Book Review: Ngimna Tawsawn Nuntakna (Purpose Driven Life):

Kuppihna:

Kei zong themkhat hong kum pak nuam ing. A kicing zaw in kikum thei leh ciin a bu Zolai tawh a kitei, Singapore ah ka pu Pa Hang Khan Lian te innkuan in hong letsong pen ka simsim laitak hih laibu thu hong suak zangzang ahih manin a sung thu bangmah kong kum nawn kei ding hi. Sakhi pang ding thautang thun nailo a Sakhi suak mah hong bang e.

A laibu meel hong suak masa pen English hi a, hih lai ah Zolai tawh a kitei pen laibu kawm kong tuangsak hi.

Billy Graham in, "Na nuntakna thaguipi theilo na hih khak leh hih laibu simin" ciin na tangko hi. Nuntakna bulpi khat hih laibu sungah kiphum cih hong musak hi. Nuntak a ut te adingin sim ding cihna hi. Laibu gelh minthang mahmah Max Lucado in zong "Na nuntakna na maban lungbuailo in na kalsuanna dingin hih laibu simin" ci hi.

Lai at minthangte, thugensiam te in a tangko na uh a mawk tangko hi lo a, a bu sung thu a tel sitset uh ciang a gen uh ahih manin hih laibu pen a tuam mahmah khat hi takpi hi cih hong telsak hi. "The Prayer of Jabez" cih a gelhpa Bruce Wilkinson in zong limtakin na simsak zo hi cih kimu thei hi.

Tua bang laibu Zokam tawh akineih theih pen lungdam huai a, a teikhia Sia PL Mangno tungah lungdam thu Zomi khempeuh in i puak ding kilawm hi. Kei ka lungdamna ka puak hi pah henla.

Kum 2004 in a kibawl hi a, kum 3na ciang Zokam in om cih i muh ciang a hamphat huai hi.

Hau Za Cin
Phuitong Liim