"mi 21 kivuita"

Malaysia thu i sim khakna ah "Hih bangin siluang luang 21 kivuita hi" cih ka simkhak ciangin ka koiteng hiam khat hong nuam kei hi. Ka khatvei zakna ahih manin na kasa a, pawi kasa a, dah huai kasa hi.

Tuma deuh in Korea ah sanggam te khat in hong nusia cih i za a, Germany ah khat in hong nusia cih aki za leuleu a, it leh ngaih omlo tawh kibang phial, it leh ngaih tamzaw tawh kigamla in i om laitakin sihna tanghial in hong tuam khak ciangin bangzah in mihing nuntakna pammaih lo tawh kibang hiam ciin ka ngaihsun hi. Upa te in, "A si masa puan tuam tang" ci in, a si masa te a it ding a kah ding a lawm leh gual tam a, a sih masak hangin hamphatna khat ngah lai veve hi ciin na kihehnem uh hi. A si nunung te a kah ding, a gal ding, a it ding om nawn mello thei hi ding in ka um hi. Ahi zongin tulai a gamdanga hong nusia i sanggam, i sisan kizop pih, i minam sungkhata innkuan te sihna ah a kah ding a nu leh pa sanggam takpi tawh omkhawm lo hih mawk pen dahna thuahniha, kibehlap lua ka sa hi.

Tua manin sihna dah huai a, tua sihna hanga dah khawm, kap khawm theilo a i om lailai pen dah huai leuleu kasa hi.

Mihing luang 21 tak Malaysia ah Zomi sisan sitset kisial cih mawk pen i gam i lei i tenna khua lah hilo a, dah huai hi. Galpi khatna, Piancit pai ci-a i ciamteh pen 1917 hi a, kum 90 lian a phakna hita hi. Kum 90 beisa in Zomi gamdangah a si masa penpen te France gamah na si a, tua zawh mihing bangzah gamdangah a si tam cih a kankha, a ciamteh a om kha tam ka thei kei hi. Mailam ah zong i tuak theih thu hi a, bangci kalsuan khop ding hiam cih te pawl a lum lai maha gen khop dingin a hoih mahmah ding khat hi. Gam pawlkhat ah Zomi Innkuan in omzo uh a, gam pawlkhat ah om zolo uh a, amau inkuan bek khawng innkuan hipah lel pawl om hi. Zomi Innkuan, International cih khat i neih theih ding lunggulh huai ka sa hi.

England galkap khat in, "ka sihna mun peuh peuh England gam hi pah hi" cih lungsim a puak pen koi mah ah mikhual kisalo cihna hi a, a gam zong it in, amah zong English ahih pen kisaktheihpih hi cih hong lak hi. A gammang leh a mangthang in kingaihsun lo a, a gam tawh a kigamla lua in a lungsim geel lo hi. Pasal mahmah kasa hi.

Zomi te zong i tunna ciangciang i gam hi a, i tenna khua peuhmah eima khua hi pah in lawm leh gual it leh ngaih tawh i kigamla kha zongin munkhat a om banga hong mu vantung Pasian mai ah kigamla lo hi hang cih phawk kik leng. Kua mah tuam om lo in, kipawlna te ah kihel teitei sawm leng tua pen minam khangto te gamtat dan hizaw hi. Ei bek kingaihsun ni cih lungsim kuamah in i puak loh ding thupi kasa hi (mihing lungsim Pasian in a ompih kei leh a langkhatpa in ompih a, tua pen gilo ahih manin na hoih theita leh zui nuamlo thei hi).

Hih i it i sanggam Zomi 21 Malaysia ah kivuite leh leitung mun tuamtuam a kivuite, Piancit pai pan tuni tana hong nusia te tungah itna leh ngaihna piak ding ka phawk kik a, amau kha khamuang takin Topa kiangah na khawl ta hen.

Sihna hanmual hong liamsan a paisa it leh ngaih te'n
Hih lei gentheihna gam nusia in hong pai un ci
Kei ngai in kap kei unla, kei omna ah hong pai un
I tun ding hong ngaklah van khuapi pan khut hong van

Hau Za Cin
Phuitong Liim