Thursday, May 15, 2008

'PIANTIT PAI'

Thu Masa

England leh Germany kikal ah kidona hong om ciangin amau lam a panpih tuak gam tengin huh ahih manin leitungbup kidona hong suak hi. Tua pen Galpi Masa (World War I) kici hi. England kumpi in amau gamke khempeuh pan nasem ding mi kaikhawm a, Labour Corps ciin minvawh hi. Zogam pan zong mi 1000 na sam uh a, galphual ah nasem in bawngtu leh leiluakna tawh nisim hun na zang uh hi. Tuate hong ciahkik uh ciangin 'Piantit Pai' (France Pai) ciin kiciamteh hi. May 27, 1917 ni Tedim pan ding khia uh a, Calcutta, Bombay tawnin Suez Canal paisuak in France leh Belgium gamgi tung uh hi. Kum 1 leh kha 6 sung nasem in galveng kuan ban ah ciah utlua uh ahih manin nasem hoih minphatna tawh hong ciah uh a, August 1918 in Tedim tungkik uh hi. Gal sungah mi 23 in sihna tuak a Tedim tungkik nawnlo uh hi. Tuipi tungah sun 40 leh zan 40 bang pai uh hi. Lamdang a sak pawlkhat uh pen Piantit nungak limci te phei ngo kiuhkeuh khawng, London a Kumpinu galvengte mukmul sau khawng, tuipi sungpan Ni sialpi cia a suak sialpi cia a tum kik khawng, tuihual lianpipi thaupi tawh a kap khapzel khawng uh hihtuak hi.


Khasiathuai Kikhakna

Piantit pai ding a kigen ciang kuamah utlo, gam huatan ah pai leng ciahkik ding maw ciahkik lo ding cih kitello ahih manin kuamah pai nuamlo uh hi. Ahi zongin mikang kumpi in zawhthawhthu tawh a sawl teitei ciangin pailoh phamawh a, 'hong ciahkik kei leh zong phamawh kei' cih bang phial in kihemna, kigawtna bang pianin kisawl phial uh hihtuak hi. Kha 3 sung nasep kisinsak a, a pai ding uh ciang a kimu kik nawnlo ding bangin kikah, kikha uh a, misi vui mahmah bang uh hi kici hi. Tua pen Tedim bek ah hilo in Lushai Hills pan pai ding Aizawl ah kikhakna zong tuabang mah hihtuak hi. Nungak leh tangval kingaite bang kimu kik nawnlo ding bangin kingaihsun uh ahih manin puanza, tau, khibah kipia in khitui naptui tawh mi lakah maizum cih zong om zo nawnlo in kikah baba mai uh hih tuak hi. Bangtan sawt ding, bangciang kimu kik ding kigen theilo ahih manin lungzin huai mahmah ding hi. Lungleng a kapkap tam hi kici a, pawlkhat bang nasem zolo in om gawp uh hihtuak hi. Lawmngaihte nangawn a kitheisak lo, a kisel, a kilanglo pena nungak tangval kingaih hun ah kuamah zahtak zo nawnlo a lia leh taang kikah ding cih pen a langkhat pan ngaihsun leng a khasiathuai takpi ding hi mawk hi. A mulkim huai phial hihtuak takpi hi.


A Kieng Vaitunna

Ahi zongin hong ciahkik uh ciang sum leh van tawh hong tung uh a, zatep zialsa hong tep uh, namtui perfume hong kikap uh ciang a pai khalote bangin engkik zezen hihtuak hi. Zomi ten leitung thu kithei nailo cih kician a, 'Gunkhawm khanglamah khua omlai kici veh aw,' cih hun hipeuhmah cihna hi. Tuni in en gam thu i theih khit ciang a nuihzathuai a bat hang amau adingin luvaih huai mahmah ding hi. Bangbang hileh 'Piantit Pai' pen Zomi te khua muhna hong kipatna ding na hileltak hi.


Lam Paina

A paidan uh hih bangin kiciamteh hi.

1917 May 27: Zingsang nai 10:00 Tedim panin Dimlo ah giak.

1917 May 28: Dimlo panin Thangpi ah giak.

1917 May 30: Tulsuk panin Kawlpi ah giak.

1917 May 31: Kawlpi panin Gun khawm tung, Gun khawm panin tum theih a tuamtuam tawh na muak uh.

1917 June 1: Gunkhawm panin Tembaw tawh Myanyan zan thum.

1917 June 8: Yangon tung. Sia Potha in zing an nekpihin France pai ding teng zatep bu nih, Khakhi puan-ak khat tek, pheituam khat, puan-ak tungsilh khat, mainul khat leh sunsiah phel khat tek pia uh hi.

1917 June 9: Zogam panin a kikhasukte tawh mangpha kikhakin, Yangon pan Tembaw tawh ding khia.

1917 June 13: Nitak nai 5:00 in India Khuapi Culcutta tung, Keizangte Khoi Gin a kamsung meima-in Zato pan si. A luang mei tawh hal ding deihlo uh a hih manin Vung Za Kham maikai-in Khuapi pan tai 15 a ki gamlatna-ah vui uh hi.

1917 June 24: Nitak nai 5:00 Culcutta pan Meileng tawh Bombay pai.

1917 June 28: Nitak nai 6:00 in Bombay tung, Zato ah ki ensak uh, khuavot thuakzolo mi 15 ciahsak uh hi.

1917 June 29: Nitak nai 3:00 in Tembaw taw Bombay pan Arabian Sea tuipi tungah ni 13 sung pai uh.

1917 July 14: Nitak nai 5:00 in Eden Huan tung uh, Innsung lutpah theilo, nitak nai 7:00 ciang lut thei pan.

1917 July 17: Eden pan Tembaw tawh ni 4 sung pai, Izipt gam Suez canal zuan uh hi.

1917 July 21: Suez tung uh a, sehnelgam mu in lamdang sa uh hi. Suez canal pen England vanleng phualpi hi a, a galvanlengte uh muhnop sa mahmah uh hi.

1917 July 26: Nitak nai 6:00 in Suez Khuapi panin Meileng tawh pai uh.

1917 July 27: Zingsang nai 8:00 in Egypt gam Alexandria khuapi tung. Nitak lamin Tembaw tawh paisuakin Italy gam Taranto khuapi tung uh hi. Tua mun pen nisat mahmah na mun hi a, amau suantawm singkung bek po hi. Sing hamsa mahmah hi. Tui nisa-ah lumsak masa-in tua khit ciangin meitungah suang pan uh hi. Sing kung tungah Toktol tam mahmah ahih manin Toktol khua ci-in ciamteh uh hi.

1917 August 6: Taranto khua panin meileng tawh ni 8 sung pai-in Moh leh Niangtui bekbek tawh kivakin nuamsa mahmah uh hi.

1917 August 14: Franch Khuapi Marseilles tung. Khasum Rs.50.00; Oversea Allowvance Rs.100.00 pia uh.

1917 August 24: Marseilles khua panin meileng tawh ding khia kikin England leh Germany te kikapna mun 'Boot Camp' August 27 ni-in tung uh hi. Tua ah nasem kipan uh a, a maban khempeuh uh thanuam tak, zawhthawh takin sem uh a, pahtak ngah mahmah uh hi. Tua manin deihsakna tangin London pai ding nangawn na phalsak uh hi.


London paina

Nasep thanuam leh siam in a kigen ciang London ah kimuhpih dingin kumpite in sam uh a, King George V tawh kimu uh hi. A pai ni uh 1918 March 9 hi. Tembaw tawh Boulogne pan English Channel kantanin England tung uh a, meileng tawh pai kikin London meileng khawlna tung uh hi. Tua laiah kumpi tangin mite in na dawn uh hi. A zingsang ciang Prime Minister leh Minister dangte in na muak uh a, kumpipa tawh kimuh ciang galkap puan silhtek ding cih vaikhak uh hi.

1918 March 11 zingsang nai 8 in a zintunna uh pan mawtaw tawh Kumpipa inn ah paipih uh hi. Khamtawh kizut Kumpipa lengla dona inndei sungah kigualin Kumpipa hong pai ding ngak uh hi. Nai 9 a cin ciangin Kumpipa a galkap puan tawh kizemin inn tung pan hong tuak suk a, zahtakna a piak khit uh ciangin khut kilenin Kumpipa in thu a gen hi. "Gamlapi, Tedim khua pek pan gal huh dinga nong pai sung un nasepna khempeuhah deihsakna tawh hanciamin paubanna omlo hoihtakin na zo uh hi cih ka za hi. Ka lungdamna bangmah tawh kiteh theilo hi. Leitung ah England Kumpi a bei mateng Tedim mi peuhmah gilkial, dangtakin puksi lo ding; a kisapna mun khempeuh ah England Kumpi in hongkem ding hi. Note tawh sauvei ka omkhop nop hangin ka nasepna tamin hun neilo ka hihmanin poi kasa hi. London khua ah na lamdang tuamtuam ka mite in hong lak kawikawi ding uh hi."

London a tam sung un Parliament, Zoological Garden, Kumpi inn lui leh Museum, Vanleng bawlna, etc etpih uh hi. A vakna khat vuah Pu Song Theu in galkap khat pen milim sa in a khamul lawnsak hi kici hi. Kumpi cing galkapte pen milim tawh kibangin tanglo, mitphialo in ding uh hi. Milim leh mihing kikhen theilo ci uh hi. Ni 12 a tam khit uh ciangin 1918 March 22 niin a nasepna lam vuah ciahkik uh hi. 1918 March 11 ni a Buckingham Palace ah Kumpi George V tawh kimu teng:

1. Mawlaik Deputy Commissioner F.O. Fowler.
2. Subidar Mang Pum, Khuasak.
3. Company Commender Song Theu, Tualzang.
4. Company Commander Vungh Za Kham, Tonzang.
5. Company commander Kam Za Nang, Tuipi.
6. Company Commander Hau Za Nang, Heilei.
7. Platoon Comander Hang Khaw Cin, Tuitawh.
8. Platoon Commander Thiau Kam, Kaptel
9. Sergeant Vial Zen, Vangteh..
10. Interpreter Thuam Pau, Khawsak.
11. Interpreter Thawng Za Kai, Muizawl.


England Galkap Suak

England galkap a suak nuam pawlkhat amau siamna tawh kizui in panmun kipia a, a nuai a bang hi. Hih lai ah akigelh lo pawlkhat zong panmun kipia a, amau nasep ciat ah panmun ngahlo om mello dan hi.

1. Capt F.O. Fowler : Colonel.
2. Thawng Za Kai, Muizawl : Captain.
3. Thuam Pau, Khuasak : Captain.
4. Vung Za Kham, Tonzang : Lieutanant.
5. Song Theu, Kaptel : Lieutanant.
6. Kam Za Mang, Tuipi : Lieutanant.
7. Kim Vungh, Lamzang : Lieutanant.
8. Do Cin Lian, Haupi : Lieutanant.
9. Lian Za Thang, Laitui : Lieutanant.
10. Pau Cin Lian, Gamngai : Lieutanant.
11. Cin Khai, Tuitum : 2nd Lieutanant.
12. Pau Za Cin, Suangzang : Subidar.


Ciahkikna Leh Pahtawina Laipi

1918 July kha ciangin hong ciah uh a, 1918 August 31 in Tedim hong tung uh hi. England kumpi adingin France leh Belgium, France leh Germany gamgi tengah kum khat leh alang nasem uh a, PAHTAWINA LAIPI (Certificate) khat ciat hong ciahpih uh hi. [A tu ate un 'gilkial dangtak hun ciang hong huh ding' a cite kiangpan hih PAHTAWITNA LAIPI tawh huhna (tuhun ciang) a ngah takpi tam maw!] A certificate vuah hih bangin kigelh hi.

CERTIFICATE

This is Certificate is given to ------------ who enrolled voluntarily as a mate in the Burma labour Corp and worked in france for the British Government during the great war. He worked loyally and well in all; weather by night as well as by day and every advance and often dangerous condition and willingly and cheerfully bare his share of the burdens of the day. This fact should ever be remembered to his credit by those who have any dealings with him and may all officials deal with him and his family in the liberal for him on which the place his service at the disposed of the empire in its hour of stress may he and his family never be forgotten.

Sd/-
F.O. Fowler
Captain
Burma Commission



Hong Ciahkiklote

A si, a kiciamteh mi 23 te leh a sihni uh hih bang hi. Han ah kivui a, tuni dong kimu theilai hi.

1. Ngul Ngin, 4.10.1917
2. Thang Eng, 25.12.1917
3. Tut Lang, 29.10.1917
4. Tuang Pum, 9.12.1917
5. Vial Dam, 9.12.1917
6. Gin Neng, 31.10.1917
7. Vum Dam, 26.10.1917
8. Kam Mang, 28.10.1017
9. Ngo Kam, 9.10.1917
10. Tual Kim, 4.9.1917
11. Lun Kap, 7.12.1917
12. Son Neng, 7.11.1918
13. Kai Ngin, 23.10.1918
14. Ma Ha Peng, 21.12.1918
15. Khoi Gin, 6.6.1917
16. Khup Za Dal, 15.10.1917
17. Lang Za Khen, 12.2.1917
18. Suan Thawng, 29.1.1918
19. Zuan Pum, 28.12.1918
20. Ngin Dam, 7.3.1918
21. Siat Lut, 9.3.1918
22. Kham Ngul, 27.4.1918
23. Pau Pum, 29.1.1918


Thukhupna

Zomi khangthu ah theihbatloh, ngaihsutbatloh khualzinna leh gamvakna tangthu (adventure story) hiden ding hi. A theihloh man vua a kihtak uh leh a kahpih uh hangin a ciahkik uh ciang a zinkhiate kiengkik phial a, a nihveina pai ding kici leh a pai ut kitamzaw phial ding upmawh huai hi. Cikmah cianga kimu kik nawnlo dinga ki ummawhte kumkhat val deuh ciang kimu kik a, lungdamna bangzah lian ding hiam cih kigen theilo hi. Ahi zongin a ciahkiklote adingin a innkuanpihte lungsima ngaihsutna om ding kisutpih siamlo hi. Topa in na khamuanta hen. Zomi bup adingin hih khualzinna pen khuamuh kipatna, mitkeuhna khat hong suak ahih manin minam banga i khantohna ding akipatna siksan khat hi tawntung ding hi. A tuah thu, lamdang a sak uh, muhnop a sak uh, nuam a sak uh, hoih a sak uh, etc a tuamtuamte eite muh bang ahih manin a kimangngilhlo ding kalsuanna khat ahi hi.

I theihkholhloh zinkikna ding koi lai ahi dia? Tung Solkhapi tung ahi ta diam?


Hau Za Cin
Phuitong Liim

PIANTIT (FRANCE) PAINA THU (1917-1918)

Thu masa

Leitung galpi khatna 1914 kumin hong om ciangin England kumpi in gal huh dingin Ukpipa kiangah a na ngen a, Ukpipa Hau Cing Khup in gal huh ding mi 1033 na ngah sak hi. Tua te Piancit pai dingin 1917 May 27 ni lianin ih pu ih pate Tedim panin na ding khia uh hi. Piancit gam a tun uh ciangin gal leh sa mai-ah na semin kum 1 leh kha 6 sung na tam uh a, 1918 August kha-in Tedim na tung kik uh hi. Gal sungah thauvui thautang mai-ah na a sep lai-un inn lam zong thei dingin kilam en nawn hetlo uh hi ta leh mi 23 lo buang cidamin Zogam na zuan kik uh a Piancit pai ngei a hi Ka Pu Khualsuan (Phaiza) in hong gen ciangin "Tuipi tungah sun 40 leh zan 40 ka pai uh hi. Tuipi sungah ni sialpi cia-in hong suakin sialpi cia mahin tum kik hi. Tuihualte lian lua mahmah ahih manin thaupi tawh kikap kham zel hi," ci-in lamdang a sakna thu leh a tuak khak thute hong gen ciangin zaknopsa-in a mai-ah kamka heuhau liangin ka ngai thei zel hi.
Leitung galpi khatna 1914 Kumin piang a, tua gal kidona-ah Englandte tampi si-in Kham dangka Pound 900 Million val bei hi. England leh Franch kipawlin, Franch gamah a kisim laitakun Englandte in amau¡ö huhna gam tengah huhna mah ngen kawikawi uh hi. Tua hunin Ih Kawl gam England Kumpi in hong uk khin a hih manin, Kawl gamah zong huhna hong ngen kik uh hi. Sukte gam, Kamhau¡ö gam, Sihzang¡ö gam tengah huhna ngen dingin Mawlaik panin Deputy Commissioner F.O.Fowler 1917 January nipi masa sungin Tedim hong tung hi. Hih Ukpi 3 sung tengah ki kaikhawmin, gal huh ding gen hi. Amasa-in Ukpite in nanial uh hi. A hi zongin F.O Lowler in, 1891 June 23, ni a Thangpi a kibawl, kiciamna bulphuhin huhna hong nget ciangin, Ukpite in nanial ngam nawnlo uh hi. Hau Cinkhup makai-in Ukpite in amau uk sung ciatah mi kaihkhop sakin, Sukte gam panin mi 250, Kamhau gam panin, mi 700, Sihzang gam panin, mi 83, a gawm mi 1033 ngah sak uh hi. A kingen zah sangin a tam zaw ngah sak uh hi.
Gal huh ding a apai mite Tedimah kha 3 sung nasep sinsak phot uh hi. Kha 3 sung a man khit uh ciangin inn lamah kha lang sung ciah khuan pia uh hi. 1917 May 15 ni-in gal huh ding mi 1033-te Tedimah kituah uh a, Franch gal mai a na sem dingin, Tedim khua panin anuai a bangin pai uh hi.

1917 May 27: Zingsang nai 10:00 Tedim panin Dimlo-ah giak uh hi.
1917May 28: Dimlo panin Thangpi-ah giak hi.
1917May 30: Tulsuk panin Kawlpi-ah giak hi.
1917May 31: Kawlpi panin Gun khawm tung uh a, Gun khawm panin tum theih a tuamtuam tawh na muak uh hi.
1917 June: Gunkhawm panin Tembaw tawh Myanyanah zan thum tam uh hi.
1917 June 8: Myanyan panin Yangon tung uh hi. Sya Po tha in zing an nekpihin France pai ding teng, zatep bu nih, Khakhi puan-ak khat tek, pheituam khat, puan-ak tungsilh khat maimul khat leh sunsiah phel khat tek pia uh hi.
1917 June 9: Zogam panin a ki kha sukte tawh mangpha kikhakin, Yangon pan Tembaw tawh ding khia uh hi. 1917 June 13, Nitak nai 5:00 India Khuapi Culcutta tung uh a, Keizangte Khoigin a kam sung meima-inZato kahin Zato panin si hi. A luang mei tawh hal ding deihlo uh a hih manin, Vung Zakham maikai-in Khuapi pan tai 15 a ki gamlatna-ah vui uh hi.
1917June 24: Nitak nai 5:00 Culcutta pan Meileng tawh Bombay pai hi.
1917June 28: Nitak nai 6:00-ah Bombay khua tungin Zato-ah ki ensak uh a, khua vot thuak zolo mi 15 ciah sak uh hi.
1917June 29: Nitak nai 3:00 Sente¡ö Tembaw tuangin Bombay pan ding khia uh hi. Arabia tuipi tungah ni 13 sung paisuak uh hi.
1917 July 14: Nitak nai 5:00-in Eden huan tung uh a Inn sung lutpah theilo uh hi. Nai.7:00Pm, ciang lut thei uh hi.
1917 July 17: Eden pan Tembaw tawh ni 4 sung pai uh a, Izipt gam Suez canal zuan uh hi. 1917 ni 21 ni-in, Suez tung uh a, Tua kikal sehnel gam bekbek a hi hi. Suez canal pen Englandte¡övanleng phualpi hi a, a galvanlengte uh muhnop sa mahmah uh hi.
1917 July 26: Nitak nai 6:00 Suez Khuapi panin Meileng tawh pai uh hi.
1917 July 27: Zingsang 8:00 Egypt gam Alexandria khuapi tung uh a, nitak lamin Tembaw tawh paisuakin Italy gam Toronto khuapi tung uh hi. Tua mun pen nisat mahmah na mun hi a, amau¡ö suan tawm singkung bek po hi. Sing hamsa mahmah hi. Tui nisa-ah lumsak masa-in tua khit ciangin meitungah suang pan uh hi. Sing kung tungah Toktol tam mahmah ahih manin, Toktol khua ci-in ciamteh uh hi.
1917Augustni 6 ni-in. Toronto khua panin meileng tawh ni 8 sung pai-in, Moh leh niangtui bekbek tawh vakin nuamsa mahmah uh hi.
1917August14: Franch Khuapi Marselles a tun uh ciangin, Khasum Rs. 50/- Oversea Allowvance Rs. 100/- sang sak uh hi. Sukte leh Sihzang mi teng, No.61 Labour Corp min pia-in, Kamhau¡ö mi No. 62 Labour Corp min pia a, Capt, Rund-all in uk hi.
1917 Aug 24: Marselles khua panin meileng tawh ding khia kikin, England leh Germanyte¡ö kikapna mun Bikot camp 1917 August 27 ni-in tung uh hi.
Tua lai-ah nasep laitakin, Tonzangte Neng Zalang in khutlet bomb khat puakkhamsak kha a hih manin, mi 6 liamin tuate Zato pension kipia hi. Bikot camp panin Brazil-ah ki tuah kik uh a, tua campah a om sungun sun leh zanin thauging bekbek kawlmim kanpuak ging bangin tai 100 huam sung, thautang san ziahzuah ci-in lim gen mahmah uh hi.
Piancit paite pen galkap hilo-in vansiate khawmtuah, galte¡ö zat ding thauvui thautang annek tui dawn, a suah a sang leh a kisam bangbang a sem uh a hi hi. Tua bangin a lauhuai galmai samai-ah lungleng khuangai-in a om sungun, a ki hehnepna-un, Alexandria khua a a om sung vua, Gualkhate tawh tuipek a kidemna uh khawng, Arabia tuipi tung a nawk lai vua, amuh uh ngasa inn ciacia a phate kikumin holim mahmah uh hi.
Alexandria a om sungun Gualkhate tawh tuipek kidem uh a, Gualkha galkap 9, Zato kipuak a hih manin, tuipek ding kikham hi. Arabia tuipi kantanin, tui hualte nasia lua mahmah ahih manin, Motor kham bangin khamin an ne zolo tui dawn zolo-in a om laitakun inn ciacia, saipi ciacia a pha ngasa (Whale) gual khat ciangin tul val bang a pha ding tai 2 sung bang, nisuahna pan nitumna lam manawhin a tai hanhan ngasa a muh uh ciangin lamdang sa-in muhnop sa mahmah uh hi.
Bikot khua a om lai-un a na seppih uh midangte tawh, lungnop nadingin bawlung kidem zel uh hi. Tua kidemna-ah na zo uh a hih manin, Piancitte in lamdang sa-in a pahtawina uh Lian Zakham in a nuai abangin la na phuak hi.
(a) Piantui a zal mi zatam tein, kua vontawi bel hiam ci e,
(b) Kua vontawi ci’n khau bang sut ing, puvon ngo sal bang lange,
Hih bangin ihpu ihpate ahunhun amunmunah, midangte¡ö sangin a hatnate uh na lakkhia uh a, mite zahtak leh pahtwi-in na om uh hi. Bikot campah a om sungun, England galkap suah theih nadingin British Parliament-ah ngen uh a, England Kumpi in ih pu ihpate, galhan dan, galsiam dan thei khin uh a hih manun, piak dingin thu zasak uh hi.
Tua hun laitakin Tonzangte Khup Zadal in, kampau khialhna khat tawh kimanin, a suahtak khit ciangin buksau natna khat tawh si hi. Tua pa pen England galkapte in thupi takin zahtakna tak tawh vui uh hi. 1917 December kha-in, England Prime Minister leh galkap mang pawl khatte Brazil camp-ah pai uh a, Tonzangte Gin vum leh a lawmte pawl khat in, zahtakna na pialo kha uh a hih manin kha 3 sung thong kiasak hi.

2. London paina:
Brazil camp a na semte khen 78, pha uh a, tua sung panin No. 61 leh No. 62, Labour corpte¡ö hanciamna leh nasep siamna minthang mahmah a hih manin, Kumpi King george V. in, ¢¨Ki mu nuam ing,¡ø ci a hih manin, a kimu dingin corp 2 sung panin ki teng khia uh hi. Tuate Kumpipa tawh kimu dingin, 1918 Marc ni 9 ni-in ding khia-in, ni 10,ni-in, Boulogue khua pan Tembaw tawh English Channel kantanin pai uh a, nitak nai 4-in England Tembaw khawlna tung uh hi. Tua panin Meileng tawh pai-in, nitak nai 9-in London meileng khawlna tung uh hi. Tua lai-ah Uliante in na dawn uh a, Indiate¡ö tunna inn khat (9th Floor) tung sak uh hi.
Tua inn deipi sungah Prime Minister leh Minister dangte in na muak uh hi. Zingsang nai 11, ciangin kumpipa tawh kimu ding leh, galkap puan silh ding vaikhak uh a, khut kilenin kikhen uh hi. England Kumpi in a khangkhangin atenna Buckingham place-ah Kumpi King george v. tawh kimu ding a pai teng:-
Mawlaik Deputy Commissioner F.O. Fowler
Subidar Mangpum (Khuasak)
Interpreter Thawng Zakai (Muizawl)
Company Commender.Songtheu (Tualzang)
Interpreter. Thuampau (Khawsak)
Company Commander.Vungh Zakham (Tonzang)
Company commander. Kam Zanang (Tuipi)
Company Commander. Hau Zanang (Heilei)
Platoon Comander. Hang Khawcin (Tuitawh)
Platoon Commander. Thiaukam (Kaptel)
Sergeant. Vialzen (Vangteh)

3. Kumpipa tawh kimuhna:
1918 March 11 zingsang nai 8,-in,Uliante in a zintunna uh panin Motor tawh la-in Kumpipa tawh Kumpipa¡ö innah paipih uh hi. Khamtawh kizut a sau mahmah Saha 4 leh sailu 2 a kisuanna Kumpipa¡ö zin dona inn dei sungah kigualin, Kumpipa¡ö hong pai ding ngak uh hi. Zingsang nai 9-in Kumpipa a galkap puan tawh kizemin huihluai tawh hong tuak sukin, 3 vei zahtakna a piak khit uh ciangin khut kilenin a nuai a bangin kumpipa in thu hong gen hi.

4. Kumpipa thu gente:
Hih zahtak a a gamla, Zogam Tedim panin, gal huh ding a hong pai Labour corp 61 leh 62 sung panin, galmai nasepna khempeuhah deihsakna tak tawh, hanciamin paubanna omlo-in, hoihtakin zo cih ka za hi. Ka lungdamna bangmah tawh kiteh theilo-in ka lungdam hi. Leitung hunah, England Kumpi¡ö thu neihna a bei matengin, England mi khat ka om lai tengun, Zomi, Tedim mi peuhmah gilkial dangtakin hong puk sisak lo ding hi ung. Na gentheihna mun khempeuh vuah England Kumpi in hongkem ding hi ung.” Ci-in thu a gen khit ciangin, “Note tawh sau veipi ka om nop hangin, ka nasepna tamin hun ngahlo ka hihmanin, ka dah mahmah hi. London khua-ah na om sungun, na lamdang tuamtuamte Ministerte in hong lak kawikawi ding hi,” ci-in thu a gen khit ciangin, khut kilenin kikhen uh hi.
Tua khit ciangin Zo mi Tedim mite, Kumpipa lim kisuanna inn dei sungah, man (Photo) kizaih uh hi. Minister khat in makaihin kumpipa¡ö inn sung panin nidang lai a, mawhnei kumpinu kithahna nalamdang tuamtuamte etpih kawikawi hi. Kumpipa inn tai 2 huam bang zai hi. Inn tungah dial mun 16-ah kikhai a, Nidang lai London khua meikatna leh, zinlinna te lim sungah ensak uh hi.
Kumpi inn sungah naupang kum 12 gual a pha mi 150-te in, Kumpipa lungnopna dingin, nisimin Benkhaza (Music) tumin lam zel uh hi, ci-in ki gen hi.
1918 March 12, ni-in Parliament kikhopna-ah kahsak uh hi. A pai ma-un Kumpipa Zum khan vel masa uh hi. Parliament kikhopna inn sung a lut uh ciangun, mipite in zahtakna pia-in ding uh hi. Kikhopna a man uh ciangin, Kawlgam Governorpa in, a innah moh leh niangtui tawh vak hi. Tua lai a nasep sin Kawl mi 13-te tawh, kiho khawmin nitak ciangin Cenima etpih uh hi.
1918 march 13, zingsang an nek khit ciangin, ganhing khawina (Zoo) en uh hi. A ciah uh ciangin Whiter leh whiteson companyte in, Singgahtui tawh vak hi.
1918 March14 ni-in, England Kumpi a sem ngei khempeuh leh, vaihawm ulian khempeuhte¡ö laizangah, Kumpi King george V. 4-te¡ö innkuan lim omna etpih uh hi. Tua mun a cing galkap khat, Songtheu in milim sa-in a khamul a lawnsak kha hi. Tua lai pen milim lah mihing kisa, mihing lah milim kisa thei hi, ci-in gen uh hi. Nitak lam ciangin, Kham leh ngun ki bawlna sik namkim leh van tuamtaum kibawlna munte en uh hi. 1918 March 15 nitak an nek khit ciangin, London khua nawl a om vanleng bawlna mun etpih uh hi.
1918 march 16 ni-in India Governorpa in an vak a, An a nek khit uh ciangin Roll company leh Whiteson Companyte in sam leuleu uh hi. Nek theih dawntheih tuamtuam tawh zindo uh hi. Roll Company inntung a sang pen munah, bawlung tualpi om a, tua panin London khua sung kimu thei hi. Roll Company inn laizangah inn tung leh inntual kikal, khuampi khat om a, a kim kot mel tuamtuam nei singpek tawh kizem hi. Sabuai bangin ki umcip hi. Tua khuam pen a tawntungin kipei den a, van leite in khuam kipei den tunga sabuai sungah sum khia leh vante a mau¡ö gei sabuai-ah hong pai lel hi, ci-in gen uh hi.
Lampi gei vanzuaknate- ah, a van man zah ding sum kikhia-in, Switch ki mek leh a leinop van pusuak hi. 1918 March 20 ni-in ciah kik ding gelna a om hangin, Germany galkap a kiman tul 300-te puakna-in Tembaw teng kizang ahih manin, ciah theilo uh hi.
1918 March 22, ni-in London pan ciahkhia-in, Brazil camp a tun uh ciangin, England galkap lut theihna ding lai tunga, galkap a suak nuamte galkap dan sin dingin Lyons camp-ah kisuan uh hi. Tuate pai khiat ni zanin, thautang koihna innpi bomb in kha a, tua munah ki om ngam nawnlo-in mundangah kitai hi. Galtaina mun panin, England galkap a suak nuam lote inn lamah ciahsak hi. England galkap suak a, Lyons camp a galkap sinte a nuai abangin za kipia hi:-
1.Capt F.O Fowler – Colonel
2. Gordon - Lt. Colonel
3. Warald – Major
4. Ohtakhin –Captain
5. Thawng Zakai -Captain –Muizawl
6. Thuampau - Captain –Khuasak
7. Vung Zakham - Leutanant –Tonzang
8. Songtheu - Leutanant Kaptel
9. Kam Zamang - Lieutanant –Tuipi
10. Kimvungh -Lieutanant – Lamzang
11. Do Cinlian -Lieutanant – Haupi
12. Cinkhai -2nd,Lieutanant –Tuitum
13. Lian Zathang -Lieutanant – Laitui
14. Pau Cinlian -Lieutanant – Gamngai
15. Pau Zacin -Subidar – Suangzang
Atung a bangin za tuamtuamte a piak banah, Sergeant, Corporal akipan za tuamtuam a ngah tampi ki om hi. Tuate Lyons camp-ah nipi 3 sung galkap dan a sin sak laitakin Zo gam panin laikhak ki ngah a, Kuki Thahdo leh Hakha gal kisimna hangin lo ki kho theilo cih thu a zak ciangun, Zo gam ciah kik dinga khuan ngen uh a, 1918 July kha-in hong ciahin 31 August kha-in Tedim hong tung uh hi. Piancit gamah Kum khat leh kha 6 sung na sem uh a, galmai leh natna tawh hong sihsante longal, Mangkang Kumpi in minphatna PAHTAWINA LAI (Certificate) khat ciat hi bangin pia hi.

CERTIFICATE

This is Certificate is given to ------------ who enrolled voluntarily as a mate in the Burma labour Corp and worked in france for the British Government during the great war. He worked loyally and well in all; weather by night as well as by day and every advance and often dangerous condition and willingly and cheerfully bare his share of the burdens of the day. This fact should ever be remembered to his credit by those who have any dealings with him and may all officials deal with him and his family in the liberal for him on which the place his service at the disposed of the empire in its hour of stress may he and his family never be forgotten.

Sd/-
F.O Fowler (Capt)
Burma Commission

Piancit pai Labour Corps a nasemte lungzuan khuangaihna tuamtuam kawm kalah mi 23 te in hong nusia uh hi. Tuate in:-
1. Ngul Ngin 4. 10. 1917
2. Thang Eng 25. 12. 1917
3. Tut Lang 29. 10. 1917
4. Tuang Pum 9. 12. 1917
5. Vial Dam 9. 12. 1917
6. Gin Neng 31. 10. 1917
7. Vum Dam 26. 10. 1917
8. Kam Mang 28. 10. 1017
9. Ngo Kam 9. 10. 1917
10. Tual Kim 4. 9. 1917
11. Lun Kap 7. 12. 1917
12. Son Neng 7. 11. 1918
13. Kai Ngin 23. 10. 1918
14.Ma Ha Peng 21. 12. 1918
15.Khoi Gin 6. 6. 1917
16.Khup Za Dal 15. 10. 1917
17.Lang Za Khen 12. 2. 1917
18.Suan Thawng 29. 1. 1918
19.Zuan Pum 28. 12. 1918
20.Ngin Dam 7. 3. 1918
21.Siat Lut 9. 3. 1918
22.Kham Ngul 27. 4. 1918
23.Pau Pum 29. 1. 1918
te a hi uh hi. (Hih teng pen 1st World war hun sung a site¡ö hanah kivui a, limtakin hancing te’n cing uh hi).
Laimai 375 a pha Zomi khat ading a thupi mahmah "Zomite' Ngeina leh Innpite' tangthu" cih laibu zong ki zo siangta a Korea a om Zomi pawlkhatte' tungah zong bu 20 tang bang ki hawm khin hi. Pasian' hong deihsakna a om leh kawlgam panin a sawtlo-in hawm khia nuam ka hih manin a kihawm khiat zawh hunah tha nong piak tek nadingun zong hong zasak khol ing.

Thu kaikhawm
Thangsiam
ACTS University (Khitta)
S. Korea