DALZAZI

- Hau Za Cin, Shillong


Tualai khangnote adingin i pate khang i cih theih, tuma kum sawmnih tan in zong diary (nisim hunzatdan ciamtehna) pen dalzazi kici ngangngang hi. Ahizongin tulai khangno pilna neite in ‘dalzazi’ ci nawn loin ‘diary’ kici ta a, tua manin tuni thulu dingin dalzazi azang ka hi hi (hihmun panin diary cih vive ka zang ta ding hi). I pate khang diary te kepcing ciat dingin hoih a, Zomite tangthu saal ahih manin mailam ah sum tampi tawh kilei nuam ding hi. Nu leh pate diary neite Sumgum nei khat hipah hi! Gentehna khat gen leng: Kei muh theih diary thupi penin, Murlen khua-a ZBC Pawlpi phuante laka khat (hong nusia sa) Pu Kham Ngo Thang diary hi. Kumsim sa kiman zah, buh neih zah, lokhawhna mun, naupiang, etc. ban ah khuasung leh innkuan sung thupiang khempeuh ciamtehpa hi-a; inn-papi, khuasung-papi/secretary cing mah mah hi ciin ka ciamteh hi. Ahizongin tua lam ka tamgen sawm kei a, ka gennopte anuai-a bangin gen suk zuaizuai pak leng.

December 23, 2002: Kumdang mah bangin Lungdam Bawl leh Kumthak zang dingin ka siamsinna Shillong nusia in Murlen ka zuan a, khua tungman loin Aizawl ah ‘LungdamBawl - 2002’ ka zang hi. Aizawl Zomite biakinn pen Ramhlun(S), lamtung ah om a, ‘A sangna lam ka kahto hi..’ cih la bangin kikahto ciaiciai hi. Biakinn sung i lut leh etlawm mahmah in’ siangtho a, lasak nuam in thungaih nuamsem hi. Mikangte kikhopna bangin puanak kang leh pheituam vom vive tawh kizem uh ahih manin kilawm a, biakinn zahtak in tu khipkhep uh hi. Biakinn dawlnih pha-a : atung ah kikhawmin a dawlnuai ah naupang nipisang nei uh hi. A dawlnuai deikhat pen biakinn cingte (tulaitak Pa Gin Sian Muan) omna hi-a, Lungdam Bawl niangtui awmna leh ann huanna zong hipah hi. Zunbuk numei leh pasal ading atuam in om a, tuidawn ding zong om in – vanzat tuamtuam kicing hi.

January 1, 2003: ‘Topa tungah lungdam ka ko ding..’ December 28, 2002 in khua tungin, ‘Kumthak Pawi–2003’ nuamtak in Vawksa tawh ka zang uh hi. Kumthak khek-leh-ni zatna dingin Ngalkhaat khat Pasian in Upa Suan Lian Thang tungtawn in hong pia a, nuamtak in kazang kik uh hi. Tukum Pawi lamdanna khat pen annkuang kilui nawn loin, annkuang kidawh zawta hi. ‘Buffe system’ kici a, ei kham dingzah eima kuang ciat tawh kidawh hi. Mikangte zatden ngeina hi mahleh Murlen ah akizat cilna hi-a, mi khempeuh kilawp sak mahmah hi! Khantohna namkhat!
Tutung khua ka ciah pen ka ngaihsutna ah thu nih hong piang hi. A khatna ah Laisim i hahkat mahmah ding kisam hi. Lo khawhna ding gam leh lei hoih nawn lo, nekzawnna haksa deuh deuh, sum leh pai kisam deuh deuh, Murlen khua hauhna -gamsa leh buh zong kinetum ta. Lungziin huai kasa hi. Ki itna lah kiam, angsung theihna lah khang. (Mikangte nuntak bangin) nang nekding nang thalawh in cih hita!
A taktak in cileng, nekzawnna pen a kip khat neih ding na himawk hi. Ak banga nektawm zong a nuntak pen tulai ciangin ahithei nawn lo thu hi. Miksi bangin innkuan kham ding kholsa, koihsa neih ding thupi hi. Tua dingin kal suan ngai a, paunak khat in - ‘mihing in a tam hinpih, ngasa in a tam sihpih’ a cih mah bangin mihing tamna lamlam ah nekzawnna kip zon ding hun hita hi.
A nihna pen Pasian phawk ding hi. Khangno pawlkhat Khangno kikhop ah kikhawm ngeilo bek hilo in pawlpi kikhopna zong a thupisim lo om hi. Tampi gen man lo ding ihih manin a tom in – mulkimhuai kasa hi. Midang eng lo, sum leh pai zong kiningcing, annkam lim-a cidamna zong hoih hi kha in teh, ahi zongin mailam dingpen (ka gensa) - mulkimhuai kasa hi. Mulkimhuai!!!

January 12, 2003: Upa Khai Za Dal tawh kum 2003 sung Hnahlan ZBC makai ding kiteelsak in ka pai uh a, nuamtakin ka zo thei uh hi. Hnahlan pawlpi pen a milip a tam loh uh hangin citak uh a, Pasian mucian uh a, khantoh sawm mahmah uh hi. Kimuang zo uh a (confident), manlah lo in lungsim kiptak tawh picing takin gamtang hiathiat uh hi. Hihpen mipil icih civilized or cultured society omdan hi. Ka sangkah pih ngei Nu Vung Ngaih Dim te inn ah nupi te khuppham hahkat dan a gen uh ka mangngilh thei kei hi. ‘Mihing a ne ding phazah zah ka pham uh hi’ ci uh hi. Mi 5 nek ding ahih leh khutdim 5 pham cihna! “Ki kham lo cih om lo a, kitangsam cih om tuan lo hi” ci uh hi!! (Ka mangngilh thei nai tuan kei hi!).

January 24, 2003: Champhai ZBC zum ah Laitai tatman pia in, Shillong naupang nipisang laibu ding leh kei ading Mangmuhna Hilhcianbu, Sia Job Thawngno laibu pawlkhat leh ZBC Steel Anniversary Souvenir leh CBA kum 40 cinna Souvenir te lei in Shillong ka tungsuk kik hi. Ka lamet bat loh, Sia Job Thawngno in PHUITONG Magazine ka khak a ngah man-a a lungdam thu hong gen bek hilo in ama laibu gelh bu tampi letsongin hong khak hi! Mi deihsakna i tung hong tunga i lungdam luat leh bang cih ding? Ken bel hibang hong deihsak ding mihoih hong pia Pasian tungah lungdam ka ko ziau hi! Cihna ding ka theih sunsun hi ven. Please…
Mipawite pattah a lunggulh thu leh, laigelh a hahkat sawm thu hong gelh-a ka zahtak mahmah hi. Mel kimu in ka kiho loh hangun a nuntakzia mi gen ka zaksa hi a, bangmah ka huh zawh loh hangin tha hong pia mahmah hi. Sanginn ah email ka sim leh Siapa leh Siapi Thang Za Tuan, leh Sia Paul Thuam Thang te hong email khak ka mu a, PHUITONG Magazine ka khak a ngah uh lungdam thu genna vive hi. Ahizongin asawt lo in Sia Paul Thuam Thang in hong nusia cih email ka sim leuleu a…… leitung ah khualzin ihihna ka phawk kik vat hi. Nungciangin a nopna vantung gam ah kimu pan ding hihang maw cih in ka kinem hi.

Cidam in nisim sangkah kikin hun awng ka neih sunsun ciangin ka laibu leite ka sim zel a, theih loh kalin kumlang bang hong beiman mawk hi! Thupiang tampi - ZBC Mission Khoppi khatveina Champhai ah om-a Sia J.M.Ngul Khan Pau in hong zatpih, Gambup numei kikhoppi Vapar ah kizang, Nipi Sangsia thusinna Champhai ah kinei, Zeisu maw Jesuh maw Jesu, etc. etc. a tuamtuam mimal leh pawlpi kalsuanna te zong ka phawkkhin mankei hi. Tua bek hilo in, Steel Anniversary Souvenir-a Murlen Pawlpi phutte min Pa Kham Khaw Thang kici pen Pa Kham Ngo Thang cih zawk ding leh March 7, 1987 Kikhoppi neihna khua Vapar kici pen Murlen cih zawk dingte zong (mailam ah khialhna a om nawn lohna dingin) asai Siate ka theisak mangngilh dektak liang hi.

* * * * * * * * * * * * * * *