Zomi thupisak masa ding maw Beh/Tribe/etc.

Zomi i thupisak nuam dan a tuam tek hi mawk e maw. Pawlkhat in Zomi mah thupisak 'masa' ngiat nuam in pawlkhat in Beh thupisak 'masa' nuam leuleu in, a hi zongin a tupna uh pen ZOMI mah hiveve hi. A bukim lo leitung ah bukim ding i sawm ciat a, a gina lo leitungah ginat i sawm ciat a, leitung mah nuam penpen mai e.

Ken Mizogam pan Zomi cih ka muh dan leh ka saan dan, promote ding ka deih dan leh Manipur ah sanggamte Zomi saan dan leh promote sawm dan a kibat lohna ka kikupkup mah bang un no zong mun tuamtuam a omte in ngaihsutna leh saan dan na kikum un. Ni khat ni ciangin hih tengteng pen kikum khawm nainai dingin hong kikaimat toto dinga, a hoih zaw ngaihsutna hong piang lai ding hi. Kikum manlo a General i suah pahpah ciang ngaihsutna hoih piang manlo hi, a topic mit zel hiven.

Zomi te omna kibanglo, mun tuamtuam ah omin, thu khat peuh i kikup pong hang in i ngaihsutna kibang theilo hi. Munkhat a om, khuakhat a teengkhawm Manipur, India a Zomi te ngaihsutna zong kibang lo a, min khat na nei zo nailo uh hi. Neih pah ding bel lamet huai in um ing.

Tua mah bangin Mizogam sunga teeng Zomi te ngaihsutna zong kibanglo a, Manipur, Mizogam leh Kawlgam suangthu banga a ki-um liliai nisim a kihoh ban, kikhawl thei, kizin batna mun ah zong muhdan, sandan, ngaihsut dan kibang lo ahih leh cikmah a kimu ngeilo US leh Malaysia, UK, Singapore, Japan, Korea, etc ah akikhenthang Zomi te ngaihsutna pen a kibang dingin up huai lo hi. Tua manin gen khawm in kikum leeng hong kinai sak semsem ding hi.

Tua ahih manin mun khat a teengte bek ngaihsut dan pen a dik hi ciin kisangpah thei ding hiam ci ing. Tua hang mahin kikup, kiho, kihilh, ki zaksak kisam a, kum khat kum nih sungin zong thu tampi kilamdang man hih tuak hi.

Bangbang hi leh -

Zomi i hih manin Zomi thupisak ding maw;
Zomi i hih manin Beh thupisak ding maw;
Zomi i hih manin Tribe thupisak ding maw;
Zomi i hih manin Penglam thupisak ding maw (he he... ciamnuihna hi sam e, hih pen).

Hau Za Cin
Phuitong Liim