Hih U Suanpi dotna ka dawn ma in tuma lam, February kha sung innlam ka ciah kal in kua hiam in, "Kawllam ah teeng ngei na hiam, Tahan pan pem na hiam...." cih dan in hong dong hih tuak a, tua pen ka ciah sung email te ka tun kik ciang tamlua ahih manin sim khin lo in tampi ka pai hi. Tua man in memberpih te khat in ' tua dotna pen dawng nailo hi ve teh aw' hong cih ciangin tua bang dotna om hi maw cih ka thei pan a, tu-in kong dawng khawm sawm ding.
Ka pa Dalzazi (Diary) pan in -
1. Kum 1918 in Thalmual pan ka pupi uh Hong Cin in Tuisiing Khua (tu in Vapar khua), Mizogam na satto hi.
2. Tuisiing khua (Vapar) leh Murlen khua ah 1934 kum in Hausa khat nuai ah na kigawm a, Tuisiing khuate Murlen ah kisuanto uh hi. [Murlen pen Hnahlan Hausapa in a tapa Pu Saithuam, a zi Pi Ngai Kang a inntuanna in kum 1933 in na sat uh hi].
3. 1954 (?) pawlin Hausapa si, tua hun in Mizogam ah hausa thuneihna kibeisak a, District council in vaihawm hi.
4. 1966 in Mizogam buaina kipan a, tua ciangin khua khempeuh galkap omna khua ah kisuan in, khualuite ki haltum hi. Village Grouping kici hi.
5. Tua sung Murlen pen Hnahlan ah kigawmto hi.
6. Buai a ven deuh, MNF leh INDIA in 'kikapna a khawlsak' (cease fire) ciangin, 1977 pawlin innkuan 12 in Murlen ah ciahkik uh hi.
7. 1986 ciang India kumpi leh MNF in kilemna bawl in, 1987 ciangin Mizogam hong piang hi.
8. Tua zawh mi tampi khualui ah hong ciahkik hi. Tu hun tanin zong hong kik omlai.
9. Khua a gawm uh ciang a taisan tampi om - pawlkhat kawllam ah, pawlkhat meitei gam ah, pawlkhat nitumna lam ah, etc. Ka ni te Kawlgam ah tai a, Ko Meitei gamah tai ka hih man un, tu tan ka ni Tahan ah om lai a, ko Meitei gam pan Khualui ah ka ciah kik uh hi.
10. Khua khat ah om khawm sa pen gambuai hangin kimu ban nawnlo in, gamlapi in hong halta hi.
Leitung..... .....
Tua manin Murlen khua Hnahlan ah gawmkhop uh ciang khua kihal a, Buh, vaimim, taang, inn, etc. gan, ui leh kel, vawk, ak.......... .. bangci om hiam kithei nawnlo hi. Kum 10 a omloh sungin khua na gambu khinta hi dan hi.
Murlen pen nidangin Veng nih kisuah a, hausapa veng ah luseipau zangte, Tuisiing veng ah Zomi te a teng hi. Murlen Tuisiing veng a omna khawng zong Hausanu Pi Ngai Kang deihsakna hang mah hih tuak hi. Ama hang mah in Zomi tein Gospel thu Jesu thu kithei in, makai masa pawlkhatte tua gah hong nosuah ahi hi.
(Thu kicing zaw sia Rev. GK Nang, USA in thei ding hi. A u, tu laitak a Kawlpi ah om pen Murlen ah Christian suak masa pente lakah khat hi. Pi Ngai Kang mapatpih mah hih tuak).
Murlen pen Pasian nasem 30 val a pian khiatna khua hi. Inn tawm cik ahih hang Mizogam ah khua lamdangin a kigen hi. Bethlehem of Mizogam i ci thei diam. Ka theih te min hong gualsuk mawkmak leng, ka theihloh om hi -
1. (L) Rev. Khup Za Go, Delhi
2. Rev. Dr. GK Nang, Fuller Theological College, USA
3. Rev. Dr. JM Ngul Khan Pau, Gen. Secy, CBCNEI, Guwahati (www. cbcnei.com)
4. Dr. Rev. Enn Za Sian, ES, CBA, Lamka
5. Rev Dr. Khen Za Sian, Kawlpi
6. Rev. S. Neng Za Khup, NECTAR Director, Shillong
7. Rev. Chhunglawma, Aizawl
8. Rev. Zathanga, Kolosib
9. Rev. Thanzual a, Aizawl
10. Rev. Lalchungnunga, Kawlpi (?)
11. Rev. Suan Khan Thang, Aizawl
12. Sianu Awi Ngaih Lun, Champhai (tu laitak Kolkatta)
13. Rev. Lang Gin, Lanva
14.
Mi masate leh mizogam pua ah a omte min a thei lo hi ing. Sia Khen in Kawllam a omte min hong huh henla, Sia GK Nang in mi masa te min hong huh leh hong kimzaw deuh in um ing. Lungdam.
Hau Za Cin
Phuitong Liim
No comments:
Post a Comment