Pai suk tai thum pai toh tai guk...:

Laitui te mah hi zel vem. Tedim leh khua kikal tai bangzah pha hiam? a kicih ciangin 'paisuk tai thum pai toh tai guk...' ci ta zen uh hi. Gun pang teng lamsuk lamto lua ahi mana, suk pai leng kitung pahpah a, to pai leng kitung hakzaw a cihna uh hi. Lamphei lo lua cihna hi. Khangluite in "Kampha ngai dah leh lamphei tawn nuamlo omlo" a cih uh pen dik mahmah hi, Laituite in zong a lampi uh phei sa mello hih tuak hi.

Ahi zongin a lampi sauna pen kikim hi. Sukpai ta leh a sauna tom tuanlo a, to pai taleh khang hi tuanlo hi. Lungsim ah haksa sakna bek kidang hi.

I nuntakna ah zong Tedim kahto mah banga hamsa i sak hun om a, gamla isak hun tam a, lamto isak tam hi. Ahi zongin tua haksatna 'hurdle' pen khatvei kankhin in a vumzang tungto peuh leng a nihveina pen suktuak hi den a, nai kisa ta hi. A to pai sangin a sukpai ah kiat theihna tamzaw a, balance lost olzaw ding hi. A hang pen pumpi kivei dan kisukvei zaw deuh ahih manin. Kidop na ding tam cihna hi. Milian, a sangtung cihte adingin minsiatna ding, khialhna ding, sikkhial khak ding tamzaw cihna hi. Mi ngeina hih khempeuh hong kilawm nawnlo a, kidopna dingtam zaw cihna hi.

Ahi zongin tua lamto khua thupi, mun thupi zaw leh a tungnung lam zong teitei ni. A kahto hamsa mah leh a khuahekna nuam a, huihsiang kingah in gamlapi kimu thei hi.

Hau Za Cin
Phuitong Liim