Saturday, March 10, 2007

Na vun a sah hia?:

En votsa a puan a lum theithei i silh lai tak in nungak pawlkhat in puan-ak gina zong silh sese lo, nik kician zong silh lo in hong vak hialhial lel uh a, vot sa lo uh ahi tam cih hong ngaihsun sak hi. Phalbi hi ta leh votsa se lo a vun uh sah deuh ahi tam, a lungsim uh sahzaw a hi tam. Ahih kei leh cidam lua in a pumpi in khualum a piak pen lumzo lel a a pualam khuavot zong phawksak lo ahi tam. Ahih kei leh vot sa pipi mah nalh ding utzaw a, a votsalo ki neih ahi tam..... a theite gen danin 'hoih loh khak ding lau' hih tuak zaw hi, nalh ding pen thupi mawk hi........ khatveivei tangval te zong puanlum silh ngailo in om thei cih khat za ngei ing, amau a bel tuam deuh 'phalbi puanlum haikhat' cihte pawl hih tuak.

Zomi te nuntakna ah kumkhat in hun thum kikhek a - Khuakhal hun, Tuuk hun leh Phalbi hun ahi hi.

Khuakhal hun sung lum kisa a puan-ak pan thei thei leh khua-ul hup thei patpuan (cotton fabric) kilim zata, khuavot kiphawk lo hi. Tuivot leh singlim kingai a theithuk leh ci-al kituak se hi. Tuuk hun hong tun tak ciangin guahpi van-awn in zu a hih manin ci pumpi kawt a, inlim leh insung nawngin huihvot hiauhiau nung den a, meilum leh puanlum kingai a, vaimim em leeng nuamse hi. Phalbi hong tun tak ciangin a votdan kibang nawnlo a, nu te in tate kiangah na puanlum silh in ciin khuavot a thuak loh ding a hilh den uh hi.

Singteh kikhek bangin khuahun zong kikhek a khuahun kikhek bangin ngaihsutna zong kikhek hi. Ahi zongin a kikhek ngeilo pawlkhat omveve a, nungak pawlkhat in nalh loh a lauh luat manin khuavot zong phawk lo a, vot a salo hi lo hi. Tangval pawlkhat in 'sunglam phalbi puanlum' a silh uh pen vot a sak man uh hi khin tuanlo hi. Vot ta leh nalh kisam, khualum ta leh sunglam puanlum silh veve.... vun sah dan kibang lo hi....

Hau Za Cin
Phuitong Liim

[.... nong dotna uh, ka theih tel thu hi kei in, upmawh nei ing, ka upmawh dan hong kum leng.]

Body Spray pen ka khatvei zakna hi. Numeite nopsakna ding pen Cosmetic Research tein a lim ngaihsut mahmah uh hi mawk hi.

A zatui lian pen thei kei ing. Ka upmawh danin nisa dona, sun screen dan khat, pumpi tungpan cilum a huthe ding dalna (heat leak proof) ahi tam ci ing. Vun leh stocking kikal ah tua cilum a thaamsak ding zatui hi dingin um ing, huthe khia lo in. Pumpi in cilum khua-ul dan-a vun vang pan a paihkhiat zelte stocking tawh kikal ah meikaai bangin (cloudy sky or fog) zaamsak, lengkhia saklo ahi tam ci ing. Cosmetics Research lamte in applied science pen limsin mahmah uh a, ahi zongin nai bangzah sung kithaamsak thei diam ka thei hi. A stable dan tawh kisai in nai 3, nai 4 sung cih bang kimang thei bek ding hi. Tua zawh ciangin kisia in ahu suak kik khin dinga (disintegrate or break down), a cilum dalna bei ding hi. Vun leh stocking kikal pen 2cm bang pha ding ahih manin spray pen sah mahmah in thaam dinga, cilum pen huthesak lo takpi ding hi.

Uitui pen lamdang sa ing. Ahi zongin a tunga spray zahin bel nai tam a ki manglo zaw dingin um mawk veng aw.... ahang pen uitui sunga chemicals te a ki design lo hi ding ahih ciangin.... (nature self design ahih leh thutuam). Uisa peuhpeuh i nek khit ciangin ihmut suak sak in i tha zawsak niangnuanga, i gilpisunga lumsak heha hi.

A lamdang pipi research hih ding tam mawk ei maw!!

Hau Za Cin
Phuitong Liim

No comments:


Blog Archive