Nektawm zong tek:

A gilkial thei ciat, a gilvah thei ciat, sia leh pha leh a an duh thei ciatciat pen nisim nek ding i zon mah hong kisam masa mawk hi. Nek ding hong kicin ciangin nikten puansilh hoih, a kilawm ki lunggulh pan a, tuate hong kimtak ciangin inhoih lo hoih neih leh lam a manpha ki mit-hem ngam pan hi. Kei a tua ci in ka cihna hilo in mihing te lungsim paizia tuabang ahi cih mipilte in na kankhia uh hi.

Nek leh dawn pen sehnel gam a Israel te kianga manna a ki khiat bangin vantung pan hong kia mawk lo a, zon zawh thu bek tawh zong hong vung nei nai tuanlo in Topa hong piak tawh a kingawlo cih zong om thei hi. Topa leh a deihna zon masak ding tua hi leh adang teng zong hong kipia thuah ding cih mana nasem lo a nek muh ding cihna na hi lo leu leu a, thadah pa aw miksi te kiangah pai in a thanuam dan uh en in nang zong nasem in ciin hong kisawl thapai laii hi. Tua ahih manin ngaihsutna kician, upna kician, kingakna (foundation) kician nei masa inla, tua ciangin na nek ding zongin cihna ahi ding in ka um hi. Tua kingakna pen - mihing nuntak a zahtak huai sak gamtatna, mihing nuntak a tangsak upna, mihing nuntakna a siangthosak upna, suahtakna hong pia thuzuihna te ahi dingin ka um hi. Tua pen Zomi te adingin Christian suahna pen ana hi gige hi.

Hong nasak thei (natna hong guan hi a pupa in a seh uh) dawi leh kaute sungpan suahtakna, inkuan aneu pen pan a lianpen tan nuntakna ding hong hilh Lai Siangtho, mimal khat leh khat hong kilemsak Lai Siangtho, i gal leh ei hong hihsia nuam hong minsia sak nuam hong sawnpai nuam te natawm it teitei dinga hong hilh Lai Siangtho, i pian pan i sih tan, i nuntakna leh i kha mailam ding khempeuh hong hilh Lai Siangtho.... . tua upna nei, tua bang kingakna (founded in the word of God) ihih manin Zomite i hampha mahmah hi.

Tua te khempeuh hangin suakta tak in leitung ah i kalsuan thei hi. Sente in dawi lauhna nei lai uh a, Zomite ki suakta ta hi. Amau zong a lau taktak hi tuanlo in 'a upna vuah tua bang om' cihna hi zaw hi. Amau leh amau vangik kiguan, kilautawm sak, a proof om tuanlo napi 'hi kha inteh' cih tawh nuntakna hi. Zomite suakta i hih man in hamphat huai hi.

US President bush pen a pu a pa khangpan sumbawlmi ahih manun nisim nekzong lo hi. Tua manin a gam nasep limtak in sem thei hi. A nek ding lungkham vanvam kawm leh a gam nasep sem manlo ding hi.

Zomi makai pawlkhat zong President Bush bangin nektawm lunggulh nawnlo hi leh i gam leh lei in nakpi takin khantoh lawh ding (gam leh lei cih ciang a mi leh a welfare khempeuh kihel pah cihna hi). Ahi zongin tua bang nuntakna ah a tungzo nailo minam hilai phot i hih manin 'nektawm zong tek' ki hi lai mawk hi.

Pupa hun a kumkhat lo khawh na pan inkuan kham pianga, tu hun ciang piang nawnlo mawk ahih manin sumbawlna leh sumbuk bawlna bek tawh kihau zo bek ding hi leh kilawm hi. "Sum in no a keuh kei leh sum hi lo hi" cih pen economics lamte tuat dan hi. Tu hun pen nektawm zonna zong sum no keuhsak ding hih tuakta hi. Neihzahzah nupi te kawng ipsungah uih lianga bilh cip hun hi nawnlo in a meet ding, a pung ding zonga kipei hun, siangtho tak manpha tak a summeet bawl hun hih tuak ta hi. Business lo tawh mihing ki hauzo taktak lo hi. Kumpi nasem ten ni 30 a sep pen summeet bawlte in nikhat in ngah leklek thei hi. Ni 30 zawh cianga zah 30 in hauzaw ding a, a sawm-a-khat (Tithe) zong a zah 30 in tamzaw ding cihna hi. Vantungah lungdamna lian dinga, leitungah zong lungdamna lian ding hi.

Hau Za Cin
Phuitong Liim