Saddam kikhailum hilhial mai:

Nai nih sung tak hih thu TV ah ngai, en ka hih manin kong gen nuam peuhpeuh hi.

Mulkim huai isa hiam? Bush in bel, 'the kind of justice he denied the victims of his brutal regime' (gitlohna tawh a vaihawmlaia ama khut thuaka si khempeuh tungah a piakloh thukhenna diktak) ci giap mai hi. Lai Siangtho in 'na vawh bangin na at ding hi' ci a, a kigente a dik ahih leh ama vaihawm sungin mihing tulza 20 (2 millions or 20 lakhs) in sihna tuak hi. Chemical tawh a thah bek zong mi 5000 ci a, amah a kithatsawm hanga a thukkikna ah Shiite mi 148 thatsak hi. Irag - Iran kido ah mi tulza leh sawmnga val si dingin kituat hi. Kuwait a dona ah, Kurds mite a thahna ah cih bangin, ama vaihawm sungin a khut thuak tampi na om a, tuate sisan man amah tungah a ki la kik himawk hi.

Lai Siangtho in 'mit tangin mit' a cih hun bang a, thukkikna tawh kibang phial hi. Ahi zongin ama khuta si te inkuanpihte in lungdam in lampi ah khutbengin lasa uh a, thau lawn in laam uh hi.

Kum 20 a phakma in tualthat ta a, ama makpa ngeingei nih zong that hi. Ama lama panglo leh amah kumpi subuai ding peuhmah ama kiangah omsak lo a, hawlkhia in, a kihep khiat kei uh leh that hi mawk hi.

Ahi zongin ama kikhailup ding, a sih ding ciangin ama biakna laibu, Quran a khut khat ah tawi hi kici hi. A theite in 'amah hehpih thei ding mi a zong lailai hi ci hi. Mi a hehpih ngei khollo khat in zong a sih taktak ding ciang amah hehpih ding zong hih tuak hi.

A kikhailupna ding a zuat laitak in maigum ngeungau sam hi kici hi. Maitai zolo veve hi ding hi. Pasal lungsim khauh leh hehpihna hau khollo dinga a kilat hangin sihna a thuak ding taktak ciang bel maitai zo lo sam hih tuak hi. Ahi zongin pang teitei lo a, a sihna ding mun khasia tak in zuan hih tuak hi.

A si cih aki zak ciangin ama khut thuakkha tampi khuasungah diangin lam uh hi. Mi khatin, 'ka inkuan uh pan mi 3 si a, ka lungdam hi' ci hi.

Bang bang ahi zongin hun in hong ngak lo in a paipai hi. Saddam thu kicing taka i zakna pen 1991 a Kuwait a luh ciangin US tawh kido a, 2003 in US in galvan lauhuai nei ahi cih a theih ciangin kap kik a, tuni tan tua kidona bei nailo hi.

CNN Headlines in 'Saddam Death' 'Death of a Dictator' ci uh hi. Ama sihna hangin tu laitak a buaina uh a khiam tuan kei dinga, a behlap tuan kei ding ciin kigen hi.

Hau Za Cin
Phuitong Liim