Kumthak ah Ngaihsutna thak tawh i kalsuan diam?:

Kumthak hong mu sak Topa min phat in na khut taklam kong len uh hi. 'Uh hi' hi nai kei ei, ka at khialh hi, 'hi' bek ding hi phot ei. Sorry.

Kumthak ah ngaihsutna thak tawh kalsuan dingin hanciam kik leng, kumluia i kalsuanna te maban zomto in kumthak ah kalsangzaw suan in mabung dih ni. Bang teng tawh kalsuan kipan ding ihi hiam? A tuamtuam ngaihsutna leh deihna, hanciamna om tham inteh, pawlkhat kikum leng ahi thei tam:

1. Pilna sinna ah kalkhat behlap ding hi: Tu ciangciang ah pilna sinna pen eima gampua kan in kihanciam nailo hi. Eima tenna gamsungah zong i kisap zah pilna kingah thei ahih man hi thei kha inteh. Vanzat kicingzaw gamte lunggulhna om nailo hi kha ding hi. Tu kumthak ah gamdang zong pilna zonna dingin i ngaihsut, i hanciam dingin hoihsa ing. Degree course sangin professional course lam uang bawl saan leeng cih ngaihsun ing.

2. Rellu mu leh mulo: Dr. G. Buhril in Guwahati ah a sep laiin Shillong hong zinciang Lenlai Magzine hong pua zel a, ka sim nainai zel uh hi. Lenlai Magazine ah a tuang tawntung khat pen - Rellu mu leh mulo (Meileng tuang leh tuang ngeilo cihna, Galkap leh Palik cihnopna hi) kinialsak den hi. Galkapte in palikte "No meileng tuang kha ngeilo" ciin ko uh a, Palikte in galkapte inzong dawng kik in, kuamah ki thusimlo tuak uh hi. Khualzin leh zin lo, khuamu leh mulo genna hi. Khualzin khia in mi gam mi lei zong muhpih ding, pilna behlap ding acihna hi.

Tua lungsim pua in, tu kumthak ah gamdang zin leh zin lo, foreign pai leh pailo cih bangin (kei pai ing cihna hilo) i sangnaupangte, khangnote pattah leeng, tawsawn in hilh leng bang aci tam (gamdang ah sangkah dingin ki pattah ta ding). Delhi khawngah Education Fair gamdang University te in a neih ciang Zomite zong limtak in thupi sim leng, gamdang pai theihna chance tampi om hi cih phawk kik leng cih ka deihna hi.

3. I nek leh dawn khek ngai: Ci kik ni. Mi khat in anne dingin hong sam a, sa hong meh pih lo hi. Ka ngaihsut kik ciang sa pen ann hoihpen hilo hi cih ka phawk hi. Mi ann i nek pih leh zong ama pumpi cidamna dingin an hoih nek pih in, anpha nekpih leeng cih ka ngaihsun hi. A lim a al bek hilo in, anhoih thupi bawl leng cih ngaihsun ing. Sa meh, zasan thak meh, a gilkhatui cihte pawl khat veivei a zing a thai lam ciang nawngkai thei ahih manin tua ding mi i deih sakkhat in a thuak loh ding khualsak leeng!

4. Christmas ciang zanhah nawn loh ding ki hanthawn leeng: Naupang Nipisang ah ka kahlaiin ka siapa in Christmas ciangin 'naupangte masi ciang zanhak ciat ding' ciin hong pulak hi. 'Aw' ciin khut kibenga, ki awng zuaizuai in lungdam in ka kiko zel uh hi. Christmas hong tun ciang 'zan hakte nek ding' - sa taangciim, buhman gaanhul, niangtui leh moh, aksa ciim,etc. cih bangin zanhah cianga hih ding program i guan pen ki hanthawn nawn kei leng a hoih tam. A hak nuam a om leh kikham theih bel hi kei, zanhak dingin kihanthawn tangtang kei leng.

5. Hun kikhek kihilh zom leng: Zomi te tenna leitung pen hong kikhek takpi ahih manin hih hun kikhel, khangthak hun akici ziauziau pen hun kikhek hi a, hih pen pawlpi makaite in pawlpi sungah kihilh zom leng. Lokho economy pan sum leh pai economy ah kilutto ahih manin hih hun kikhek a theisiam dingin Zogam kiutawng pen a om in zong a theihsiamna ding in a theite in i mite hilh zom to zeel lai leeng. Sum in no a keuh kei leh sum hilo a, hun kikhel ah i kalsuan siam pah kei leh i nungdelh kisam kha ding hi.

Gal aih ding om nawnlo, sa aih ding om nawnlo, tua bang hun in hong khengta a, pilna ki aita, hauhna ki aita, siamna ki ai hizaw ta a, tuate in min lian, min thupi hong phuak ding uh hita hi. Hih hun kikhel ah thauka sangin laikung ki thupi simzaw hi cih kihilh hilh tawpsan tuan kei leng. Khanglui hun ah naungek a pianciang temtawng kilensak hi, galman sa man hi ding deihna, thahat in gualzo ding deihna hi, tu lai ciang laikung kilensak masa pen ta hi. [ZONET sim tengin tua i theih hang singtang dawna i sanggamte in theikim nailo maithei hi]

6. Gamvak, sa kap khawlsan ta leeng: A khawlsan tampi omta ni. Ahi zongin gamhoih nei lai, sa tamna gam ah sa kap pen thupi kisa a, nupi khat in 'ken pasal khempeuh sakhi man ding sa' a cih te hun kipelta hi. Sa kapkap, sisan tawh nekzong te hau taktak ngeilo kici hi. Tua manin i gamsunga sa omte hong nawngkaisak ahih kei buang leh cidam lungnuam in omsak in ihmu sak ni. Phawngphawng, delhdelh, thatthat nawn kei ni. Zogam kilawmna amau om hang hi.

Tua mah bangin i gamsunga sing hoih leh pak hoihte la in mi gamah zuak kei ni. Nature pen it in zuun zaw ni.

7. Muanhuai ni: Gamdanga pai a zin khia pawlkhat a nei, a nuamsa a om tei hangin a ne ciamciam mah om veve i hih manin kipanpih ki huai lailai leeng thupi sa ing. I nek muhna ding sepna ah kuhkal in i tungsiahte itna ngahna dingin zong muanhuai ni. Ei zong a tunglam pan vaihawm i hih ciang i nasem te muanhuai leh ki itsemsem ding in ka um hi. Tua mitsuang gige ni. A nuailam sang a tunglam tawldam zaw, meetzaw, lungnuam zaw tham ding in ka um hi.

Gen khialh sak khialh a om leh kimaisak ni.

Itna tawh,

Hau Za Cin
Phuitong Liim