"Happy Birth-day to Cingno":

Tring....tring. ..tring.. ..: "Hello, Cingno hi ing ei".... "Aw, hi maw lungdam si e nong len kha a, ka hopih nop pen hipah lian ei...." (khut hong liing pianpah, ahi zong kha-pet teta in kipasal sak, aw bel liing liang sam lo hi inteh!)

Millenium thak i lut tak cianga Zomi leh Zogam hong zeel, a en masa sa -nupi papi cih omlo, pitek putek leh nungak tangval natawm naupangte mah banga khitui luangsak zo khop a lungsim hong lawng hong khasia sak leh Pasian gama dinga hong pangsak nuam semsem Khitui Gospel Ministry in a hawmkhiat "Ngaih Anglai Ah" leh "Ngaih Anglai Mah" sungah a "staring" nu putek te natawm in 'Cingno' a cih ngaungau liang uh Japan Lulun in zanni January 17 niin hih leitung khuavak a muhni 'Birth-day' ci-a leitung bup ah a ki thangsak vangvang pen manpha tak, nuamtak in it leh ngaih, lawm leh gual tawh ama gen bang in "phatak in na (ka) zang thei uh hi." Hun nuamtak in na zang thei uh hi cih ka zak bek zong kei a b'day cake themkhat zong a ne kha lo natawm (ama theih loh in) a na nuam khinkhian ing. Tua mah bangin ama starring na video a enkha peuhmah in i lungdampih ding ka lamen hi.

Topa in a khankum cidam lungnuam in zangsak in, b'day tamzaw sem a muhsak ding deihsak hang. Pasian mah in amailam zong hong makaihsak henla, minam leh gam a minthang sak semsem dingin thupha hong piaksak hen. "Topa thupha mawle Cingno."

Kei, keima b'day zong a ciamteh khollo ka hih manin b'day lungdampih thu gen dan zong ka siam kei a, "Belated Happy Birth-Day Lulun" ka ci pong hi, aman zong, "Thank you, lungdam peuhmah ing" hong ci kiau ahih manin a lungdam takpi mah hi dingin deihbawl pong ing (a hoih lam kipiaksiam zong a kisam khat hi cih ka ngaihsun hi!)

Ahi zongin kei pen ama hong theih zong hilo, akimu ngei zong hilo, kimu ding maw, kimulo ding cih zong leitung dam sungin a kigen thei hilo, ken zong amah Video sungah ka muh bek hi a, kisuanglah pipi in ka kamsiamna tengteng kaikhawm in, "ko a teitawi pawl in na b'day niin hong hopih ngam lo hi ung, tua mana a bei khit ciang hong hopih ngam pan hi ing" ka cih gemgam sa'm leh aman zong hisa pian hisa lo pian ahi tam maw, "phamawh kei e, nang manlah hizaw ni cia" hong ci ziau in ka guallel kik pah lian hi. Eh.. ka ci a, Zolia mah ding hi veh aw, Zolia mah hopih nuam mawk hilo maw ka ci hi, hi nong sakpih ding uh lamen ing.... he he.... A pil kiukiau a maitai mahmah hi cih aki theihna pen nasem a tunglian, akisil man nailo, gim mahmah ding hi napi - lawptak, damtak, manlah hetlo, kimuangngam takin hong hopih hiathiat a, i tawl hong dam sakin hong lungnuamsak ngaungau hi.

Cingno mel ka muh ciilna (video ah) pen kum 2004 Nipini, zingsang khat lawmte inn ah hi. Lamka pan hong kipua Zomi video thak liklek, Ngaih Nanglai Ah a kici ka etna pan hi. Lawmte in computer thak nei cih ka zak ciangin kei zong kikhopma in etsak ning ciin ka ban toh leh Numei Pawl makai te pawlkhat in film na en uh a, ka lut lian cianga suak pen - numei khat lupna tungah a kihei bualbual ka mu hi. Lengtong music hong ging ciaiciai a, Lengtong Pauno in la hong sa in:

"Khua khalvak in ah lei lengthe hong khuang,
Zan khuasawt in bang sial ka diam aw,
Khangtheilo leng zalna laikhun tungah,
Na min thei bang lo kha zel ing.....

Albang dah in sawlbang hul veng, ngaih aw
Heh hong nem ding dang lah omlo a,
Nang tawh tullo a, gi bang i khen ding
Kei a'n nopna Ni taang omlo...."

cih hong sa hi. Eh, tua la ka theih ngei hi si e ciin ka zui pah a, a ban hong paipai a, ka upmawh sangin hong lunglut sak semsem a, minit 5 ka et zawh ciangin kikhop ka zekai nuam ta hi. A tawplam naih deuhdeuh, kei lah lunglut panpan, amai lam ah bangthu om hiam ciin zialkik sak ding ka ut phial ta hi. Aw... nupi te lah hopih zawh nawn loh, hopih ngam ding bang zong hi nawnlo....meivak teng zong sumit un ci nuam phial uh hita, kuamah maitang kitang et ngam nawnlo.... "Topa aw, hun tomno, tomno sung bekbek..." cih ka tun uh bang ciang.... nupite phalbi zingtho mahmah hong bang uh, a nap uh hong tolh pianpian ta ahih manin, 'a bul pan etkik ding tepawl hi e, hong cilphul sak lel veh' ciin kikhopna lam ka zuatsan hi.

A sawtlo in CD tampi hong tunga, kei zong Rs. 200 in khat ka leisak pah hi. University Hostel ah lawmte DVD player kawm in TV Hall ah ka en uh a, a en ut teng lakah vaite in zong muhnop sa uh hi. Ka siapa Computer, ka PhD thesis gelhna in ka zat pen ah zong ka khum a, ka thesis at kawmkawm in ka en kha zel hi.

Lasiam mah ahi Shillong Nu Ciinno te inn ah amau computer ah ka et tak uh ciangin maan akilakpih ut hong tam, Paboih in, "...kei bek om...tua zah mawle" cihna san kilak pih ut, Zuzun leh Khan Cing in numei cih mah a nungakte melhoih na san teng kilak pih nuam uh, tua bangin ka kilak ngeingai uh leh ka camera roll khat bang hong bei pah mawk, a thak lei kik......... Damdam in a la te zong lasak ukte makaihna tawh a teikhiat khit uh ciangin a video enkawm in ka sa ngeingai uh a, ken zongka sak theih ciangin ka guiter saina khutcin zong na vom mahmah ta hi; Nu Ciinno bel ana siamlua khin lam hi...

Shillong khuasung Zomi te omkhopna peuh ah holimna in kinei in, kam pau masa in kizangin, "Personal Pronoun" leh "Kei a na nuam khinkhian ding hi ing" cih te nungak tangval kihona, aki maingapte kinohna kammal khat hong suak hi. Shillong Zomite bek a kha tang ka kisak uh leh Lamka pan Newspaper khat ah ... 7vei ka enta a, ka khitui ka kideekzo nai tuankei... aci nupi te kamgen khawng hong tuang hi. Zomite omna a nawk khak na peuhmah hong tuamcip, hong zo cih ding hi.

Tua sungteng Pastor te, Pawlpi makaite, Numei makaite zong Ngaih Anglai Ah kha kitangciat hi cih ding hi. Tua sungah a kilawm mahmah pen zanni a B'day lawm Cingno kihel hi. Kei theihna ciangah sisan ensak a pai ding cianga atonpih a lawm... "Kei a sanggam hilo, a lawm hi ing" a ci pen Siamah Cingkok hi a, tu in PhD sim in Phillipines ah om hi. Zomi numei sungah a muanhuai mahmah khat hi.

B'day wish kawm a ka kiho laitak un Cingno in, "Nang kua na hiam, nong kigen thei diam?" hong cih ngaungau ciang, "Cingno aw, kei pen theih tak zong hi kei ing, hong thei nai kei mai in, na mang peuh sia kha inteh" ka cih buatbuat leh, "aw phamawh tuan sam kei mah e, hong dong teitei ngam tuan kei ing" hong ci a, tua leuleu ciangin va kigen kik ding lah hong nuam nawnlo hi; amah tawh kimaituah a kiho bang hi leng kipumvalh nuam phial ding hi ing. A tuunga kigen pah loh hong zum huai phial hi. Ahi zongin hong theisiam dingin lamen ing. A migitna khempeuh tawh hong maisak zong kisam mai ning, khial kisa phial ka hih manin. A taktak in aman kei sangin ka kigen pah nuamlohna a hang theisiam zaw pekpek ding, tua ahih manin ka lungnuam veve hi.

"Na b'day kik ciang bel a ni mah in kong hopih ngam ta ding hiam?" ci a sau dot deuh zong ka ut hangin (a bul pan khin, khawlkik) amah a nasepna pan a tung tuung hi a, gim ding, zan 11.30PM hita si, advantage la a kei lunglut leh theihnop bek kava dot thapai ding zong Laitui paudana "hon ci phei phei, hon ci pheiphei" a cih khak ding zong lah dah ka hih manin ka sau hopih ngam nawn kei hi.

"Cingno, lungdam peuhmah ing, nong hopih nuam a....";
"Kei nuam zaw ing.......";
"Mangsiatna in na nei ke'n la, mangpha hoihtak na manin aw, na ihmut nuam in aw....";
"Nuam peuhmah si'ng e, nang zong ihmut nuam in aw.....(ka min thei hi leh behlap nuam hi in thei ing... ka khial diam maw)"

Dama ka phone ka lak khiat leh aman kei khiat masak ding hong ngak hi cih ka thei a, it pipi in ka koihsuk diaidiai a, koihsuk leng a bei himai ding cih ka thei gige hi. Aman khia masa leh ka ut a, ahi zongin kei khiat hong ngak ahih manin hamsa sa pipi in ka khiatsuk luap leh a bei hitak pi a, ka manglam bang kasa phial hi. Ka phone ka len pheikik a, a hopih kik sawm ka hi kei a, ka khut letna a lumlai hiam cih a theinuam pak ka hizaw hi.

Tu'n, hih lai ka atat laitak in amah lah kei phawklo in ihmu hithiat ta dinga, a mang ah kua tawh tulsing liim khawng a bel tam maw cih khawng peuh ngaihsun kha ka hiam, sau gelh ding zong kei tawh zalmanga lengkhawm hi kei kha leng ciin ka hialbawl nop tha hong suak hi. Ahi zongin a thu tello pi a khatbek ngaihsutna tawh kalsuan pen thudik hilo zel cih zong ka phawk veve hi.

Guai, sun hi in, zan hi ta leh a lailung ah saampi bangin ka kual kei zong, a mitkha leh a lungsim neu khat zong tangkha lo maithei... phamawh kei, zong lamen ngam kei ing, amah Zomite limciing siam minthang penpen hi a, Zolia diktak, melhoih, migi hiven....

Amah nuam taka ihmu ta ding ahih manin phawng kha kei ni, nuamtak in ihmu sak ni, ihmut nuam hen.

Tua manin a aw ka zak bektakin a video a aw tawh kibang lian hi cih ka cian pah thute, ka kiho zawh tun nai 2 pha zo, ahi zongin ka phone a omna pan ka likkhiat zawh nailoh dan te, "Ngaih Anglai Mah" ah apa in sawt a khasiatsak luat mi khempeuh in a thuakpih dante, a nu a pute in a bawlsia lua hiam cih a va vehna munte, ...... aaaaaaa..... 'pa ka khutsungah nong sia mai diam' a cih ciang Zogam tangval kei ka hi akici ngamte natawm a lungsim uh tuisik a suah dante ka gen nawn kei ding hi. Hun hoih hun pha dang khat Topa in pha asak leh hong omlai samlo diam ka ci hi.

Zomi Christian te ading in:

Ngaih aw nang leh
To Zeisu ka nunna ah hong om ciang,
Sapna bangmah om nawn kei,
Ngaih aw nang, leh kei, leh Zeisu,
Maciang suan khawm peuh leng
Lungdeih teng li bang kicing ta.

hi takpi dingin ka um hi. Cliff Richard in zong 'The greatest Christian love song' a kici la hih bangin na sa hi.

You, me and Jesus,
Jesus, me and you,
On our own we'd break
With Him we'll make it through...

"Ngaih Anglai Ah" zong "Zeisu" a kihel ciang bekin kigualzo ding hi mawk hi.

Hau Za Cin
Phuitong Liim