I mangngilh khak loh dingin:

Keima mimal ngaihsutna ah a om den, ahi zonga ka gen khiat ngam ngeiloh khat pen i mi masa te pahtawina tawh kisai hi. Nungin Zomi numei sungpan Siaza a kipia masa penpen Sianu Rev. Ngiak Za Dim in leitung hong nusiat san ta hi cih i za ciat hi. Amah bang mi hong om thei nawnlo ding hi. Amasa pen kuamah om thei nawnlo ding hi. A nuntak lai a akipahtawina te keima mimal in Net sung ah ka muh tawmtawm te ka sim a, ka kaihkhop kiktak ciangin ka lungsim ah 'Sianu zong ama mit muh a a pahtawi nuam, a pahtawi manlo om kha ding hi a maw' ciin ka lusu ngeungeu hi. Hun in hong ngak lo a, nuntakna kilencip thei lo hi. A hun zui in pai ciata lap kei leng a bei hi mai a, kisam kik theilo hi. Tua ahih manin a hun lapa ngaihsut man ding, a hunlap a sep man ding thupi mahmah hi ciin ka ngaihsun hi.

I sia masa te ci ni. Biakna Christianity i zuih pan a kipan sia ding kisam pah in, i upna a kipsak ding, i upna i theihcianna ding, i muan i belh i biak Pasian i telsemna dingin minam sungah zong mipil, mitei masa te in Sia hong sem in hong pattah uh a, amaute nasepna leh hanciamna hangin tuni leitung level ah a niam hetlo dinmun i tung thei ta hi. Hong nusia zo Rev ST Hau Go, Rev. T. Jamkhothang cihte Zomi te khualna tawh USA ah zin in Pasian thu kicing zaw sinin hong ciah uh a, a minam tein bangzah kipahtawi hiam cih ka thei kei hi.

Leitung kumpi na semin milian milal khat suak le uh a nasem ding natawm akipia ding kimlai pen 'nisim ka kham khop ding ann hong pia in' cih zah phial a Zomi makai leh minam leh Pasian nasem te nuntakna ahih mawk pen a ngaihsun thei ciangin i kikup, eima sep theih ciang ah i ngaihsut phat ding thu hiin ka ngaihsun hi. Tua bek kicing nailo a, pahtawi zong kilawm veve mawk hi.

Singapore ah om Zomi Inkuan Singapore te in Sia masa te leh a zi te uh a pahtawina uh, a khualna thu uh i sim ciangin i cimul tho in i lungsim tawng pan i zahtak mahmah hi. Ahi zongin amau zong amau hih theih khom ciang a sep uh hi a, a huam khit zawh loh uh om ding hi. Tuate a khual thei ding i om leh ngaihsut a kilawm mahmah hi. Mihing angsung theilo omlo, a huaiham lo omlo cih pen leitung ngeina hi. Ahi zongin a kilawm ciangah midanga dinga thupha i hih zong kisam mahmah hi.

I mi masa te - sanginn gina ah zong kah lo a pilna a zong kankan, siamna a sin kankan, kum 50, 60 a pelh uh ciangin zong lai a na sin kankan te pen pahtak huai, it huai, etteh huai a, zahtak huai uh hi. Amau hanciamna i pahtawisak khin zo kei zongin it hi hang, khual hi hang cih i kilat sak zel pen amau adingin Kham lukhu bangin manpha dingin ka um hi.

Rev. GK Nang pen tu in PhD sinin USA ah om hi. Kei theihna ciangah a neulai pan laisiam mahmah hi a, tan 10 a zawh ciang Science sin in ahi zongin pumpi cidam lohna hangin zomsuak theilo in sang khawl a, a zawh lam pek ciang Lai Siangtho hong sin kik in, BTh, MTh, zo to in tu in a pension khit ciang PhD natawm sin ngap lai hitazen a, pahtak huai cih dingin kam neulua ka sa a, thupi lua ka ci nuam zaw hi.

Rev. Khup Za Go pen a neu tung pan laisiam mah hia, ahi zongin insung haksatman in sangkah kizom takin zomsuak thei lo a, aman deih mahmah ahih manin a tangval khit a upat khit ciang laisim kik in, BA, MA zo in, MA a zawh zawh kum 8 ciangin BD sin kik pan a, zi leh ta tawh tate guallak ah sangnaupang suah kik pen nuam kasa het kei hi ci hi. BD a zawh zawh kum 20 zawh, a pension kuan in MTh sin kik ngap a, a pension zawh ciangin M.Phil, sim kik in zo manlo in hong nusia a, zo man hi leh MPhil zoh ciang PhD zong kahsuak a sawm lai hi. Aman "naupangte in (ka tate in a cihna) pension zawh ciang pilna kisin thei a, pilna pen manpha hi cih thei leh cih ka deihna hi" ci hi. Ken ka degree zang man nawn kei ning, ahih zongin pilna thupi kasa hi ci hi.

A tunga ka gente kei theihna ciang hi a, Zomi sung pan amau mah banga khangham zawh, upat zawh cianga pilna sin tampi om ding hi. Mikang pau natawm a pau siam pha lo zong om kha ding hi. Ahi zongin pilna a deihna uh, a hahkhatna uh kei thupi na sa mahmah ing. I pahtawi theih leh pahtawi kilawm hilo hiam, i mun ciat ah, i khua leh tui ciat ah, i pawlpi, i tenna gam ciat ah cih bangin..... cih na ngaihsun ing.

Gen khial a om leh kimaisak ni. I mi masa leh tulaitak a khangnote hong pattah khuavak hong musak i mipil masa te it in zahtak in, Zomi te go, gamh, van manpha, heritage khat hi uh hi cih mangngilh kei ni.

PS: Biakna lam bek ka gen pen gentehna in ka zat bek hi, secular lam ah zong i mi masa te a kikim in pahtawina kilawm hi.

Hau Za Cin
Phuitong Liim