipil masate' lai bulpi (alphabet) a na zat khak pen i hamphat mahmahna lianpi khat ahi hi. Zo lai simthei aa Manglai a sim thei nailo khat in manglai mal khat mu peuh leh a sim thei het kei zongin malgawmin hpmg si, leh kinaih mahmah hi. Tua pen i hamphatna khat hipah hi.

I lai neih zawh tu'n kum zakhat hong cing ding hita buang aa i Zolai pen a khantoh hetloh pen i vaipuak ahi hi. Mailam ah i lai lam aa degree sang nei mipil nih le thum i neih ciangin hong puah ding uhhi. Tu laitak in a kin zaw deuh khat leh nih in a mau' uk zia hoih a sak zia uh tawh kizui in a tuamtuam in kibawl ngeingai hi. Hoih mahmah hi. Tu a bangin kin tek lehang asawt lo-in i Zolai pen laipai zia (gramma) bulpi nei thei ding hihang.

I Zolai bulpi pen A,B,C, (alphabet) ahih man ahitam? tuma kum 30/40 hunlai aa college kahte manglai/pau a kihtak lohna uh? ahih phial leh zong banghangin tulai aate siam tuan khollo i hiam? Ahi zongin i Zolai hangin nidang aate manglai siam, zahin i siam, hetkei zongin phattuamna tampi hong pia hi, cih phawk huai mahmah hi.

Leitung gam khangtote' lai bulpi i zat manin amau' bawlsa laikhetna (typewriter) , thukheelset (computer) deih bangin kizangh thei ziau a hih manin minam hampha mah mahte ihi hi. I minam sung pan Zolai gelh thei khat in internet hongin laikhak theihna pen Manglai a siamna hang hikei. Thukheelset (computer) ii sawlna teng a banbanin a mitkha ah luaisakin, a kigelh Mannglai malte a ciapteh hat man hilel hi. Pilna hang ahih tei hangin ciapteh hat peuh leng hithei pha mahmah hi. Hih pen i Zolai neih man aa phattuamna ahi hi. Tua ahih leh i Zolai in Zotate tuni'n bang ciang hong tun?

Leitung pilna khantohna tawh kizui-in zotate zong pil-in khangto mahmah kisa ing. University leh college pan master leh doctorate degree ngah pen tuma lam kum 10 a kipan kikhang mahmah hi. Tua bek thamloh in leitung mun tuamtuam aa zotate i tuntunna peuh ah a pil a siam a kikhai zaw deuh om, cih khawng i gal zakzak ciangin Zogam aa inn ngakte nana angtang mahmah hi ung. I Zolai in Zomite pilna sang pipi hong guanin gualtung hong tuang sak hi. Cope topa in Zolai a hong bawlsak bek hilo-in Manglai aw suah tawh a kinai-in hong bawlsak lailai ahih manin, lai i neih ding ciang bek hilo-in leitung bup tawh a kizakim dingin a hong deihsakna kilang mahmah hi. Tua hih manin:

- Zolai i gelh theih khit nak leh Manglai gelh hak nawnlo hi.
- Zolai i sim theih khit nak leh Manglai sim hak nawnlo hi.
- Zolai i zat theih khit nak leh leitung tawh kizakim hihang.

Cope topa Zogam leitang hong tun zawh kum za hong cin ngawngaw ciangin a hong makaih / a hong guat "I pilna tawh i minam laamto ni! I pilna tawh i gam i lei puah ni! I pilna tawh i omna peuhah nungta-in mi tampi phatuam sak ni."

2. Cope topa hang a Khristian nuntak zia khantohna: Zomite'n Khristian lam ah leitung tawh kikim lel hang, ci leng kikhial khollo ding hi. Hun khat lai-in ei le ei ciamnuihna a i zat "khamtung gam ah bang piang hiam?" kici sakin "galkap" ci-in kidawng sak hi. Hih kammal ka zak aa kipan tuni dong thuakhak ka sa mahmah hi. Midangte hong cih hileh phamawh ka sa kei aa, ei le ei in i kicih manin zumhuai mahmah ka kisa hi. Tuma kum 50 lai aa kipan galkap lam kinak tum mah aa, galkap ulian tampi na om mah hi. Ahi zongin tuma kum 25 khawng aa kipan hun hong kinak kheel mahmah in mi tampi tak-in Khristian biakna hong kin mahmah uhhi. Tua tungtawn in i milip ii 90% khawng Khristian ahi ding khatin kigen aa tawm ka sa hi. Ahi zongin kawl gam bup zia tawh i et ciangin tam mahmah hi. 1980 khit Khristian biakna a kilawp mahbangin Lai Siangtho sang kah zong kilawp mahmah hi. Tu ni ciangciang gam sung gam pua aa om zotate Biakna lam ah Doctorate degree ngah 200 bang pha khin ding hi ahong kicih ciangin angtan huai mahmah ka sa hi.

Tua banah Lai Siangtho sangkah tampi ki-om aa, Zotate' makaih Lai Siangtho sinna sang zong tampi mah om hi. Khangnote mipil degree nei 40% bangin biakna hong kin mahmah hi. I minam bup phial Khristian ihih hangin Khrih gim nam nailo hihang. Ahi zongin Zomite' leitang ah Khristian hong tun zawh kum zakhat taktak hong naih ciangin Khristian hihna i khang mahmah aa, Biakna sang tampi i nei aa, Biakna lam mipil tampi i om hi. Khristian mipil tampi'n gam dangah pilna a sin beh manun pilna bek hilo-in khantohna tampi hong nei uh aa phattuamna tampi hong hipah hi.

Zotate Khristian biakna lam i khantohna tawh kizui -in kumpi nasemte zong a tuntunna vuah thu-umteng na kikaikhawm in Pawlpi na phut (dingsak) kawikawi uhhi. Tua tawh kizui-in Biakna nasep zong a munmun ah om kawikawi hi. Hun khat lai aa, "Zogam ah bang piang" ci a kidot ciangin a kidawnna ahi "galkap" acih pen man mahmah hi. Zogam panin tulaitak galkap (Khrih galkap) tampi piang (thuat) aa, mitampi mah langlut uhhi. Mitampi mah-in langlut nadingin a pi a taang kitehteh uhhi.

Tuma kum 25 lai-in Zotate LaiSiangtho sin "bangzah pha?" cih kithei khinzo napi, tu'n tua gen loh Zotate makaih Lai Siangtho sang nangawn theihkhit zawh ding hilo hi. Hih pen ei hanciam zawhna hang hilo-in Pasian thupha ahi hi.

Zomite Khristian hihna (Christianity) ah nasia takin khangto hang-a. Kawlgam sung minam tuamtuam lakah a khangto pen dingin i kilam-en hi. Zomite' makaih Lai Siangtho sinna (Biakna) sang tawm-lo aa, Evangelist zong a tam khahkhia pawl ahi dngin ka ki lam-en hi. I leitang ah Khristian upna a hong tun zawh kum zakhat hong naih ngawngaw ciangin:

I Khristian hihna in Kawlgam vaigam zel, I Khristian hihna nuntak pihni!
I Khriastian hihna khahsuah keini!
I Khristian hihna i omna peuhah kilangsak ni!

3. Copa hang-a nuntak khuasak zia khantohna: Zomi kampau Khristian ahi-aa, Khristian lo ahi zong, i minam bup silh le ten, thu le la, muh le ciin a kipan a kivang kimin kikhangto mahmah hi. Ama' hongpuak Khristian thu-in dahna thu hilo -aa Lungdamna thu ahih manin i mivekpi-in lam khat teitei ah kiphattuam pih hi.

Tu hun laitak i nuntak zia i ki-et ciangin nidang tawh kilamdangin, heek le tat a hi-aa pau le ham ahi zong nasia takin khangto mahmah hihang. I gam ah bel kikial lua ahih loh hangin midangte muhna munuam in tu aa sangin a nuamzaw in i om khak leh cihna bekbek hangin gamdang kipai mahmah aa mailam ah kipai lai ding hi. Khualzin gamvak pen nidang sangin kitamzaw hi. Gentehna: Tedim pan Kalay myo tuaksuak ding mawtaw tuang te kidong ciatciat leng "Yangon pai ning" aci om hamtang hi. Tua mahbangin Kalay myo pan Tedim a kahto mawtaw khat peuh vasit tel leng, "Yangon pan hong ciah" khat le nih om hamtang hi. Tedim leh Yangon kikal lampaina ni thum bang a sawt hangin a nisim in a kuan a ciah kiphamat hihang! Tuma kum 25 lai-in Tedim pan Yangon pai ding kal khatin khat a om leh a tam mahmah hi aa, tu hun ciangin ani ni-in omta hi. I gentehna in: tu ni'n Thangho-te unau; zing teh Nantal, thai teh Neinote nita, cih phial ding hita hi.

Tua mahbangin Yangon pan gam dang pai zong a nipi simin khat le nih om aa, pai a sawm zong tampi mah om hi. Hite pen sum le paai zong ding i cih hangin khantohna, thumuhna hi aa, nidang sangin i kilamdanna, i khantoh zawkna na hi gige hi.

Tu laitak i mipih gamdang omzia en leuleu le’ng, Malaysia ah tul giat val ding ci uh aa, America ah tul nga val ding ci uhhi. Tua lo mundang gam tuamtuam aa omteng a kilomtuat leh then nga val ding ci uhhi. Hih bangin leitung gam tuamtuam ah a kithehthang Zotate pawlkhat bang a tuntun na vuah inn le lo tawh sumbuk tawh omin nuntak khuasak zia nakpi-in nuamsa mahmah uhhi.

Silh le ten i ki-et ciangin mi silh, mi ten bangmah kisilh, kiteeng thei lel aa, mi omzia mah kiciing thei hi. Leitung khantoh zia tawh kizui in om thei lel hihang.

Thukhupna

Cope topa hangin zomite leitung tawh i kikimna mangngilh theih, pampaih theih ding hilo hi. Tua ahih manin Zomi u le nau i omna ciat, i maban ciat panin hihciang i tun theihna khatvei lungngai kikin 2010 ciangin a kua, a kua cilo Zotate vannuai khut khat tawi, khe khat khai bangin, geelkhawm semkhawm in kuang khat sungah sawk khawm ding hihang. Hih 2010 pen Zotate kici khempeuh a pil, a hai, a hau, a zawng kua pawl, kua pawl cilo-in Lungdamkoh khopna leh Thupha nget khopna hun manpha hong hiding ahih manin, Topa tungah thungetna tawh mapang ciat dingin kong zawn uh hi.

COPE TOPA’ NUNZIA TOM GENNA

2009-03-01T06:46:00.000-08:00

Sia Gin Hau Pum

Thupatna

Pasian in mihingte a mangthang dingin hong deih lo ahih manin Amah mah in mite hong zonna Piancil sung, Eden huan sung pan i mukhia thei hi. Tua hi-in Lai Siangtho lui sungah a mangthang ding mihingte Amah mah in a zon hun, Kamsangte zangh in a zon hun zong om hi. Lai Siangtho thak hun ciangin a Tapa Jesuh hong zangh hi. Zomite lakah 1910 kum ciangin a mangthang ding Zomite a zong dingin Cope topate nupa hong zangh hi. Tua Cope topa i cihcih pen Pasian zatzia leh Zomite hamphat zia, Pasian in eite adingin a tuam vilvel a hong puak ahihna tawmcik a nuai a thulunote tungtawn in ih ensuk ding hi.

1. Cope Topa Pianna: Pasian thu, Zolai leh Zomite thangthu a kigen simin Cope topa thu kihel lo-in thuguipi cing thei mahmah lo hi. Banghang hiam cih leh Khamtung gam ah Pasian thu gen dingin 1899-1966 kikal sung America gam pen a hong pai innkuan sagih pha hi. Tuate in Carson, East, Cope, Woodin, Strait, Nelson leh Johnson-te innkuan hi-in tua innkuante sung panin 5-te in Haka phualpi pan nasem uh aa, Cope leh Nelson-te innkuan in ahih lehTedim phualpi pan hong sem uhhi. Rev. Dr. J.H Cope pen America gam Pennsylvania State, Philadelphia khuapi, Germantown veng ah teng uhhi. A pa Joseph leh a nu Elizabeth Danford Cope sung panin November 21, 1882 ni-in suak hi. A nu pen India, Assam gam, Gawhati khua thuhilh mangpa’ tanu ahi hi. Kum 11 a phak ciangin Germantown Second Baptist Pawlpi sungah a min pia in tawpidaw suak hi. A nu leh a pa in zong sangsia semtek uh in tua khua mahah Nipi sang (Sunday school) sia sem uhhi. A ma minpi in Joseph Herbert Cope hi. Pasian thu khuavaak hong puakpa, Zolai hong phuatsakpa, Lai Siangtho hong teisakpa, Labu hong teisakpa, Sangukpipa leh Zomite nuntak khuasak zia hong lamsangpa, Mi thum nasep a sem, a gim theilo tawh a kibang ngilhmawh Sangmangpa ahi hi.

2. Pasian thu (Khuavak) Hong Puakpa Hi: Cope topa pen Zogam hong paima, 1900 kum ciangin North East High School panin tan sawm hong ongkhia hi. B.Sc degree a ngah khit ciang in kum khat sung Utah gam Morman mite kiangah missionary sem hi. University a kah hun lai a kipanin khamangthang a vei khinsa hi aa, gammial nasep kum khat a sep khit ciangin Lai Siangtho sang hong kah hi. 1908 kum in B.D. degree ngah hi. 1908 kum mahin Northern Baptist kikhoppi Oklahoma khua ah tung aa, amah zong pawisim in pai hi. Gamdang thuhilh ding a puakpawl (Baptist Mission Society)te President pa Dr. Haggard in J.H. Cope kiang ah “Kawlgam khamtung (Chin Hills) ah na pai ding hi” a ci hi. Cope in Chin Hills kicihna mun za ngei nailo ahih manin, “Koi mun hi peuhmah hiam? Gamlim sungah na zong dih in,” ci-in a lawmnu sikkhau sat hi. A lawmnu in zong “ka punote khat in Gamtawh kisai laibu (Gezetter) nei in tua sung hong en ning, tuakhit ciangin sikkhau hong sat ning” ci hi. Tua laibu a et ciangin “Kawlgam nitumnalam, gam mong khat, kuamah a ukzawhnai loh (Unadministrated) gam khat kici hi” ci- in a zing ciang sikkhau thuk kik hi. J.H. Cope leh a lawmnu Elizabeth Caldwell 1908 kum September kha ni 3 ni in hong kiteng uh hi. Zogam khuavak puak dingin September kha 30 ni-in Boston khua pan tembaw tuangin hong dingkhia pah uhhi.

Cope topa Kawlgam hong paiding ciangin a pawlpi (First Baptist Church, German Town, Philadelphia)-te kam vaikhakna hong nei hi. Tua a vaikhak kammal pen “Tu-in kei Pasian thu a za nailo Kawlgam saklam Zomite lakah khuavak puak dingin va pai ding hi’ng, Cidam in kong ciahkik ngeingei leh ka min hong khel un” ci hi. Missionary sem dingin hong kuankhia pah a December 21, 1908 ni-in Haka khua hong tung hi. Carson topa pen April kha sungin na si khin ahih manin Carson tonu leh Dr. East-te tawh tawlkhat sung Haka ah Pasian’ nasepna (Gupna thugenna) leh Zo pausinna hong nei hi. Khamtung gam leitaw lam, Haka phualpi ah ah Dr.Hjalmar East in hong sem in, leilu lam Tedim ah Missionary phualthak sat dingin Cope-te innkuan hong dingkhia aa, November 1, 1910 ni-in Tedim hong tung uhhi. Tua Tedim hong tunni pen Tedim gam adingin khuavak tanni, Nisuahni, Suahtak ni cih ding himawk hi. Banghang hiam cih leh Pasian thu a thei nai lo, minam picing khat hih nading a kisam ahi Lai kineilo, khuamialpi lak a om nuntak khuasak zia bangmah a thei nailo Tedimte lakah nasep a kipat ni hipah hi. Hong tunni pan a kipan in pausinna leh gupna thu genna nei pah ngelhngelh hi. Pasian in thupha pia in a nini in Pasian thu-um kibehlap toto sak ahih manin 1913 kum ciangin Tedim gamah mi 91 tuiphum hi.

3. Zolai Hong Bawlsakpa Hi: 1885 kumin Mangkang kumpi in Kawlgam buppi a lakkhit, 1891 kum ciangin Zagam zong hong lato zo uhhi. Gam ukna phualpi pen Haka khua ah hong phut uhhi. Surgeon Major A.E. Newland in Haka khua ah nasem in om a Haka numei melhoih mahmah khat tenpih hi. Haka pau hong sinpah in “A Practical Handbook of the languge of the Lais as Spoken by the Kakas” cih laibu khat bawl in 1897 kum in hawmkhia hi. Mangkam leh Hakha pau Dictionary bu masa penpen hi ci-in kiciamteh hi. Sangmang A. Carson in “Biakna thu hilh theih nangin Lai hilh masak ding kisam” cih thu hong mupah in Yangon A.B.M phualpite thukimna tawh piangthaksa Kayin sia pawlkhat Zogam ah hong sam to in Zomite Kawllai tawh laihilh hong kipan uhhi. 1900 kum in Sia San Win in Haka khua sang naupang 7 tawh sang neu khat hong (Phuan) in sang masapen hipah hi. Rev. J.H. Cope in lailam siam (linguists) thum hong tonpih in Newland leh Carson-te maban hong zomto in Haka leh Matupi gam a zat ding “Lai”, Falam gam adingin “Laizo”, leh Tedim gam a zat ding “Tedim lai” hong bawlkhia hi.Tua bang in hong hanciamna sung panin 1913 kum ciangin Zolai Simbu khat hong bawlkhia zo hi. Khuakhal sangkhak sungin nitak sang (night Class) in sinsak zel hi. Ama bawlsa laigelhzia, lai ngeina (orthography) a kip nadingin hanciam tak in kum 30 sung bang Cope topa mahmah in hong puah toto a tuni dong ih zat Zolai ahi hi.

4. Lai Siangtho leh Labu Zolai in Hong Teisakpa Hi: Missionary sep kawm leh khuan ciah hun nangawn in tawlnga vetlo a Cope topa nasep thupi mahmah khat in laitei (Translation) nasep ahi hi. Khualzin hun, khuan ciah hun sungin zong annek leh ihmut kikal longal in Zo Lai Siangtho leh Labu tei ngelhngelh hi. Tua kawm mahin Sang Laibu, Khrisitan Biakna lai, Tedim Thukizakna Lai cihte tatsat lo-in bawllai tazen hi. Lai Siangtho I neihcil pen Matthew hi a 1915 kumin Cope topa’n hong teisak ahi hi. Tuabangin tawlnga man lo in laitei nasep hong semsem in Thu Ciamthak (New Testament) 1932 kumin zo hi. Piancilna leh Paikhiatna zong teikhin zo a a laidal (manuscript) in om hi ci-in kiciamteh hi. 1914 kum in dawng 20 val a pha Labu bawl in, 1918 kum in la dawng 101 a pha labu khat teikhin hi. 1923 kum in dawng 283 a pha labu leh 1927 kum in kawng 300 a pha labu bawl hi ci-in kiciamteh hi. Zomite ading in Laibu nam 36 gelh hi ci-in a kiciaptehna tampi om hi.

5. Zogam Buppi Sang Ukpipa Hi: Haka khua hong tunphet in Carson tonu tawh sangsia sem hi. Khualzin hat in thugen a siam banah lailam kivalua ahih manin Mangkang kumpi in 1925 kumin Khamtung gambup sang Ukpipa (Honrrary Inspector of Schools) tavuan / za pia hi. Khasum ngah lo hi. Tua kumpite sang a zat ding laibu khempeuh bawlsak hi. Tuabangin khamtung gambup sang ukpipa tavuan a let manin “Sangmangpa” cih min a ngah ahi hi. Cope topa in Pasian thugen, Lai tei/let nasepte a sepnate leh Sang laisimbu tampi hong bawlsaknate banah in leitung sangte khempeuh ah sangukpi a sepna hangin Mangkang missionary-te khempeuh in zong ‘sangmangpa’ cih min ngahlawh uhhi.

6. Sum le Pai tawh Zong Zogam Hong Vaan Hi: Khamtung gambup sang ukpipa a sepna hangin Mangkang kumpi in Khualzin nading in a piak (T.A) Rs. 700/- ngah hi. Tua sung panin Tedim thu kizakna lai hawmkhia hi. Tua bek thamlo in I gam le i lei kepcing theih nading leh guahtui mantak in i ngah nadingin kumpi Singhalh (Cuvuai) hong bawlsak hi. Hi cuvuai hong bawlsakna hang in Yangon Governor-pa in pahtawina sum Rs.2000/- pia hi. Tua sumte tawh nitak sang hong phuan in lai hilhna leh sia cialna in zanglai zensam hi. Pilna siamna leh thagui thatang bek thamlo a sum leh a paai tawh Zomite adingin na hong sem hi.

7. Doctor Divinity Kipia: Khamtungmite adingin pilna siamna, sum le paai, thagui thatang tawh mipil thum nasep (Translator, Missionary/Preacher, Educator) a sepzawhna hangin June 10, 1935 ni-in New York, Colgate University panin Cope topa Honorary Degree of Doctor of Divinity (D.D) kipia hi. Cope topa Doctor a kipiak laitak in tua University a Dean-pa in hibangin gen hi. “Kuhkal tak in nasepna leh lungkia ngei lo a hanciamna tawh khamtung mite kam nam 40 val pen nam 4 in gawmtuahsak hi. Laigelhzia ngina kip bawlsak a, Sang laisimbu bawlsak hi. Ham namtampi tawh labu bawl a, kam nam khat tawh Lai Siangtho thak (Tedim Lai Siangtho) letkhia hi. Pau nam tuamtuam tampi tawh Lai Siangtho thak sung mun tampi letkhia hi,” ci-in mipite mai-ah genkhia hi.

8. A Nuntakna Ni Hong Tumta: 1938 kum April kha pawlin Khanglam, Kawlgam gamgi neh tengah thuhilhsia phengvak pawlkhatte hangin thu nawngkaina tampi om ahih manin J.H.Cope leh Col. Burne-te tua thu vaan dingin va zinkhia uhhi. Hih a khualzin hunsung uh guahzu a, lampi haksa hi. Lampi ah guahthuak in kawt gawp uhhi. J.H.Cope in gilsan natna leh nattun natna hong ngah sawnsawn ahih manin sakol tung tuangin khualgamlapi panin hong ciah hi. Hakha myone Sulkhua a tun uh ciangin sakol tung tuangzo nawn lo aa, tua pan Rev. Sang Fen tai 50 val bang a gamla Haka khua ah thuko dingin a paisuak vingveng hi. Haka khua panin a hithei bangbang in siavuante tawh kithuah in va dawn kik uhhi. Cope topa gimluata ahih manin taal in kizawng aa Haka hong tun uhhi.Hih hun in Cope topa gim mahmah ta hi. Haka panin Tedim a om Cope tonu sikkhau sat uh aa, Cope tonu in sikkhau a ngahphet in vuandokpa Thomson tawh a zing ciangin hong delhpah uhhi. Falam gun lei a tun ciangun J.H. Cope June 11, 1938 ni 5:00 a.m. hunin Cope topa nuntakna nite hong tumta cihna thu lai ngah uhhi. Tua lai Cope tonu in a sim khit phetin thum ding, mau ding, kap ning ci lo-in, “Mi thum nasep a sem a gim theilo tawh a kibang mi khat nuntakna beita hi.” a cih khit ciangin Haka a om tapidaw-te’n limtak na vui un ci –in vaikha aa, Tedim ah nasep mabante sem dingin hong kileh kikpah vingveng hi. Haka biakinnpi gei Rev.A.E.Carson kivuina han kiangah June 12, 1938 ni-in kivui hi.Tua sihvuina mun ah Dr. Strait makai in tualai ah Strait in hibangin gen hi. “Pasian thuhilh sangmang khat hihna tawh Dr. Cope in Topa ading nasepna ah ama’ khangualte sangin kipia zozaw hi. Ahih hangin hih thupen ama thu a telmahmahte bek in phawk a, ama pumpi a kipiakna hangin bangmah kisuangtak ngeilo-in nungta hi. Ama ngaihsutna in a biak Pasian adingin zatkhiat ding leh ama pumpi mahmah kipumpiak ding ahi hi. Ama lawmte leh amah a theite in amah pen a tawntung in phawk a, mi pawlhuai mahmah, a migi mahmah leh a lungduai mahmah khat in ciamteh uh hi. A biak Topa’ nuntakna bangin amah in thuhoih sem dingin hong kipia hi” ci hi. Hibang in a missionary a seppihte in zong ama nasep zawhnate lamdangsa phialmawk uhhi.

9. Cope Topa Kivui Ni Kumpi Laan A Laizang ah Kikhai: Cope topa sihvui ni-in Haka khua ah Naylor mangpa in Dr.Cope zahtakna in Haka a kumpi zumte khempeuh khaksak a kumpi laante khempeuh zong (Half mast) laankhuam lang bekah khaisak in supna, dahna lianpite kilangh sak hi. Pasian’ nasem khat a sih manin kumpi-in a laante a laizang ciangah khai-in kumpi zumte kikhak a, dahna a kilat sak pen khamtung gamah a masapen leh amah bek hiding hi.

10. Cope tonu’ Kam Vaikhakna Hun: Cope tonu in a pasal tawh a sep mabante a sep khit ciangin a ciah ding hong kulta hi. Tonzang a Rev. Vial Nang vaikhak in July 18, 1938 ni-in Tedim Biakinnpi sungah hun nunungpen mangpha khakna biak kikhop bawl khawm uhhi. Sia Vial Nang thugen dingin kithawi a Cope tonu a ciah ding a ngaihsut ciangin dahin lunglen huailua mahmah ahih manin a khitui tak ngelhngel thapai in thu gen thei phalo hi. A nunung ciangin Cope tonu in thugen in a khitui luang ngelhngelh na pi’n a thugen themcik zong hoi lo-in hihbangin gen hi. “Kei a ciah dingin hong kisamta hi. Banghang hiam cih leh kei ka ciah kei leh Sangmang a thak hong pai lo ding hi. Tua ahih manin a manlang theithei in ka ciah ding kisam hi. Lungkham kei un, Topa’n hong kem ding hi” ci hi. Tonu leh pawlpi mite hun nunung kamvaikhakna a man ciangun Cope tonu pusuak in khuangzang mual (U Suan Khan Kham’te inn mai) ciang thu-ummite’n kha-in khut kilen in kap kawmkawm mahun lunglen khuangaihna tampi tawh mangpha kikhak uhhi.

11. Cope Topa Hong Zat Ni le khate: Cope topa khamtung gam hong tunzawh thum vei a khuan va ciah hi. Khamtung gam sung a om hun sung khempeuh Kum 25 leh kha 7 (Ni 9419) sawt hi. A khuan ciah hunteng ni 1345 sawt hi. America gam pan hong dinkhiat a kipan a sih dong kum 29 leh kha 7 sawt hi. Tua a khuanciah hun sungin zong tawlnga hithiat tuan lo in Lailet (Translator) nasepte semkawm veve hi.

12. Cope topa leh Tulai Zomite Dinmun: Cope topa hong pailo hizen leh Zomite tulai khuahun luanzia in hong taisan in mite nungah a om denkeei dingte ihi hi. Khua hun paizia manlanna tawh kizui in Mipilte in min tuamtuam na vawh uh aa, The age of Knowledge ci-in pilna hun ci-hi. Tuabangin min a kivawh zah khat in Zomite zong pilna kihanciam in siingdang eng lo, tanbang kim in a ki-om hita hi.

Tua bek tham lo in leitung khantohna tawh kizui in mindang khat kivawhna omlai aa The age of Globalization ci-in tua hun sungah khantohna tampi om in siatna lam zong tampi mah khang hi. Khantohna manlang mahmah in na hoih tampi a khantoh mahbang in siatnate zong tampi khangto hi. Tuabangin siatna leh phatna tampi khangto in Leitung a kalsuan laitak in a hoihte zuithei in siatnate i pelh theihna zong Cope topa hong vawh khaici hang hitazen hi. Zomite in khantohna delhtum in Kiim le paam ah siattheihna leh natna tuamtuamte in hong umcih ahihna thu kiphawk aa AIDS/HIV cihbangin a dam theilo natnate hong laang mahmah hangin Pasian thu in hong kem hi. Nupa sung, khualzinna, a tuamtuamte ah kikep siam ding kihanciam in Lai Siangtho tawh kituakin I nuntakna pen I ngah khak Cope topa khaici hang ahi hi.

Khantohna tawh kizui in mite khuaneu panin khuapi liante ah kizuan ngeingai ahih manin tuhun pen The age of Urbanization ci-in min vawhna zong na nei uhhi. Hitakpi hi. Khuano sung sangin khuapi sungah pilna, sumzonna, khantohna, thumuhnate omzaw ahih manin khuapi kizuan ngeingai himawk hi. Ahi thei zah in khuapi sung zuat ding kihanciam keei hi. Khuapi sung zuatna hangin midangte tawh pilna, neihna, khuamuhnate hong kikim theita ahih manin I hamphatna lianpi ahi hi.

Hih leitung pen Upna tuamtuam neite tenkhop ngeingaina leitung ahih manin mipilte in leitung min na vawh uh aa Pluralistic World na ci uhhi. Hilua hi. I kiim le paam ah Buddist-te, Hindu-te leh Pasian thu um lo mitampi tawh i teng khawm ngeingai hi. Amau upnate sung pan a hoihte laksak in ei Khristian-te upna I hawpsawn ding Cope topa hong nusiat khaici hoih khat ahi hi. Cope topa hong puak Pasian thu in ei Khristian-te bek lo in upna kibang lo midangte tawh zong hong kilem sak hi. Tua upna tuamtuam a neite tawh I tenkhopna hih leitungah Cope topa hong puak Pasian thu khahsuah lo-in ih nuntak pih ding leh tua thu manpha a san theih nading un eite tavuan lianpi khat hita leuleu hi.

Tuate banah I.T. (The age of Information & Technology) hun ci-in thu kizakna malang mahmah ahih manin leitung buppi nangawn khuatano khat (Global village) ciziau hi. Leimong khat a thupiang pen leimong khat pan a pianhun mah in kiza ziau hi. Ei Zomite zong muntuam gamtuam ah kithehthang in ih om hangin pianna Zogam sunga omkhawm mah tawh kibang lelmawk hi. Sun le zan, ut hunhun in thu kizakna I nei thei lel hi. Nidang in internet, email, Gtalk ci-in mite gengen I zakzak pen tu-in eite’n nuamtak in I zangh zihziah theita hi. Tuabangin muntuam gamtuam ah I omna panin khuano khat sunga tengkhawm bangin ih omna leh pumpi kigamlat hangin lungsim hong gawmtuah in khuatano khat sungah tengkhawm bangin hong gawmtuah Cope topa hizen hi.

13. Cope Centennial Jubilee Leh Zomite: Tedim mite bek hilo, Zogam bup adingin a nuntakna, a pilna hong kipiakna hangin Zomite hiciang dinmun a tung thei ih hihi. “Cope topate nupa hong pai lo hizenzen leh Zomite bangci dinmun ciang ah ih om lai zen tam?” A beisa hunin Cope Jubilee tawh kisai Tuiphum Pawlpite in 1985 kum in Rev. J.H. Cope Diamond Jubilee bawl uhhi.1999 kum ciangin Cope Diamond Jubilee mah kibawl kik khin hi. Tua hi-in Cope Centennial Jubilee zong Tuiphumte bek in bawl ding maw? Bawl zenzen lo ee, Cope topa pen Tuiphumte bek pia peuhmah loding hi hangh. Cope topa hong puak Lungdamna thu (Pasian thu), Cope topa hong phuat sak Zolai, Cope topa hong teisak Zolai Siangtho, Zo Labute pen Zomi buppi, Pasian thu a sang peuhmah leh Zolai a zangh khempeuh ii pawi ahih manin Zomi buppi ii khaam ding pawipi ahi hi. Tua Cope Centennial Jubilee bawl nading tawh kisai in a hunte hong toi mahmah ahih manin kum thum sung tha thak lakna ding thu bulphuh 3 kinei hi. Tuate Zomi bupin ki-apna, thungetna leh thuhilhnate ah zangh tek le’ng ih Zogam hong cidam in Zomite khantoh nading leh Zomite thupha ngahna hong suak taktak ding hi cihna tawh 2008 a dingin “Pasian aw, Na nasepna adingin hong siansuah in” (Joel 2:16-17), 2009 adingin “Pasian aw, acitak nasem dingin hong bawl in” (Late 40:11) cih leh 2010 adingin “Pasian’ zat Minam: Pasian aw, na deihna a tun nadingin vaang hong guan in.” (Pai.19:5-6; I Pet.2:9) cihte ahi hi. Hih thubulphuh thumte thungetna leh ih pawlpi tek ah thuhilhnate ah zang kiim tek le’ng ih Zogam leh Zomite adingin Pasian in a lamdang khat teitei hong pia takpi ding hi. Tua ahih manin 2010 ciang i khaam ding Cope Centennial pawipi pen Zomi bup Lungdamkoh Pawipi cihna zong himawk hi. Tua pawipi hangin Pasian in ih gam le lei, ih minam adingin damna leh thupha ngahna hong hisak pelmawh / hamtang ding hi.

Thu Khupna

Leitungah minam picing khat ih suak nadingin Lai kician neih ding kisam hi. Rev. Dr. Hre Kio genna ah “Leitung ah Kha thum hal in minam khatta manthang hi. Banghang hiam cih leh Lai a neihloh man uhhi” ci hi. Ih Kha a mangthang ding kimlai Cope topate nupa hangin Ih Kha bek tham lo-in ih minam mangthang lo hi. Kamdang khat in gen le’ng Zomite a mangthang lodingin hong khoipa leh hong khansuahpa pen Cope topa ahi hi. Tuabang Sangmang ih ngahkhak manin zong ih hamphatna lianpi khat ahi hi. Zogam ah Cope topa nasepnate ih ngaihsut ciangin lamdang liang hi. Pasian in Zomite adingin a tuam vilvel a hong piak Sangmangpa ahi hi. Tua ahih manin Cope Centennial Jubilee bawl dingin ih kithawi laitak in Pawlpi lungsim, beh lungsim, nam lungsimte panin minam lungsim ah kalsuan to-in 2010 November 4 -7 ni sungteng sim le maal, sak le khang, gam sung gam pua leh tui lu tuitaw pan kikaikhawm henhan in Kum 100 pawipi Tedim khuapi ah a muak khawmtek dingin hanciam ni.

[Courtesy: Cope 98 Celebration, Tedim, November 2008]

Rev. Dr. Joseph Herbert Cope (1882 - 1938)

2009-03-01T06:42:00.000-08:00

Cope topa’ Thu Tomlahna

By Sia Gin Hau Pum

- 1882 kum November 21 ni suak.
- 1899 kum in Tui kiphum.
- 1904 kum in Pennsylvania University pan B.Sc. Degree ngah
- 1908 kumin Rochester Theological Seminarypan B.D Degree ngah.
- 1908 July 7 ni Ordination kipia.
- 1908 Sept. 3 ni Elizabeth Coldwel Smith tawh kiteng
- Tapa 3 nei in; Joseph Howard Cope, Harry Cope leh Appleton Danforth Cope te ahi hi.
- 1908 December 21 ni Hakha tung.
- 1910 November 1 ni Tedim hong tung.
- 1913 kumin Zolai Simbu khatna bawl.
- 1915 kumin Matthew Lai Siangtho Zolai-in manzo.
- 1919 kumin Tedim Thukizakna Laihawm pankhia.
- 1925 kum Honorary Inspector of Schools sem.
- 1932 kumin Lai Siangtho Thak Zolai-in Neihpih.
- Pasian thu gen, Zolai bawlsak, Lai Siangtho teisak, labu teisak, Sang laisim bu bawlsak, Sanguk Mangpi sem.
- 1927 November in Mikang kumpi in Kaisar I Hind kici Ngun Medel khat pahtawina pia.
- 1935 June 10 ni-in Colgate University in Honorary Degree of Doctor of Divinity (D.D.) pia.
- 1938 June 11 ni Hakha ah si.
- Khamtung gam sung a om hun khempeuh, Kum 25 leh Kha 7 (ni 9419) sawt.

(Cope 98 Celebration sunga Cope topa’ thu Tomlahna pan hi.)

I Have A Dream

2009-01-19T19:58:00.000-08:00

By Martin Luther King Jr.

I am happy to join with you today in what will go down in history as the greatest demonstration for freedom in the history of our nation.

Five score years ago, a great American, in whose symbolic shadow we stand today, signed the Emancipation Proclamation. This momentous decree came as a great beacon light of hope to millions of Negro slaves who had been seared in the flames of withering injustice. It came as a joyous daybreak to end the long night of their captivity.

But one hundred years later, the Negro still is not free. One hundred years later, the life of the Negro is still sadly crippled by the manacles of segregation and the chains of discrimination. One hundred years later, the Negro lives on a lonely island of poverty in the midst of a vast ocean of material prosperity. One hundred years later, the Negro is still languishing in the corners of American society and finds himself an exile in his own land. So we have come here today to dramatize a shameful condition.

In a sense we have come to our nation's capital to cash a check. When the architects of our republic wrote the magnificent words of the Constitution and the Declaration of Independence, they were signing a promissory note to which every American was to fall heir. This note was a promise that all men, yes, black men as well as white men, would be guaranteed the unalienable rights of life, liberty, and the pursuit of happiness.

It is obvious today that America has defaulted on this promissory note insofar as her citizens of color are concerned. Instead of honoring this sacred obligation, America has given the Negro people a bad check, a check which has come back marked "insufficient funds." But we refuse to believe that the bank of justice is bankrupt. We refuse to believe that there are insufficient funds in the great vaults of opportunity of this nation. So we have come to cash this check — a check that will give us upon demand the riches of freedom and the security of justice. We have also come to this hallowed spot to remind America of the fierce urgency of now. This is no time to engage in the luxury of cooling off or to take the tranquilizing drug of gradualism. Now is the time to make real the promises of democracy. Now is the time to rise from the dark and desolate valley of segregation to the sunlit path of racial justice. Now is the time to lift our nation from the quick sands of racial injustice to the solid rock of brotherhood. Now is the time to make justice a reality for all of God's children.

It would be fatal for the nation to overlook the urgency of the moment. This sweltering summer of the Negro's legitimate discontent will not pass until there is an invigorating autumn of freedom and equality. Nineteen sixty-three is not an end, but a beginning. Those who hope that the Negro needed to blow off steam and will now be content will have a rude awakening if the nation returns to business as usual. There will be neither rest nor tranquility in America until the Negro is granted his citizenship rights. The whirlwinds of revolt will continue to shake the foundations of our nation until the bright day of justice emerges.

But there is something that I must say to my people who stand on the warm threshold which leads into the palace of justice. In the process of gaining our rightful place we must not be guilty of wrongful deeds. Let us not seek to satisfy our thirst for freedom by drinking from the cup of bitterness and hatred.

We must forever conduct our struggle on the high plane of dignity and discipline. We must not allow our creative protest to degenerate into physical violence. Again and again we must rise to the majestic heights of meeting physical force with soul force. The marvelous new militancy which has engulfed the Negro community must not lead us to a distrust of all white people, for many of our white brothers, as evidenced by their presence here today, have come to realize that their destiny is tied up with our destiny. They have come to realize that their freedom is inextricably bound to our freedom. We cannot walk alone.

As we walk, we must make the pledge that we shall always march ahead. We cannot turn back. There are those who are asking the devotees of civil rights, "When will you be satisfied?" We can never be satisfied as long as the Negro is the victim of the unspeakable horrors of police brutality. We can never be satisfied, as long as our bodies, heavy with the fatigue of travel, cannot gain lodging in the motels of the highways and the hotels of the cities. We cannot be satisfied as long as the Negro's basic mobility is from a smaller ghetto to a larger one. We can never be satisfied as long as our children are stripped of their selfhood and robbed of their dignity by signs stating "For Whites Only". We cannot be satisfied as long as a Negro in Mississippi cannot vote and a Negro in New York believes he has nothing for which to vote. No, no, we are not satisfied, and we will not be satisfied until justice rolls down like waters and righteousness like a mighty stream.

I am not unmindful that some of you have come here out of great trials and tribulations. Some of you have come fresh from narrow jail cells. Some of you have come from areas where your quest for freedom left you battered by the storms of persecution and staggered by the winds of police brutality. You have been the veterans of creative suffering. Continue to work with the faith that unearned suffering is redemptive.

Go back to Mississippi, go back to Alabama, go back to South Carolina, go back to Georgia, go back to Louisiana, go back to the slums and ghettos of our northern cities, knowing that somehow this situation can and will be changed. Let us not wallow in the valley of despair.
I say to you today, my friends, so even though we face the difficulties of today and tomorrow, I still have a dream. It is a dream deeply rooted in the American dream.

I have a dream that one day this nation will rise up and live out the true meaning of its creed: "We hold these truths to be self-evident: that all men are created equal."

I have a dream that one day on the red hills of Georgia the sons of former slaves and the sons of former slave owners will be able to sit down together at the table of brotherhood.

I have a dream that one day even the state of Mississippi, a state sweltering with the heat of injustice, sweltering with the heat of oppression, will be transformed into an oasis of freedom and justice.

I have a dream that my four little children will one day live in a nation where they will not be judged by the color of their skin but by the content of their character.

I have a dream today.

I have a dream that one day, down in Alabama, with its vicious racists, with its governor having his lips dripping with the words of interposition and nullification; one day right there in Alabama, little black boys and black girls will be able to join hands with little white boys and white girls as sisters and brothers.

I have a dream today.

I have a dream that one day every valley shall be exalted, every hill and mountain shall be made low, the rough places will be made plain, and the crooked places will be made straight, and the glory of the Lord shall be revealed, and all flesh shall see it together.

This is our hope. This is the faith that I go back to the South with. With this faith we will be able to hew out of the mountain of despair a stone of hope. With this faith we will be able to transform the jangling discords of our nation into a beautiful symphony of brotherhood. With this faith we will be able to work together, to pray together, to struggle together, to go to jail together, to stand up for freedom together, knowing that we will be free one day.

This will be the day when all of God's children will be able to sing with a new meaning, "My country, 'tis of thee, sweet land of liberty, of thee I sing. Land where my fathers died, land of the pilgrim's pride, from every mountainside, let freedom ring."

And if America is to be a great nation this must become true. So let freedom ring from the prodigious hilltops of New Hampshire. Let freedom ring from the mighty mountains of New York. Let freedom ring from the heightening Alleghenies of Pennsylvania!

Let freedom ring from the snowcapped Rockies of Colorado!

Let freedom ring from the curvaceous slopes of California!

But not only that; let freedom ring from Stone Mountain of Georgia!

Let freedom ring from Lookout Mountain of Tennessee!

Let freedom ring from every hill and molehill of Mississippi. From every mountainside, let freedom ring.

And when this happens, when we allow freedom to ring, when we let it ring from every village and every hamlet, from every state and every city, we will be able to speed up that day when all of God's children, black men and white men, Jews and Gentiles, Protestants and Catholics, will be able to join hands and sing in the words of the old Negro spiritual, "Free at last! free at last! thank God Almighty, we are free at last!" [August 28, 1963]

CHANGE HAS COME

2009-01-18T16:55:00.000-08:00

November 4, 2008, USA: Democrat Barack Obama has become the first African-American to win the White House. Here are his remarks to a huge crowd in his home city of Chicago:

If there is anyone out there who still doubts that America is a place where all things are possible; who still wonders if the dream of our founders is alive in our time; who still questions the power of our democracy, tonight is your answer.

It's the answer told by lines that stretched around schools and churches in numbers this nation has never seen; by people who waited three hours and four hours, many for the very first time in their lives, because they believed that this time must be different; that their voices could be that difference.

It's the answer spoken by young and old, rich and poor, Democrat and Republican, black, white, Hispanic, Asian, Native American, gay, straight, disabled and not disabled - Americans who sent a message to the world that we have never been just a collection of individuals or a collection of Red States and Blue States: we are, and always will be, the United States of America.

It's the answer that led those who have been told for so long by so many to be cynical, and fearful, and doubtful of what we can achieve to put their hands on the arc of history and bend it once more toward the hope of a better day.

It's been a long time coming, but tonight, because of what we did on this day, in this election, at this defining moment, change has come to America.

PARTNERS IN THE JOURNEY

A little bit earlier this evening I received an extraordinarily gracious call from Senator McCain. He fought long and hard in this campaign, and he's fought even longer and harder for the country he loves. He has endured sacrifices for America that most of us cannot begin to imagine. We are better off for the service rendered by this brave and selfless leader.

I congratulate him, I congratulate Governor Palin, for all they have achieved, and I look forward to working with them to renew this nation's promise in the months ahead.

I want to thank my partner in this journey, a man who campaigned from his heart and spoke for the men and women he grew up with on the streets of Scranton and rode with on that train home to Delaware, the vice-president-elect of the United States, Joe Biden.

And I would not be standing here tonight without the unyielding support of my best friend for the last 16 years, the rock of our family, the love of my life, the nation's next first lady, Michelle Obama. Sasha and Malia, I love you both more than you can imagine, and you have earned the new puppy that's coming with us to the White House.

And while she's no longer with us, I know my grandmother is watching, along with the family that made me who I am. I miss them tonight, and know that my debt to them is beyond measure. To my sister Maya, my sister Auma, all my other brothers and sisters - thank you so much for all the support you have given me. I am grateful to them.

To my campaign manager David Plouffe, the unsung hero of this campaign, who built the best political campaign in the history of the United States of America. My chief strategist David Axelrod, who has been a partner with me every step of the way, and to the best campaign team ever assembled in the history of politics - you made this happen, and I am forever grateful for what you've sacrificed to get it done.

VICTORY FOR THE PEOPLE

But above all, I will never forget who this victory truly belongs to - it belongs to you.

I was never the likeliest candidate for this office. We didn't start with much money or many endorsements. Our campaign was not hatched in the halls of Washington - it began in the backyards of Des Moines and the living rooms of Concord and the front porches of Charleston.

It was built by working men and women who dug into what little savings they had to give $5 and $10 and $20 to the cause.

It grew strength from the young people who rejected the myth of their generation's apathy; who left their homes and their families for jobs that offered little pay and less sleep; it grew strength from the not-so-young people who braved the bitter cold and scorching heat to knock on the doors of perfect strangers; from the millions of Americans who volunteered, and organised, and proved that more than two centuries later, a government of the people, by the people and for the people has not perished from the Earth.

This is your victory.

THE TASK AHEAD

I know you didn't do this just to win an election and I know you didn't do it for me. You did it because you understand the enormity of the task that lies ahead. For even as we celebrate tonight, we know the challenges that tomorrow will bring are the greatest of our lifetime - two wars, a planet in peril, the worst financial crisis in a century.

Even as we stand here tonight, we know there are brave Americans waking up in the deserts of Iraq and the mountains of Afghanistan to risk their lives for us.

There are mothers and fathers who will lie awake after their children fall asleep and wonder how they'll make the mortgage, or pay their doctor's bills, or save enough for their child's college education. There is new energy to harness and new jobs to be created; new schools to build and threats to meet and alliances to repair.

REMAKING THE NATION

The road ahead will be long. Our climb will be steep. We may not get there in one year or even in one term, but America - I have never been more hopeful than I am tonight that we will get there. I promise you - we as a people will get there.

There will be setbacks and false starts. There are many who won't agree with every decision or policy I make as president, and we know that government can't solve every problem. But I will always be honest with you about the challenges we face. I will listen to you, especially when we disagree.

And above all, I will ask you to join in the work of remaking this nation the only way it's been done in America for 221 years - block by block, brick by brick, calloused hand by calloused hand.
ONE NATION, ONE PEOPLE

What began 21 months ago in the depths of winter cannot end on this autumn night. This victory alone is not the change we seek - it is only the chance for us to make that change. And that cannot happen if we go back to the way things were. It cannot happen without you, without a new spirit of service, a new spirit of sacrifice.

So let us summon a new spirit of patriotism; of service and responsibility where each of us resolves to pitch in and work harder and look after not only ourselves, but each other. Let us remember that if this financial crisis taught us anything, it's that we cannot have a thriving Wall Street while Main Street suffers - in this country, we rise or fall as one nation; as one people.

Let us resist the temptation to fall back on the same partisanship and pettiness and immaturity that has poisoned our politics for so long. Let us remember that it was a man from this state who first carried the banner of the Republican Party to the White House - a party founded on the values of self-reliance, individual liberty, and national unity.

Those are values that we all share, and while the Democratic Party has won a great victory tonight, we do so with a measure of humility and determination to heal the divides that have held back our progress. As Lincoln said to a nation far more divided than ours: "We are not enemies, but friends… though passion may have strained it must not break our bonds of affection."

And to those Americans whose support I have yet to earn - I may not have won your vote tonight, but I hear your voices, I need your help, and I will be your president too.

AMERICA IN THE WORLD

And to all those watching tonight from beyond our shores, from parliaments and palaces to those who are huddled around radios in the forgotten corners of the world - our stories are singular, but our destiny is shared, and a new dawn of American leadership is at hand.

To those who would tear the world down - we will defeat you. To those who seek peace and security - we support you.

And to all those who have wondered if America's beacon still burns as bright - tonight we proved once more that the true strength of our nation comes not from the might of our arms or the scale of our wealth, but from the enduring power of our ideals: democracy, liberty, opportunity and unyielding hope.

For that is the true genius of America - that America can change. Our union can be perfected. And what we have already achieved gives us hope for what we can and must achieve tomorrow.

A HISTORY OF STRUGGLE

This election had many firsts and many stories that will be told for generations. But one that's on my mind tonight is about a woman who cast her ballot in Atlanta. She's a lot like the millions of others who stood in line to make their voice heard in this election except for one thing - Ann Nixon Cooper is 106 years old.

She was born just a generation past slavery; a time when there were no cars on the road or planes in the sky; when someone like her couldn't vote for two reasons - because she was a woman and because of the colour of her skin.

And tonight, I think about all that she's seen throughout her century in America - the heartache and the hope; the struggle and the progress; the times we were told that we can't, and the people who pressed on with that American creed: Yes, we can.

At a time when women's voices were silenced and their hopes dismissed, she lived to see them stand up and speak out and reach for the ballot. Yes, we can.

When there was despair in the dust bowl and depression across the land, she saw a nation conquer fear itself with a New Deal, new jobs and a new sense of common purpose. Yes, we can.

When the bombs fell on our harbour and tyranny threatened the world, she was there to witness a generation rise to greatness and a democracy was saved. Yes, we can.

She was there for the buses in Montgomery, the hoses in Birmingham, a bridge in Selma, and a preacher from Atlanta who told a people that "we shall overcome". Yes, we can.

A man touched down on the Moon, a wall came down in Berlin, a world was connected by our own science and imagination. And this year, in this election, she touched her finger to a screen, and cast her vote, because after 106 years in America, through the best of times and the darkest of hours, she knows how America can change. Yes, we can.

THIS IS OUR MOMENT

America, we have come so far. We have seen so much. But there is so much more to do. So tonight, let us ask ourselves - if our children should live to see the next century; if my daughters should be so lucky to live as long as Ann Nixon Cooper, what change will they see? What progress will we have made?

This is our chance to answer that call. This is our moment.

This is our time - to put our people back to work and open doors of opportunity for our kids; to restore prosperity and promote the cause of peace; to reclaim the American dream and reaffirm that fundamental truth - that out of many, we are one; that while we breathe, we hope, and where we are met with cynicism and doubt, and those who tell us that we can't, we will respond with that timeless creed that sums up the spirit of a people: yes, we can.

Thank you, God bless you, and may God bless the United States of America.