Rev. Dr. JM Ngul Khan Pau lungdampihna in:

Leitung kiuli ah om Zomi te aw, kal khat hong beiin ni sagih hong cingto kik leh leitungbup a Zomi te in i nasep maban ciat mah i zom dingin ka um hi.

Tua laitak in India gam Guwahati khuapi Council of Baptist Churches in North East India (CBCNEI, www.cbcnei.com) huangsung ah General Secretary a sem Zomi, sia Rev. Dr. JM Ngul Khan Pau in Pasian nasem dinga a kalsuan zawh kum 25 cinna (Silver Jubilee) leh a zi Nu Lucy Eng Ja Dim tawh pumkhat a suak zawh uh kum 20 cinna 'a simple but meaningful celebration' zang dinguh hi. Amau leh a tate nih Tg. Daniel Gin Sian Mung (BA-Iyr) leh Tg. Toshi Thang Lian Mang (class VIII) nakpi takin i lungdampih hi.

Mizogam Murlen khua ah Christian a suak masa leh pawlpi upa a sem masapen Upa Thuam Za Gin sung pan piangin, Panzawl khua Lamka ah khangkhia a, Churachandpur College leh Union Biblical Seminary pan BA leh BD a zawh khit ciang Shillong ah Student Chapalain sem in, tua sungin St George College, Israel ah kha thum sung Israel and the Holy Land cih ah summer cource kah a, tua pan Western Baptist Seminary, Portland, Oregon ah Doctor of Missiology zo hi.

A kipatna a neu hangin (inn 100 zong a pha lo Murlen pan) a tunna ding ciangtan a neilo Pasian in leitung kimvial in khual zinsak a, Ama thu leh la tangko dingin minam tuamtuam lak ah hong zatsak hi. Aman a gen den leh thupi pen hi-a a ngaihsut pen "Pasian Bek Mah Minthang Hen" cih hi.

Hau Za Cin
Phuitong Liim
[Lungdampihna lai khat a nuai ah kong belh hi.]
---------

PASIAN BEK MAH MINTHANG HEN

by Dr. Hau Za Cin, Taipei

“Topa aw, hih tapa a nuntakna nong hawisak (taak-a ahih leh),
nangma nasem dingin kong ap uh hi”

January 31, 1981 zingsangin na lungsim ah bang thu teng a om tam maw! Nu leh pa thungetna tangtung sak dinga na kalsuan khiat niin bangteng na ngaihsun tam maw! Amau hong muh theih nawn loh hangin, tuni in, vantung ah lungdamna lian ding a, nakpi takin vantung mite tawh phatna lasa-in lam ding uh hi. Khangluite in ‘nu leh pa thumang a nahlawh peek’ a cih uh pen khanglui thu bek hi loin, Pasian thu tawh zong kituak a, Pasian thu zuih zawh ciangin zong tangtung toto hi cih hong musak hi.

A nuam ding, a hamsa ding mukhollo ding na hih manin ‘upna’ bek mah tawh kalsuanin bulpan na hih ding ka um hi (Piancilna 12). Ahi zongin na tel mahmah thu khat om ding a, na muh kilkel khat om ding hi. ‘Zan na ihmut kal in hong cing ding a, na khanlawh ciang zong hong hopih ding hi, na gamtatzia ding zong hong hilh ding hi’ a kicipa mucian lua na hih manin na lungsim-a sapna aw pen ‘aw’ ci-in na dawn ciang a khentat khin hi dingin ka um hi. ‘Mit tawh na kimuh theih loh hang, nong hona aw ka za’… tua ‘aw’ na zak pan kum sawmnih-le-nga sung hong makaih, hong kalsuan pih, haksatna tuamtuam hong zosak, cidam ludamna hong pia; nat-hun gim-hun a om tei hangin hong gualzosakpa vanglian Pasian hi a, nakpi taka phat ding kilawm mah hi.

Na mi-le-sate bek hilo, leitung minam tuamtuam lak ah tangzai taka hong zang a, Ama’ minthanna dinga leitung mun tuamtuam ah Lungdamna Thu (Gospel, the Good News) hong tangko sak a; vantung thu bek hilo, leitung thu zong dottak dinga hong seekpa-in na mailam zong hong gualzohpih zel ding a, a lianzaw gam hong tuancil sakin, a tangzaizaw in hong zanglai ding hi cih ka um hi. Hi zahta thupha pen nangma pilna pan hong pai bek hilo ding a, Pasian pan hong luangkhia itna thupha taktak hi ding hi. A pil khempeuh thu kidong hi tuan lo a, a pil khempeuh kizah tak hi tuanlo hi.
1981 kuma B.A. hoih tak a zo thei pen IAS nuamtakin ngah thei ding cih ka um hi (IAS pen India gam officer sangpenpente hi). Ahi zongin leitung sangin na itzawk, na khiatlah zawk khat om a, tua in leitung nate itloin vantung nate hong lunggulhsak zaw hi ding hi. Aw! India President khaliim nuaiah nuamtaka nungta ding kimlai Union Biblical Seminary, Pune zuan dinga meileng ticket na lei lunglung pen leitung mite muhna ah haihuai lua hilo hiam? ‘Khangkhat nuntak leltak kigim bawl nuam si cia, inn-le-lo hoih deih lo na hi hiam?’ Singlamteh thu pen mangthangte adingin ‘haihuai’ hi takpi hi.

Aw! doctorate degree hong tun laia Shillong common room ah ei bek-a i et guauguau khong nuam kei buang ei maw. IAS na pass-ni hi leh hong cibai nuam mi’ kigual ding hizen ve’n! Zi leh ta nei in ‘pa’ na hih taak hangin hong saat ngam, hong taai ngam dingte beekin hong muhpih lai leh maw ka cici hi. Murlen khua neucik ah pianga, Pangzawl khuata ah khangkhia a, khuapi lak ah zong a lianlo Shillong leh Guwahati pan leitung muntuam tuam ah Pasian in leitung mite a itna thu, a kigengen a kigen cim theilo Lungdamna Thu, Gospel, i Topa Jesuh leh a nungzuite natawmin a nuntakna uh taan lianga a tangko pihsa uh tua maban zom dinga Pasian in hong zat pen a lamdang hi. Na kipatna lian lo a, Topa hong zatna lian hi. Nazareth leh Bethlehem khua hong phawksak hi. Itna mit tawh galin don leng Bethlehem leh gan ankuang sung, Topa mimbang a pianna mun lenliang hi zen si e!

Midang khempeuh in hong nungngatsan ciang zong hong taisan lo-a na lang khatah pang thei ding zi hoih tak Topa in hong piak manin leh, ‘hehna a om leh nitumsak lo ding’ na cih tawh kalsuan na patzawh uh ‘kum sawmnihna’ bang melmu theiin lungdamna pawi bawl thei ding cih ka zak ciangin nakpi takin kong lungdampih hi. Oliv kung dawng hilhhelh banga hoih tapa nihte in na thaltang hatte uh hong hi to lai hen. Kum sawmnih hong makaihpa mah in mailam zong hong gualzawhpih hen la, na ki itna uh a ni a ni in khangsemsem ta hen. Kiten kum lah hong tam semsem, ngaih meel lah hoih semsem (Sia Lang Do Khup).

Kong it mahmahna leh kong zahtak mahmahna khat pen kum sawm val Shillong ah i tenkhop sungin na hehmel uh kimu lo a, maigum meel kimu lo hi. Awtongh kiza lo a, inkuan kitot gamgam omlo hi. Lai Siangtho sim-a thu ngeen khawm in, lasa khawm a ciamnui khawm in hun nuamtak na zang uh hi. Lengla peuhmah deidan nei loin limtakin na do uh hi. Hih ka mit mahmah tawh ka muhte – Pasian hong piak itna hang bekmah hi ding hi ciin ka ciamteh hi. Mihing hoihna bek tawh sepzawh ding hi kei. Tua zah thahatna pen pilman hi lo-a, ngaihsut zawh man zong hi lo hi. ‘Zawhna’ hong pia den, tha hong guan den khat om hi ding hi. Tua pen na gengen, na tangko den, nisim na ngaihsutsut, pulpit tung hi ta leh, innsungah hi ta leh, lamzik leh theih loh te kiangh zong na gengen pa’ Pasian hi ding hi.
May 1991, New Lamka ‘CBA Mission Kikhoppi’ ah ikimuh ciil pan tuni ciang ah kum sawm-le-guk pha man hi. Tua mission khoppi in ‘bang gah suang hiam’ cih bel misia mipha guhngek pailet donga amu kilkel pa bekin thei ding a; April 1993, Zomi Students Evangelistic Camp, Barapani, Shillong ah Topa hoihna sin unla, hoih hi ciin thei un, amah a bel miin mi lungdam ahi hi cih pen zong ‘Topa hoihna a sin’ bangzah om hiam cih i biak Pasian bek mahin thei ding hi. Ze-etna ka tuak ciangin Jesu in, ‘khuavak bang na hi uh hi, ci al bang na hi uh hi’ (Matt 5: 13-16) a cih kammal tawh ka do zo zel hi. Na kammal ka mangngilh theih loh pawlkhat om a, tuate lak pan ‘I tenna leitung hong kilamdang ding hi, tua kilamdanna ah na suakta zo diam, ahih kei leh thankikpi (dinosaur) bangin na maimang zaw diam’ cih leh Zomi Baptist Church, Mizogam in Sial tawh na Doctor of Missiology degree hong lopsak lai-a ‘Doctorate degree ka ngah ciangin bangmah ka theih loh lam ka thei hi’ na cihte ka phawk kik hi.
Toshi Thang Lian Mang pianni zingsang zato pan nong ciah lai-a na lungdammeel leh na laibu ‘Youth Culture’ zawhni-a Nu Dim tawh scooter ah nong puaksuk vua na lungdammeelte ka mitkha ah a mangthei kei hi. ‘Tuivai ngasa keu’ leh phalbi zingsang nisuak kizawl ka sa a, vawk khawi, huan bawl leh tuitawi hunte ‘nidang lai’ hong suak ta hi. Guwahati ah Brahmaputra tuikhangin inn hong tup mahmah nawngkai ka sa lai pen hi.
Theih loh kal in CBCNEI General Secretary hun nih (2x5years) bang a sem man hiin, i kimuh tunga nursery kah Daniel in College hong kahta cih khawng ka ngaih sut ciang’ theih loh kalin hun saupi na paizo mah hi ka ci hi. Nu Dim in Priscilla Centre a pat tuungin Brahmaputra gallam ah siksakol tawh va kuan zel a, ahi zongin tuni in tuate gah ahi, mi bangzah hiamin Pasian hong muh uh ciangin Shillong pan Guwahati na zot uh zong Topa hong deihna mah hi ding hi ciin ka ngaihsun hi. Ka pumpi in kong kihel theiloh hangin Silver Jubilee leh kitenkum sawmnihna Pawi ah ka lungsim leh ngaihsutna khempeuh no tawh om dinga, hong phawk mahmah ding ka hi. Kong deihsakna leh itna kong khak hi. Ka gennop tampi omlai, ahi zongin ka lungdam diakna khat tawh hong hialbawl phot ning.

Mikangpau siamlo pan hih ciang ka tun theihna pen nong pattahna leh nong itna hang uh hi ciin ka ciamteh hi. Sawm-a-khat piak ding nong sinsak laiun ka gen loh hangin hamsa kasa hi (Ahang pen khasim ka sum ngahzah zong nong theihpih hun uh om maithei hi). Ahi zongin Pasian in kum khat-a khatvei pia thei ding panin khasim-a pia thei dingin hong phungvuh a, tua bek hilo in a kumsimin a tamzaw sem pia thei dingin hong lamsang lai tazen hi. Khuata naupang, English zong a pau theilo pa thupha saan dingin manpha a, thupi a, lamdang hi!!

Tua ahih manin u le nau, nu leh pa leh Zomi khempeuhte aw - a pilna, a siamna, a pumpi leh neih-le-lam khatzong siitlo-a eite leh mihing khempeuh hong piangsakpa Pasian adinga ‘a pia ngam’ Sia Jamang Ngul Khan Pau Silver Jubilee pawi nakpi takin lungdampih ni. Tua bek hiloin hih ciang a tuntheihna dinga a langkhatah a pang thei tawntung a zi Sianu Lucy Eng Ja Dim tawh a nuam a haksa thuak khawm dinga a kitenzawh uh kum sawmnih cinna pawi zong nakpi takin lungsim takpi tawh lungdampih hang. Pasian thupha tapa nih Daniel Gin Sian Mung leh Toshi Thang Lian Mang zong nu leh pa deihna a tangtungsak, Pasian a minthangsak tano hong hi dingin Topa mah in hong kepsak henla, bangbang ahi ta zongin - Pasian bek mah minthang tawntung ta hen. //