Hun i cih pen bang hiam?:

'A nunung khempeuh a zekai hilo hi'. A tung nunung peuhmah a zekai hi tuanlo a, a masa khempeuh a hunlap hi tuanlo hi. Amau hun hun in a tung hizaw hi. Bang cihnop na hiam?

Ka cihnopna ah Hun pen mihingte khentawm hi. Japan ah kumthak atun laitak in USA ah kumlui kha panpan uh a, Japan, Korea, Taiwan te in kumthak nikhat a langsang tamzaw a zat zawh ciang, a lop zawh dikdek, a khua-ul uh zong hulzo, zong kisil kik man, nasem in kuan khia khin man cih ciang USA te kumthak muakdingin NY khuasungah hong diangkhia pan uh a, zankim a pel nailo hi lel tak hi.

Tua ahih leh hi ciin ngaihsun leng. Japan ah kumthak muak khit bektak in vanleng hattak tawh lengin USA delhsuk vingveng leng, kumkhatin kumthak nihvei a zangman ka suak ding hi. Tua ahih leh Hun i cih bang hiam? Nisuak nitum ciamtehna bek ahih hiam? Khade, khamang ciamtehna leh nasep, tawlngak hun ciamtehna bek ahi hiam?

Hun pen a om tawntung, a kip, a kipatna pan a tawpna ding a kigen theilo, a ma om in a om, a lui ngeilo, a kho hi a, mihing leh leitung nuntakna nei leh neilo - na khempeuh tua hun kiim ah a beibei hi zaw hi. Hun in hong paisan hi lo a, hun in hong ngak zong hi lo hi. Hun bel ama om in a om lel a, mihingte i piangin, i si zel hi zaw hi. Singno hong po in si kik zel a, a dang khat hong po kik in tua zong asih hunin si kik lel hi. Hun a hih leh leitung piansak pan tuni tan omlai a, upa tuanlo, naupang tuanlo a, mihingte ahih leh a pianni pan a ni anai, a kha akumin upa hiaihiai in a beisuak lel hi.

Tua ahih leh hun bangci zang ding?

Hun hoihtak a i zat leh nuntak manpha cihna hi a, nuntak a manphat leh lungdam ding cihna hi. Lungdam leh pumpi cidam a, sawt nungta sak hi. Lungsim gim in dahna maigum tawh nungta den leng pumpi cidam lo in, natna in hong bawm baihdeuh hi. Tua ahih leh bangci lungdam ding. Gilkial tak in 'Lungdam siing Topa' ciin lasasa theilo ding hi. Hong it hong ngai khatzong a omlo in kingaihsun leng leitung a gimhuai ding hi.

Thegul banga kilip kik lo ding, gamgua banga kikhehno kik lo ding mihingte in ki ittak, kingai diamdiam a i nuntak sung tomcik, zinga nisuak meikai in a liah kik pah banga sawtto lo, zinga papo nitak cianga muat kik bang mai leh zing daitui in a palhsak pak hoih takte sun nisa in a kap hul kik pah mai banga i nuntakna ki itna, kingaihna leh kipahtawina tawh i zat ding manpha mahmah hi. Hun in bei cih nei ngeilo a, mihing te ahih leh kumthak 60, 70 vei bek mu in ei ut leh ut loh hilo, Lai Siangtho in hong hilhsa i kipatna leitang mah ah a ciahkik ding i hihi. Tua manin tomcik i nuntak sung kihuatna man ding om lo a, kitot manna ding hi kei, i kim i kianga omte tawh kituak tak a nuntak ding hun nuam hi zaw.

Kumkhat sung i cih pen kha 12 hi lel a, kha khat i cih lah nipini 4 vei hong tung leh beipahpah hi. Nasem in nek ding silh ding lungkham leng ni 30 pen tomlua a, i deih i duh kimu manlo in kumtawp hong tung pahpah hi. Tua manin kumkhat i simna saulo a, mihingte nuntakna sawt lo hi. Hun bel kip in kho a, leitung bei dongin a tek ding a huai ding hilo hi. Ei bei zawh ciang zong leitung na omtoto lai dinga, leitung bei dongin zong Hun pen kikhel tuanlo ding hi.

Na nuntak sung dinga Hun hong kizangsak, Hun hong kipia pen manpha takin zang siam in.

Hau Za Cin
Phuitong Liim