"Rev. Dr. JM PAUPU & LUCY DIMNU CRUSADE & SEMINAR" by Rev. Job Nang Khaw Thawng
Zomi sung pan Laibu tam bawl pen in a kiciamteh Sia Rev. Job Nang Khaw Thawng (Sia Thawngno ciin a kitheizaw) in a kaihkhop, a bu in hong hawmkhiat hih laibu thak sungah Innkuan thu pan kipan minam thu, khangno tawh kisai, Pasian gam zaina ding nasepna (missions) leh sepkhawm diamdiam ding a kisapna thu dongin a tuamtuam kihel hi. Kum 2007 sunga laibu kibawl khempeuh pan kammal khat nangawn paih ding a omlo, sim teitei dinga hoih, a tom in, mikangpau kawm bualbual leeng - "Book of the Year 2007" dingin ka thukimpih hi; "Kum 2007 Sunga Laibu Hoih Pen"!
I theihsa mah bangin Sia JM Paupu ciin zong a kitheizaw Sia Rev. Dr. JM Ngul Khan Pau pen India gama Tuiphum kipawlna lianpen ah a lianpen ahih ban ah, India gam om Zomi sung pan Pasian mizat pen hi cileng kikhiallo ding hi (kuamah tawh kidem sakna hilo in). Tua hi a Zomi sung pan laibu bawl tampen pa in a lungkimzah a bawl laibu pen sim taak mahmah ding cih theihsa hi, laibu sim ut taktakte adingin.
Siapa pen India gama khuata, inn 100 zong a pha nailo, ahi zonga Pasian nasem mimal 30 val leh Doctor, Teacher, etc a khanna khua Murlen, Mizogam pan a piang, Lamka Pangzawl pan khangkhia ahi hi. A pian ni in a pa in, "Topa aw, a nuntakna nong hawisak leh nangma nasem dingin kong ap hi" ciin a ap hi. A pa, Upa Thuam Za Gin pen Murlen khua Christian sung pan Upa a kipia masa pen hi. Siapa in Lamka pan BA distinction tawh a zawh ciang UBS, Pune, India pan Bachelor of Divinity (B.D.) zo a, St. George College, Isreal pan Zeisu suahna, khanna leh a nasepna te sin in summer course kah a Jordan tui, Si tuipi tui, Galile tui cihte hong pua in...... , tua zawh ciangin Portland, USA pan gammial nasepna lam (missions) tawh kisai sin in, D.Miss. hong zo in, tu in Council of Baptist Churches in North East India (CBCNEI) ah General Secretary term 2 (4 x 2 = 8 years) a sepna hita hi.
A zi, Sianu Lucy Dimnu pen Priscilla Centre kici numeite laptohna ding nasepna a phuankhia nu hi a, tua lai ah Director a sep laitak hi. A nungak tung pan Pasian ading kipia ahih mah bangin khasum tampi san theihna ding nasep zong ngah hi napi tuate nusia in Pasian in a muhkholhsak numeite laptoh nasep hong kipan a, numei 10 tawh a kipat tuni in office neiin, nasem zong nei a, gamsung leh gampua ah hih mizawng numeite khutsuak zuak khia theita uh hi. A kicingtakin hih laibu ah a nasep dan uh leh Pasian in a makaih dan uh kimu thei hi. A laibu pan na sim lecin.
Laibu bawlpa Sia Thawngno in laisim te etnop dingin thulu guan in gualsuk diudeu a, Topa in A lam inn, Tangban kikhung inn, Minam taimang, ..... cih bangin. Tua sungah Zomi bup in i sim dinga hoih kasak khat om a 'MINAM LIAN LUNGTANG' a cih thulu pen hi. Laimai 214-229 kikal ah hih Minam Lian Lungtang cih kikoih a, Zomi te in minam lian lungtang i pua hiam cih i ki etna ding in sim ciat dingin hoih kasa mahmah hi.
Laibu bawlpa in, "Zomi te gamh luah ding lak ah a luah taaklo tam peuhmah veh aw.." ci hi.
Ahi zongin hih laibu pen Zomi te adingin 'gamh' cing a, innkuan kikhopna khawngah sim a nuntakpih pah dingin hoih hi. Mimal gamh, innkuan gamh, minam gamh a cing laibu khat hilo hiam ciin ka ngaihsun hi. Nang tua bangin na mu diam a bul pan a tawp tan na sim suak phot peuhmah dih ve le!
[End Note: Kei zong hih laibu bu khat laibu bawlpa in Champhai ZBC Silver Jubilee ah hong pia a, Kawl pan copy 5 bekbek hong puahtoh lak pan khat ka tankhak ahih manin ka it mahmah a, hampha zong ka kisa hi. Singapore ka zin ciangin Pu Hang Khan Lian kiangah ka etsak leh amah tawh a sim masa ding ka kituh phial uh hi. Ahi zongin aman laibu sim dang khat neilai ahih manin kei hong nolh kik a, ken ka sim masa hi. Kawlgam, India gam leh gamdang zong a tung khin dingin lamen ing.]
Lei, Sim, Nuntakpih. "Reader makes leader" (Laisimsim te makai suak ding hi).
Hau Za Cin
Phuitong Liim
