Thursday, March 8, 2007

Dear ....

Nang koilai pan na hiam ka thei kei a, "kahbia hoih maw, original mah?" cih pen hong dawng masa leng (hong dong na hih mawk ciangin):

Hatna tha a nei tam penpente element hi a, molecule na hi lo hi. Hydrogen pen element hi a, water pen molecule hi. Hydrogen pen a ciik hi a, water pen a kihel hi (2H+O=H2O). Hydrogen Bomb om a, water bomb a om lam kitheilo hi. Atomic bomb kithei a, molecule bomb kiza ngeilo hi.

A nihna ah, kawl leh Zo, kawl leh kala, mikang leh kawl, Zomi leh Chin, etc... kiteng leh bang a piang diam maw? Mihing mah pianglaisam lo diam. Ha... ciamnuihpakna hi sam e.

A honeymoon teng a bei ciang a kigen khia lo, a ki imcip lah hilo, a kiselcip zo zong hi tuanlo, kitotna ah zong akizang nuam lo, amau ngeina leh eima ngeina a kidawklo a kisim nawkna, cold war thupi tak khawng a piang kha tam maw. Aminam kibang kiteng leh bel tuate khempeuh kigen khia ngam dinga, kinialna piang dinga tua kinialna tungtawn panin thu hoihzaw tawh kilem dinga, hehna, thangpaihna te luppih lo kha ding hi. A zing a thai tanin zong vomvom nawn kei mai inteh. Theisam kei ing. Mi hong muh sang (a guka) kituak lohna a om kha tam maw. Emotional relationship sangin professional relationship hih bang nupa te kikal ah kilimzat zaw leh kilawm. A lungsim tawng khat vuah lunglenna khat nei giugiau thei in um ing. Numeite a pasal insungah a inttek teei hang, a beh sungah, a phung sungah, a minam sung ah a intek zo taktak tam maw. A kinolh hilo in, amah ut lo zaw, a nungsang mahah inteek nuam lai veve cih hi thei kha ding hi.

India ah Sonia Gandhi pen kumpipa zi hi a, amah Rom mite hi. India kumpiza zong a len thei ding zaha inntek hi. Ahi zongin a tawpna taktak ah holiday a zat ciang a pasal beh leh phung sang, Rom khua mah ngai ngeungau zaw sam hi inteh, va lengsuk vangvang zel hi ven. A tate gam itna zong a kilawm leh nuam ciangah it bek hiam cih ding hi, a driving force pen lian khollo mawk tawh kibang hi. Thei cian sam kei ing. Zi neih bangci hiam cih zong a theilo pi a kong gen hiin. I neih zawh ciang kigen ngam nawnlo maithei ahih cianga a hun laitak ci a hangsan taka kong gen hi.

Ka tuak loh thu ahih hang ka upmawh kong gen hi lo in, nam dang tawh a kitengte in deihsak taka hong hilh khawng uh leh mi gen ka zak leh, mit tawh ka muh pawlkhat zong om sam hi.

Bangbang hi leh hih bang vai ah pasal a pil nak leh a siatna om tuanlo dingin ka um hi.

Kahbia ta te in minam it lo deuh tawh kibang cih pen a khankhiatna ah zong a kinga tam ciing. Mihing in i innteekna penpen ki it penpen hi kici hi. Intek na kisakna mun na it dinga, mikhual na kisakna mun na it taktak thei kei ding hi.

Kawlte zong mihoih om, Zomi zong a sia om sam cih pen, 'a na tua ci maw?' cih tawh zo phot ni.

Mikang te nidangin mangkang kici, mikang (the whites), hong pai masa te peuhmah mang na hi uh a, officer, tua manin mang ahihna uh leh mikang ahihna uh kigawm in, mangkang akici hi. Kawl le Zo, vut leh vai, sia leh pha, etc cih banga phrase ah Mangkang, mangvom cih kinei ahih manin mikang khempeuh mangkang akici hilo in, mang + kang te mangkang akici hi ding hi. Tu hun ciang Zomi zong mang a tam mahmah ta hi. India gama Zomi galkap bu te Zomisaap (Zomi + saap) cih danin kisam hi. Mikang khempeuh, mang na hi lo a, Zomi khempeuh in zong Haipi na tawi lo uh hi.

I theih khial i hih khial hilo a, ahi mah hi. Ahi zongin tu lai ciang mikang i muh khempeuh mang hi nawnlo a, mangkang zong a om lai veve hi. Tua man in mikang leh mangkang om hi. Tua mah bangin Zomi khempeuh zong bu na hi sam lo uh a, Zomisaap kici khin thei tuanlo hi.

Lungsim pen na cih bangin mikangte khempeuh a mel et uh bang khol kei. Laituite paudan a 'ba hon them' cih ding tam peuhmah uh hi. Mikang pau awk hong pau taktak zong a ciltui kai tawh, a khut viik tawh, a khe khai in a lusingin lei mah tuan keei sam uh hi. A pumpi leh mel uh zong TV khawnga i muh te bang khin kei, singluangnuai maipuang mah bang a sawi leiilawii khawng tam veve saam. Thatang zong, a ngaltaak uh singkhuah tawh sat ban peuh leng hong zo ding uh hi khin tuanlo hi.

Tua hi a, Zomi bek a hoih hi kei, midang zong a hoih om sa'm.


Hau Za Cin
Phuitong Liim

No comments:


Blog Archive