Pu Chin Khen Thang, IAS pahtawina in:

He is a man of principle and he is honest.

Behlap a kisam hiam? A kisap ding um kei ing. Ahi zongin amah ka phawkna themkhat gen nuam ing.

Ama thu gelh dingin ka cing kei hi. Cinglo ka cih ciangin prelims nihvei ka fail man hi lo in - amah kitheician mi, a nasep ah kumpi leh mipi adinga muanhuai mi, leh a biakna adinga muanhuai mi ahih man in; (nopsakna ding, lu leh taw zong phawk lo a noptal theihna lampi khatbek om dana i ngaihsut IAS pen) Zomi te in India gama officer lian penpen suah ding a kidem lai takin aman cihtakna, thumaanna leh thudik gupngamna tawh mi khempeuh muh theihin ama nuntakna tawh i maitang ah hong lakin hong musak kilkel ahih manin, tua bang omthei hi cih zong i theih ngei hetloh pen eite etteh ding, i model ding, i Hero dingin mualdawn khua om bangin selcip theih lohin hong laka - tua zah a taang aksipi tangthu gen dingin (kei ama tungpan a kisin tawm khat lel pen) neu ka kisa ngaungau hi.

Ahi zongin amah tuabang hong hilh masa, hong lak masa, pioneer ahih manin thupi a, zahtakhuai in gengen ding hoih kasa a, etteh tak, zuih tham cing ka sa hi. Tua manin siam leh siam loh gen theih hilo, a thu hangin kei leh kei hanciam tawmin kong atsuk sawm hi.

Hih zaha thulian leh zahtakhuai nuntakna tawh i zuih theih ding hong lakpa ahih manin a nuntakna vaak Zomi khempeuh adingin Aksipi bangin tang den ding hi.

Shillong ka tun tung, 1991 pan ka theih hi a ka nusiat 2004 tana zong ka etteh den Pu Khen pen ciamnuih a uk pen leh a siampen ahih hangin ciamnuih genna ding hun neilo, thu tak gen ding zong a gen khin manlo mi ahih manin thu ginalo tawh a lungsim leh a hun, a kam mahmah zong a zanglo hi in ka mu hi. Sangnaupangte kikhoppi ah, biakna kikhoppi ah, kimuh khopna khat peuhpeuh ah Chief Guest in a kizat den hangin thu tak vive tawh hong pattah in, ciamnuih namtuilo leh zahmawh a gen kiza lo hi. A thugen a tamzaw upa te in 'ciangduai tawh hong sat zaw ve' cih ding zah in khauh a, itna kammal leh thudik pen lungsim hong lawn dan tuam se hi. Damna ding zatuikha dawn tawh kibang hi. Tua bang thudik thuhoih a gen ngam amah ahi hi.

Ama mai ah kamsiam kisam masa lo a, thudik genna dingin kamsiam kisam lo hi. Ahihna bangbang a gen ngam mihing tawmcik omte lak pan amah aksi bangin taang diak a, mai et hangin hong deihsak tuam hilo a, thudik hi peuh leh kitheih masak zong kisam tuanlo hi. Thudik gum in thumaan tawh nungta mi hi in ka mu hi. India kumpi leh Zomi te adingin khamuan huai hi.

Kum 15 sung ama khaliim ah Zono tampi in Shillong ah pilna ka zon sung un za khan nop man leh thu neih nop manin tungsiahte a maiet leh nuaisiahte a neu et kiza ngei lo a, minphat deih in a kipei tengtung kithei lo hi. Contractor te leh mihaute sum tawh innlam sawmlo, hauh sawmlo mi ahih manin Department pawimawh leh sum tamna te lunggulh tuanlo a, ama tavuan zo takin a sem ngiat ngiat mi hi.

Khatvei US pan zankim phial a hong tung Rev. Dr. JM Ngul Khan Pau pen ama neihsa akpi em minsa tawh vaidawn a, amah sang naupang zaw, ama makaihna nuai ah Pastor asem mi khat hi lel a, a maietna leh a zahtak man ahih ding ka um kei hi. A biakna a theihcian man, a biak Pasian a it man ahih ding ka um zaw hi (Ka dot tuanloh hangin). Youth Wing Chairman ka sep laiin amah pawlpi ah Chairman hi a, Nipini zingsang khat kikhopna ding vai pawlkhat dong nuam ka hih manin ka phone leh - a phone ging, khat in len, ki khoih khia, ahi zong kuamahin hong dawnglo hi. A phone sung pan ama aw za, zingsang inkuan kikhop nei uh hi cih ka theisiam a, ka koih kik hi. Pasian sangin a masa ding bangmah om kei cih hong telsak a, tuabang dingin zong a insung keem hi cih hong musak ahih manin etteh tak ka sa hi.

Nuntakna (Life) pen theician mahmah a, ka zahtak mahmah hi. Nasep pen zum huailo hi cih (dignity of labor) ama inkuan a sinsak bek hilo in ama nuntakna mahmah pan hong lak ahih manin zahtak huai ngaungau hi. Ama in ka hawh khak sunsun ciang kimanna a nei mello luxurious items tuamtuam (mi dang inn pawlkhat ah a ki mute) kimu lo a, laibu leh inkuan maan, Lai Siangtho leh Labu, nisim thuthang Newspaperte kimu zaw hi.

Mi lian mi neu khenlo, meigong tagah leh mizawng daipamte a mangngilh lo a a huaisiam milian khat in ama nasep kumpi ciangtansa kum a tawptan cidam lungnuam tak leh inkuan lungdam taka sem suak thei ahih manin nakpi takin ka lungdampih hi. A kipatna a career a kicingin ka theih loh hangin hanciamna leh kuhkalna hang bekbek tawh India kumpi nasem lian penpente a suak hi cih ka thei hi.

Topa in lungnuam in hong kepsak henla, khansauna, cidamna leh hatna khempeuh tawh hong phungvuh sak hen. Ama pilna leh nuntakna in Zomi te sung leh minam dang khempeuh sungah zong thu hong genzel lai hen. A insung lawhcinna thu lungdam huai izak zelte zong ama hanga Pasian tungpan thupha ahih ding ka lam en hi.

Pu Khen leh Nu Niang Topa in thupha pia in, a inkuan zong thupha namkim tawh na phungvuh ta hen.

Itna leh zahtakna tawh,

Hau Za Cin
Taipei, Taiwan