Kumlui mangpha khak ta ding i hih ciangin:

Bang i cih ta ding a le? A mah guak i nusia diam? Kumthak ah ah lah kiton pih thei nawnlo a, December 31, 2006 24hrs tan bek hong zui thei a, amah nusia in ei kumthak ah i lutto ding hi. Amah a lungleng diam, ei i lungleng zaw diam? Lawm ngaihte tawh kikhen i bang diam, ama adingin ei lawmngaih dang a neihsan, siing ang a zawtsan, a muanhuailo lawmngai i bang kha diam? A khitui i luangsak kha diam? A hehna leh thangpaihna i tungah hong tung kha diam?

Kumlui sunga i hehna leh i maitai lohna teng kumthak ah zong sai ippi bangin i pua to kaankaan lai diam, ahih kei leh kumlui tawh nusia in kumthak ah tangzang tak in, football final kimawl ding bangin i diang lut zaw diam? I hih khelh, i khak loh, i sep man loh teng nung ngaihsutna leh lunggim takin i lutto diam, ahih kei leh 'tui buasa kiluak kik theilo' ciin i mailam ah hanciam ding lungsim a nei in i paisan zaw diam.

Ei tunga hong khialte i maisak diam, ahih kei leh kumthak tawh i hehna i thaksuak sak diam? Van gik pua in kumthak na lut diam? Van zang tak, lungsim kihong leh ngaihsutna thak tawh na diang lut zaw diam?

Na hun nuam na tonpih thei kei dinga, na nopsak hunte kum tawh a lui khawm ding hi. A nuam leh a lungdam huai dangin hong ngak dinga, a thupi leh a lianzaw nuntakna na masuan ding hi. Topa in ama mite adingin a kicingin a nuntakna ding uh a koihsak sa ahih man in mi khempeuh amau adinga kilawm bang ciat in thupha a sang ding uh hi.

Lungnopna leh lungdamna in hong ngak a, it ta leng i let theihloh kumlui i paisan pah ta ding hi. Amah ahih leh kumlui pai masa te mah bangin sap kik theih nawnloh in a lengmang dinga, kap ta leng a kikho thei kei dinga, ngai ta leng hong naih kik kei ding hi. A pai ngeingei in a pai a, cingpi bangin a nungkik kei hi. Ut in ut ta kei leng mihing te zong hong tonpih a, taam nuam ta leng a phal kei hi. I maban Topa hong sialsak sa lampi i tot ding om a, tua lam ah i kal i suan toto lel ding hi.

Ahi zongin Topa in 'Lam tawntung a hong tonpih hi' (Everywhere my Savior leads me).

Kumlui tungah a thupha te hangin lungdam ko ko inla, kumthak lam ah na lungsim koih in. Kum lui ki mangngilh bawlta inla, hunthak kalsuan ding thupi sim pen in neita in. Hong bei hiai hiai, hong bei hiai kumlui mangpha khak in na khut vik diaidiai inla, na nunget teitei hangin a kimuh theih nawnloh hun, mual a khup hun hong tung ding hi cih thei in, na khitui a luan leh luang mai henla, na kah nop leh kap lel in, kimu kik nawnlo ding na hih manin it huai veve hi. Kumthak sangin na meltheih hoihzaw hi a, kumthak sangin na kineelpih zaw sa hi. Let her go, even if you cry, 'cos she has to go.

Kumlui a na lungdamna khempeuh suutkik in tua te tawh kumthak lut in, Topa in hong makaih hen.

Hau Za Cin
Phuitong Liim