Thursday, March 8, 2007

Rev. Khup Za Go a ki muakna:

LEIVUI PANIN laimai 126 na ah Rev Khup Za Go in Delhi Zomi te lak ah Pastor sem dingin a pai ciang ZCF Chairman N. Neihsial leh Secretary G. Swan Za Lian in meileng khawlna ah a dawn thu at masa hi. A zing Nipi biak kikhopna Free Church, Parliament Street ah vaidawn kikhop hunpha tak gelsa in na nei uh a, hong muakna uhin pak hong pia uh hi. A thai ciang.....

A lai at ka sim sim ciangin 'pak hong kipia hi' a cihna tam hetlo a, khut kilet ciang pen tamzaw hi.

Kanpur ah ka sep lai a ka siapa pen Tamil te hi a, a birthday ciangin present deih lo a, pak piak ding ut se hi. Pasal pipi pak thupi sim si e ka cih leh ama ngaihsutna ah tua bang na hi lo a, pak in nunna, life, living ensak hi. Thaksuahna, freshness khawng, leh nuntak gimnam sak hi ci hi.

India suahtakna ding a seplai in Nehru thongkia hong tuak ciangin thonginn mai ah Mufti kici khat Shillong pan a pai in motopi tawh singhianga khat puak a, thonginn kong ah tua singhiang lianpi Nehu muakna in pia hi. A hing sitset, a nungta silsel green ahih manin Nehru a lungdam lua a akhitui kai hi kici hi. Tua manin India in suahtakna a ngah ciangin Nehru Prime Minister hi a, Shillong ah paiin kungno te kepna Botanical Survey of India cih Office pi khat pia nei nai hi.

Pak tawh kidawn pen hinna, nuntakna, no suahna lahna hi in a kingaihsun hi a, a kibawltawm sangin a pak takpi mah a kizat ciangin a thupina kigen theilo hi. Sia Khup Za Go in zong thupi sa mahmah hi kei leh a laibu ah khum lo dingin ka um hi.

Zomi te vai i ki dawn ciangin khut kilen masa in niangtui tawh kimuak hi. Niangtui pen mikangte hong lawh hi dinga, a kipatciil taktak in Tuibuk hi masa ding hi. Lengla khat peuh hong om ciang sangkil sak a tuibuk thei manin kipia masa a, ki itna lahna hi pah hi. Ki welcome na, ki vaidawn hi. Tua ahih kei leh tu lai ciangin Christian i suak zawh ciangin biakinn ah hi in, khuamual ah hita leh lasakna tawh 'kong muak uh hi' cih la kisa thei zel hi. Khoppi ah hi in, milian khual zin khat peuh zong tuabang kizang hi. Kam tawh a kigen manman hun in a kigen den hi a, a tuama gen ding zong akiseh hun om hi.

Mikang te pawlkhat in bel mutpuak tungah min khawng atsak in tua tawh kimuak uh a, mutpuak sungah huihzangte (helium gas) thun in khau khih in tawi liatluat thei uh hi.

Zuning kilup in, zatep kipia cih bangin zong kivaidawn thei hi. Mikangte bel kingawngkawi in biang thumvei kitaat uh a, Zomi te bel khut kilen in kibansah hi. Vaite in bel a nu leh pa a hih leh a khe uh khoih a, pasal leh pasal kipom in, numei leh numei kipom uh hi. Pasal leh numei khut kilen ngeilo uh hi (a ki thei mahmah ahih kei buang uh leh).

Kumpi khualzinte pen galkap te in lamna tawh na dawn uh a, thaukap in na mualsuah uh hi.

Tu lai ciang Zomite zong i kipatna khuata nusia in khuapi zaw ah kikhin khia in, khuapi penpen ah a tung zong i omta a, i tenna a kilamdan tawh kizui in leh i tenna gamte zat dantawh kizui in i gamtat dan zong hong kidang hiai hiai hi. A hi zongin i nu leh pa sisan leh i minam sisan tawh i puakkip, i neihsa ki itna leh ki ngaihna te, kikhualna leh ki deihsakna te na kiam nailo a, zong bei ngei lo ding hi.

A hoih lam in na khempeuh hong kihei hei dinga, Zomite zong a hoih lam kizuan zuan hi. Sia Khup Za Go in :

....1976 kum a Faridabad khua Thomson Press ah Tedim Lai Siangtho a kikhet lai a proof reading sema keimah guak lungzuang lua-a ka omna Free Church pen tu in pawlcing taka Zomi sanggam u leh naute tawh Topa phat a hong kimuakna mun hong suak hi.....

ci hi. Tua pen kum 2001 hi a, khang khat, kum 25 sungin Zomite Biakinn nei thei ding khop Km 1000 val na kikhinsuk man uh hi.

Tua Zomi te in hong tung ding maikal nih na sungin Silver Jubilee muak ding uh hi lai hi. Topa in Zomite hong lamto a, hong lamto lai ding hi. Zomi on the move.... Praise the Lord.

Hau Za Cin
Phuitong Liim

No comments:


Blog Archive