Akpi meibawi

Akpi in no a keuh ciang a mei kibawhsak a, a mei tawng hi. A mei a khan kik ciangin a note lianta a, a tui kik hunpah hi. Tua bangin akpi khangah no keuh, no kai, mei bawi, tui kik cih bangin life cylce a nei hi, mikangpau a kawm ngaingai hi hang ei, life cycle. A meibawi hun pen a nungak kik laitak, a nopsak laitak, mawhpuak a neihloh laitak ahi hi. Guah hong zu in kuamah a khual ding omlo, a huai ding omlo ahih manin amah bek tai liatliat lel hi.

Ka guah aw zu sengseng
Ka kel aw tai diamdiam
Neihtong te kongmai nuai a,
Akpi meibawi tai ta liatliat

ciin la kisa hi. Tua la pen kohsak dan hi a, ka neulai in ka pi tawh guah a zuk ciang innka tau ah ding kawm in inn kong a ak tai diamdiam, kel tai diamdiamte ka muh uh ciang naukepna bangin ka sa zel uh hi. Hih la phuak kua hi diam, bang hun a kiphuak hi diam cih pen kithei nawnlo a, Zomi te Nau Awih La namkhat ahi hi. Doh Reh Meh a kibulh lo Zomi la neih masak pawl hi in ka um hi.


Tu hun ciangin i nu leh pate in nau awih la hong phuak ding hileh bang aphuak tam uh maw? Akpi a mu nawnlo, kel tal a mu nawnlo te in a la phuah ding hileng bang i phuaktam maw. A sa i nek zah in a tak i mu nawnkei a, KFC khawngah aksa a si kai neunau khawngin i petsuk guapguap a, kam gei teng san khin phial mahleh nopmawh isa kei ta hi. Nau Awih La tawh awi ding hi leng bang ciin i phuak tam maw? Naukepna te lah Computer khawng, TV khawng, CD player leh Cassette Player khawng hita a...

Electric aw mit lo aw,
Ka nau TV ensak aw,
Ka nau CD ensak aw,
Ka nau VDO games siamsak aw,
Ka nau iphone ngai sak aw,
Ka nau phone ah pausak aw.

cih bangin i phuakta mai diam? Ahih kei leh,

Bawi aw hong khang mengmeng aw,
Pam a computer siamsak aw,
Gamdang tuipi gal tungsak inla,
Mi nam suak mi ngeina zui sak inla,
Tun leh zua u leh nau ngilhsak in,
Hauhna namkim pilna namkim na guan in.

i ci zaw diam?


Akpi meibawi pen ama nuntakna ah a khangno hun tawh kibang ding hi. A kep a huai ding a omloh laitak hi. A nopsak laitak hi. A tung a nuai a don ding a kisap loh laitak hi. Guahzu leh amah bek bikhaliim lam zuanin tai a, inn nuai niliap ah kibu dingin tai liatliat lel hi. A nung a ma khual kullo a, ama bitna ding bek a sep phamawh lo hi.


Akpi Meibawi la a phuah Zomi te in amah banga i suahtak laitak amah bangin ei bek i ki khual kha hiam? Akpi bangin ei bek lu taakna ding zongin i tai kha hiam? Akpi tawh i kibang thei hiam? Akpi in bel amah bek kikhual lel hi, Zomi te tua bang ihi thei ding hiam? A meibawi masasa i kitaisan zelzul diam?


Hau Za Cin
Phuitong Liim