Hih tawh kisai ngaihsutna pawlkhat omte mipi lakah va gen ding kilawmlo thei ahih manin keima blog bek mah ah kigelh leh hoih inteh ciin ka khentat hi.
Mihing ngaihsut theih ah a hoih penpen leh Lai Siangtho in hong hilh bel nek ding a kicin ciangin zi nei ding cih ahi hi.
"Na nuntakna ding zong masa in la, na an nek ding a kicin' ciang bekin na inn ding lamin zi leh ta nei pan in." Paunak 24: 27.
Tu lai, tu hun ciangin nek ding zonna pen a kipatna bulpi pen in laisim, pilna neih ahi hi. Pilna tawh nek kimu ta hi. Pilna tawh nek cing a, inn kilam thei hi. Ahi zongin mi khempeuh in tua pilna lampi zui thei khinlo hi. Laisim khempeuh pil hi tuanlo hi. A pil khempeuh a nek mu zong hi tuanlo a, a hai khempeuh a zawng hi tuanlo hi.
Laisim pen ei deih banga zoh ziauziau theih hi leh kisim masa tek ding hi. Ahi zongin zi leh ta neih zawh ciang a sim kik te in zong zo toto lel uh hi.
Mi khat in kum 5 sung tan 10 zo zo kei leh ama kum tampi a bei suak hi. Master a zawh ding kum tampi zekai a, master kum 2 in zo zo kei leuleu leh tampi nawngkai to lai hi. Tua manin ama pian kum pan sim in a kum upa ding ahih manin a ma nuntakna mailam ding zong a khual kisam hi.
Zi neih a kisap hun, a kum a cin leh neih mai a, pilna pen sih dong a sin theih ahih man in a hun kikhel thei pen zawh masak ding dan hi. Teek tanin zong zi neih theih cih hiveve sam a... ahi zongin a hun lai khat om leh kilawm.
(zop zel ding)
1 comment:
Lawm Cin,
Cih ngeet ngut zawzen in ah.
Na lai gelhte thupi thei mahmah ei.
Hong zom to zeel dih in. Lungdam.
Post a Comment