How big is your world?

Hau Za Cin
Phuitong Liim


Nisim in laboratory ah nasem in ka om ciangin ka kiim ah hong umcip pen baang hi mawk hi. Ka ciah ciangin ka room ah ka om a baang li mah in hong umcih hi. Nikhat a hun a tamzaw hih baang li umcih in kizang ahih manin leitung khuadakna pen TV, internet, newspaper khawng bek hi den mawk hi. Tua te in bang gen pen hiam i cih leh mite in bang hih uh hiam cih hi a, a tamzaw te nasep pen baangli sunga kikhumlo, inn pua a baang omlohna tuallak a gamta te nasep tampi hi. Sydney Olympic a tamzaw inn pua hi a, politics hi leh inn pua thu hi a, kimawlna cileng a pualam thu hizel hi. Innsung sangin innpua zai zaw a, taanzau zaw in lian huam zaw hi. Tua in hong ngaihsutsak khat om a, 'innsung bek a kikhum sangin innpua ah dakkhia leng taangzai zaw hamtang' cih hi.


Nang e le?


Na lungsim innsungah kikhum bangin neucik, toicik ahi kha hiam? Baang li in a umcih tawh a kibang kekna ding a om nawnlo lungsim ahi kha hiam? Ahih kei leh innpua ah om bangin lianpi taanzau tak, a kihong lungsim ahi zaw hiam? Innkuan sung, khuasung, beh leh phung ciang khawng bek a huam lungsim toi na nei kha hiam? Na khua na tui kantan in minam leh gam leh leitung mihing te ciang a khual lungsim tanzau ahi zaw hiam? Limtak ngaihsun kik mah dih; na lungsim in koiciang huam takpi hiam. Na huamna ciang nang na tel pen ding hi.


"Ni nungzui" ciang khawng leltak a ngaihsun i pupa te lungsim tuhun leitungah kimang thei nawnlo hi. Khuata khat bek kikhual huna lungsimte tu hun ciang kizang thei nawnlo hi. A taktakin ci leng "ni nungzui" i pupate in a deihna uh pen a neih a lam uh, a lim a al a nek ding uh, a nuam a nuamlo a thuak ding khempeuh uh meltheih sung bek ah kizeek henla, meltheih u leh nau kheng kei leh cih a deihna uh hilel hi. A lim i nek leh i u i nau tawh ne leng; mi ta mi tu tawh i gualnop sangin ei ta ei tu tawh gualnuam leng cih a deihna uh hileltak hi. Angsung thei lungsim hi. Huaiham lungsim hi a, a huam zau hetlo lungsim toi ahi hi. A taktak in ci leng 'ni nungzui' cih pen mikangte kisapna bangah cousin hi lai mawk ahih manin sanggam, unau hi lai hi, tua bang kiteen pen incest hiphial mawk hi. Innkuan khat kiteeng himawk hi. India gam ah Kala/Vai te in amau khuapih te tawh kiten pen 'unau kiteng' (incest) hi ci uh a, khua khat kitengsaklo uh hi. A zi ding, a pasal ding uh pen khuadang pan pui teekteek uh hi. Zomi te in khua khat genloh sisan kinai ciikteek kilasak mawk hihang. I lungsim toi, i angsung theih, i ngaihsutna toi lai hun thu hi.


Hih banga kitheisa, kinaisa sungh leh pu in i kizon kik zel ciangin i kinaihna, i ki meltheihna kikhan theilo a, singtung kah bang hilel hi. Kahto in kumsuk kik; kahto kik zel tawh kibang hi. Singbul kimvial a taitai tawh zong kibang hi. A ngeina teng mah tawh kithei den, kikhawl den, kinai den cihna hi. Tua in i lungsim toisak a, tua in i leitung muhzia liansak khollo hi. A kingaia kiteng te phamawh kei, ahi zongin hunlui hun ah bel kingai ta kei leh kipuisak hi mawk hi. Midang ngaih neizaw phial leh zong 'na pute tanu' kici se hi. A ni a nopni, a dahni in a hehnem ding, a panpih ding, a khoi ding, a khual ding cih deihna hi kha ding hi. Sisan kinai leh ki itna, kikhualna bel lianzaw thei mah hi. A kul leh zong kihilh ngam, kitai ngam hipah hi. Midang khat hi leh hilh ngamlo tai ngamlo dinga, kitotna, kisiatna piangin innkuan nuamlo suak ding hi. Ni nungzui hi phot phot leh bel thukim takei leh 'thuak keikai' ding hilel a, kilemna omzaw hiding hi.


Midang apantah ngamlo, midang tawh kizopna a bawl mengmeng utlo minam ihihna kilang hi. A haksa a phu nuamlo, a olno bek tawh a kimang thei ding a ngaihsun Zomi nam kihileltak mawk hi.


Tu hun ciang leitung huih nungin hong nawk kha ta a, Zomi bek hilo India kala mivom te nangawn gamdang a tun uh ciang nungak leh tangval khut kilen in khualai khawngah hong vak luanluanta uh hi. Khut kilen bek hilo in mikang dan zangin hong kinam tuttut lei peuh uh a, tukhawm leh kikawi ngamta uh hi. Tua bang peuhmah India omlai hi leh hih ding cih thadah ngaihsun ngamlo ding uh hi. Mihing suahtakna gam ah a tun uh ciang amau zong 'vasa khahsuah' a gen mah uh bang sam hi. Zomi zong tua bang mah. Lawm kingaite khut kilen ziauziau, tukhawm ziauziau ta lel hi hang. We have come a long way. Nu leh pa, pi leh pu te in bel hong awi hetlo kha inteh; zong tuabang dingin hong ngaihsun lo ding uh hi, amau ngaihsutna pen 'hua hunlai' pek a hilai ahih cianga.


Hibanga leitung huih nungin hong nawk khakna mun ah ei zong i lungsim i liatsak ding hilo hiam, ka ci hi. Lungsim liansak ding cih ciang i beh i phung ciang bek, i u i nau ciang bek huam ngaihsutna te paikhiain minam leh gam ading ngaihsut huai hilo hiam ka ci nuam hi. Ko khua ah tua pau kizang cihcih hun nawnlo a, ko tua kuam, tua beh, tua pawlpi cihcih hun nawnlo hi. I vekpi a khantohna ding vai kikup hun hi a, i vekpi a khantoh ding ngaihsut hun hi. Minam khantohna dingin mimal khantoh kisam a, mimal khantoh kei leh minam khangto theilo hi. Mimal khantohna i neih ciangin a meet ne ding minam hi hen la, beh leh phung leh khua leh tui bek hi kei leh hoih ka sa hi. Mimal khangto khat a om ciang "ko a pa hi" "ko khua pa hi" cih i gen tam luat ciang a huam lianzaw minam in suplawh hi. I lawhcinna, i khantohna in minam ban hen la, u leh nau sung pen gen kullo a hisa hi. Tua bang kalsuan dan i minam sungah i hanciam kik ding kisam mahmah hi.


Na lawhcin ciang, na khantoh ciang nang leh na tanau ciang bek ah tawp kei leh minam in meetpih ding hi. Nang leh na innkuan pih teng bek in na khantohna na gaih kiuhkeuh uh ciang minam sum hi. Na khateh minam in a top theih ding kisam hi. Lawhcing ta ing, nuamsa ta ing cih ciang minam leh gam na khual nawn kei a, nang bek nopsakna na zon leh na minam sum dinga, na vaang a bei ciang nang zong na sum dinga, na keu ding hi. Tua hun ciang kuamah in nang hong don nawnlo dinga, minam kidon kei leng minam kisum ding hi. Tua manin na nopsak hun ciang zong minam leh gam ading na khualna a bei ding hoih tuanlo hi. Nang zong na minam pelh in leitungah na khuasuak tuan kei ding hi. Hauhna kip denlo a, liatna zong kho tuanlo hi. Zawng den ding cih om tuanlo a, hai i sak mahmah khat zong ulian suak mawh lo hi. Tua manin hi kisa lua in minam leh gam na kin bawl kei leh tua minam leh gam in zong nang hong kinbawl kei leh sawt na nopsa tuan kei ding hi. Minam leh gam nasep pen i hih theih bang tek a sep ding ahi hi. Kidang koih theih cih bang omlo hi. Lungsim liatsak kul hi.


Nopna dahna a om ciang minam khat pen kikhual kul hi. Kihuai kul hi. Ki it diamdiam ding kisam hi. Daipam lama mizawng khat i phawk sinsenna pen i thupi na hi a, minam i itna hi in; tua te mangngilh a khuapi laizanga u lian khat bek i pi bawl keeina pen minam thupina hi masa lo hi. A huai kul khat huaina, a kep kul khat kepna, a dah a kap khat khualna pen thupina hi a; a nuam a thupi bek delh ngengngangna pen picinna hi khin khollo hi. Germany ah Zomi khat luang pham loh a om den cih pen ngaihsun taktak leng Zomi te aw, minam thupi ihihna hi masa khollo dingin ka um hi. Malaysia ah, Delhi ah, Singapore ah, Korea ah, Japan ah, USA ah -- Zomi te in tua bang haksatna tuak, tua bang dahna tuak, tua bang huai kisam om cih i zak ciang i sep kei leh -- Thupha Ngah Minam kici aw, A Khangto Minam kici aw, Topa Pasian in a nei Minam kici aw.... na zuaupi hi, umveih. Zomi kipawlna, Zomi ka it ciin kam dimdim in i pau hang i mi i sate khuallo, donlo in om leng bang hiam a phattuamna, bang hiam a metna, i thupina om khollo hi. Mipi kikhop cianga amai gual a tutna sangah nektie awka tut liatluat pong ciang khawng bek thupina hi khollo hi. Makaipa, siapa ci a mite hong theih, hong nohset ciang khawng bek thupi khollo hi. Minam makai, gam makai cia mi deidan nei a nasepna zong minam itna hi lo a politics hizaw hi.


Tua ahih manin Zomi te in lungsim lian i neih ding kisam pha mahmah hi. Hih sanga khantoh zawk i sawm a, hih sanga sangzaw i phak nop leh kisin taak mahmah ding hi. Minam banga mite in hong theih ding i deih leh i kisin ding tampi omlai hi. Tua kisin ding tampi lakah ei unau sung, ei beh sung, ei khua sung, ei kual sung cih bang ciangciang bek huam lungsimte i kek a, i liatsak a, lungsim tangzai leh Zomi bek mah cih lungsim i neih kisam hi. Tua hilo a, ko tua pau zangte hi ung; ko tua beh te hi ung; ko tua khua kiim teng hi ung; ko tua pawlpi te hi ung... cih bang lungsim i neih kiukiau den leh minam 'ZOMI' bangin khangkhia khol kei ni. Minam dang lak ah thelthang in mangthang lel ni. Zomi cih leitungah minam bangin hong kiciamteh khol kenteh. Mite minam i suahna mun ah a Zomi teng mah kimu khawm luailuai ding hi hang.


Minam khat a hong bawlpa in minam khat a i din ding hong deih in ka um hi. Tua bang ahihna dinga ze-etna te zong thuakzo ding leh palsatzo dingin hong ompih ding cih ka um hi. Minam thupi hihna dinga hong dalte enlo in minam thupi Zomi i galmuhsa lui gala pen bek mitsuan kawm in luineute kantan pheiphei ni. //