Gibang khenna ding in kawlni hong suak ta:

Kilawp taka sak zuaizuai ding hilo hi. Kilawp huailo lua hi. Battery bei dekdek, peizo ciamciam lai, ging zo ciamciam lai cih banga i ngaih leh zong ngaihlua lai hi, hih la pen. Ngaih tawh kikhenna ding kawlni suak pen awtpih buabua, kikopih lala ding lawp huai hetlo hi. Ahi zongin kipelh thei lo hi. Phulsuak ngai a, phul thanop huailo hi. A innkong khak uh i kiuh masak ni sang nervous huaizaw a, zing nisuak kimudah nuam phial hi, ahi zongin kimudah zolo ding hi, amah a pai ngeingei in a pai ngai a, mihingte in tua kikhel theilo hi.

Aw! a lunglen huai ding dan. Leaving on a Jet plane cih mai sangin zong lungleng huai zaw. A kipatna zong gi bang khenna dingin kawlni hong suak a... hito ngeingai hi ven. Tua ni suak pen vanta bangin kimu nuamlo meek ding hi.

Ni hong suak dia, an kine dinga, kei ka khualzinna maban zom in ka pai kul dinga 'ngaihno' inn ah amah guak nusia ding ka hih cianga. Sun in a nasep ngei teng sem dinga, a thazat ngei zah mah zang dinga, ahi zongin nitak ciang ni dang sangin gimzaw ding hi.Bang hangin maw, sun thapai in a 'u' in zinsan ta hi cih ngaihsun dinga, nitak ciang a inkongbiang uh hong kiu nawnlo dinga, hong kiu a om leh zong 'lengdang, singdang' hi ding cih thei khin lua ahih manin a thaneem ngaungau hi. Hehpih huai lua hi.

A zin khiat dingin a kimuh ngam uh leh kimuh nuam mahmah na pi nuamlo dinga, kilet nuam mahmah napi kholo ding hi. Kikawi nuamsa mahmah napi uh kikawi sawt theilo ding hi. A nai uh second khat zong khawlsak theilo ahih ciangin. Lunggim taka sun thapai ma na bung dinga, a 'u' khuamual a pelh ding dan, khuaveng a tun ding dan, a omna lam a tun ding dan te ngaihsun daudau dinga, a hun hun, a ni a kha in a om dan ding a lungsima ah phawk in, a mitkha ah bawltawmtawm dinga, khuamual hong suah kik ding hun ngaklah in a ni a kha sim ding hi.

A laikhak hong tun masak in a lungzuan nem tuam dinga ahi zongin nemzolo ding hi. Lengla te lakah a nuih duatduat hangin alungsim kiu khatah a 'u' om den ding ahih ciangin a nuih ciangin zong a muk bek nui in a lungsim nuilo ding hi.

Tua zahta a la hoih leh lunglengsak bang la hi peuhmah hiam?

Gi bang khenna dingin kawlni hong suak a
Nun nopnate'n mual ah liam zel ding a
Laigil ah ka gelgel chiangin
Nung chiang hei ding gel maw'ng

Ngaihlung tuah aw, gi bangin kikhen mah zong le'ng
Nunnuam in dawn bang kituak khawm nawn ni
Ngabang lenna tang dang zong leh
Lunglai kingilh lou di aw ngaih....

Vangkhua lai a nga bang kong leen ni chiangin
Thangvan aksi zong a hong taang ding a
I nunluite hong lang dinga
Sanggah sinlai na e

Singdang munmuang nga bang hong leng mah zong leh
Tongdam naubang a na saang sih'n aw ngaih
Nung chiang sawlbang ka heita ding
Ngaih aw damni mangpha....


Ngaih aw lungdam tak in ki mu kik ding hi hang, nang zong na muan huai inla, kei zong ka mun ah muanhuai ding ka hi. I kimuh kik ciang nungciang hei nawnlo dingin mun khat ah i hei khop dan ding ngaihsun ding ka hi a ci nuam hi leh kilawm hi. Ka pai hunta a, dam ni, cidam in na om in, mangpha hoihtak man inla, ngaihmuang in om in a ci ahi hi. A 'u' vaikhakna kammal pen lungkim huai mahmah a, ahi zongin vangkhua khat a hei vang kingai lia leh tang in sun ni khat kimuh loh zong sawt a sak uh hi a, zan tampi sun tampi kimu lo a om ding uh a geel ciangin 'ngaihno' pen lungleng khol veve ding hi. A paikhia pen in zong 'nungkaih' vei veve mawk inteh. A hi zongin itna in a kimutheilo ah khaubang kizomsak veve dinga, ciampeel lo sawlbang a hei nak leh dawnbang tuah kik ciang nunnuam sawlbang heita ding hi.

Bang hanga vang kingai te kikhen zel a, aki ngailo te zong kikhen ngei khollo sese hiam? Mihing bawlpa bawl khialh lah hi sam lo dinga, mihing itna a kho semna ding, itna a kipsemna ding acih hi zaw kha ding hi.

Bangbang hi leh,

Thelnah laileng pan a
Tongdam sang ding kinem zing vang e ngaih,
Gun tuipi leh mual zatam halna pan
Lailung hing muang den sih aw U Mang!

cih lungsim pua kawma a 'u' khuamual tan a va khak khiat teitei bel ngai kha ding hi.

Hau Za Cin
Phuitong Liim