Saturday, March 10, 2007

English na siam hiam?:

Na pau thei hiam, na at thei hiam, na sim thei hiam? English na siam hiam? Siam kisam na sa hiam? Siam kisam mah hi. Ahi zongin i pianpih hilo ahih manin siam mahmah ding kuaman hong lamen lo a, lametna zong om masa lo hi. Siam mahmah kei ta leeng zumhuai lo a, i innsung pau hilo hi. I beh i phung tawh i kihona hilo in i tengta kineihna pau ana hilo hi ven. I thei het kei kiuhkeuh zongin kuaman hong mawhsak theihna om lo a, kuaman hong nuihsan na ding a hang omlo a, niamna leh saanna tehna zong hi lo hi. A thei masa te ahampha cihman bek hi a, i theih nunun hang a zumhuaina om tuanlo hi.

Ahi zongin sangnaupang khat, tulai leitung pilna sin khat adingin English pen a siam ngeingei ding a kisam tawh kibangta hi. Zomite in leitung bup nawk ding leh tuancil dinga kal i suan laitak in pau a theih nop pen leh a sin olpen English hi mawk hi. Ahangpen i Zolai tawh kibang mahmah, ki naih mahmah hi. Leitung bup ah zong a na kizeel zaw phot ahih manin a hamphat huai sawnsawn hi.

English siam leh siam loh a theih nop uh ciangin kiho sak masa lo uh hi. Vaidawnna leh vaikhakna kam gensak a (Welcome, Farewell speech), Thuakpihna thu gensak in (condolence message), laikhak atsak uh hi (letter writing). Tua thum ah a zattheih leh, a gennop a kitel leh a dang kihona pau mawkmawk pen a ollua zaw ana hi hi. I dahna bang gensiam, i lungdamna bang gensiam, khamuanna thu gensiam cih pen paukhat a zangkim thei in kingaihsun hi.

Pau khat peuhpeuh i pianpih loh, i innsung ah i zatloh, i ankuang tung thungetna in i neih loh pen i siam pah kei leh zong zumhuai in ka ngaihsun kei a, a siam pahpah te enhuai bel kasa hi. Ka sangsia pa khat in pau nam 11 thei a, a vekin a paunak natawm uh thei mawk hi. A kisin sin hilo napi khatvei a zak pen ciamteh toto thei dan hi, talent hoih neih mahmah hi.

Hau Za Cin
Phuitong Liim

No comments:


Blog Archive