Sangsia ginalo

Zolai at a kisin tung ei khangthak pawl lai gelh theihna ding hunpha i ngah leh 'tagah nawimu' a gen bangun am mahmah mai ni maw.

Zolai gelh masa i mi masa Siate Rev. ST Hau Go, Rev. Khup Za Go, Rev. Zam Khaw Thang, Col. H. Kam Pum, etc leh midang tampi nungah tu laitaka nupi papi ahi honkhat om a, tua zawh ciang ei khangthakte i hi a, ei zom ah khangsawn momno honpi khat mah om ding cih Zomi Siamsin Magazine 2009 na sim leh na mu thei ding hi. Tu laitak hong dampih lai sungpan "Ka sih ciang lai kuang tawh hong vui un," ci a genkhia ngiat, lai a it luat man leh lai a thupisim lua, 'a pen' ci leng zong khial lua lawmlawm kei ni Sia Rev. Job Thawngno ahi hi. Minam leh lai a kemcing nuam Prof. Dr. C. Thang Za Tuan leh midang tampi om, genkhin zo kei ni.

Amau thu a gen nuam i hi kei a, amau zom ah ei tuni a laigelh kisin lengleng pawl cihnopna hizaw. I gennop pen bel sangsia ginalo ahi hi. Zolai tawh utut kigelh thei, Zolai zangin zong utut kigen thei cih lahnopna bek hi. Cimphawng a cih pawl uh hizaw. Laigelh kisinna zong hipah.

Khatvei Zolai sia khat in, A=Ak khuangta, thawh hunta cih pen inn lai in pia a, a khiatna nong kan ding uh ci hi. Naupang zong ciah in, a nu leh pa kiang dong pah lo a innsunga kisuang a et leh A=Abraham, ta pia ngam cih na hi hi. A zingciang sanginn a tun ciang a siapa in na dong lian a, 'A=Abraham, ak khuan ciang tho in, a tapa pia hi' ci hi; siapa zong a ihmut suak pian ahih manin Abraham zingsang thobaih in a tapa Isaac tonpih a, Horeb mual tung ah biakna pia dingin a paipih hi cih phawk ziziai ahih manin,"maan hi, tu o," ci a, full mark a ngahsak hi. Sangsia ginalo.

Khatvei leuleu Zolai sangsia khat in, "Hihpa lai at 'Pankhawm Hatna Hi' cih pen inn lam ah hong sim unla, zingciang kikum ding (group discussion) nei ding ci. Amau zong ciah, inn a tun ciang a nu leh pa kitawng in, "I tapa thumanglo pen nanghang hi," ci a na kingawh uh. A nu in, "Nang pasal hive cin, na hilh kei ding maw," ci. A pa zong ut deklo, "Nang a nu hive cin, na nawipiak kawmin thuman ding na hilhpah kei ding maw," ci. A mawhpua ding kuamah utlo. Na ta hiven a ci leh nang kep nang khoi hiven a ci tawh, kithutuak theilo ahih ciangvua, a ta zong sanginn a tun kik ciang kikupkhawmna ah: "Siapa aw, pankhawm pen ahi thei vetlo hi," a cihnopna in, "pankhawm hamsa hi," ci hi. Banghang? "Ka nu leh ka pa zong pangkhawm theilo hi, ahi zongin a ki it a kiteng mah uh hi," ci hi. Siapa zong sau ngaihsut khollo ahih cianga, numei pasal zong ngaihsutna a kibanglo thei himah e ci kawmkawm in, "Maan hi, tu o," ci a, full mark a pia leuleu hi. Sangsia ginalo.

Zolai sin ziahziah, A=Ak khuangta, thawh hunta, B=Bi leh lo gamlak po, .... ci toto, Z=Zomi te hanlungciam khangto diam, diamdiamdiam? a cih ziahziah khit uh ciang khat khat a gensak. Tua laitak naupang khat in a khut hong lamto in, "Sia aw, Z=Zomi te hanlungciam, kikhentoto diam" a cih leh a siapa in zong ngaihsun ngeungau in, hisa lua, dik salua, ahi zonga hi cipah ngamlo, zuau lah gen utlo, 'thudik gen ding, thuman gum ding, zuau genlo ding' ci a sangnaupangte ahilh den, apattah denpa leh amaute model hisi ahih cianga, a tawpna ciang hamsa sapipi in, "Zong hi peuhmah veh aw mate," ciin, "Maan ei, tu o," ciin, full credit mah pia leuleu hihtuak hi.

Zuau genlo sia i ci diam, sia ginalo ici zaw diam?

Zolai lunglut huai peuhmah hi ei mate.

Hau Za Cin
Phuitong Liim