Nungak hel dan thak (latest tactics) :

(nasty)

Millenium lui ah bel nungak hel ciangin gentleman taka tangvalte na gamta in nungakte zong lady taka na maitai in, millenium thak ah bel tua bang kizang thei nawnlo, outdated ahih kei leh thring, odd hi ta mai hi. Tua manin new millenium ah nungak hel danpen style thak kimangta a, nungak heldan thak (latest tactics kici ta hi).

Kamsiam leh mihoih kisam lo, bil vut dingin mun nih mun thum a khausan, gold, silver cihte bah suk pah zeizai ding, lu gakna ding American flag mainul a lian deda te khat lei dingin ahi zonga lu ah gak lo dingin baanbul gakna in zang dingin, pheituam pen a taw kaisuk a tual pian, a khuk ciang ah a kaa a ki khaisuk tepawl teng dingin sneaker pate khakhat khasum tawh a ki lei zo ciamciamte khat bulh uih pian vengveng dingin, ahi zongin a gim a kizak lohna dinga zazial tep khu piandingin, kuva leh sweet haipian naknak ding. T-shirt kol liakluak silh pen a ngawng vang bawngpi thawl ding zah a lianpen zong liangko khat a kidawk dekdek pian a silh dingin, kaito zellel ding...... hair style pen samsih tawh a ki gamla theithei a hawi ding....

Nungak te kong tual tun cianga khanglui ngeina dan mah a khatvei awsuah dingin khuh kheuhkheuh ding, tua ciang insunga te in mi hong hawh ding om cih na thei dingin tua pen Zomite ngeina hi.... Kong khak nih vei thum vei kiu ging letlet dingin hong zak kei uh leh tawm vei ngak digin kiu kik ding, tua ciang hong hon ding uh in.... hong lut un a cih ma vua greeetings ... hong hawh un, dam maw, nong hawh zenzen a, cihte pawl a gen ma vua en i ut na lamlam pheeng gensuk gawp pah lel dingin basic courtesy pen khanglui vai hi..... ci suk ziau dingin intekte mitmei zong veng sese lo a.... ki intek sak suak lel ding.... ei in lut mah banga pau kawmkawm tawh lut thuah suak phei pah lel ding... pa na e hong cih ding uh deih i hih cianga maw....

A zum kineih sese zong kullo sofa tung, tutna nuam pen, innsung tawng lam pen ah zong va tu phei pah gega mai ding, khe khuang ditdiata, ut teng gensuk zialzial dingin, TV remote omna zong dong sese lo a, mitmei pah lel ding.... nungak hong hopih ngak sese lo dingin en i gen ut teng gen dinga hawh dan k ingaihsun lel dingin ban gengen lel ding.....

A nungak lunglut lam zong ahi khol kei zonga i mobile leithak (a nu leisak pak pen) a hoih dan leh sms a khah zah te pawl zong gensuak vet dingin nungak pau sak man sese lo ding, a hang pen a nungaknu lungsim ah busep sawm, nungaknu in pa na e hong cih ding ut i hih cianga maw..... lawmte Bike tawh i vak thu leh i van leite khawng ban gengen lel dingin..... i kam khamta, i dangkeu pianta cih ciang inntekte mitmei zong veng sese lo a niangtui demand ciah hilo ahi zonga nial theih lohdinga genkhia ziau ziau ding, tua pen mastersa leh vakna peuh ah zatsa ahih cianga No problem, (gilpi leh nek ding lamsang pen a key man hoih lua e).....

I kiphat nopna teng leh i gen ut a bei cianga nungak nu ei ut lam, ei theih ut lam gensak dingin ama gen ut leh lunglutna lam zong khualsak sese lo ding, ahang pen amah Numei hi in, ei Pasal hi ve hang.... a gen theih khol kei leh ciamnuih zahmawh lam kai pian zong genpih dingin taptunga tu a nu lehpa, TV en a tu naupangte in zong hong gen ngamloh uh hanga kilawm sa ciah lo, nuamsa lo uh hi cih zong khual sese lo dingin, innsunga om khempeuh khangual bang a ngaihsun pak dingin, ut teng gen theihna dan a tuat lel ding.... ei lengla i hih cianga lengla do na siam un cih pen total advantage la dingin hih insunga omkhempeuh mitmei veng sese lo ding....

A kikal helh in lawmte phone dingin khat vei leh english zang dingin, khatvei leh vaipau, kawlpau cih dan hel naunau se dingin moral boost thei thei ding bek nungak kianga tut laiin gen ding... Sun a hawh i hih manin nitak annek hun dektak tan tu dingin ei thu bek gen ding... nek ding dawn ding hong kiluite zong lungdam thu gen sese ngailo, tua te khanglui vai ci dingin Boss dan deuh a, ne suk pah phiau phiau lel ding, a lim khol kei leh zong genpah mai ding, ka duh lamte pawl hi khol kei veh aw ci lel dingin intek te kisuang lah leh zong hawh kik ciang a limzaw na leita na ve uh cih lungsima nei gige ding.... kua nopsak loh kua neih loh khual ngailo, kei nopsak ding, kei gilvah ding bek khual ngai cih lungsim ah nei gige ding.....

Intekte zunbuk ekbuk pen a emergency a hi khol kei zonga lut zihzeh lel dingin, zong ngen masa sese lo ding, na ek buk uh a hoih hia, a siangtho hia, a namsia hia cihte pawl zong lut ma a dong pah lel dingin ei sang a inneite kisungsia sak zaw phot zezen ding.... ei inn ah ek buk zun buk gina zong neilo i hi cih lam pen gen hetlo dingin, zong ki standard sak mahmah ding....

I nungak hel pen a nu leh pa zong hopih meello dingin a tanu bek mah thupi bawl dingin amah kiangah ki thupi sak tawm keei ding..... impress nuam i hih cianga maw.... ahi zongin i mawk kamtam leh i thugen pen lampi nei a pheeng paupau hi cih hong theih tak ciang a lunglut nawnlo hi, hih pa a hawmpi hi cih hong theih khak zenzen leh zong a deih taktak lo dana kigen kik lel dingin hawhna ding thei lo a, ama kiangah hawh pak lawmte khat in koisung hiam ah mu kha a melhoih sa a mah tawh kimu nuam himhim a hawh dana kigen kik lel dingin, eima suahtakna ding zong kik carcar mai ding..... i kigen siang theih mahmah kei leh....a manlah mahmah, hihding nei, tua hih ding neih pen a mangngilh kha, a delh ngai, rush out kisam dana kigen pak dingin, a kua a mi khual lo a, mangpha khak leh dam taka insung pan dinkhiat cih om se lo a, thakhat thu a dingto vat dingin inkongkhak lam kiden phei na ding.... kongkhak hong dingin nungak nu in 'lungdam ei nong hawh uh, mangpha maw' a cih zong za man nawnlo ding khop a kikhawh khia ding.... hawhkik nawnlo ding cih kithei hi ve hang, hope omlo, ki genlut zolo i hih cianga.....

Ahi zonga tactics dang khat ngaihsun dingin, lawmte Bike kawm dingin amau inkong ah lugakna san leh sunglass vom bulha nihvei thumvei bang kileh ding..... tua tak ciang bel nungak nu zong hong khanglo kik dingin hih pa che thei na e hong ci kik ding in, i hawh masak lai a i ciah kuana hong maitai pha nawn mello pen hong maitai kik dingin...biakinn ah, fucntiion leh pawi hun te ah hong kineel kik kik pianta ding, ei zong a deih nawnlo dan a ki hisakpian dingin, maitai nuam nawnlo ding.... tun pawh tai nawn kei in teh cih i theih cianga, khatvei hopih vat dingin phuul ding. Tua lai nong tuacih loh... ci dingin i Bike tawh ki khawh khia ding..... lawmnu a lubgleng vangvang ding ahih cianga, kuva lei khit ciang kileh kik dingin hoih taka va hopih kik dingin.... nungak nu zong a theihtawp suah a hong convince sawm in maisakna hong ngen dingin.... hih khial kisa ding, tua tak ciang 'kong hopih nopna om' ci dingin Bike nungah tuang dingin mitsaai ziau dingin lawmte mitsaai kik dingin...... . ut na lamlam ah vakpih ding.... tua ciang bel..... tua nungak sanga hoihzaw i muh matan hiam, ahih kei leh tua nu i deih nawnloh tan lawmte bike tawh pua khia den dingin, a nungak nu leh pa zong 'lungkim pianta' cih cianga midang khat heel san kik dingin, tuanu hehsak ding..... khen dan ding scheme khat kisam kik ahih ciang amaw....

Tua scheme pen a ki zawh ciang nungak thak tua banga pua kawikawi kik dingin...... ... tua zoh ciang zong a dang khat,,,,,,, tua zawh caing zong a dang khat........ mihau tapa kihi ven, lawmte Bike nei lawm kinei hiven..... enjoy life....mazza karna hai......

Tua bang sunga theih loh kal a College exam hun cihte a banban a hong tung toto dingin fail zel, pass zel, a tawpttawp na ah pass zo nawnlo.... inkuanpihte in lai lah zolo nahih ciang zi ding khat Kaam nei zong ni ci dingin..... amah inn ah khumcip digin a nu leh pa in zi hoih mahmah khat zonsak ding..... ka tapa uh nidang in themkhat na gilo a, tun bel ki khel kikta, mi hoih kik hita, kisiik mahmah, biakinn ah zong hong kikawm zel, biakna leh khangno kikhopte ah tel gige ta.... cidingin, phat theih dandan a phat pongpong ding, U Johny in 'Ni khat in numei 19vei ngawl ahi'n tua laitak i tuak khak nak leh convince lah omlo' a cih dan deuh a, kua tanu hiam khat a hoih penpen mah zi dinga bel va deih zel, a melhoih, a laisiam, a pil leh kaam nei.... (a hang pen a tapa uh piangthakta a hih cianga)....

Si leh nai tawh hong muhsak uh in, sum leh pai zong om lel ahih cianga, mihaupa tapa leh mihoih nungak hong kiteeng in mopawi hong bawl uh... thupi taka gan go...sa tawh lawm, nuamsa,,,,,, ahi zonga......

Hau Za Cin
Phuitong Liim