Pasian thugen siam kasak te pen kei mawhna a gen kha lo, midangte mawhna leh midangte kibawlphat kulna teng a genkha den, kei hoihlohna leh kipuahna ding, kibawlphatna ding lam peuhmah a genkha vetlo hi masa hamtang hi. Mite acici dan khatin gensiam leh kei pen muk tuk liang, kam ka hehaw dektak liangin a ngai pah pawl ka hi hi. Kei hong cihna kiau khat a om leh lah ka tumna ding, ka kiselna ding ka bukna ding azong pah, tua lam gen nawn kei leh hoihding hi a, a ci nuam pawl ka hi hi.
Mawhna leh khelhna khawng tam gen lo dingin ki it ding, kingaih ding khawng uang gen khollo dingin sep ding bawl ding leh piakkhiatna khawng awlgen zaw ding. Kha Siangtho ngahzia leh limna, lawpna lam khawng zong tam gen lo mai ding. Kei hih theih lam ahi, mite khual ding, hanciam ding, mite huh theihzaha huh ding, thatang tawh sep a kul leh sem ding cih khawng limgen zaw ding. Piakkhiat a hat hetlo pa kiangah piak khiat ding bekbek hong genpih ciang ka piakloh luat lam kitel ka hih cianga ka maizum in, 'ki uiveih phawk' a cih bang vua, 'kau nei kisungsia' cih banga kei kuama theihloh a na kisungsia in, nop het-het-lo.
Ka lawmpa pen zu dawndawn mi ahi cih ka theih leh thugenpa in zu dawn a hoihlohna lim gen mahmah leh ka ut lamtak hi. Nak genlua cih omsak kei leh ka ut mai hi. Ka lawmpa in nuamsa kei henla, hong kikhel leh cih ka deihsak man khat ahih hang, kei leh kei gualzo kisak man, kiphatsak man zong hikawm veve hi. Kei peng in amah penglo ahih cianga. Kei hoihlohna kipulak kha lo, amah gialpi den banga guahpi huihpi thuak-a thuak hi. Tua pen angsung theitaka ka nopsak giugiau ahi hi. Hakkol na pua khawm un, van gik na kidawn un cih te peuhmah ka phawk nawn kei hi. A huhlo kei pen a khial veve ka hih lam ka mihing hihna in hong mangngilhsak hi. Ka lawmpa zu dawn luat pen ka mawhsak kawm in a kikhel ding ka deihsak hi. Ahi zongin ama adingin zu dawn pen bangzah a nuam a, bangzah a kikhel ding hamsa hiam cih ka theihpih kei hi. Kei kikhel ding ka theihte zong ama abangin ollo kasak hiveve ding hi. Ahi zongin a kawk kei hilo in pulpit tung pan thugenpa ahih manin tha ka ngah mahmah hi.
Ka kibawlphat ding, ka hoihlohna hong genkha den pulpit thugenpa pen ka ngai ngaungau kei a, tha ka ngah lua kei hi. Kei hong maizumsak tawh kibanga, kei hong selpho tawh kibang hi. Ka kibawlphat ding hong deih hi cih lamsang sangin kei hong khelbawl hi, kei hong simmawh hi ka ci nuam phial hi. Kikhel hileng a meet ngah ding amah hilo in kei ka hi zaw gige hi. Ahi zongin banghangin tua bang thugen ngai nuamlo ka hiam? Kei hong kici lo dingin midang kici leh ka utluat man ahi hi. Angsung thei, selfish ka hi hi. Star fish zong hizolo in, selfish ka hi. Ka hoihlohna kipuah in a hoih in gamta leng kei a hampha bek hilo ka kim ka kianga te a hampha hi dinga, vekpi a hamphatna hi ding hi. Tua ding ngaihsun lo in siapa in kei hong ci deuh cih bang lungsim ka pua thei hi. Ka picin lohna hong kilangsak hi.
Zindo a siam hetlo pa pen zindo siam bangin hong kigen leh ka nuam mahmah hi. Ka siamzah ka hanciam pen a hong kipaktat ciangin nuam kasa a, hi kakisa a, thupi ka kisa hi. A taktak in cileng a phattak nai hetlopa ka hi hi. A cihtak a sem nailo pahtawina a ngahpa ka hi a, a kilawmlo pahtawina a ngahpa ka hi hi. Mipi mai bang hi peuhmah leh ka lawp semsem ding hi. Ka naupang lungsim hi cih kidawk hi. A picing ding ka kisin kisamlai cihna hi.
Zi te aw na pasalte uh zahtak un, a thu uh mang un cih pen zak nuam kasa mahmah a, pasalte aw na zi te uh it in bel kitambaih bangin kem un, a cih ciang bel ka kizakmawh bawlta hi. Tate aw na nu leh pa thumang un cih ciangin haksa ka sa a, nu leh pate aw tate pen Topa hong piak hi a cih ciang un nuam kasa hi. Ka nu leh pa thuman den ding leh it den ding pen haksa kasa a, khat veivei kei thu a gamtat ut hun ka nei hi. Tua ciang sermon pen ka za nuam kholkei hi. Ahi zongin kei hong kingekbawlna ding lamsang ahih leh bel ka bil vang keklian in ka ngai dedaw hi.
A taktak in mihing hong bawlpha pen i hoihlohna leh i kisapna mun hong kihilhna pan kipuah phatna ahi hi. Haksa mah leh nuam kei mah leh, zumhuai mah leh ut kei mah leng... tua bek in mihing mi picingzaw in hong seek ahi hi. A kilanglo ki itna sangin a kipulak kithuhilhna in itna maan hizaw hi. Kei hoih ding hong deihsak taktak te in bel ka hoihlohna zong hong puah nuam ding ahi hi. Ka hoihna teng bek hong pakta a, ka hoihlohna hong puahsak sawmlo in itna kicing hong neilo cihna hi. Ka hoihna ka hoihlohna hong pulak ngampa in hong it, hong deihsak taktak cihna hi a, tua bang thugen mi ka paktat pen ding te na hizaw hi. A nuam bek in mihing picingsak lo a, tui hual om kei leh tembaw hawlte siamna kilanglo a, kihal kikkik kei leh sik nangawn khauh zolo hi. Tua manin mihing zong a picin semsem dingin sik bangin akihal, a kikhaihsiang den kisam hi. Tua mihing picing ding ka ut leh kei zong ka nitna khempeuh ka khaihsiang den kisam cihna hi. //
Hau Za Cin
Phuitong Liim
No comments:
Post a Comment