How much?:

Nisim nitak nai nga a sat sim in ka Professor lab ah hong lut in "so what's the progress today?" cih hong dong den hi. Tuni bang sem na hiam?, how much, how big, how, how, how.....

Inn bang ah a kisuang milim khat ah i Topa hong itna 'This much' ciin a khutzaak in singlamteh tungah si hi cih ka mu ngei hi. Ama nuntakna natawm pia khia in a mawh a khialte hong it zen hi. Ei tung pan lamet neivetlo (condition omlo), nong it kik ding naak uh leh si ngam ing cilo a akicilphih hangin zong hong itna khiam tuanlo hi. Mihing tawh i ki lamdanna hi. Topa ahihna kilang hi. Muanhuai a belh huai hi mawk hi.

Mihingte hih zah in ki itlo, muanhuailo i hi hiam? Thuhkikna a om kei ding leh kihuh nuamlo, ki panpih nuamlo ihi kha hiam? Condition vive tawh na khat peuh peuh i paipih den kha hiam? Ui pen mihing adingin lawmhoih khat hi ciin kiciamteh hi. Ahi zongin tua ui in mihing khempeuh a it hi tuanlo a, a pi leh pu bek a it hi a, api leh pu in it hi cih a theih cian mahmah ciangin tua ui in zong a it hi a, akithukkik itna (conditional love) mah hi veve hi. Mihingte zong tua zah in hong it taktak hi, hong ngai taktak hi cih thei leeng ganhing ki itna sangin i ki itna sangzaw, lianzaw, kipzaw dingin ka um hi. Ahi zongin akithukkik itna mah hi a, i TOPA itna tawh a kilam dang hi kik hi.

Tan sawm all-D a ngah leh pahtawi ding cih pen kiciamna nei itna hi a, all-D a ngah kei leh a ki pahtawi ding hi lo hi. Na zawh limlim leh hong kipahtawi ding hi cih tawh a kilamdanna omlo hi. A condition, a kiciamna pen sangzaw cih bek hi. Naungek paithei tungte 'pai pai aktui lawhlawh' ciin a nute in lampai sinsak thei hi. A pai theih kei leh aktui lawhlo ding hi zen hi. Lametna leh kiciamna a tate lampai theih tung pan neisak pah cihna hi. Sumbuk ngak pawlkhat in hong genna vuah a vanzuak uh tam a khot leh 'pahtawina (bonus)' themkhat kipia ding hi cih om hih tuak hi.

I nisim nuntakna pen thuhkik ding lametna bek tawh a kidim den leh a gim huai mahmah ding hi mawk hi.

Hau Za Cin
Phuitong Liim