Patauhna ding om kei:

Pasian biakna a hal ngam om a, a mu ngam lo a kun ngaungau liang om a, a tang et ngamlo a nuailam a en teitei om a, a khedap tawh a sik ngamlo a khedap a suah teitei om a,.......... .. a dang zong om lai inteh.... Pasian mai ah hangsan dan, zahtak dan, it dan kibang lo hi mawk a, leitung pen a lamdang veve hi. Thuciam Lui hun lai in, mit taangin mit na kici a, Thuciam Thak hun ah phuba peuhmah kuama kaingah na kila kei un ci leuleu a, a hi zongin a thukhupna kibang veve a, mi khempeuh in ama tuh bang teekteek a at ding ci hi. A hoih a tuh te in a hoih at dinga, a sia a tuhte in a sia a at ding ci hi. Tua pen Christian upna hi lo a, a nungta Pasian kammal hi mawk hi.

Na galte na do in ci lo a, na it in ci zaw a, thu na ngetsak in, na maisak in ci hi. Ei maisak ding ci a Pa in maisak ding hiam maisak lo ding hiam cih pen kuaman theilo in Pasian Tapa in zong Apa thukhenna ding khatzong theilo hi. Tua manin ei mihing te patauhna ding om in ka um kei a, i Pasian i belh tinten ding, Amah i muan tinten ding bek kisam hi in ka um hi.

Luka 10: 27: Amah in, “Na Topa Pasian na lungsim khempeuh, na nuntakna khempeuh, na hatna khempeuh, leh na pilna khempeuh tawh na it in la, nangmah na ki-it bangin na vengte na it in,” ci-in kigelh hi, ci-in a dawng hi.

Tua ahih manin ei patauh na ding om kei, vantung pan misia mipha a kibanga a mu khin Topa in mu lua hi. Tua manin lungnuam tak in om ni. Zong heh kei ni, tua bang zong ngaihsut sawm het kei ni. Hehnopna lungsim zong nei het kei ni. Ei sang a hehzaw Pa khut ah nga ni. Ei sang a thu i zak loh khempeu zong aza, a telzaw Pa khut ah kip hi, muan huai hi. Muan huai hi. Tua manin patau kei ni. Heh theihna, hehnopna, thangpaih nopna lungsimte a om khak zenzen leh Topa mai ah maisakna ngen zaw ni. Ei a hilo a, a Neipa a hi ven.

Patau kei ni. Kunglam zuan a i taina maban zom zel ni.

Hau Za Cin
Phuitong Liim