"Paisuk tai thum, paitoh tai guk," hong ci bilbel hi. Pyidawtha te, ka zinpa uh Kawl leh Tedim kigamlatna ka dot ciang tua tawh hong dawng hi. A ciamnui kawm bel hisam.
Lamto kah pen gimhuai hi. Lamsuk pai leng kitungbaih zaw hi. Suk puak leng phadawm a, to puak leh i kawng kham hi. To tai leng i kampau banglo a, suk tai leng kamdimdima pau mah tawh kibangzaw deuh hi. A nuam khatzong om tuan kei. A phei a pai zong baih tuanlo hi. Zomi ten bel lamsuk leh lamto kitam zuihzaw ahih manin lamphei na ngillah tek uh a, "lamphei tawn nuamlo omlo" na ci liang uh hi. Upa te in kum tampi a etcik zawh uh ciang amau tuah thu pan a pulak khiat uh kammal ahi hi. Own experience a cihte uh hi. I pianna bulpi kithei nawnlo a, upmawh thu vive tawh ki awng ngeingai tek hi. I mit keuhna mun bel kithei lai a, i khuamuh cilna mun bel zangsung sang khamlak hizaw ahih manin mawtaw hawlna akilim zat mahmah kulna mun hi.
Ka nu tawh lo ah Za lo, bawm dima pua, aman zong seng dim a pua, ciah. Lo pen nai mahmah hi. Lo pan inn pen kisuk pai pian hi. Paipai, inn tung dek ciang Hanmual na om hi. Hanmual taw pan inn dong lamto vive hi. Lo pan ka van a gik khollo pen khawtaw pan gik mahmah ta hi. Kito kahpihzo nawnlo hi. Letli pua bel kihi samlo hi. Za pen teep ding, buk za ding, zuak ding cih bang hi. Zomi te leh za pen kikhen theilo hi. Lokuan le uh zatep uh a, lo ah thosi thovai te in petlo pah hi. Gamsa Sahang leh Ngia te in naih nuamlo hi. Tua manin za pen Zomi te survival na dingin a kisam khat ahi hi. Khuataw pan ka van puak pen to kahpih dingin hong gik mahmah ta hi. Lu siip in, khe kikhai zo nawnlo hi. Lamsak phung tung kingaito in ka din khawl leh ka nu in ka van hong letsak a, "Giklua maw?" hong cih khit ciangin, dawnna ngahlo ahih ciangin theisiam hiding hiven a lang taang ding suahkhia in inn pan ka la kik uh hi. Lo pan bel phamawhlo hi. Lamto pan bel 'senpi' vetlo thong!
Nungak hel zong tua mah bang pian hi. I nungak hel pen in hong hisak thei pianleh a nu leh pa in hong phal kei zong hong lemlem lel hi. Ei tawh kiho ding a khamphial uh zong a tanu un ei tawh kiho theihna ding paulap pen mulah vetlo hi. Kimuh theihna ding zong ngian tam theilua lel hi. Nuvaw, nuvaw... kicici lel hi. Ahi zongin lamto kah bang sak in hong ngaihbawl kei mawk leh kihona ding lem i bawlbawl hang zong za thei vetlo uh hi. Nungak hel pen lamto kah tawh a kibatna om kasa pian hi.
Khualzin ciang zin zon zong lamto kah tawh kibat hun om hi. Hong kitungsak nuam kei leh 'zin nei khin ve ung aw' ci pong un neilo ding cih i theih pipi zong 'nei' cita phot uh ahih cianga suppreme court thukhen zum banga 'nei kei nuteh' ci a va tangnial theih hilo in, 'aw, hong hisak zolo uh ahi ve maw' cih tawh kipusuak kik hi. Hong it bawl in hong tungsak pah le uh maipuang tui awm i meh a, sianmawng tui bek i hawpkhawm zong lim kisa ngaungau a, luipi tung ding mualdung pan tuaksuk tawh kibang hi. I tha kizan in, i sa malh hanhan a, i tawldam in, i bil vang hanhan hi. Aksa meh in bawngsa meh taleng a sa i suah khak ding hong kikihta pian leh lim lua khollo a, Aizawl khuasung steps tokah mah bang pah hi.
Lamto kah tektek ah zong mawtaw tungah tuang leng phadawm. Mihing khe Sen gam pek pan i zat suksuk pen tawh to kah thong bel olhiau lo. Mawtaw vanleng sakol tung tuang hipeuh leng a dan khat omzaw deuh. Ut leh Aizawl khua to lut aw, a ut leh Tonsim khua to lut aw, a ut leh Singngat khua to lut aw, a ut leh Tedim to lut aw (ci ding hileng Tedim pen a kito lut maw, a ki suk lut theilo, sorry)... phamawh kei, khe tawh suk lut sang zong nuamzaw pekpek hi ei. Ciau lui geia Lih Bual (Lih Lake) en dingte a khua ah to kah teitei kul hi. Khe tawh hileh khuk kidomdom dinga, mawtaw tawh hileh kinui to veuveu lel hi. Lih Bual gei ah 'tuisik mantam' om hih tuak a, ciah lam ciang Mizogam pan paite bang nui sa mahin ciahkik uh hih tuak.
Khatveivei i nuntakna zong lamto kah mah tawh kibang aive (ci ding hi leng...gospel lam ah lut zel veh hong kici kha ding aih ciang)... tua lam bel gen kei ni.
Khual kizin tek a, khe tawh a zin pawl om a, khe tawh a zin ngei vetlo zong om ding hi. Khe tawh a zin ngeite in lamto kah haksatzia tel dinga, a tualo te in tel khollo ding hi. Lamphei tawn leng khuasung vak bangin kihei dada theih deuh a, nawh pai kei leng lah kiziakai hi. To pai leng khenuai kham a, suk pai leng khuk zek hi. A tawldam penpen bel, "pai suksuk, pai suksuk inla, hunta vak na cih ciang kawi lian lecin, tua mah tawldam pen ding hi."
Hau Za Cin
Phuitong Liim
No comments:
Post a Comment