Kisam i sa diam?:

Kisam i sa diam, thupi i sa diam thei kei ing. Ahi zongin ngaihsut ding leh zuih dingin hoih kasak khat hi.

Kumlui khakna hun ka zat laitak un makaipa in kumlui sungin na lungdamna te hangin Topa tungah lungdam ko in; kumlui na zatna sungah na hih khelh a omte hangin Topa mai ah maisakna ngen in ciin hong gen masa hi. Thungetna hun, lungdam kohna hun a kizat taktak ding ciangin, "na mawhna pulak sese kei in, na hih khelh te zong sut kikkik sese kei in, na hih khelh na theih a om leh zong kimangngilh bawl zaw inla, thathak la in, na khelhna na lim ngaihsut luat leh mawh kisakna, khial kisakna (guilty feeling) tawh na nungta ding hi...."


Hih lai ah ngaihsut dinga ka deih ahih leh 'na mawhna zong kikkik kei in' cih hi. I hih khelh, i mangngilhsa, i phawk nawnloh khat pen a phawk kik dinga kisawlsawl ding a kilawm hetlo hi takpi veh e ciin ka ngaihsun hi.

Innlam ah bel Pastor te sangin nupi honkhat bang kiva zaw thei in, thungen pawl bang zong hi thei mawkmawk (a diak in cialpi na khawng ah) 'na mawhna pulak pulak pulak lak lak .....' cih khawng peuh om zanzan thei hi. A tuapa a mawh ahih leh zong a pulak ding ei sawl teitei kisam lo a, khelhna gen dingin kisawl teitei loh ding pen zang thei leng picin huai, pilvai mahmah ka sa hi.

A lungdam huailo lam, a cidamlo lam, lungsim nuamlo sak lam khat peuh peuh pen ahih theih lai teng kiguan tawm kei thei leng ahoih tam ciin ngaihsutna thak ka nei hi. I kisawl loh, i kigen gen loh in zong ei leh ei khial kisakna leh mawh kisakna, Pasian hong piak sia leh pha theihna pan a om khin hi. Tua manin ki force kei ni. Lungsim damna pen pumpi cidamna dingin zong a hoih, mihing khan letna ding ah zong a thupi mahmah khat hi.

Kong gen mawk hangin kisam i sak lam a hi diam thei kei ing. Sia te, makaite, insunga vaihawm nu leh pa te, etc in i makaih mite kisuanglah taka om sak, maizum sak phial leh maingal theilo-a i omsak khak lohna ding kivenna leh kikepna dingin zong kisam i sak khak leh ka cihna hi-a, gen khialh a om leh hong maisak un.

Hau Za Cin
Phuitong Liim