Phuitong pakta, ngaihtawh lah khawllo:

Kumlui bei ding, ngaih tawh lah khawllo, Phuitong pakta, ngaih tawh lah a liim belin khawllo, Phuitong pak ka lawh hang hong saang ding omlo. Ka koihna thawlgong ah ahoihna pahtak lawhlo in a hul mai mai hi. A pakna Phuitong kung ah vahkhuai leh pengpelep namcin, tungleng vasa leh pakzu bawm ganhing namcin in bawh a, kuamah kinawngkaisak lo in amau neknopna san ciat ne in a pak hoihna a nopsakpih uh hi. Kei zong ka mit dim in en in, a leikaai niam hiangte siak in ka napnap hangin a gim namtui leh a hoihna te hong pahtak pih ding omlo a, ngaihsutna khempeuh zong huih mut bangin damdam in lengmang uh hi. La phuaksiam hi leng gual nih gual thum ciik takin kuisuk nuam ing.

Leitung pen eibek in a nop zawk huna om tei hangin eibeka muh dingin a pammaih om a, ei beka nek dingin a pammaih om a, ei bek a theihdingin a pammaih om hiin ka thei hi. Kuama hong nawngkaisak loh ding i ut hun tampi a om a, gamdai ah ei bek in i kibuk ut hun om hi. Ei bek a thunget nop hun om a, ei bek a laisim nop hun om hi.

Ahi zongin a hoih khat a kilawm khat i muh ciang ei bek muh ding in pammaih a, ei bek theih dingin pammaih hi. A lim kici te lim khin lo a, a hoih khempeuh ki pakta tuanlo hi. Mihon lak ah zong khattang kisak ngeungau theih a, lawm i ngaih hun om hi mawk hi. Hun nuam hong tungin, hun hoih hong tunga, leitung hoihna in hong tuam ciangin i mi isa, i it i ngaihte kiang mah kingai hi.

Na hun hoih ciil kei in, hun nuam na tuak laiin aam in, mai kum ah hih bang hun nuam na tuak kha khol kei maithei, hihsang nuamzaw zong na masuan maithei. Tu hun a nuam na sak leh nuamsa takin zang inla, haksa na sak leh thuak keikai in, zan zong nisuak mateng khuazing hi lel a, zing khuavak in hawlmangin, zing nisuak mu ngamlo hi.

Ngaihsun kik taktak lecin, hun haksa sang hun hoih na thuak tamzaw ding a, na kahna sang na nuihna tamzaw ding hi.

Nang bek a kap na hi kei a, nang bek a thuak na hi kei hi. Nang bek a lungdam thei na hi kei a, nang bek a hauthei na hi kei hi.

Hau Za Cin
Phuitong Liim