Kumlui mangpha!

Pammaih sa, it in ka kah sawm hang a nuamzaw kumthak in hong ngak in, a maitai zaw hun thak in hong muak hi si. It lo in paisuaksak ning cileng thupha tampi ka saan kum hi a, muh ngeiloh, theih ngei loh tampi ka muh kum, phawk ngeiloh thu tampi ka phawk kum, ka ngaihsut zawh zah sanga kei leh kei mainawt ka kisak kum hi a, pammaih sak loh ding bang hilo zel hi. Ka thupha te ka simsim a, ka sim zo kei liang hi. Mi adingin bang ahi kei zong kei adingin kum thupi, kum manpha hi a, bang hangin ka thupha ngahte themkhat bek genkhia lo in mawk beisak ding ka hiam cih ka ngaihsun hi.

2006 Kumthak Delhi ah:
Delhi zing nisuak zong a ngeina bangin a suak a, ahi zongin mihingte hun leh kum simna ah nithak hi in, kumthak hi a, hunthak khat sungah a kilut hi. Kanpur pan manlah tak a ka delh toh pen kumthak in Delhi ah hong na ngak hi.

Rev. Dr. JM Ngul Khan Pau in a Doctoral Desertation ah 'When the World of Zomi Changed" cih a gelh a, Zomite nuntakna hong kilamdang ding ahi ciin a gen hi. Zomite nuntak dan kilamdang takpi a, hun thak ah kilutta hi. Delhi ka pai ciangin Shillong pan lawm hoih tampi om hi ciin ka gal zak a, ahi zongin ka tunsuk takpi ciangin kuamah muh ding a om kei hi. Ka lung hong leeng pian hi. Sum leh pai leh hihna (position) in Zomite lungsim hong luahta a, lawm leh gual itna, kingaihna kiam in, na khempeuh sumtawh kituatta hi ciin ka mu a, Zomite zong materialism in hong nawk bek hilo, hong giahpih, hong tuamcip, hong diah, hong ciim (flooded) hita cih ka mu a, The World of Zomi Have Changed ciin ka nusia hi.

Sum leh pai in Zomite lungsim tawng deeng ta ahih manin thudik gum ngam ding mihing hamsa hiai hiai ding, thudik mipi zaka genkhia ngam zong tawm hiai hiai ding, a gen khia te genkhiat teng zong mipi bil ah lutlo in mawk beibei lai ding hi. A kigen sunsun a ngai peih tawm hiaihiai ding hi, dah huai mahmah hi. But it was a great discovery.

Second Post-Doc assignment:
Kanpur sepna pan in Taipei ah sem dingin sapna ka ngah ciangin manlang tak in ka kithawi a, ni 15 sungin ka vaiteng siangzo mawk hi. Lawmte in kum khat val a ngak zel pen kei adingin khuaphialep banga, kei hatna hilo cihka thei cian mahmah hi. Tua bang thupha ka saan kum hi a, mi adingin cihtak kei mah leh gen loh dingin pammaih kasa hi. Singapore ah Pa Lian in 'vanleng tual hong tung a, hong lut nuamlo' hong cih pen ka ngaihsut khak ciang kei zong kisuanglah pian ing, ka ut loh man hilo a, ka sepna lui pan ka sepna thak ah ka join ding ni pen kinaih lua ahih manin ka inkuanpihte zong mu manlo a ka delh hi a, ka tun hunding kiciangtan om ahih man in, a lut suaklo hi mah ing.

Tua bek hilo in third post-doc assignment zong nung kal in ngah kik ka hih manin kumlui ahih mawk hang kei adingin thupi mahmah hi.

Thupha tuamtuam: Leitung insang pen (Tallest building in the world) Taipei 101 tung pan leitung hong suk etsak a, leitung bup ah a kigen minthang Chinese food nisim a hong nesaka, international Christian fellowship minam tuamtuam tawh hong kikhawlsak a, Zokam tawh thungetna hun hong ngahsak pen ka pi in, 'ko na tate, na khutsuak, tuisik guahsia pan na lomkhiat' a cih pa Pasian hi ciin ka thei hi.

Leitung kiuli a om Zomite tawh khutmuk pan kizom in thu leh la kikum in dahna nopna kiza sak in, a sia a pha genkhawm in hun nuam ka zanga, hi bang hong hih theihna ding hong ngahsak ZONET pute tungah ka lungdam mahmah hi. Lei leh ha zong ki petkha cih mah bangin ngaihsutna kibat loh hun om te ah zong a hoihzaw ding khual in maban i nawtto zel a, mi picing leh lungsim picing pua dingin iki seekto zel hi.

I nek leh dawn a lim a al pan, anhoih nek ding hong phawksak a, leitung kiuli ah pilna siamna sin dingin ei sum bei lo in kipai thei hi cih ka mu khia a, Zomi te zong mi neih bang, mi sim bang laibu sim leng gual i en ding, i phaklahding omlo hi cih ka phawk hi.

Lawm leh gual ka neih thak te, hong nusia ngeilo Pasian, cidamna ludamna leh thahatna tawh maban hong zomsak a, mi dang kianga nasepna ah zong hong maizum saklo Pasian ka neihna te, a lian a thupi semzo kei mah leeng hih zawh zahzah a mainawt ding ahih dan ka phawkte - - - hihte khempeuh ka ngaihsut ciang kumlui, tuzana beiding, tampi in a bei ding a ngak lah uh, tampi in a khoh nop uh, kum 2006 pen kei adingin itna themkhat bek genlo a paiding in pammaih kasak man in hih teng hong gen hi ing.

Kumlui a na dahna te kumthak lungdamna in hong kheksak henla, na matut zawhloh a lianzaw gualzo dingin Topa in hong makaih hen.

Hih lai simkha khempeuh hih gama Zomi om khempeuh (kei bek) in Kumthak thupha kong khak (uh) hi.

Happy New Year!!

Hau Za Cin
Phuitong Liim