Mittaw te bek in a muh theih:

Mittaw te bek in a muh theih, bil ngawng te bek in a zak theih pen migitna, itna, hoih gamtatna cihte ahi hi. Khuamu theite adingin Rose pak etlawm mahmah ta se leh muhna ding a neilo te adingin meihol tawh a kilamdang tuanlo hi. Sumbuk a kizemna puan hoih mahmah ta se leh iplah in zong eng tuan lo uh hi. Khat adinga hoih khat adingin hoih tuanlo thei a, ahi zongin mi khempeuh adingin a hoih te thupi mawk hi. Tua pen suang manpha leh hauhna sumgum te sangin manpha zaw a, leitung kilawmsak in, nuntak nuamsak a, mi khempeuh muk ah nuihna maitai kilangsak hi.

Naungek a pian kheh laitaka a kah khiat lela pen 'kahna' ahih hangin a nu bil ah kilawm mah mah hi kici a, a nu in a khantawn mangngilh thei lo hi kici hi. Stevie Wander pen leitung lasa siam minthang hi a, ahi zongin khua mulo hi. Tanu melhoih mahmah khat a neih hangin a mel mu ngeilo a, ahi zongin 'the most beautiful face in the world' ci hi. La phuakpa khat in, Mit tawh na ki muh theih loh hang, na kilawn theih loh hang, Topa aw na kilawm pen pen hi ci hi. Mit tawh muh sese loh zong a kilawm muh ding om cih hong telsak mahmah hi.

Zomi te in kumbei kuan, kumthak kuan ciangin sum leh pai tampi bei in puan thak vanthak lei in i Topa hong pian hun limtak in i muak a, thupi takin i pahtawi hi. I Topa adingin i sum leh pai te i piak ban ah eimau nopsakna ding mahmah inzong tampi i bei hi. Tua bang hun sungah i lut laitak in ei bek kikhual lo in, i veng i pam ah gual englua kisa leh mipi lakah nuam a salo ding om theih hi a, tuate mangngilh lo in lungsim kiu khat ah phawk den leng. Insung haksat man hiam, dahna haksatna tuak khak man hiam a lungleng khuangai a om khak leh itna, migitna leh kiniamkhiatna tawh i Topa hong pian bangin sem leng bangzah in etlawm ding hiam cih ka ngaihsun hi.

[Zomi te pen zong vaite bang hetlo in a ki pasal sak tinten leh a ki ngeksak nuam hetlo, mi nawngkai sak ding a ut hetlo i hih manin i haksatna, i khuangaihna te a ki gengen lo i hi a, tua manin mithak seem in bil tungsak in i kim i pama i mipihte i ki huai ding a thupi mahmah hi].

Christmas leh Kumthak in lah hong nai deuhdeuh ta ahih manin mittawte mit ah a etlawm mahmah, bilngawngte bil ah a zaknop vanvan thute tawh tukum tawp hun i omna ciat ah -Zogam kiu khat ah electric a mu nailote leh US ah nuclear energy meilum a awi hithiat te natawmin - lungkim tak lungnuam tak in hih hun lungdamhuai ah lungdamkhawm ni.

Hau Za Cin
Phuitong Liim