..ni 5 bek omta... :

Tun bel Laitui te hi nawn kei sam ei. Tu kum beina ding ni 5 bekbek omta cih hi zaw hi. Ni 5 hong cing leh kumthak hong hita dinga, lai at zong damdam in kikhiam deuhdeuh ta ding ahih manin ngaihsut khawl ciang hong lungzuan huai khawl pian hi. A kahbia a kahbia lo ci kei ni, i maban ciat mah zom tek ni. I gen ut khempeuh gen gen a kilawm lohna leitung, hong ngai khempeuh hong it a hih lohna leitung, hong pakta khempeuh hong deihsak ahih lohna leitung, kumlui khempeuh kum sia ahih lohna leitung, hong tung ding leh kumthak khempeuh a hoih kum hoih a hih tuan lohna ding leitung, mihing leh ganhing a kilawmtat semsem hanga, mihing leh mihing a kigal neih sesemna lei tung, a hunhun, a kumkum a vangam saang leitung a ki it zawkna sesemna leitung, vaphual sang sihal a punzawkna leitung, itna ngaihna kilawmtatna leh kikhawlhkhawmna sang sum leh pai neih leh lam leh letna neuna tawh na khempeuh a kiteh ngiatngiatna leitung.... bangzah i behlap lai dia? Kawl leh Zo u leh nau cih hunte in mual a khup vangvang na leitung leh Zomi ngeina sang vai leh mikang ngeina in a ciah kik ding khualzin bang hilo a van neih khempeuh tawh hong peem hong tengsuak ding banga hong inteek taakna minam sung.....

ni 5 bek omta.... Singlamteh tunga kithat ding Zeisu in a hun nunung in bang a ngaihsun tam? Saddam Hussein kumtawp ciang kikhailum ding cih kiza, a tak ahih leh bang a ngaihsun ta tam? Kumbei ma a sum leh pai leiba loh dinga kiciam, ahih hang a neilo hi leh bang a ngaihsun tam??

Kumbei cih zong a hun simna bek hi a, a ni leh kha te kibang a, a hun ngeina sa bang mah in Ni zong zingin suak in nitak in tum a, leilu leitaw kidang tuan lo hi. Zikbem (circle) bang hi lel a, a kual paipai hi mai hi. Ni 5 bek a omlai a, ni tul a om zongin a ni suak kilamdang lo a, a simdan bek kidang hi.

Christmas ciang Kumthak ciang cih tawh kiciam sese ngai tuanlo a, hun khat peuh ah mihing nuntakna pen maban zop zop ding hi zaw hi. Zinga kuan leh nitaka kuan a nitha a kibat mah bangin tuuklai a hausa leh phalbi sunga summu te a sum kibang veve hi. Pawlkhat in tuipuan zuak a, pawlkhat in puanlum zuak hilel hi. Ansa zuak om a, ankhing zuak om hi. A sum kibang veve hi.

A ni sim lo in, mailam kal khat ta suan toh zel lel ding hi.... life must go on!

Hau Za Cin
Phuitong Liim