Na min lo kha zel ing:

Lasiam Lentong Pauno in lungleng takin,

Khua khal vak in ah
Lei Lengthe hong khuang
Zan khuasawt in bang sial ka diam aw
Khangthei lo leng zalna laikhun tungah
Na min thei bang lo kha zel ing

Albang dah in sawl bang hul veng ngaihno
Heh hong nem ding dang lah omlo a
Nang tawh tullo a gi bang i khen ding
Kei a'n nopna nitang omlo

na ci ngaungau hi. Ama cih bang a cihpih tampi om kha ding hi. Sihna khen lah hi samlo, na sam hi. Kei a'n nopna nitang omlo cih bek mah hi takpi!

1985 kum hi, April kha lo hal zawh mangtom saan laitak hi a, lengthe khuang ziah ziah in, lohal meikhu gim kinam ciikceek hi. Singno leh singbul meng masa dingte sel sipsep ta a, tua singmeng te ziik tungah thankik in a cil sia in a nusia hi. Tua singmeng dawng mitmet tungah lengthe a neu deuh, a lian deuh cih bangin tuangin khuang kelkel a, i bil-am sak zo liang hi. A khuang nailo the no te zong leisung pan hong paikhia in a thaumikmek a kang hit het, a dawng mitmet theno pen etlawm mahmah hi. Amah zong a lip kikheh kheh dinga thumvei thegul banga a kikhek/ a kilip zawh ciang picing suak dingin' a kha hamta dinga, lengthei in, khuang theita ding hi.

Tuaikiteh ziik ciin singmeng namkhat a thuk ciuciau lo lai ah a mengte kilo in sunsiah mehtui dingin kihuan a, (tuaidawng, aipak, etc te khawng a tamlai hi) nasep kigim in ankam zong lim a, nasep loh sung pen a nuam theithei in kigamlum ut hi. Zawlhel dingin ki naupang lua lai ahih manin kivakkhia ngam nailo a, 'datmei' hong kileisak nailo hi (tangval nungak hel theite ciang bek datmei, torch light kileisak hi, tua hunlai in). Sun annek hun, nitak ann nek hun, nitak an nek khit, lupma tan cih bang hun awng om sunsun ah hih theih pen kuamah nawngkai na a piangsak lo pen, za dinga i deih giugiau tein a zak tuaituai batloh hangin siam tawptawp, aw hut phialphial mah in la kisa buaibuai zel a, tua banga la ka sak uh ciang a kitam sak mahmah la pen 'Na min lo kha zel ing' cih la hi.

Tangval kithei nai kei ta se leh hih la in a gennop pen ki itna hi cih ki theita ahih manin Nipini zanga lo giakna pan Ninoni a ciah ciangin lampi ah kisa buaibuai in, Nipini lawmte tawh singtang guiter om sunsun kuah khia in Tualpi (football ground) ah nitumna lam hek, nitum en kawm in kisai gamgam sam hi. Nu leh pa leh mi muhna ah nunglam pan hong nuihsansan ding uh cih zong ki khhual sese lo a, a KHA kitang mawk hi.... Tawldam hun tomno neih sun lungsim a dim khempeuh suahkhiat hun hi ven kici mai zong hi kha ding hi. Kua poi kigenlo ahih manin a nuam veve khat hi.

Lo ah bel sun an nek ding buk lam zuana ka pai uh ciang ka U Nang Go Kap (New Lamka Nipipaakte in bel Bu Kap a cih uh) tawh, ka paneu tawh, ka pa tawh, hong seppih ka ute uh tawh awkim khawngin sa khawm liailiai in, nitak nitum zawh nasep khawl ding ciang zong tua bang mah....

Khatvei logal ah Ngal hon hong kipet in Cingngia hong kiko a, Cingngia note hong kiko keukeu uh ciang ka pa te in a va delh uh leh a kuan lam uh sang a ciah lam uh tuahpha zaw in amau kimu phial in a Ngalpi sa puak uh liah a, nitak nasep khol baih in, zan khataang ah meiphualpi sep in meipi tungah ngalsa ka hang uh a, duhduhna eu kawm, ne kawm zel cih tawh gilvah dong mah kinene thei mawk hi. Tua laitak in ka lovengte uh nungakte 2 leh a lengla tangval khempeuh hong tung phei zeizai in 'sa lu hong lawm' kawm uh a, tua tak ciang bel..... tua April khatang nuai ah, meiphualpi lum awikawm in zawlla kong zuut taktak uh bel......... nuamsam hi inteh, thupikei leh zong lungsim hong zo mawk hiin um ing, tuni dong ka mangngilh thei kei a, ka mitkha ah ka om liliai dan khawng uh mang theilo hi........Na min lo kha zel ing..... Zan khaliik zan pel ta a, a bei kuan ahih hangin kha tum tan mah kigual nuam a, tua kha tangah ka giakna logam uh, a kiim a paam a mual leh kuam khatang nuai ah sun mah banga kimu dimdemte, aksi tangsilsialte lah meivom liah om vet lo a tangsilsial etlawm...... . vantung ento leng khuasiang, aw.... leitung a hoih hun, akilawm hun pen om takpi mah hi...

Hun leh tuiluangin hong ngak lo in ko gualnop khuaphawk loh hong khuallo in ama pai in ana paipai a, tung solkhapi a tum nuam in khanglam ah hong sawi tut bibiai a, leilengthe khuangte hong kam in, huih vot sialsial (huihdam) hong nung a, khuavak ak masa khuan hong naita cih ciangin daitui hong nom pianta, tua tak ciang meipi zong hong tum kuan in, meipi tunga sa kihang te zong a tui luang khinin keu gawm phin phian a, Pata uikai leh siguk zong kilehbut ta ahih manin, zalna kikhatlo laikhun ciat zuan dingin ka kikhen bawl uh hi. Ka lupna tung ka zanpuan ka kikhuh hangin gallam zuan ciah nungakleh tangval te nuih ging kiza lai a, khuavak ma in a ihmu man tam maw ci a ka ngaihsutsut laitak in ka manglam bang phial in ka pa in hong phot ciangin ka khanglo kik a, zing nisuak kilawm tak hong suak ciciai tawh ka ki maitai uh hi.

Aw! tua zan buang pawh amah Sia TS Khai cih bangin, "La kik thei leng maw" ka cih hun tam hi.

Hau Za Cin
Phuitong Liim