Na nopzat hia?:

Tu kum Christmas nuamtak in i zang ciat hiam? Bang cici in i zanga le? Ko bel a tunma in zang khin ung.

Chinese kitheilo ahih manin tukum Christmas sermon pen bang kigen hiam cih ka telkhin kei a, ahi zongin a hong pianna leh a hong pian dan gen uh hi in ka thei.

Ni tak nai 7.30 a hun kipan ding pen nitak nai 6.30 pan in mipi biakinn kong khak pan kigual in a pualam ah, lamdungah kigual phei in, saupi muh tawp tan kigual a, biakinn kong khak 7.05 akihon ciang kilut hi. A nunglama kigualte in Biakinn sung tang nawnlo uh a, a pua lama cinema tawh a kilak pen ah na en uh hi. Kei zong sente nupi thum tawh tukhawm in candle san neu khat ka tawi a, a lasak uh ciang ka theih bangbang in ka zui hi.

A hun hong cin ciangin pastorpa in mipi muakna thugen a, 'khatvei kikhopna te hong ding un' ci hi ding hi ven, mi pawlkhat hong ding zuai uh a, khutbengin uh a a tutkik uh cianga akiangvua te in cibai buk in khutlet uh hi. A den ciang mi pawlkhat hong ding kik ziaizuai a, khutbeng in mipi lungdam mahmah uh a, bang thu hita diam ka thei nawn kei hi. Khua ka hekhek lel hi.

Tua zawh ciang Opera conductor hong dingto in a groupte khat in Silent Night Holy Night cih hong pan masa a, damdam in hong ngaih deuhdeuh in a sawtna ciangin a vekpi un hong sangsak deuhdeuh uh a.....aw...kilawm sam ei... vantung mihonpite naungek dawnna lasak bangzah in a kilawm tam maw cih ka ngaihsun hi. Tua zah a music thupi leh siam ka khatvei zakna hi a, amau a vekpi un professional vive hi uh a, zan khata sum tampi tawh a kicialte hi. Manpha mahmah e, tua bang cik cianga ki tuak kik tam cih hong ngaihsun sak hi.

Zeisu pianna thu kamsang Isai in a genna pan hong pan uh a, Drama kilawm tak in, a ban ban in Mipilte, Tucingte pahtawina hong lak uh hi. A pianna bawngbuk sungah naungek leh a nu leh a pa omsak lel uh a, (vai film bang lo in) naungek kapsak, a suaklaitak cih bang lak sese lo uh hi. (A vekpi a et in a negative lam Kumpi Herod in naungek thahna cihte a khasiat huai lam peuhmah lak lo uh hi, pilvai mahmah). Lungdamna ding lam leh thunuam vive bek gen zaw uh, lak zaw uh hi.

Naungek hong piang ding cih vantungmi Gabriel in a gen khit ciang nungak lam siam mahmah khat hong lamsak a, siam taktak hi. Hong lungnuam sak ngaungau a, lungdamna hong tung ding cih a lak uh hi. A thu gen te leh a lasak te uh theilai hi leeng a nasia mahmah ding hi mawk hi. Mary leh a sanggam nu Elizabeth te lungdamna lasak te khawng thupi bawl mahmah uh hi. Mipilte letsong piak khawng thupi sak mahmah uh a, tucingte vehna khawng thupi sak uh hi.

Video recording hoihtak in bawl uh a, live in zong telecast pah uh ahih manin sum leh pai bei pen phamawh sak tuak mello uh hi. Vantung mihonpi phatna lasa te pen puan-ak kang vive silh in kha neisak uh a, Gabriel kha pen liansak tuamse uh hi. A pian khit ciang, thugen ding Pastor hong dingto a, min 5 sung thu tuamtuam gen a, a thugen sung khempeuh vantungmi te in dinpih a, pulpit kiim khempeuh ah vantungmite ding uh hi, kilawm kasa mahmah hi. Naungek a lai ah a nu leh pa in luasungah sial in lumsak uh a, kilawm mahmah hi.

Bawngbuk sungah piang i cih pen amau bawngbuk a lamna vuah sakol lim tuangsak uh a, sakol buk sungah piang cihna ahi tam thei kei ing. Ganbuk sungah piang cihna hilel maithei hi. Bawng hi sakol hi ciin kinial sese lo uh ahih ding um ing. Phimbil vang sungah camel alut sangin cih zong amau Sai a lut sangin ciin thei uh hih tuak hi.

Pastor thugen khit ciangin inpua aom khempeuh a ta thei zahzah biakin sungah hong sam lut a, khuaimei vak in ka vekpi un, "Hong pai un thu um teng, tu in lungdam in va bia ni" cih la leh 'Leitung nuam nangin Zeisu hong pai" cih la ka sa uh a, ka sak khit uh ciang 'We wish you a merry Christmas and a Hapy new Year" cih la sa kik in Topa Thupha piakna tawh hun kizo hi.

Christmas eve kikhop kasak leh Christmas zatna na hi a, English kizang kei si e, ka cih leh a mau a tuam tuak in English leh Chinese service ana nei uh, kei a Chinese service ah kihel kha na hi zaw hi. Christmas program ahih manin mi tam lua mahmah a, biakinn sung pan paikhiat ding zong ollo mawk hi.

Bangbanghi leh tua teng tawh tukum Christmas pen a bei hi a, inkongah lawmte khat in zing ciang program a om hiam ka cih leh 'thats all, tomorrow is a working day' hong ci zawmah lai hi. A ni a tunma a zo, a hun cinma a maleep hi mawk ung ei. I mumang banga, Christmas zang kibang hetlo hi. Tuni lab ah na kisem hi zaw mah lai a, sangkikhak lo lai hi. Christian gam hi lo ahih cianga.

Mi khat in Christmas leh phalbi khawng hong tunga, bei zel lel hi a cih bangin hong tung a, a bei hi khin ta mawk hi. Hun in hong ngaklo.

Lastly,
Halpuak kihal ging cih kiza lo a, siangthona limtakin thupibawl uh hi. Pollution nakpi in veng uh a, ka tunzawh moto khu vom ka mu naikei hi. A tuaci kimlai nungak pawlkhat in nakkhuhna puan tawh a mai uh tuam veve hi. India gam hong zin le uh huih a dik ngam tam uh kici nuam phial hi.

Hau Za Cin
Phuitong Liim