ZOMI SIAMSIN Magazine, Vol.1.

ZOMI SIAMSIN Magazine, Vol.1 (February 2006) lemsuk zuaizuai leeng:

Zomi Siamsin Kipawlna, Kalay University in a bawl hih Zomi Siamsin Magazine Volume - 1 na pen Chief Editor Sia Vum Lian Pau, MSc (Maths), Editor Suan Lian Mung leh Pawl lutang Suan Lian Pau MA (Hist) makaihna nuai ah kibawl in, Professor Kam Za Mung, Head of Philosophy Dept. in Thumasa gelh sak hi.

Laimai 200 sungah Poems, Cartoon, Kalay Univ. tawh kisai thu, Major subjects tuamtuamte thu, ICT, Hanthotna thu, Music thu, Lai leh Pau thu, Gam leh Minam thu, Cidamna thu, leh Thu tuamtuam ban ah All-D ngah Lia Hau Khan Dim leh Taang Thawn Za Lian tawh holimna zong tuang hi.

Prof. Kam Za Mung in "Zomi te pen i pu i pa khang pan mi citak, mi thumaan, mi ki it ngiat te ihi hi. ITNA, THUMAANNA leh CIHTAKNA tawh Vaphual nupa banga a nungta ngiat te ihi" ci'in Zomi te hihna diktak leitung khempeuh theih dingin hong pulak masa a, hih Magazine sim khempeuh theih masak dingin laimai masa ah gualphei pah hi.

Poems sungah Zogam itna leh pahtawina, khualui phawkna la, nuntak namtui ngahna ding la, mi khempeuh lungsim ah a om Tunnu itna, Zomi zahpih lopa la phuak thupi mahmah, Zogam zeem Phualva, Tun leh zua leh a dangte kituang sak hi.

Cartoons - mi khempeuh in a thu sim sese zong kisam lo a, a milim pan a kithei ziau dingin Zomi Cartoonist Pu Zozam in, "Sang kah kah khiatna nei kei, hauh ding thupi, gamdang pai lel ni" ciin a lawmpa zawh a, a gal lam ah, "Pilna lo tawh migam ah nasep zong nop mah e...mateh" ciin thagum tawh nasem Zomi te lim hong suai phei hi.... A nuai ah Zomi Siamsin tangvalno khat a nu leh pa thau leh sengbingpua a, muitung khaukhek lailaite kiangah 'Ka tangval teh hiteng leh huateng kikal khaulei dawh ding..' ciin a sang thungpi kuah kawmin a nu leh pa lungsim ah lungdamna, lametna leh hanciamna, ngimna leh mailam khualna aneihte alak, a guan hi.

Sangkah ciang a nuam mahmah - Maithak muakna (fresher's welcome) hun maante hong kidawk a, laisiam zono te pahtawina laipi kipiate in lametna mitdim in hong musak a, Zogam kilbang khang ding hi cih hong phawksak kik zel (remind) hi. Makai te maitai leh Zongeina lak siamsin momno te, makaite maan cimlo takin a ki etlai in, milim sanga thupi zaw leh pilna hong guanzaw ding laimai tamzaw in hong ngak lai hi. A ban phen phei leeng -

Sangkah hun ding, sangkah ciang a kisam ding - lai, sum, maan, etc., Department tuamtuam ah subject lak theih dingte leh mark muh zah ding te, Laibusaal thu, biak kikhopna University Christian Fellowship thu, Nate thu, Tangthu, Maths zatna, Philosophy or na khempeuh tawh a kisai thuman bulpi zonna, Law, etc. te thu kicing takin kituangsak hi.

All-D ngah Lia Hau Khan Dim in "Ka exam zawh ni in, subject 4 ah D ngah dingin kimuang ing, adang nihte bel gen ngam keng" ci hi. A subject ah mark muhzah Kawllai, (laigial) tawh ki at ahih manin a phazah ka thei kei hi. "Lai sim hun Time Table nei tuan kei ing, a hun hun in sim den ing" ci a, MC = Medical College (Naupang Siavuanpi) a zop sawm thu gen hi. A thupi mahmah kasak pen Nipini kikhawm den, Nipisaang pelh lo, Paunak sung sim den hi. "Topa Zahtakna in pilna kipatna hi......"

All-D ngah mah Taang Thawn Za Lian in zong MC a kahsawm thu leh a neutung pan Siavuan a ut thu gen a, khuata pan ahih hang limtaka lai a etzia gen hi. Manglai leh Kawllai tawh a ki atlo te zong Zolaimal in - lotngah, siamah, limsuaih.... . cih khawng kigelh ahih manin hih bel Rev. Khup Za Go in Zomi International acihte taktak hita mawk ei. Kei bel lotngah het kei mawk ing ei. A mark ngah zah a sim theilo hih Magazine sim dangte lakah a om ding um ing (kei bek ka hih ding um ke'ng).

Sia Lianbawi, FBBC in Zomi te in Manglai i sin patna tuma kum 40 hun panin hong sut to in, tulai sangnaupangte hamphatna tuamtuamte hong gelh khia hi. Nidang laia laisimte tawh a kilamdan tawh teh in tulaite in manglai i hahkat ding ahih dan gen hi. English i siam ding a kisapna pen leitung pau kitamzat pen hi ci hi.

Kawlgam ah Christian a tawmna hang pen a tamzaw Tapidaw hi.... ha ha!! Tapidaw leh Pilna cih sungah Sia Dr. Do Suan Mung in "Pilna pen Pasian aa ahi hi" Dan. 2:20 ciin a laigual masa pan hi. I Pasian pilna Pasian hi a, Lai Siangtho pilna laibu hi ci hi. LS sunga Pasian mizatte zong pilna sangpipi nei vive - Moses, Abraham (pilna zonna khuapi Ur ah teng), Daniel, Pawl, etc..... Pasian ah aki bulphuh pilna zong ni, nei ni, nuntakpih ni a ci hi.

Gin Sian Pau, Tedim in Lungkia ngei kei in cih a gelhna ah - Leitung ah mi gualzo i cihte pen a pilpen te, a khuak hoihpen te, a cidampente, a galhat pente hi masa tuanlo hi; a hanciam, a kuhkal, amau khom ciat a hamsatna, gentheihna te a phulsuak te ahi hi ci hi. Mi kuhkal minthang Dr. Condoleeza Rice, Helen Keller, Werner von Braun, Abraham Lincoln, etc te hahkatna gen hi.

Sia Rev Jon Thawngno in - Kipumkhatna pen mihingte nuntakna bek hilo, ganhing leh singkung lopate nangawn sungah a kisam hi ci hi. Tua manin bangzah takin Zomi te kipumkhat kisam hiam ciin hong challenge hi. Minam naupang ihihna a kilatna tuamtuam te a gen banah kipumkhatna hong dal te gen hi. Abu sungah sim ding pawl hi.

Prof. C. Thang Za Tuan in Bang pilna sin ding cih a genna ah tuma kum 40 hun in eima kingap lamlam sin theih a, tu hun ciang kidemna tawh a siamte in a hoih ngah ta hi ciin midangte sang pilzawk a kisap dan gen hi. Tuma hun pan pilna zonna a kikhek dan zong theih ding hoih a, tulai latest technology zong i thupi bawl ding ahi ci hi.

Sia Vum Lian Pau in Pilvang Ni ciin mi lak ah i om ciangin gamtat kilawm a kisamte hong gen hi. Rev Nang Khen Kham,Tahan in Siamsin momno te Magazine ah lai at theihna a ngah a angtanna gen masa pen a, siamsinte maban ding limtak in gen hi... a thu hoih lua ... a bu sim in ...a thupina kitel sem hi.

Prof Kam Za Mung in Pilna bek mah deih pha pen ni ciin ama tuak thu pawlkhat pan na dang khempeuh sang pilna thupi bawlzaw ni ci hi. Sum leh pai, neih leh lam te pilna om phot leh hong kipia ding hi ci hi.

Angela Hau Khaw Neam pan laikhak, TK Double pan Theihtel kisam... Msgr Felix Lian Khen Thang kiang pan Khangno leh Gamtat hoihna cihte in khangnote ading a kicing mahmah thu manpha tampi ki at hi.

U Gin Sian Mung in Thadah lo in hanciam tentan ni ciin - Tu laitak mipil, misiam, mi minthang, laithei, lai atsiam i cihte hun khat laiin lungkia hetlo in a hanciam, a cihtak, a kuhkal leh a bel mite vive ahi uh hi ci hi. Aman lungkia loin hanciam tentan peuh lecin (try try again) na gualzo ding hi ci hi. Mi thupi i cihte in mihing pumpi khat a hih uh hangin nasep thum bang thuah in hun awng ah zong nasep gina khat sem kawm thei lai uh hi ci hi.

Thudot hatpa leh a kisel cip itna ciin .... Tg Thawn Deih Tung in hong gelh a, itna thu ... itna na thu... .Lianpu leh Nemno ki itna thu.... Zomi Lia leh Taang te ki itna thu (Zomi Love Story)..... sim loh theih loh.... by Taang A. Vaanpi.

T = Tedim pau...... (zop lai ding) ....


KONG THEIHSA HITEH:

Zato kikheina room sungah Penglam kikhei dingin a lup laitak in Siavuanpa hong pai hi.

Penglam: "Siavuanpa aw, na mai tuamna lakhia in, kong theihsa hi teh"

Hau Za Cin
Phuitong Liim