Zomi official name hi lo

I gengen sa hi, zong gengen lai ni, gengen bek mah tawh a beibei ding zong hithei ahih ciangin maw. Laitui tangval zawlhelpa bang hong phawksak liang hi!!

ZOMI cih pen ei leh ei i kicihna sim loh kumpi in official in "ZOMI hi uhteh" ciin hong ciamteh nailo a, ei leh ei "ZOMI ka hi uh" iki cih ngeungau pong hang, kumpi vai, official vai ah na khat peuh a kisai ding ciangin ZOMI cih pen zat theih loh hi. Zomi a kici teng zong kumpi hong theihna ah Zomi hi nailo hi (officially) . A taktak in ZOMI a kici teng pen minam min tuamtuam nei hi a, unau khat, minam khat i cih hangin kumpi hong ciamtehna laite kilak lehang, ki ensak lehang unau khat ihi hiam, ihi kei hiam kithei ding hi. Nang minam min leh kei minam min kibang khollo maithei hi. Zomi akici te minam bangbang hiam, bangteng hiam, thei khin kei ing. Laigelh pawlkhat in bel gualsuk zeizai zel hi. A kimloh khak ding bang lau hi zezen leh kilawm cih bang phial in.

Tua manin "ZOMI recognition kisam hi", a kicihcihna hang tua hi. Na telsiam ding lamen ing. But, Who will bell the cat???? A min omlo in a kigawm sawm te ihi a, huih lakah innlam sawmte i hi hi; ahi thei diam keisang theizaw niteh.

Tua ahih manin ZOMI, ZOPAU cih a zatnop uh hangin a hi theilo hi. Leitungah i om sungtengin official in kizang theilo hi (Kumpi laibu ah a om phot kei leh, tua min in hong kiciamteh phot kei leh). Tua ahih manin ei i kicihna om a, kumpi te hong ciamtehna om hi. Tuate gel kibanglo a, kumpi te mawh hi lo hi. I kim i kiangah mi amau kicihna leh kumpite ciamtehna akibang nei om a, ei a kibang lo hi. En khek ni icih mateng kumpi te in na khekta un hong ci lo ding hi.

Tua ahih manin kumpi te natawm in hihte Zomi hi zaw veh aw hong cih theihna dingin ei ki ZOMI sak mahmah phot lehang, ni khatni ciang amau i min hong kheksakloh uh zong hong kisuanglah kik zaw phial ding uh hi. Tua ahih manin Zomi mahmah ding kisam hi.

Tua ahih kei leh bel a bang minam minmin hiam tawh Titanic Tembawpi bangin i kihihsak leenlaanna (false pride or ego) tawh tuipi nuai lam ah 'a themthem in' (Zomi in pieces) i tummang suk lel ding hi. Titanic Tembawpi tum sangin kiminthang lo zaw lai ding hi. Because our Titanic is not at all unsinkable. It is very much sinking, even now.

Hau Za Cin
Phuitong Liim