Tuucingte leh Tuute

Sia Suanpi series kawmkal ah kihelh zauhzauh zel ni in. Siapa in tuucingte leh tuute kizopna hong gen khawm toto zel henla, kei a tuu lam hizaw ka hih manin tuute lungsim leh ngaihsutna, lametna cih bang them khat hong behlap pak nuam ing.

Tuute in tuucingpa tung bek pan ka lamet den uh leh ka khial uh hi ka ci nuam hi. Lasiam te in mipi maiah lasakna concert i ci hiam a neih uh ciang a pai mikhempeuh in a lasak uh nuam a sak uh, zaknop a sak uh, thupi a sak uh banga tuucingpa tungpan lungkimna ka zon uh leh ka khial uh hi ciin ka um hi. Siate pen mihing leh Pasian kikal a siampi nasem hi a, Topa sathau nilh, Ama thugente hong hilhsawn, Pa tawh i zopna a kho semna dinga hong sepsak ahi uh hi. Pa tawh kizopna khempeuh hong bawlsak dingin ka tuat kei a, ama tavuan in ka koih khak uh leh zong ka khial uh hi. Tuute leh Pasian kizopna a bawl ding mimal hi a, tua kizopna (pianthakna i ci hiam, mithak suakna, Pasian ta dinga kipiakna) a kibawl zawh ciang tua kizopna a khangcingsak ding tuucingte nasep hi zaw a, a kizopsak ding pen tuucingte tavuan hiloin mimal hih dingin ka ngaihsun hi; siate hong bawlsak dingin ka koih khak uh leh ko khialhna hi ding ciin ka um hi.

Hau Za Cin
Phuitong Liim