'Pang teitei in aw!!'

Sihna laikhun zal a gimlua, nasa lua, thuak zo nawnlo, hi thei nawn mahmah lo.... leitung nusia mai dinga amah leh amah zong a kiphal takpi ciangin zong a tanu in phal nai tuanlo a, hisak theilo in 'Pa aw pang teitei in aw' ciin khoh hi. Amah it leh ngai, a khiatlahte it hangin khohzo nawnlo, it mah taleng hong paisan ngai, a dam ding sangin a sih dingin bukzozawta ahih manin..... khasiat huai a, dahhuai hi. Sihna pen mulkim huai a, maingap huailo in, ki mudah ngaungau hi. Hong paisan ding it leh ngaihte ki khoh nuam ta leh, 'Pang teitei in aw' ciin tha i pia a, ki thahatsak in, pasal hilo na hiam, kithanemsak kei in i ci a, ahi zongin a natna a zawngkhalna lianlua ahih manin ei itman bek tawh kilenzolo lo in vantung mite in akha tung vuah pua in vanlamah lentoh pih uh hi.

A pumpi hawm bek hong nusiat ahih manin a taksa leh a lungsim, a kha khempeuh vantungah ciahpih a, it leh ngaih a pai masa te tawh kimu dingin hong lensan hi. A tak mu nawnlo ihih manin a luang hawm bekin (ama mihing hihna mah pua laisi a hih manin) hong khasia sak a, khitui luangsak hi.

Mihing sihna pen khasiat huaia, nuntakna nei khempeuh a sih kisam hi si hi. Ganhing te in kha a nei hiam kithei lo a, mihing kha ahih leh i upna leh biakna in vantung Pasian kiangah tung hi ciin hong hilh hi. Kikhen nawnlo ding cihna hi. Christian te sihna pen a nuamzaw ding, a hoih zaw dinga sihna hi ciin hong kisinsak hangin a pai masa ding kuamah kisawl ngeilo a, kuamah kituh lo hi. Kinepna leh ki lungnopsakna bek ahi tam cih bel thei tuan kei ing.

Mihing bek silo in gam leh minam zong si thei a, kha a neih loh hangin mihing zah mahin ithuai thei hi. Pammaih kisa in ki it vanvan veve a, mihing sangin zong ki itzaw thei hi. Tua ahih manin khasiat kahna aw....'na pang teitei in aw'......

Hau Za Cin
Phuitong Liim