Ka tong naubang na san ciil in:

Lusei lasiam Daduh in a lasak a hoih mahmah lah a sak nuam hetlo khat pen: Nang nen a tu dang ngailo te a lendun leh ka nuam, cih ah hia leh pen sese hi a nawngkai, lendun ka nuam, cih hi leh lungnuam taka sak hiauhiau ding hi a, hia leh hangin nawngkaina lianpi om hi cih hong theisak hi. Kikhen uh cihna hi a, a ki it lai a kingaih lai bang un kikhawl 'kik' nuam, kimu 'kik' nuam cih hi. Khatvei kikhensa nupa ahih kei buang leh nungak tangval kingai kik cih tampi omlo hi, a omlo hilhial bel ahih ding ka umsam kei hi.

Tua ahih manin hih a nuaia la phuak pa in zong itna mittui luang kawm in kon ngen ci ngaungau a, nang tawh khen sang ka pham zaw ding ciin confess mah leh ama sih leh hin ding a khat in khualzo nawnlo ahi ding, bangmah a neih loh thu leh a itna bek masuan ahih thu a gen hangin a masa bang nawnlo a, tongdam neem in naubang sang nawnlo hi. Itna ngaih huai a, itna khasiat huai hi. Khatvei kipelhsak kha leng maw sap kik theih loh a, a nungsang ah khitui naptui tampi luangsak hi.

Ahi zongin la phuakpa kilungkimsak kik a, a it mahmah a ngaih mahmah hangin ama ading hi thei nawnlo ahih manin thupha tawh paisak a,

Lunglai ngilhni la beilou dia
Nunnuam in ngabang hong lengta in
Kei zaw sanggah lenkumvei mai ding simlei ah
Tembang deih toh tang bang hong dam aw..

ci hi. Pasal mahmah a, picing mahmah hi. Lungnuam in pai in, kisuanglah lo in pai inla, na it na ngaih pen mah tawh kitengin cidam lungnuam in om un, ken bel ahih leh kong itna kong piaksate ka mangngilh kei dinga, nang zong hong mangngilh thei kei ning. Nang ngai in kum kiveivei ding hi ci hi.

Phamawh kei e, na ut leh singdang pom in
Lunga na deih tangpal tawh hong leng in bye bye

tawh bel ki bang hetlo mah hi.

A la en pak leeng:

Ka tong naubang na san ciil in: (Sa: S. Chingnu)

Ka tong naubang na san chiil in
Tongdam neem in naubang nong sang a
Ka itpen leh tembang ka deihpen ngaih zozam
Nang toh khen sa'ng ka pham zaw ding.

Anbang kong itna lelmaw'ng e
Na vangngaih in mawngsing bang hon kaan
Hichimai a samgi bang i khen mai ding aw
Ka thuak in aw a na ngei e

Sum bang hon nial mah lechin ngaih
Itna mittui luang kawm in kon ngen
Bangmah dang masuan ding ka neilou na siang ah
Aw kon it, kon itna kia loungal

Lunglai ngilhni la beilou dia
Nunnuam in ngabang hong lengta in
Kei zaw sanggah lenkumvei mai ding simlei ah
Tembang deih toh tang bang hong dam aw..

Gual lelh la lak ah hel theih kha inteh. Ahi zongin a la aw kaih leh a sa nu siam lua mahmah ahih manin a hun lai in la minthang hi a, guiter sai thei peuh in misi duukduuk kawm a huankhangte nungaknu zong zahtak zolo a a kikopih, a awih ngam la khat uh hi.

Hau Za Cin
Phuitong Liim