Leitung kilumlet leh Zomite:

Leitung pen a khangtoto hi a, Zomite zong a khangtoto hi. Khatvei vei i neihsa leh i pilna neihsa tawh leitung i minam mit in i et ciangin ei leh ei kihawmthawh theih dingin ka um hi. Leitung khantohna leh Zomi te khantohna teh ding hiin ka tuat kei a, leitung khantohna pan Zomite in bang teng hamphat pihding i hiam cih danin i et ding in ka tuat hi. Mimal nekzonna a nopzaw ding bek a ngaihsun pawl a om dinga, a tang a liing khempeuh a bawhsawm pawl zong i om ding hi. Mihing ngaihsutna tuam ciat nei a hong kibawl ahih manin et dan muh dan kibang kim theilo ding hi cih pen up huai hi.

Leitung laizang kiim a teng, Irag a gal kikapna i zakte, Africa gama Somalia leh muslim te kidona te i za a, kumpi leh kumpi beklo, minam khat leh kumpi kido cih pen mun khempeuh ah a om hi. Ei gam ah zong om a, mi gam ah zong hi. A omlohna a omlo ci leeng a kikhial kei ding hi. Tua manin Zomi te bek galnei i kisak leh mi zong gal nei vive hi a, a zo zaw cih a om ngeilo gal kido na leitung ahi hi.

I pu i pa khangsangin gal tamzaw i sa kha maithei a, ahih ding ka um kei hi. Amau hun lai in a thuzak theih na tantan vuah gal kido mah na za uh a, tu hun ciang leitung bup thu kiza thei ihih manin a piang khempeuh a za ihi zaw a, a pung a kiam hi tuanlo in ka um hi. Khat bei leh khat kipan a, khat lamlam ah mihing lungsim leh thatang kinawk in, vanzat tuamtuam tawh leitang, gamgi leh thu leh la na kituh uh hi. Tua manin ei zong i do teta ding hi a, i bahni in i langlamte in hong neh dinga, i hatni in i langlamte i hencip ding hi. Tuabanga kidelhna leitung ah kua minam mah na peng tuanlo uh hi. Peng uh hi leh galvan leh galkap kisam lo dinga, thauvui thautang kizatna omlo ding hi.

Tua banga kidona leh thu kituhna leitung, pengpelep banga tungnung kituhna leitungah a leitung bup huam in USA in khatna ngah a, amah pen leitung kumpi bangin a thu lianpen mawk hi. Tua pen tuzawh kum 50 sungin kikhek dinga kilam hi a, India leh China khat zawzaw in luahzo digin kingaihsun hi. Ngaihsutna bek a hih khak ding bel lauhuai veve hi.

Tua bang hi ta leh Zomi te in bang hamphatpih i sawm tam. I nekzonna i khangkhanzo diam? I tenna gam ah nekcingin lo leh huan nei in ankam, lothang i cing thei diam? Ahih kei leh i gam nusia in migamah sila suak in mi huan, mi lo ah na i sem zaw diam? Sila kizem, sila melhoih, sila pil hih i ut zaw diam? I laisimna leh vanneihte behlap in i gamsungah thupina i seng (harvest) zo diam? Khuai in pakzu tuamtuam a khon khop bangin Zogam ah leitung hoihna te i tungsak diam?

Japan moto hawl in, US dollars zangin, Chinese food ne in, British house sungah i teng dinga, leitungah a hoih a to, a nuam kici peuhmah Zogam ah ciahpih in 'Zua saulim ah' Zolia Zotaang tawh teng in Zongeina mah tawh inthak lut leh mopawi khawng bawl zaizai leng leitung kilumlet i hamphat pihna hilo ding hiam ci ing.

Mi gam mi lei ah lobuk bangin giahna ding inn khat leh nih i hanciam leh zong i lo i vai a bei ciang, buhmin, anlak khit ciang tua khamphengbuk te nusia in Zogam mahah i ciah kik ding hi ding a, i zinsung, i vakkhiat sung i gamtat i giak pakna bek hi ding hi. A kip taktak pen i mun i gam ah hi ding hi.

Tua ahih manin i tenna leitung kilumlet ah mi leh ei kiteh ding hi in ka tuat kei a, hih khantohna pan bangteng meetpih ding, bangteng ciahpih ding cih ding hizaw in ka tuat hi. Ei sang amau niamzaw cih kisam dingin ka tuat kei a, a hoih peuhmah sina, a sia peuhmah nolh a nisim nuntak nuamzaw dinga hanciam ding bek kisam in ka um hi. Midang tawh i kiteh den leh mi i neumuh kha dinga, a kiphasak Zomi te ihi kha ding hi. Mi zong hong khang hen, ei zong i mainawt zel ni.

Hau Za Cin
Phuitong Liim