Singtang nupite thunget dan:

A khuamuhna zong toi ahih manin a thutheih zong toi a, Lai Siangtho leh Labu neilo in Christian hi kei lai leng Israel cih khawng, Bethlehem cih khawng, Jerusalem cih khawng a theilo ding hi. Tun zong a min a thei, a za, a lo bek hi a, a omna gensak leng gen theilo ding hi. Gamlim (Map) ah zongsak leng zong kawk theilo ding hi. A in leh lo kikal a khepek tawh a sik dimdem hangin khuapi lamphei leh zangsung lampi tawnkha ngeilo hi. Ahi zong in kuamah eng tuanlo a, nek ding a kicin a, a tate a cidam ding leh lungdam a a Pasian a biak ding a lunggulh pen hi phot hi. A ban mulo, a ban ngaihsun ban lo ahih man in.

Tua pen singtang nupi mawl i cih gawpgawp, lai theilo te nuntakna hi phot hi. Tua i cih hang tua bang gilsung pan milian milal tampi pianga, Zogam bek hilo leitung bup ah ahi hi, US president ding takpi zong tuabang sung na piang kha ngei hi.

Thu a nget ciangin, 'ka tate thu a manna ding in, ka tate a cidamna dingin, a laisimna ah a theih theihna dingin, ka buh leh vaimim te, ka vawk khawite, gan leh huan te, .. cih bangin ama ngaihsut theih ciangciang lo dandan hi. 'Ko numei pawlte in ka sawmna ah, ka antang khut pham uh cih bangin pawlpi adingin zong ngen uh a, 'ka Zomi pih te, a zin a vak, summet bawlte, palik galkap leh pilna zongte zong hong kepsak in, ciin a theih khempeuh sam naunau hi. A theih peuhmah nusia lo hi.

Khuapi nupi, ak ek muciik zong a sik kha ngeilo, a gim bangci cih zong a thei kha ngeilo, a kilawm a ut banga kizem thei leh a nik apuan a deih deih a laih ziahziah theite in zong ama hih theih khomkhom in thungen a, panla sam hi. Ahi zongin nek ding kicing den ahih manin thunget kisam sa lo, silh ding a hoih nei thei denlel ahih manin thungetna ah hel ngailo, a tate zong sanghoih ah kahsak zo lel ahih manin thunget kisam sa lua lo, numei pawl ah zong a kumkhat sumciam uh nei pah lel, a kisap uh tamlo ahih manin thungetpen sau kisam lo hi.

A nih un hih nupi nih te i tawikhai ciangin khat adingin thunget ding tam a, khat adingin lungdam koh ding tam hi. Kua in a lungsim takpi tawh Topa a ko diam cih a ki gen theih loh hangin a kilawmsakna bek tawh Topa a zong a bel a om ding ka um kei hi.

A kigen thei khat om a, tua in singtang nupi a hi ciuciau banga kipan ciauciau Zomi sung pan tu hun ciangin khuapi nupi banga lungdam koh koh lel ding dinmun a tung omta cihna hi. A nak a phawk diam, a kipatna a phawk diam, a khan khiatna a phawk diam?

Singtang insung pan khangkhia na hi a, khuapi pan khangkhia na hi zongin na kipatna, na bul, na khua leh tui na mangngilh ding kilawm lo hi. Zahpih dingin zong zumhuai hilo hi. I hihna pen zahpih huailo a, i khek ding hizaw hi.

Singtang nupi in a theihna ciangciang ah thanuamtak leh zahtak takin Topa mai ah thungen a, ama muhna ciangciang ah zahtak huai hi. Ama theih ciang zo takin siamnel a, a lungsim siangtho taka a biakna zui ahih manin zahtak huai hi. Khuapi nupi bangin amah zong hun kipia hi leh (chance ngah hi leh) khuapi beklo leitung koimun peuh ah zong muan huai ding hi. A lungsim hoih ahih man in.

Hau Za Cin
Phuitong Liim