Dear ...,

Zomi khempeuh tua ci khin sam in um kei ing. Nang zong Zomi inkuan hoih na muh om sam in um ing. Ahi zongin Zomite hoih khat zong na at loh kiuhkeuh mah bangin minam dangte siatna khatzong na atkei leuleu hi. Minam dangte siatna san zong na muh om sam in ka um a, Zomite hoihna san zong na muh om sam in um ing. One sided lua a thu i gen ciang "HI" a sa khin pawl om theih a, a hoihna, a hoih lohna zong genkhop zelzel kisam sa ing.

Zomi inkuan khempeuh nu leh pa zahtak lo ahih ding ka um kei a, midang mawhna nei vetlo zah a na gente zah mah a nu leh pa a zahtak zong Zomi lak ah om tham hi. Vantung mite bang phial a mawhna neilo dinga na gen minam dang lak ah zong Zomi nu leh pa zahtakna pia lo na cih zah sanga sia zaw zong a om ding ka um hi.

Tua manin kei ngaihsutna ah Zomi te a sia teng bek kipiak den sawmna lungsim pen leitungin hong pakta ding hi peuhmah lo a, kawlte, vaite, mikangte in zong "thukhual siam Zomite, leitung siatna leh mawhna teng pua khin" ciin zong hong pakta tuanlo ding uh hi.

Minam (mimal zong hi veve) khangto i cihte in amau hoihna lam vive kigen zaw uh hi. A siatna thu uh pen kuaman za nuam lo hi. Gengen dingin zong thupi lo a, zum huai hizaw hi. Never force yourself to have a guilty feeling. Guilty Feeling, Mawhkisakna tawh nuntak pen lungdamna ding tamlo hi.

Kei ngaihsutna bek hi sam. Lungsim lam siamte in Think Positive na ci uh ahih manin, a hoih lam bek lim ngaihsut zaw in, a sia i bawlkhak a omte kingilh bawl in, a kik ciang khialh sawm nawn kei leng, ahi zongin taangpi taangta theih dingin pulaklak sa kei leeng cih ka ngaihsun zel hi.

Genkhial a om leh hong maisak un,

Hau Za Cin
Phuitong Liim