Taiwan ziinliing:

Inkhat kicim a, telephone lines 2 kisia in gamdang hopihna kitat a, mi 2 si in, mi 100 val liam hi.

A si a liam te sangin a kigen thupi penpen ahih leh nu in a ta a itna hi. Hih nupi nu in a tapa adingin a hinna pia hi. Zinlingin a inn uh a nawktak ciangin cim a, khatvei thu in cim khin pah lo ahih manin a pasal tawh a tate nih leh a nuteek inka ah nawnkhia uh hi. Tua laitak in a inn hong cim khin ahih manin nu in a tano, kum 2 ding khat a awm ah pom in, leilak ah bawhcip a, a tungpan incim in anu delhlum in a tano liam lo in suakta hi.

'Tunnu in a ta mah lunggulh hi' ciin la phuakpa khatin na gen hi. A ta adingin a nuntakna pia ngam hi. A ta hinna dingin amah si hi. Zan kim zankhanga i zun i ek hong siaksak a, nuamtaka hong ihmu kik sak bek hilo in, a kisap leh zong ei nuntakna dingin ama nuntakna zong a kham ngam Nu, numei na hi mawk hi.

I nute pen a kamsiam loh hang, hong khut a khe a kilawm loh hang, a an huan limsa lo in i kizil hangin amah sang a hong itzaw ding na omlo hih tuak hi. A kizepna te mi'n hong nuihsan in, a kamgente mi'n hong zahpih ta leh ei adingin i nu, leitung khuavak i muhna dinga khasawm a gilsungah hong pai a, i dah i kah ding phallo a hong pattah leh a ma nuntakna natawm a it hetlo numei himawk ahih manin thupi hi.

Lengtong Pauno in, 'Leitheih zon theih hi lo' ciin khasiat huai tak in la tawh hong sa ngeungeu a, a ngaihsun theite adingin lunglen huai, khitui nul theih liang hi. I zon zon hang nu ding adang kimu lo a, leizo ta leng lei ding omlo a, sem zo ta leeng kithalawh theilo hi. A ang ah hong tawi in hong nam a, a nungah hong pua in hong keem hi.

Sau gen kisam ken teh,

Hau Za Cin
Phuitong Liim