Zolia ding mah na hi veh aw...:

Zolia ding mah na hi veh aw, guai, Zolia ding mah na hi veh! A aw uh i zak bek zong khum ngaungau hi ven. A kamneel uh hong zanglai leh Zogam tangval a lungdam lo om ding hiam? ka ci hi. Laphuakte in "Zozam melhoih" ana cih ngutngut uh pen a diklua hi, a tehpih ding a hoihzaw paak dang omleh tua tawh kibang hi. Zozam sanga pak hoihzaw Zomi te khang ah na omlo ahih manin Zozam melhoih aw na ci uh hi. Mikangte in Rose tawh na teh uh a, Zomi te in bel Zozam tawh na teh uh hi. Zomite khangthu ah Rose i theih pen sawt nailo a, Zozam pen Ciimnuai, Geltui pek pan a kineisa hi ding hi. Tua ahih manin Zolia leh Zozam kigenteh a, a hoihna uh a kigenzolo ithuai genna hi.

Namdang nungak, laphuakpa khat in, "Tongdam saan mawh singdang san nem" na ci hi. Kituak thei mahmah lo, lungkihual thei mahmah lo namdang nungak hitazen hi. A sia hi peuhmah lo uh, a mel khawng uh a hoihlo zong hi tuan sam kei e, ahi zongin Zomite adingin kituak thei hetlo himawk hi....tongdam san mawh..... Ei a mah i lungnuam sak a, ei a mah na thupi veve hi. Zolia tawh om leng i lungnuam a, singdang lia tawh om leng kilungnopsak tawm kisam hi. Zolia tawh kikhawl leng i kimaitaia, singdang tawh kikhawl leng kimaitaisak tawm kisam hi. Zolia tawh hi leng i lungsim takpi tawh kinungta a, singdang tawh hi leng a kilawm dingin kigamta hi. Professional relationships kisam hi. Maitai lopi kimaitaisak pong, pakta lopi pakta tawm pong cih dan te e....

Tua ahih manin mi'n bangci ngaihsut hiam cih bel thei kei ing, Zolia mah ding hi. Zogam tangval ten zong Zolia mah in hong ngak hi cih i mangngilh loh ding hi. Amau lametna i guaksuaksak loh ding zong tangval te mawhpuakna khat hi. Ei a mah na thupi a, ei a mah na honuam hi.

Tuma in "i Zolia gamdanga om pawlkhat namdang tangval tawh hong kingai thei kiukiu zong om in khantohna khat hi thong lo hiam....." cih te khawng tangvalte in i lianu te vil lo lua i hi kha tam aw ka ci hi. A ki lawmta kholh zong hi kha in cia..... (thei sam kei ing).

Bangbang hi leh Zogam tangval ka hi a kici te adingin adang hi kei, Zolia mah ding hi. Zozam melhoih tumtai gimnam duang kizuunsiam Zolia mah hoihsa ing.

Tulsing lel a len heisa zong a palna tulsing dawn pan,
Ngaih gim hong laang nam maw ci e,
A paal lo ding Zogam vontawi Taang ngalliam in,
Lungsit loin vangngaih Zozam,
Pak bang va lo ve ni... e......

(khawng ci zanzan dih ni, self composed)

Na paal lo dingin lailung ka gel ciang
Sinlai lambang na paak ing
Hong leng ing e ngaih aw tual hong niam ve aw
Na pal lo nuam ing ngaih aw

----by Zamdal

Aw bangzah in nuam ding hiam... ngaih Zozam pak bang lo ding a vabang va leng diaidiai ding cih pen....

Hau Za Cin
Phuitong Liim