I Pasian bangzah in lian?:

Amah bel a liansa hi a, ei adingin bangzah in lian hiam cih ding hizaw hi. I ngaihsutna zahzah in lian a, mong neilo itna nei in kip hi. A kipat pan a tawp dong ding hi a, en i ngaihsut zawh na ciang tantanin lian in thupi a, i ngaihsut zawh kei leh zong a liatna kiam tuanlo hi. Na khempeuh thei a, na khempeuh nei in, leitung leh vantunga om teng ama khutsuak ahi hi. Mipha leh misia a kikim in mu a, ama mit in leitung en kawikawi hi. Israel te Amite a cih hangin amah a teel te zong Amite ci veve hi. Vanglian in thu nei a, it huai in lipkhaphuai hi mawk hi. Tua zaha thupi Ama khutsuak kuamah bawllo a, ama sep bang a semthei ding A thalaih ding zong sehlo hi.

Phuba peuhmah keima lak ding hi ciin hong ciam a, kuamah na thuk kik kei un ci hi. Ei hong simmawh sawm, hong bawlsia nuamte zong thuhkik sese ngai lo a, Aman na sem lel ding hih tuak hi. Na galte na it un, no hong langpangte na lawmbawl un, mi tungah khial kei un ciin hong gen a, a upmawh thu hong gen hilo in, Ama geelna bang A tate i hih manin hong hilh hizaw dinga, innkuan kam kihilh bang hi ding hi.

Mawhna na bawl nawn kei un, mawhna hong bawlte zong na maisak un ci a, khial thei mihing ihi cih hong telsak a, sawm loh pi, theih loh pi in zong kikhial thei ahih manin ei tungah hong khial (ei deih loh dana hong gamta kha te) zong i maisak ding hong hilh hi. Hong ngen hilo a, hong hilh hi. Hilh cih ciang, theizaw, siamzaw khin ahih manin a hihna bangbang i zuih dingin hong mu sak, hong theisak cihna hi. Hong ngen hi leh bel Aman zong a tel melloh thu, hoih thei hoih lo thei ahih manin a hoih kei leh na zui kei un, a hoih leh na zui un cih dan hi. Hih lai ah hong kamhilh hi.

A pianni pan 'Eite tawh hong om khawm' a, a sih ding ciangin 'Leitung bei dongin no te tawh kong om khawm ding hi' ciin hong vaikhak lai hi. A kammal masa leh a kammal nunung ah hong nusia ngeilo ding ci in hong kiciam hi. Kiciam a hih ciangin ka kamciam ka pelh leh hong muang kei in, hong um nawnkeiin, zuau gen in hong ngaihsun un cihna hi a, tuni tan a kamciam a pelh ki thei nailo hi. Kum bangzah a kamciam kip hiam cih leitung pian zawh kum bangzah pha cih a bawlsa mihing te in nisim naisim in zongin a kicianin gen thei nailo uh hi.

1969 July kha in America te khapi tungah kah ciin hong kithang demdam a, ahi zongin tu'n kum 40 pha nailo in "KAH TAKPI HI UNG" ci ngam nawnlo uh hi.

Pasian nasep ah bel kikhemna omlo a, mihing te pahtak ding bek in sem lo in thudik in gamta a, thumaan gum hi. Kei nuntakna leh thutak ka hi ciin gen ngam a, gen ngam bek hilo in thudik hi cih thei ahih manin sihpih ngam lai hi.

Zomi te adingin Pasian lian se hi. Amau adingin a tuam liat hi lo in, Lian hi ciin sang thei in lian hi ciin pom uh ahih manin a lian ahi hi. A tuam in Zomi te ading bek in Pasian lian hi tuanlo hi. A liansak peuhmah adiingin Amah lian hi lel hi. Zomi te in Pasian i letsak manin hamphatna tampi i nei hi. A zu a va tawh giak khawm gamta khawm ding kimlai leitung Ama bawlsa kem dingleh puah ding, zuun ding leh ukdingin hong lamsang a, leitung khantoh tawh kituakin kal hong suan sak hi.

Ahi zongin Amah bangzah in it in bangzah in thupi sak i hi hiam cih a theihnop manin i vek in hong lamsang pah lo a, ei leh ei zong i ki lapsang ding deih in ei sep theih ciang teng hong nusiat hi. Tua hong guat nasep ding pen i sepsuah nini ciangin i minam bup in khangto dinga, i minam bup kilamsang ding hi. Ei sep ding teng hong sepsak leh i pilna neih, i hauhna ngah, i siamna sinte a zatna ding omlo hi cih Aman tellua ahih manin ei septheih ciang teng hong nusiat ahi zaw hi.

Tua zah a lian Pasian nei i hih leh zat cihtak in zang dih ni. I Pa pen lian ahih manin eima thupi nading limtakin zang dih ni. Leitung mihing hausa ta te in anu leh pa neihsa bek ne a nitum bang hilo in, Pasian tate in i pa hauhna hangin ei zong midang sanga lianzaw, i lawm i gual sanga sangzaw hih sawm in kalsuan dih ni. Nu leh pa a kheng zolo tapa kingeksak, tanu kingeksak bang hi lo in, thanuam in i Pasian muangin kalsuan in ei bek hilo, i inkuan, i minam, i gamsung, i kim leh pam te zong thupi sak dih ni. Liansak dih ni.

Mihing leh ganhing kibang lo a, nuntakna neite leh Pasian zong kibang lo hi. Pasian in a hihna zah khiam ngeilo hi. Vaphual a kilawm mahmah hangin a tate zong amah sangin kilawm ngei lo a, a tu a tusawn, khang sawm sagih in zong a mel uh hoihzaw cih ki za lo hi. Mihing te ahih leh hong bawl Pasian i suun semsem dinga, i hanciam zawh nak leh i pil semsem dinga, i siam semsem dinga, i mihoih semsem ding a, ni khatni ciang Pasian i suun ding hi. Ahi zongin tua pen vantung pan hi bek ding hiciin Ama kammal in hong gen hi.

Na nu na suun hiam, na nu sangin na thupi zaw hiam? Na pa sangin na thupi zaw hiam? Ta hoih na hih leh na nu na pa na kheng dinga, hanciam lo a nu leh pa tung bek ah kinga na hih leh amau sang na kizem siam zawk hangin amau na khum kei ding hi. Tua pen khut lawmthaw hi a, thadah hi in, zahtak huai lo hi. Na pa in tan 4 a zawh leh nang tan 10 na zawh sawm ding hi, na pa in moto a lei zawh leh nang motopi na leizawh ding ahi, tua pen khantohna hi. Pasian in hong deihsak hi. En sem ngap peuh leng zong hong pia nuam lua hi.

Na Pasian bangzah in na zang a, na Pasian na lungsim khempeuh tawh na biak, na buaipih pen bangzah in na meetpih a. Thupha tampi ngahna in na zang hiam? Nipini tawldam na ding ciang bek in na zang kha hiam? A lim zat zozo khangkhat nuntak tektek a hampha hi mai hi.

Hih bangin na Pasian liatna na ngaihsun ngei hiam???

Hau Za Cin
Phuitong Liim